मकवानपुर । एमाले मकवानपुरले उम्मेद्वारकाे सिफारिसकाे लागि मिति, मापदण्ड र प्रक्रिया तोकेको छ ।
नेकपा एमाले, मकवानपुर जिल्ला कमिटी सचिवालयकाे बैठकले आगामी मंसिर ४ गते हुने प्रतिनिधिसभा सदस्य तथा प्रदेशसभा सदस्य प्रत्यक्ष निर्वाचनकाे लागि भाद्र १८ गते र १७ गते सम्बन्धित कमिटीकाे बैठक बसी सिफारिस गर्ने निर्णय गरेकाे छ ।
जिल्ला अध्यक्ष एकालाल श्रेष्ठकाे अध्यक्षतामा र केन्द्रीय सदस्य तथा मकवानपुर ईन्चार्ज रामेश्वर रानाकाे प्रमुख आथित्यतामा बसेकाे बैठकले जिल्लाबाट प्रत्यक्ष र समानुपातिकतर्फकाे प्रतिनिधिसभा र प्रदेशसभा सदस्यकाे उम्मेद्वारकाे अन्तिम सिफारिसकाे लागि १९ गते जिल्ला सचिवालय बैठक र २० गते जिल्ला कमिटीकाे पूर्ण बैठक बस्ने भएकाे जिल्ला कमिटीका सचिव नवीन सिग्देलले बताउनु भयाे ।
प्रतिनिधिसभा तथा प्रदेशसभा समन्वय समितिमा सम्बन्धित क्षेत्रका जिल्ला सदस्य, पालिका कमिटीका पदाधिकारी, पार्टी वडा कमिटीका अध्यक्ष, आमन्त्रित सदस्य निर्वाचित पालिका कमिटीका अध्यक्ष, उपाध्यक्ष र वडा अध्यक्ष रहने विधानकाे व्यवस्था रहेकाे सचिव सिग्देलले बताउनु भयाे । उम्मेद्वार सिफारिस गर्दा पार्टीकाे नीति र कार्यक्रमप्रतिकाे प्रतिबद्वता, लाेकप्रियता र विजयकाे सुनिश्चिता, पार्टीप्रतिकाे निष्ठा र आन्दाेलनमा याेगदान, सन्तुलन र समावेशीता तथा निर्वाचन कानुन बमाेजिमकाे याेग्यतालाई ध्यान दिनुपर्ने केन्द्रीय निर्देशन अनुरूप सिफारिस गर्ने निर्णय गरेको पार्टी सचिब ननिन सिग्देलले बताए ।
उम्मेदवारको लागि १ महिलासहित ३ जनाकाे सिफारिस गर्नसक्ने प्रावधान रहेकाे बारे पार्टीले ध्यान दिने सचिव सिग्देलले बताए । बैठकले प्रतिनिधिसभा १ नं. मा अनन्त पाैडेल, प्रदेशसभा “क” मा रामचन्द्र राई, “ख”मा गाेपाल श्रेष्ठ, २ नं. डाेरमणि पाैडेल, प्रदेशसभा “क” मा नवराज तिमल्सिना, “ख”मा एकराज उप्रेतीलाई सहजकर्ता ताेकिएकाे जनाईएकाे छ ।
बैठकमा केन्द्रीय सदस्यहरू जुनेली श्रेष्ठ, भारती पाठक, राष्ट्रिय सभा सदस्य रामचन्द्र राई, प्रदेश कमिटीका उपसचिव महेश बर्ताैलालगायतका प्रदेश सदस्यहरूकाे उपस्थिति रहेकाे थियाे ।
मकवानपुर । उच्च शिक्षा हासिल गरेकाहरूलाई समेत स्थानीय स्तरको सामान्य जानकारी समेत हुन नसक्ने अवस्था बढिरहेको बेला मकवानपुर जिल्लाको थाहा नगरपालिकाले स्थानीय भुगोललगायत जातजाति, भाषाभाषि तथा संस्कृति बारे जानकारी हासिल गर्ने गरी स्थानीय पाठ्य सामग्री समाबेश गरिएको पाठ्यक्रम लागु गर्ने तत्परता देखाएको छ ।
