मकवानपुर । अन्तरिम मन्त्रिपरिषदमा नवनियुक्त तीन मन्त्रीले सोमबार पद तथा गोपनीयताको शपथ ग्रहण गरेका छन् ।
शीतल निवासमा आयोजित समारोहमा राष्ट्रपति रामचन्द्र पौडेलले नवनियुक्त अर्थमन्त्री रामेश्वर खनाल, ऊर्जा, जलस्रोत तथा सिँचाइमन्त्री कुलमान घिसिङ र गृहका साथै कानुन, न्याय तथा संसदीय मामिलामन्त्री ओम प्रकाश अर्याललाई शपथ गराएका हुन् ।
पूर्वसचिव समेत रहेका खनालले अर्थ मन्त्रालयको जिम्मेवारी सम्हालेका मौका पाएका हुन् । त्यस्तै, नेपाल विद्युत प्राधिकरणका पूर्वकार्यकारी निर्देशक घिसिङलाई भौतिक योजना तथा यातायात र सहरी विकास मन्त्रालयको पनि जिम्मेवारी दिइएको छ । अधिवक्ता र जेनजी आन्दोलनका सहजकर्ता भनिएका अर्यालले भने गृह र कानुन मन्त्रालय सम्हाल्ने मौका पाएका हुन् ।
जेनजी आन्दोलन पछिको बदलिँदो राजनीतिक परिवेशमा अन्तरिम सरकारकाे प्रधानमन्त्री नियुक्ति भएकी सुशीला कार्कीले सोमबार बेलुका खनाल, घिसिङ र अर्याललाई मन्त्री नियुक्ति गरेकी थिइन् ।

