मकवानपुर । मकवानपुरमा कोरोना संक्रमितको संङ्ख्या बढ्न थालेपछि आजबाट निषेधाज्ञमा थप कडाइ गरिएको छ । संक्रमणको जोखिम उच्च बढेको भन्दै आजबाट थप भएको निषेधाज्ञामा जिल्ला भित्र चल्ने निजि तथा सार्वजनिक सवारीमा जोर बिजोर प्रणाली लागू भएको छ ।
हेटौंडा बजार क्षेत्रमा जोर बिजोर प्रणाली लागू गर्न प्रहरी चेकिङ टोलि खटाईएको छ । जिल्ला प्रहरी कार्यलय मकवानपुर अनुसार हेटौंडाको क्याम्पाडाँडा, संगमचोक, कान्तिराजपथ, सिमाचोक, चौकिटोल ओरालो, थानाभर्याङ, कर्रापुल क्षेत्रमा सवारी जाँच कडाइ गरिएको छ ।
जिल्लामा आजबाट थप गरिएको निषेधाज्ञा आउँदो साउन ३२ गतेसम्म रहेको छ । यसैगरी जिल्ला भित्र मास्क अभियान सुरु गरिएको छ । जिल्लामा सञ्चालित विभिन्न गैरसरकारी संस्थाहरुको संलग्नतामा मास्क अभियान सुरु गर्न थालेको हो । आजबाट लागु हुने यो अभियानबारे यहाँ हेर्नुहोस् ।
मकवानपुर । अन्तर्राष्ट्रिय युवा दिवस सप्ताहव्यापी कार्यक्रम गरी मनाइने भएकाे छ । अन्तर्राष्ट्रिय युवा दिवस २०२१ को अवसर बागमती प्रदेश अन्तर्गत प्रदेश युवा परिषद्ले अगष्ट १२ तारिख अर्थात साउन २८ गतेदेखि एक हप्ता सप्ताहव्यापी कार्यक्रमको आयोजना गरी युवा दिवस मनाउन लागेको हो ।
कार्यक्रम आयोजना गर्नका लागि प्रदेश युवा परिषद्ले कार्यकारी उपाध्यक्ष संयोजकत्वमा ५१ सदस्यीय मुल आयोजक समिति गठन गरिएको जनाइएको छ । प्रदेश युवा परिषद् गठन भएपछि पहिलो कार्यक्रमको रुपमा कार्यक्रम आयोजना हुन लागेको हाे । प्रदेश युवा परिषद्ले कार्यकारी उपाध्यक्ष सन्ताेष चौलागाईले कोरोना संक्रमणका कारण स्वास्थ्य मापदण्डका सबै नियमहरु पालना गरी कार्यक्रम हुने जानकारी दिए ।
आइतबार चौलागाईले कार्यक्रमका बारेमा जानकारी दिएका हुन् । ‘खाद्य प्रणालीमा रुपान्तरणः मानव र भुमण्डलिय स्वास्थ्यका लागि युवा नवप्रवर्तन’ भन्ने नाराका साथ सप्रताहाव्यापी कार्यक्रम आयोजना गरिने भएकाे हाे । चौलागाई साउन २८ गते बागमती प्रदेशका मुख्यमनत्री डोरमणी पौडेलको प्रमुख आतिथ्यतामा परिषद्को कार्यालयको उद्धाटन हुने बताए । २९ गते जिल्ला युवा समिति मकवानपुरसँगको समन्वयमा रक्तदान कार्यक्रम आयोजना गरिने तथा ३० गते मकवानपुर जिल्ला खेलकुद विकास समितिको समन्वयमा ५ किलोमिटर दौड प्रतियोगिता हुने उपाध्यक्ष चौलागाईले बताए ।
यस्तै सप्ताहव्यापी कार्यक्रम अन्तर्गत साउन ३१ गते बालकल्याण समाज मकवानपुरको समन्वयमा कोभिड–१९ संक्रमणको परिवेशमा बालबालिकालाई बालश्रमबाट जोगाउ विषयमा अन्तरक्रिया गरिने भएकाे छ । साउन ३२ गते शिक्षाको लागि राष्ट्रिय अभियानको समन्वयमा अन्तरक्रिया कार्यक्रम गरिने भएको छ । भदौ १ गते हेटौंडा लेडी जेसिजको समन्वयमा बक्तृत्वकला कार्यक्रमको आयोजना हुने र भदौ २ गते समापन कार्यक्रमको आयोजना गरिने पनि उनले जानकारी दिए ।