हाल थाहा नगरपालिकाले चालु शैक्षिक सत्रबाट आफ्नो क्षेत्रको सबै सामुदायिक विद्यालयमा स्थानीयता झल्कने पाठ्यक्रम कार्यान्वयनमा ल्याएको हो । स्थानीय परिवेश, चालचलन, परम्परा, पर्यटकीय स्थल, स्वास्थ्य, स्थानीय खेलजस्ता मौलिक र संरक्षण गर्नुपर्ने विषयको महत्त्व बुझाउन ‘थाहा ज्ञानमाला’ पाठ्यसामग्री गत वैशाखदेखि पढाउन थालिएको नगर प्रमुख बिष्णु बिष्टले बताए ।
यसैबर्षबाट सुरू गरिएको पाठ्यसामग्री हाल कक्षा १ देखि ५ कक्षासम्म लागु गरिएको नगरपालिका प्रमुख बिष्टले बताए । आगामी अर्को शैक्षिकसत्रबाट ६ देखि ८ कक्षासम्म पढाइ हुने गरी पाठ्यपुस्तक बनाइने तयार समेत गरिएको विष्टले बताए ।
स्थानीय पाठ्यक्रम विकास तथा कार्यान्वयन मार्गदर्शन २०७६ ले कक्षा १ देखि ८ सम्म स्थानीय सरोकारवालाको संलग्नतामा स्थानीय तहलाई पाठ्यक्रम निर्माण गरी कार्यान्वयन गर्ने अधिकार प्रदान गरेको छ । नगरपालिकामा ५३ वटा सामुदायिक, ६ संस्थागत विद्यालय छन् । जसमा ९ हजार ७ सय ५२ जना विद्यार्थी छन् । कक्षा १ देखि ५ सम्मको पाठ्यपुस्तकमा रूपचन्द्र विष्ट र थाहा अभियानबारे सामान्य जानकारी मात्र समावेश गरिएको छ ।
ती कक्षाका बालबालिकाका लागि बुझ्न सक्ने प्रकृतिको पाठ्य सामग्री समावेश गरिएको शिक्षा शाखा प्रमुख शोभाकर रेग्मीले बताए । रूपचन्द्र विष्टको उपनाम र विशेषताका बारेमा मात्र साना कक्षाका बालबालिकालाई पढाउने योजनाअनुसार सामान्य जानकारी समावेश गरिएको रेग्मीले बताए ।
निश्चित तह पास गरेर गएका युवाहरूलाई आफ्नो स्थानीय स्तरको बारेमा स्पष्ट जानकारी होस् भनेर पनि स्थानीय पाठ्यसामग्री लागु गरिएको प्रमुख बिष्टले बताए ।
मकवानपुर । आसन्न निर्वाचन लक्ष्यित गरेर नेकपा एमाले बागमती प्रदेश कमिटीका पदाधिकारीहरुको बैठक बसेको छ । बैठकले चुनावी तयारीको लागि केहि निर्णय गरेको जनाएको छ ।
एमाले बागमती प्रदेश संगठन कमिटी पदाधिकारीको बैठकले गरेका एमालेको बिधानको धारा ५९ को अधीनमा रहि आगामी भदौ १५ गते भित्र बागमती प्रदेशका ३३ प्रतिनिधिसभा र ६६ प्रदेशसभा निर्वाचन क्षेत्र समन्वय कमिटी गठन गर्ने निर्णय गरेको छ ।
