मकवानपुर । अविरल वर्षासँगै पहिरो खस्दा हेटौंडा–कुलेखानी–सिस्नेरी–दक्षिणकाली सडकखण्ड अवरुद्ध भएकाे छ । मकवानपुरको इन्द्रसरोवर गाउँपालिका वडा नं. ३ ज्यामिरेमा पहरो खस्दा उक्त सडकखण्ड अबरुद्ध भएकाे मकवानपुर प्रहरीले जनाएकाे छ ।
निरन्तर परिरहेको वर्षाका कारण शनिबार साँझ गएको पहिरोले सडक पूर्ण रूपमा बन्द भएको जिल्ला प्रहरी कार्यालय मकवानपुरले जनाएको छ । प्रहरीका अनुसार सडक डिभिजन कार्यालयकाे समन्वयमा पहिरो खसेको स्थानमा बाटो खुलाउने प्रयास भइरहेको छ । प्रहरीले यात्रुहरूलाई आवश्यक नपरी यो सडक प्रयोग नगर्न र वैकल्पिक मार्ग प्रयोग गर्न आग्रह समेत गरेको छ । प्रहरीका अनुसार हेटौंडा काठमाडो जाने अन्य सडक खण्डमा अवरोध रहेकाे छैन ।