सन् २००० देखि विश्वका विभिन्न मुलुकमा युवा दिवस मनाउन थालिएको हाे भने नेपालमा सन् २००४ देखि याे दिवस मनाउन सुरु गरिएकाे हो ।
मकवानपुर । मकवानपुरमा ४० जना काेराेना संक्रमित थपिएका छन् । पछिल्लो २४ घण्टामा ४० जनामा कोरोना भाइरस संक्रमण पुष्टि भए सँगै उक्त संख्या थप भएकाे हाे ।
५२ जनाको पीसीआर र ६१ एन्टीजेन परीक्षणमा क्रमशः ३० जना र १० जना गरी ४० जनामा काेराेना पुष्टि भएकाे स्वास्थ्य कार्यालय मकवानपुरले जनाएको छ । यो संगै मकवानपुरमा हालसम्म १३ हजार ९ सय ३८ जनामा कोरोना पुष्टि भएको छ ।
यसै गरी साेही अवधीमा मकवानपुरमा १ जना काेराेना संक्रमणा पुष्टि भएकाकाे मृत्यु भएकाे छ । हेटौंडा १ का ५६ वर्षीय काेराेना संक्रमित पुरुषकाे आइतबार बिहान ९ बजे हेटौंडा अस्पतालमा उपचारको क्रममा मृत्यु भएको कार्यालय मकवानपुरले जनाएको छ । यो संगै मकवानपुरमा हालसम्म मृत्यु हुनेको संख्या १ सय ४८ पुगेको छ ।
यसैगरि जिल्लामा पछिल्लो २४ घण्टामा ६९ जना कोरोना संक्रमण निकाे भएका छन् । यो संगै मकवानपुरमा हालसम्म १२ हजार ६ सय ६७ जनाले कोरोना निकाे भएका छन् । जिल्लामा हाल १ हजार ७९ जना सक्रिय संक्रमित उपचाररत रहेका छन् । जसमा १ हजार ३१ जना आफ्नै घरमा र ४८ जना संस्थागत आइसोलेसनमा उपचाररत छन् ।
नेपालमा थपिए २ हजार ५ सय ४८ जना काेराेना संक्रमित
नेपालमा पछिल्लो २४ घण्टामा २ हजार ५ सय ४८ जनामा कोरोना संक्रमित थपिएका छन् । स्वास्थ्य मन्त्रालयले पछिल्लो २४ घण्टामा देशभर पीसीआरबाट २ हजार १ सय ३७ र एन्टीजेन परीक्षणबाट ४ सय ११ गरि थप २ हजार ५ सय ४८ जना संक्रमित थपिएको जनाएको छ ।
त्यस्तै पछिल्लो २४ घण्टामा २ हजार २९ जना संक्रमण मुक्त भएका छन् । नेपालमा कोरोना निको नेपालमा हाल सक्रिय कोरोना संक्रमितको संख्या ३५ हजार ४ सय ८५ जना रहेका छन् ।
यसैगरी पछिल्लो २४ घण्टामा नेपालमा थप ५५ जना संक्रमितको मृत्यु भएको स्वास्थ्य मन्त्रालयले जनाएको छ । यसअघि शनिबार नेपालमा १९ जना संक्रमितको मृत्यु भएको थियो । यो संगै नेपालमा हालसम्म कोरोनाको कारण मृत्यु हुनेको संख्या १० हजार ९३ पुगेको मन्त्रालयले जनाएको छ ।
मकवानपुर । राष्ट्रिय परीक्षा बोर्ड परीक्षा नियन्त्रण कार्यालय कक्षा १० ले २०७७ सालको माध्यमिक शिक्षा परीक्षा (एसईई)को नतिजा सार्वजनिक गरेकाे छ । विद्यालयले गरेको आन्तरिक मूल्यांकनलाई बोर्डले प्रमाणित गरेर नतिजा प्रकाशित गरेकाे हाे ।
माध्यमिक शिक्षा परीक्षा (एसईई) को लागि ५ लाख १७ हजार १ सय २२ जनाले परीक्षा फारम भरेकोमा ४ लाख ८४ हजार २ सय ७८ उत्तीर्ण भएको परीक्षा नियन्त्रक कार्यालयले जनाएकाे छ
