मकवानपुर । हेटाैडाकाे कर्रा खाेलाले ट्रक सहित बगाएका २ मध्ये १ काे शव भेटियाे छ । हेटौंडा –१७ रामपुरडाँडास्थित कर्रा खोलाले शिवम सिमेन्ट उद्योगबाट चौघडातर्फ आउदै गरेको ना ४ ख १४४० नम्बरको ट्रकसहित २ जनालाई शुक्रबार बगाएको थियो ।
शुक्रबार र शनिबार प्रहरी, स्थानीय वासिन्दा र नेपाली सेना सहितको टोलीले खोजी गर्दा भदाै १९ गते गणेश थापा मगरको शव भेटिएको जिल्ला प्रहरी कार्यालय मकवानपुरले जनाएको छ । घटनास्थलबाट करिब २ सय मिटर तल खोलामा १ जनाको शव भेटिएको हाे । खाेलाले बगाएकाे मध्ये अर्का १ जनाको खोजी कार्य भइरहेको छ।
शनिबार कर्रा खाेलाले ट्रकका चालक ४० वर्षीय बद्री सार्की र उनका साथी ४० बर्षीय गणेश थापा मगरलाई बगाएको थियो । पानीको बहाव घटेसँगै ट्रक करिब १ सय मिटर पर फेला परेको थियो ।
मकवानपुर । हेटाैडामा काेराेना संक्रमित १ जनाकाे मृत्यु भएकाे छ । हेटौंडा उपमहानगरपालिका भित्र थप १ जना संक्रमितको मृत्यु भएको हाे । शनिबार बिहान हेटौंडा ११ की ४८ वर्षीया महिलाको उपचारको क्रममा मृत्यु भएको स्वास्थ्य कार्यलय मकवानपुरले जनाएको छ ।
मृतक महिलालाई भदौ १६ गते उपचारको लागि हेटौंडा अस्पताल भर्ना गरिएको थियो । उनमा भदौ १७ गते कोरोना पुष्टि भएको हेटाैडा अस्पतालले जनाएकाे छ । यो संगै हेटौंडा उपमहानगरपालिकामा कोरोना संक्रमणको कारण मृत्यु हुनेको संख्या १ सय १५ पुगेको छ । हालसम्म मकवानपुर जिल्लामा मृत्यु हुनेकाे संख्या १ सय ६२ पुगेको स्वास्थ्य कार्यलय मकवानपुरले जनाएको छ ।
शनिबार थप २३ जनामा कोरोना पुष्टि
मकवानपुर जिल्लामा पछिल्लो २४ घण्टामा थप २३ जनामा काेराेना संक्रमण पुष्टि भएकाे छ । ९८ जनाकाे पीसीआर र एन्टीजेन परीक्षण गर्दा २३ जनामा संक्रमण पुष्टि भएको हाे ।
यो संगै जिल्लामा सक्रिय संक्रमितको संख्या ३ सय ६ पुगेको छ । जिल्लामा पछिल्लो २४ घण्टामा २१ जना काेराेना सक्रमित काेराेना निकाे भएका छन् ।
मकवानपुर । नेपाल रेडक्रस सोसाइटी हेटौंडा उपशाखाले आफ्नो उपशाखा अन्तर्गत रहेका आजिवन सदस्यहरुलाई आवश्यक परेकाे बेला रगत उपलब्ध गराउने भएको छ ।
हेटौंडा उपशाखाको शनिबार बसेको बैठकले उपशाखाका आजिवन सदस्यहरूलाई रगतको आवश्यकता परेको बेलामा रक्तसञ्चार केन्द्र मार्फत निःशुल्क रगत उपलब्ध गराउने निर्णय गरेकाे हाे । रगतको आवश्यकता परेको बेला बिरामीलाई रगत उपलब्ध गराउने र बिरामीलाइ उपलब्ध गराएको रगतको मूल्य बराबरको रकम हेटौंडा उपशाखाले रक्तसञ्चार केन्द्रलाई उपलब्ध गराउने नेपाल रेडक्रस सोसाइटी हेटौंडा उपशाखाका सभापति शिवहरि दाहालले जानकारी दिए ।
सभापति दाहालका अनुसार नेपालमै पहिलो पल्ट नेपाल रेडक्रस सोसाइटी अन्तर्गतको उपशाखाले आफ्नो आजिवन सदस्यहरुलाई निशुल्क रगत उपलब्ध गराउन लागिएकाे हाे । यस कार्यक्रमले बिरामी भएको बेला आजिवन सदस्यहरुलाई सहयोग पुग्ने दाहालले बताए । अहिले रक्तसञ्चार केन्द्रले प्रती युनिट रगतको ८ सय ५० रुपैया लिदै आएको छ ।
मकवानपुर । नेपालमा मनसुनी वायुको प्रभावले रहेकाेले अझै केही दिन पानी पर्ने भएको छ। मौसम पूर्वानुमान महाशाखाका अनुसार अहिले मनसुनी न्यून चापीय रेखा नेपालको तराई भु–भागभन्दा केही तल रहेको छ। त्यसको प्रभाव देशैभरि परेको छ।
भदाै १९ गते शनिबार देशभर सामान्यदेखि पूर्ण बदली रही प्रदेश नम्बर १, गण्डकी ,कर्णाली र लुम्बिनी प्रदेशका केही स्थानमा मेघ गर्जन–चट्याङ्ग सहित भारी वर्षाको सम्भावना रहेको महाशाखाले जनाएकाे छ।
