मकवानपुर । नेपालमा पछिल्लो २४ घण्टामा थप ६ हजार ८ सय २७ जनामा कोरोना भाइरस (कोभिड-१९) को संक्रमण पुष्टि भएको छ ।
मन्त्रालयका अनुसार १३ हजार ७ सय ९१ जनाको पीसीआर परीक्षण गर्दा ४ हजार ८ सय ७ जना र ६ हजार ७८ जनाको एन्टीजेन परीक्षण गर्दा २ हजार २० जना उक्त संख्यामा कोरोना भाइरस संक्रमण पुष्टि भएको हो । शुक्रबार थपिएसँगै नेपालमा कोरोना संक्रमितको कूल संख्या १० लाख ६८ हजार ९ सय ३२ पुगेको छ मन्त्रालयले जनाएकाे छ ।
साेही अवधीमा काेराेना संक्रमित १० जनाको मृत्यु समेत भएकाे स्वास्थ्य तथा जनसंख्या मन्त्रालयले जनाएकाे छ । यस्तै नेपाल मृत्यु हुनेको संख्या ११ हजार ६ सय ९७ पुगेको छ । यसैगरी विगत २४ घण्टाकाे अवधीमा ५ हजार ४ सय ३५ जना कोरोना संक्रमण मुक्त भएका छन् । याे सँगै हालसम्म ८ लाख ४२ हजार ४ सय ३६ जना संक्रमणमुक्त भएका छन् ।
मन्त्रालयका अनुसार हाल देशभरमा ८९ हजार ९ सय ४१ सक्रिय संक्रमित छन् । जसमध्ये ८८ हजार ८४ जना होम आइसोलेसनमा रहेका छन् भने १ हजार ८ सय ५७ जना संस्थागत आइसोलेसनमा रहेका छन् । कोरोनाका बिरामीमध्ये २ सय ५६ जना आईसीयू र ४५ जना भेन्टिलेटरमा उपचाररत् छन् ।
यस्तै १० वर्ष मुनिका ९३ बालबालिकामा कोरोना संक्रमण पुष्टि भएको छ भने ११ देखि २० वर्ष उमेर समूहका २ सय ३९ जना कोरोना संक्रमित थपिएका छन् ।
मकवानपुरमा थप ७२ जनामा कोरोना संक्रमण
मकवानपुरमा पछिल्लाे २४ घण्टामा थप ७२ जनामा कोरोना भाइरस संक्रमण पुष्टि भएको छ । १ सय १ जनामा पीसीआर र १ सय ६ जनामा एन्टीजेन परीक्षण गर्दा क्रमशः ४१ जना र ४० जना गरि थप ८१ जनामा कोरोना देखिएको स्वास्थ्य कार्यलय मकवानपुरले जनाएको छ ।
काेराेना पुष्टि भएकाहरुमा ५९ जना हेटौंडा उपमहानगरपालिका भित्रका रहेका छन् । यसैगरि,९ जना थाहा नगरपालिका भित्रका,१० जना मनहरी गाउँपालिका भित्रका र २ जना भीमफेदी गाउँपालिका भित्रका रहेका छन् भने १ जना राक्सिराङ्ग गाउँपालिकाको रहेका छन् ।
यसैगरि,जिल्लामा आज थप २ सय ४६ जना संक्रमितले कोरोना जितेका छन् । हाल जिल्लामा १ हजार १७ जना सक्रिय संक्रमित उपचाररत रहेका छन्।
मकवानपुर । अहिले देशको पहाडी भू-भागमा आंशिक बदली रही तराइका केही भू-भागमा हुस्सु कुहिरो लागेको जल तथा मौसम विज्ञान विभागकाे मौसम पूर्वानुमान महाशाखा जनाएकाे छ ।
हाल देशमा पश्चिमी न्यून चापिय प्रणालीको आंशिक प्रभाव रहेको महाशाखाले जनाएको छ । आज दिउँसो प्रदेश एक, वाग्मती र गण्डकी प्रदेशका पहाडी क्षेत्रमा मौसम आंशिकदेखि सामान्य बद्ली रहने अनुमान छ ।