परीक्षा नियन्त्रण कार्यालय कक्षा १० ले एसईई परीक्षा २०७७ को नतिजा बोर्डको वेबसाइट, एसएमएस र आईभीआर मार्फ प्राप्त गर्न सकिने बताएको छ । बोर्डले २०७७ सालको नियमित तथा ग्रेडवृद्धि परीक्षाको नतिजा इजी सर्भिस प्रालिबाट ३४९४९ आकाश टेक प्रालिबाट ३१००३ र जानकी टेक्नोलोजी प्रालि मार्फत् ३५००१ मा एसएमएस गरेर हेर्न सक्ने र नेपाल टेलिकममार्फत १६०० एनसेलबाट १६०० मा एसएमएस गरेर थाहा पाउन सक्ने जनाएकाे हाे
त्यसैगरी बोर्डले २०७७ को एसईईको नतिजा बोर्डको अफिसियल बेवसाइट, नेपाल टेलिकम, द कन्सेपट प्लस, एडुसञ्जाल, नेपाल टेलिकम, ईकान्तिपुर र एनसेलको वेबसाइटबाट सार्वजनिक गरेको छ ।
मकवानपुर । राष्ट्रिय परीक्षा बोर्डले कक्षा १२ को परीक्षा स्थगित गर्ने निर्णय गरेको छ । शनिबार बसेको बोर्डको बैठकले आगामी साउन ३१ गतेदेखि भदौ ९ गतेसम्म हुने तय भएकाे कक्षा १२ को परीक्षा स्थगित गरेको हाे ।
शुक्रबार स्वास्थ्य तथा जनसंख्या राज्यमन्त्री उमेश श्रेष्ठले परीक्षा स्थगनका लागि शिक्षा मन्त्रालय तथा कोभिड-१९ संकट व्यवस्थापन केन्द्रलाई सिफारिस गरेका थिए ।
कोरोना संक्रमितको संख्या बढ्दै गएका कारण परीक्षा सञ्चालन गर्न कठिनाइ उत्पन्न भएकोले स्थगित गरिएकाे बताइएकाे छ । यसअघि कोभिड-१९ संकट व्यवस्थापन केन्द्र (सीसीएमसी) ले कोरोना संक्रमण बढ्दै गएको कारण तत्काल परीक्षा गर्न नसक्ने भन्दै बोर्डलाई नयाँ मिति तय गर्न पत्राचार गरेको थियो ।
विद्यार्थी संगठन र अभिभावकहरुले सबै परीक्षार्थी र परीक्षामा संलग्न सबैलाई कोभिड विरुद्धको खोपको व्यवस्थापन गर्न, व्यवस्थापन गर्न नसक्ने भए स्थगित गर्न माग गर्दै आएका थिए ।
परीक्षा आउन एक हप्ता बाँकी हुँदा स्वास्थ्य मन्त्रालयको सिफारिसमा सीसीएमसीले परीक्षाको नयाँ मिति तय गर्न अनुरोध गरेपछि राष्ट्रिय परीक्षा बोर्डले परीक्षाको तयारी अन्तिम चरणमा पुगेको र परीक्षा हुने बताउँदै आएको बताए पनि शनिवार तत्काललाई स्थगित गरकाे हाे ।
बोर्डले गतवर्ष परीक्षा समय र अंक भार घटाएर परीक्षा लिएको थियो । बोर्डले ४० प्रतिशत मूल्यांकनका लागि मात्रै परीक्षा लिएको थियो । परीक्षा बोर्डले यो पटक १०० पूर्णांककै परीक्षा गराउने तयारी गरेको थियो ।
बोर्डले भौतिक दुरी कायम गरी एउटा कक्षामा २५ जना मात्रै विद्यार्थी राख्नेगरी तयारी थालेको थियो । साथै परीक्षा केन्द्रमा स्वाथ्य परीक्षण गर्ने, परीक्षा अगावै अनिवार्य रुपमा पीसीआर परीक्षण गर्ने, केन्द्रमा हेल्थडेक्स राख्ने लगायत तयारी गर्न सबै केन्द्रलाई निर्देशन दिएको थियो । कक्षा १२ का ३ लाख ७२ हजार ३ सय ४८ परीक्षार्थीका लागि बोर्डले ४ हजार ३ सय १० परीक्षा केन्द्र समेत तोकिसकेको थियो ।