पार्बती भट्ट
१.
सुख पाहुना जस्तै, दु:ख मीत रहेछ
जिन्दगी , पात माथिको शीत रहेछ
फुल्नु, ओइलाउनु ,झर्नु अनि सकिनु
आखिर ! यही त दुनियाँकाे रीत रहेछ ।
२.
हारें भनेर जिन्दगीमा, रुनु बेकार हुने रहेछ
एउटाकाे जितमा पाे!अर्कोकाे हार हुने रहेछ
सत्य स्विकार्न नसकेर मात्रै हाे मन दुखिरहने
हुन त, यसरी नै चलिरहेकाे संसार हुने रहेछ ।
३.
निखारेर आफ्नै आँखा, पिउन पनि नपराेस्
नच्यातियाेस् खुशी सधैं, सिउन पनि नपराेस्
सम्हाल्दा सम्हाल्दै कति दुख्छस् ए ! जिन्दगी
यति धेरै तड्पितड्पी, बरु जिउन पनि नपराेस् ।
डडेल्धुरा हाल इमाडाेल, ललितपुर