यस अनुसार गठन भएको प्रतिनिधिसभा र प्रदेशसभा निर्वाचन क्षेत्र समन्वय कमिटीले आफ्नो बैठक बसि पार्टी केन्द्रिय कमिटीले निर्धारण गरेको मापदण्ड र सिमा भित्र रहेर उम्मेद्बारको सिफारिस गर्नुपर्नेछ । यसै सिफारिसको लागी भएको बैठकको निर्णयको प्रतिलिपी र प्रस्तावित उम्मेद्बारका सम्बन्धमा सम्बन्धित जिल्ला कमिटीको आवश्यक राय सहित यही भदौ २० गते भित्र उमेदवारको सुची प्रदेश कार्यालयमा पेश गर्नुपर्ने निर्णय गरिएको एमाले बागमती प्रदेश कमिटीका उपसचिब तथा प्रचार बिभागका प्रमुख महेश कुमार बतौंलाले जानकारी दिए ।
“निर्वाचन तयारीको लागि आजको बैठक महत्त्वपूर्ण बन्नेछ” बर्तौलले भने । बैठकले समानुपातिक समाबेशिताको आधारमा भदौ २० गते भित्र प्रतिनिधिसभा र प्रदेश सभाको लागी समानुपातिक सुचीमा समाबेश गर्नुपर्ने उम्मेदवारको नामावली सम्बन्धित जिल्ला कमिटीहरुले प्रदेश पार्टी कार्यालयमा सिफारिस गर्नुपर्ने निर्णय भएको छ ।
आजैको बैठकले बागमती प्रदेश सल्लाहकार परिषदको गठन गरेको छ । बैठकले आगामी भदौ २१ गते प्रदेश संगठन कमिटीको पुर्ण बैठक, तुल्सिलाल स्मृति हल च्यासल ललितपुरमा बस्ने निर्णय गरिएको ।
मकवानपुर । सम्बन्धित मुद्दामा मानव अधिकार रक्षकहरुको एकमत नहुदा मुद्दामा सफलता पाउन समस्या हुने गरेको मानव अधिकार रक्षकहरुले स्वीकार गरेका छन् ।
मानव अधिकारको रक्षार्थ अघिबढ्दा कुनै समुदाय वा लिङ्गको प्रतिनिधित्व गर्ने गर्नाले मानव अधिकारको सवाल पछाडि परेको सरोकारवालाहरुले बताएका हुन् । “जे जस्ता चुनौति आइपरे पनि सबै रक्षकहरु एकै सवालमा उभिन सक्दा मुद्दालाई दरीलो बनाउन सकिन्छ, हामी नै बाँडिनु भनेको हाम्रै सवाल कमजोर हुने हो” मानव अधिकार रक्षक दिपेन्द्र पाठकले भने । “यहाँ त को मानव अधिकार रक्षक को के भन्नेसम्म थाहा पाउन समस्या छ ।”
अनौपचारिक क्षेत्र सेवा केन्द्र (इन्सेक) बागमती प्रदेश हेटौँडाले आयोजना गरेको नेपालमा मानव अधिकारको रक्षकको संरक्षण र सम्बर्धनको सरोकार विषयक अन्तरक्रिया कार्यक्रममा यस्तो बताइएको हो ।
एकै समयमा दुई बेग्ला बेग्लै भूमिका निर्वाह नगरी पीडितका न्यायका लागि पहल गर्ने व्यक्तिलाई मानव अधिकार रक्षककै रूपमा लिनु पर्ने मानव अधिकार संरक्षण तथा मानव बेच विखन विरुद्धको जिल्ला सञ्जाल अध्यक्ष आरती पाठकले बताइन् । आफ्नो व्यत्तिगत आवद्धता जहाँ भएपनि पिडीतले न्याय पाउने सवालमा एकै मत हुनुपर्ने गैसस बागमती प्रदेश अध्यक्ष समेत रहेकी पाठकले बताइन् ।
कार्यक्रममा गैसस महासङ्घका केन्द्रीय सचिव बुद्धशरण लामाले मानव अधिकार रक्षकको अधिकार संरक्षणका लागि उठाउँदै आएको आवाज कमजोर हुँदै गएको अवस्थामा आयोजना गरिएको यस कार्यक्रमले रक्षकको संरक्षण र सम्बर्धनमा टेवा पुग्ने बताए । राष्ट्रिय मानव अधिकार आयोग मानव अधिकार रक्षकको संरक्षण र सम्बद्धनका लागि मुख्य भूमिका निर्वाह गर्नु पर्ने सचिव लामाले बताए ।
