महोत्तरी । महोत्तरी जिल्लाको एकडारा गाउँपालिका -३ भटौलियामा सशस्त्र प्रहरीले प्रतिबन्धित लागू औषध गाँजा बरामद गरेको छ ।
८ असोज गते राति ११ बजेको समयमा सशस्त्र प्रहरी बल, नेपाल एकडारा चेकपोष्टबाट सइ राम गणेश महतोको कमाण्डमा खटिएको मोबाइल गस्तीले चार वटा पोकामा प्याक गरिएको ६०.८ किलोग्राम गाँजा बरामद गरेको हो ।
सशस्त्र प्रहरीको टोलीलाई देखी उक्त प्रतिबन्धित गाँजा भारततर्फ लैजाँदै गरेका ४ जना व्यक्तिहरू गाँजा छाडी भागेका छन् । फरार व्यक्तिहरूको खोजी भइरहेको जलसागर स्थित सशस्त्र प्रहरी बल,नेपाल नं ९ गण हेडक्वार्टर महोत्तरीको जनाएको छ ।
बरामद गरिएको गाँजा आवश्यक अनुसन्धानका लागि जिल्ला प्रहरी कार्यालय महोत्तरीमा बुझाइएको सशस्त्र प्रहरी नायव उपरीक्षक विकास अधिकारीले जानकारी दिएका छन् ।

