मकवानपुर । इन्डियन प्रिमियर लिग (आइपिएल) क्रिकेट २०२१ को बाँकी खेल युएईमा हुने भएङ्काे छ । कोरोना संक्रमणका कारण इन्डियन प्रिमियर लिग (आइपिएल) क्रिकेट २०२१ बीचैमा रद्द गरिएको थियाे । आईपीएल बीचमै रद्द गरिए पछी युएईमा हुने खेलतालिका सार्वजनिक भएको छ । भारतीय क्रिकेट कन्ट्रोल बोर्ड (बीसीसीआइ)ले आइतबार प्रतियोगिता पुनः सुरु हुने मिति सार्वजनिक गरेको हो ।
प्रतियोगिताका कुल ६० खेलमध्ये २९ खेल सम्पन्न भइसकेका छन् भने बाँकी ३१ खेलमध्ये १३ खेल दुबईमा हुँदा १० खेल शारजाह र ८ खेल अबुधाबीमा हुनेछन् । बाँकी रहेका खेलहरु सेप्टेम्बर १९ देखि युएईमा हुने भएका छन् । उक्त दिनमा दुई चिरपरिचित प्रतिद्वन्द्वी मुम्बई इन्डियन्स र चेन्नई सुपर किङ्सबीच प्रतिस्पर्धा हुनेछ । फाइनल खेल अक्टोबर १५ मा हुनेछ ।
आइपिएलको अंकतालिकामा हाल दिल्ली क्यापिटल्स १२ अंकसहित शीर्षस्थानमा रहेको छ भने चेन्नई सुपर किङ्स र रोयल च्यालेन्जर्स बैंगलोर समान १०-१० अंकसहित दोस्रो र तेस्रोमा छन् । मुम्बई इन्डियन्स ८ अंकसहित चौथोमा छ । राजस्थान रोयल्स र पञ्जाब किङ्स ६-६ अंकसहित पाँचौं र छैंटौंमा रहँदा कोलकाता ४ अंकसहित सातौं र हैदराबाद २ अंकसहित आठौंमा छ ।