कार्यक्रममा इन्सेक बागमती प्रदेशका कार्यक्रम संयोजक गणेश भण्डारीले मानव अधिकार रक्षकहरूको अधिकार संरक्षणका राष्ट्रिय मानव अधिकार आयोगले जारी गरेको मानव अधिकार निर्देशिका, नेपाल सरकारले २०७७ मा गृह मन्त्रालयमार्फत ल्याएको मानव अधिकार रक्षकहरू संरक्षणका लागि आदेश लगायतको कार्यान्वयनको अवस्था उल्लेख प्रस्तुती गरेको थिए ।
संयुक्त राष्ट्र सङ्घले १९९८ मा पारित गरेको मानव अधिकार रक्षकको घोषणा पत्र, राष्ट्रिय मानव अधिकार आयोगले २०६९ मा जारी गरेको मानव अधिकार रक्षकसम्बन्धी निर्देशिका र यसपछि नेपालमा मानव अधिकार रक्षकका लागि लागि निर्माण भएका व्यवस्था तथा प्रवधानहरूका बारे जानकारी प्रस्तुत गरेका थिए ।
यि प्रवाधानले केही हदसम्म भए पनि मानव अधिकार रक्षकलाई कसैबाट धाक, धम्की वा दुव्र्यवहार भएको अवस्थामा राष्ट्रिय मानव अधिकार आयोगमा उजुरी गर्न सक्ने अवस्थामा सहज भएको सहभागीहरुले बताए ।
मानव अधिकार रक्षकहरूको संरक्षणको मुख्य जिम्मेवारी राज्यको भएकोले राज्यका निकायहरुलाई थप जवाफदेही बनाउन आवश्यक रहेकोले यस्ता कार्यक्रमले त्यस प्रकृयालाई थप सहयोग पु¥याउन यस कार्यक्रमको आयोजना गरिएको भण्डारीले बताए ।
कार्यक्रममा गैसस महासंघ बागमती प्रदेशका उपाध्यक्ष कमलकुमार विश्वकर्माले मानव अधिकार रक्षकहरूको आवाज पनि पक्षधर रूपमा आउने हुँदा रक्षकहरूलाई थप जोखिम भएको बताए । उनले दलितको सवालमा दलित अधिकारकर्मीले मात्र आवाज उठाउँदा पीडितको न्यायमा पहुँच पुग्न नसकेको बताए ।
यसैगरी सिवीन मकवानपुरका प्रबन्धक तथा बाल कल्याण समिति बागमती प्रदेशका सदस्य झविन्द्र ज्ञवालीले मानव अधिकार रक्षक सम्बन्धी ज्ञान स्थानीय तहको पनि वडा स्तरमा आवश्यक रहेको बताए। पीडितको न्यायका लागि सबै भन्दा बढी वडास्तरमा काम गर्न आवश्यक रहेकोले मानव अधिकार रक्षकको आवश्यकता र बुझाई वडा वडामा आवश्यक रहेको उनले बताए ।
हिमराइट्स मकवानपुरकी कार्यक्रम संयोजक कुमारी वाइवाले मानव अधिकार रक्षकहरूलाई राज्यले सहयोग गर्ने प्रणाली नभएका कारण मानव अधिकार रक्षकलाई काम गर्न समस्या परेको बताइन्। यसैगरी माइती नेपालकी कार्यक्रम संयोजक माया लामाले मानव अधिकार रक्षकमाथि हुने सांघातिक हिंसाको बारेमा आवाज उठ्ने गरे पनि मानसिक हिंसाको सम्बोधन हुन नसकेको बताइन् । मानव अधिकार रक्षकमाथि हुने अप्रत्यक्ष हिंसाका घटना हुने गरेको उनले बताइन् । “राति राति फोन गरेर मैले जानेको छु के गर्ने भन्दै” धम्की आउने गरेको लामाले बताइन् ।
