मकवानपुर । मकवानपुरगढी गाउँपालिका स्थित कार्की खाेलाले बगाउँदा १ जना बेपत्ता भएका छन् । मकवानपुर प्रहरीका अनुसार मकवानपुरगढी –२ तल्लो छापस्थित उक्त खोलाले बगाउँदा १ जना बेपत्ता भएका हुन्।
इलाका प्रहरी कार्यालय मकवानपुरगढीका अनुसार तल्लो छाप बस्ने २५ वर्षीय विनोद बम्जन ७ नम्बरकाे सुकौरा तर्फबाट घर फर्कने क्रममा खोलाले बगाएको हो । ह्युमपाइप राखेर आवतजावत गर्ने गरिएको कार्की खोलामा शुक्रबार दिउँसो पानीको बहाव बढ्दा बम्जनलाई बगाएकाे बताइएकाे छ । प्रहरी निरीक्षक बिरेन्द्र रायमाझीसहितकाे प्रहरी टोली स्थानीयवासीसहित घटनास्थलमा खोजतलास कार्य सुरू गरिएको जिल्ला प्रहरी कार्यालय मकवानपुरले जनाएको छ।
घटनास्थल इलाका प्रहरी कार्यालय मकवानपुरगढीबाट करिब ७ किलोमिटर उत्तरतर्फ पर्छ। हालसम्म बम्जनको अवस्था थाहा हुन नसकेको र खोजतलास कार्य जारी रहेको प्रहरीले जनाएको छ।