यस्तै शनिबार राति पनि देशभर सामान्यदेखि पूर्ण बदली रही केही स्थानहरूमा हल्कादेखि मध्यम वर्षाको सम्भावना रहेको छ। प्रदेश २ र गण्डकी प्रदेशका एक वा दुई स्थानमा मेघ गर्जन–चट्याङ्ग सहित भारी वर्षाको सम्भावना रहेको महाशाखाले जनाएको छ।
भदाै २० गते आइतबार देशभर सामान्य बदली रही धेरै स्थानहरूमा हल्कादेखि मध्यम वर्षाको सम्भावना रहेको छ। प्रदेश १ का एक वा दुई स्थानमा मेघ गर्जन–चट्याङ्गसहित भारी वर्षाको सम्भावना रहेको छ।
आइतबार राति पनि देशभर सामान्यदेखि पूर्ण बदली रही धेरै स्थानहरूमा हल्कादेखि मध्यम वर्षाको सम्भावना रहेको छ। प्रदेश १, बागमती, गण्डकी र सुदूरपश्चिम प्रदेशका एक वा दुई स्थानमा मेघगर्जनरचट्याङ्गसहित भारी वर्षाको सम्भावना रहेको छ।
भादाै २१ गते सोमबार देशभर सामान्य बदली रही धेरै स्थानहरुमा हल्का देखि मध्यम वर्षाको सम्भावना रहेको छ । बागमती, गण्डकी र लुम्बिनी प्रदेशका एक वा दुई स्थानमा मेघ गर्जन/चट्याङ्ग सहित भारी वर्षाको सम्भावना रहेको छ।
साेमबार राति देशभर सामान्य देखि पूर्ण बदली रही केही स्थानहरुमा हल्का देखि मध्यम वर्षाको सम्भावना रहेको छ। गण्डकी, सुदूरपश्चिम र कर्णाली प्रदेशका एक वा दुई स्थानमा मेघगर्जन/चट्याङ्ग सहित भारी वर्षाको सम्भावना रहेको छ ।
महाशखाका अनुसार देशको केही स्थानहरुमा हल्का देखि मध्यम वर्षाको सम्भावना रहेकाे छ ।प्रदेश १ र गण्डकी प्रदेशका एक वा दुई स्थानमा मेघ गर्जन/चट्याङ्ग सहित भारी वर्षाको सम्भावना रहेको छ । पहाडी भू-भागमा भू-क्षय, पहिरो तथा गेग्रान बहाव (debris flow) को जोखिम रहेको हुनाले नदीनाला र खहरे खोलामा पानीको सतह बढ्न सक्ने भएकोले सामान्य सतर्कता समेत महाशाखाले अनुरोध गरेकाे छ।
वर्षाका कारण ठाउँ ठाउँमा पहिरो खसेर सडक अवरूद्ध भइरहेको छ। महाशाखाका अनुसार पानी पर्ने क्रम केही दिन जारी रहनेछ।
मकवानपुर । राष्ट्रिय प्रजातन्त्र पार्टीका अध्यक्ष कमल थापाले राजनिती समाजसेवा भन्दा पनि ब्यापार भएकोमा चिन्ता प्रकट गरेका छन् । शुक्रबार मकवानपुरको हेटौंडामा पार्टी सम्बद्ध युबा संगठनद्वारा आयोजित अगुवा युबा भेलालाई सम्बोधन गर्दै थापाले भने ‘स्वार्थी एवं भ्रष्ट व्यापारी,ठेकेदार र नेताहरुको माफिया गठबन्धनले नेपालमा प्रजातन्त्रलाई वन्धक बनाएको छ’
थापाले गाउँदेखि केन्द्रसम्मको राजनीति यही माफियाले प्रदुषित गरेको छ। संबैधानिक अङ्ग कब्जाको नितिले प्रजातन्त्र कमजोर भएको बताएका छन् । नियन्त्रण र खबरदारी गर्नुपर्ने निकायहरूमा कार्यकर्ता भर्ती गर्दा कानुनी राज्यको उपहास र दुरुपयोग भएको थापाको दाबी थियो ।इमानदार र बिकासप्रेमी भन्दा माफिया, व्यापारी, बिचौलिया राजनितिमा हाबी भएको भन्दै थापाले राजनीति भ्रष्टिकरण तर्फ गैरहेकोमा युबा पुस्ताको हस्तक्षेपकारी भुमिका जरुरी भएको बताए ।
भएका उद्योग धन्दा कौडिको मुल्यमा बेच्ने, युबालाई रगत पसिना बगाउन मरुभुमिमा जान बाध्य बनाउने सत्तारुढ दलहरुले युबालाई निराश बनाएको आरोप थापाले लगाए। कार्यक्रममा बोल्दै राप्रपा नेता मधु अधिकारिले राप्रपामा अहिले कमल थापाको बिकल्प नभएको भन्दै महाधिवेशन ,संगठन र निर्बाचन केन्द्रित हुनुपर्ने आबश्यकता औल्याए ।
कार्यक्रममा नेताहरु राजाराम बर्तौला, गुरु सापकोटा , दामोदर वाग्ले, शुक्र प्रजा, अर्जुन ढुङ्गाना, भृगु कार्की, कोइशोर मैनाली , अमृत पाठक, समेन्द्र लामा, लक्ष्मण सापकोटा लगायतले बोलेका थिए । सो अबसरमा विभिन्न पार्टी परित्याग गरि राप्रपा प्रबेश गर्नेलाई थापाले स्वागत गरेका थिए।