नेपाल मानव अधिकार सङ्गठनकी मकवानपुर जिल्लाकी पूर्व अध्यक्ष तथा अधिवक्ता अप्सरा बस्नेतले कार्यस्थलमै पनि पीडक पक्षबाट प्रत्यक्ष अप्रत्यक्ष धम्की आउने गरेको अनुभव सुनाइन् । पीडितको पक्षमा वकालत गर्दा धम्की आउने गरेकोले मानव अधिकार रक्षकलाई काम गर्न चुनौती रहेको भन्दै यसका लागि संयुक्त रूपमा आवाज उठाउँदा भने जोखिम कम हुने अपेक्षा उनले सुनाइन् । आम नागरिकहरूको आधारभूत आवश्यकताहरूलाई राज्यले प्राथमिकतामा नपार्दा नागरिकको मौलिक हकको अधिकार हनन् भइरहेको राष्ट्रिय अपाङ्ग महासंघकी जमुना तितुङले बताइन् ।
मकवानपुर । मकवानपुरे साहित्यकार बिर्खे अन्जानलाई यसवर्षको युवा मोति पुरस्कार प्रदान गरिएको छ । युवाकवि मोतीराम भट्टको १५७ औं जन्म जयन्तीको अवसरमा काठमाण्डौ लेखनाथ सदन स्रोहखुट्टेमा आयोजित कार्यक्रममा अञ्जानलाइ पुरस्कार प्रदान गरिएको हो ।
मोतीराम भट्टको सम्मानमा स्थापना गरिएको पुरस्कार पाउनु सौभाग्यको रुपमा लिएको अञ्जानले बताए । युवाबर्ष मोती पुरस्कार २०७९ मकवानपुरका कवि तथा समालोचक बिर्खे अञ्जानले प्राप्त गरेका हुन् । संस्थागत साहित्यको विकासका साथसाथै साहित्यिक खोज अनुसन्धानका क्षेत्रमा क्रियाशील अञ्जानका समालोचना, कविता, मुक्तक, गजल विधाका कृतिहरू प्रकाशित छन् ।
नेपाली शिक्षा परिषदको अध्यक्ष रमा शर्मा, पत्रकार तथा साहित्यकार भैरव रिसाललगायतले अञ्जानलाई सम्मान तथा पुरस्कार प्रदान गरेका थिए । कार्यक्रममा युवा सेवा कोषका अध्यक्ष प्रदीपमान वैद्य , डा विष्णु भण्डारी तथा स्रष्टा समिति छनोट निर्णायक समितिका संयोजक रमेश खकुरेलले साहित्यमा आइपरेको चुनौतीबारे चर्चा गरेका थिए ।
मोतिराम नेपाली साहित्यका प्रथम गजलकार, जीवनीकार , समालोचक तथा माध्यामिक कालका प्रवर्तक थिए । थोरै बाँचेर नेपाली साहित्यमा योगदान पु-याएका मोसतराम नेपाली साहित्यका प्रेरक व्यक्तित्व हुन् । मोतिराम १९४० देखि १९७६ सालसम्मको नेपाली साहित्यमा श्रृङ्गारिक धाराको सुरूवातकर्ता हुन् । राष्ट्रिय विभूति युवाकवि मोतीराम भट्टको स्मृतिमा वि स २०४० सालमा राष्ट्रिय युवा कोष स्थापनागरी प्रत्येक बर्ष नेपाली भाषा एवम् साहित्यको श्रृवृद्धिका लागि अतुलनीय योगदान पुर्याउने युवा स्रष्टालाई समर्पित गर्दै आएको छ ।