ती क्षेत्रका १/२ ठाउँमा हल्का वर्षा तथा उच्च पहाडी र हिमाली थोरै ठाउँमा हल्का हिमपातको सम्भावना छ । केही दिनदेखि प्रभावित रहेको मौसम बिस्तारै सुधार हुँदै जानेक्रममा रहेको मौसमविद्ले जानकारी दिए । तराईको हुस्सु र कुहिरो हट्न भने केही दिन लाग्नेछ । चिसो कायमै रहेकाले जोगिन पनि महाशाखाले अनुरोध छ ।
प्रदेश १ तथा बाग्मती प्रदेशको पहाडी भू-भागका एक-दुई स्थानहरुमा हल्का वर्षाको संभावना रहनुका साथै सो प्रदेशको उच्च पहाडी तथा हिमाली भू-भागका थोरै स्थानमा हल्का हिमपातको संभावना रहेकाले चिसोबाट बच्न र त्यसको प्रभावबाट जोगिन आवश्यक सुरक्षा तथा सतर्कता अपनाउनु समेत महाशाखाले अनुरोध गरेकाे छ।
आगामी तीन दिनको मौसम पूर्वानुमान
माघ १४गते शुक्रबार
प्रदेश १, बाग्मती तथा गण्डकी प्रदेशको पहाडी भू-भागमा आंशिक देखि सामान्यतया बदली रही देशका बाँकी भू-भागमा आंशिक बदली देखि मौसम सामान्यतया सफा रहने छ। प्रदेश नं १ तथा बाग्मती प्रदेशको पहाडी भू-भागका एक-दुई स्थानमा हल्का वर्षाको र सोही क्षेत्रको उच्च पहाडी तथा हिमाली भू-भागका थोरै स्थानहरुमा हल्का हिमपातको संभावना छ।
माघ १५गते शनिबार
प्रदेश नं १, बागमती प्रदेश र गण्डकी प्रदेशको पहाडी भू-भागमा आंशिक बदली रही बाँकी भू-भागहरुको मौसम सामान्यतया सफा रहनेछ ।
माघ १६गतेआइतबार
प्रदेश नं १, बागमती प्रदेश, गण्डकी तथा लुम्बिनी प्रदेशका पहाडी भू-भागमा आंशिक देखि सामान्य बदली रही बाँकी भू-भागहरुमा आंशिक बदली रहनेछ ।
मकवानपुर । स्वास्थ्य तथा जनसंख्या मन्त्रालयले हेटौंडा अस्पताललाई स्वास्थ्य सामग्री सहयाेग गरेकाे छ । मन्त्रालयले मदन भण्डारी स्वास्थ्य विज्ञान प्रतिष्ठानद्वारा संचालित अस्पताल ५१ लाख बरारबको स्वास्थ्य सामाग्रीय सहयोग गरेकाे हाे ।
विहीबार हेटाैडा अस्पतलालाई मन्त्रालयले २ वटा भेन्टिलेटर, १० वटा वेड साइड लकर र दुईवटा मनिटर गरी ५१ लख रुपैयाँ बराबरको स्वास्थ्य सामाग्री सहयाेग गरेकाे हाे । विहीबार बागमती प्रदेशका स्वास्थ्य मन्त्री निमा लामाले मेडिकल सुपरिटेन्डेण्ट डा. रामचन्द्र सापकोटालाई उक्त स्वास्थ्य सामाग्री हस्तान्तरण गरेका हुन् ।
स्वास्थ्य साम्रगी हस्तातरण गर्दै मन्त्री लामाले हेटौंडा अस्पतालाई जिल्लाको अस्पताल मात्र नभएर प्रदेशकै सुविधा सम्पन्न अस्पतालको रुपमा विकास गर्न आफू तत्पर रहेको बताए । यस्तै, बागमती प्रदेशसभा सदस्य मुनु सिग्देलले हेटौंडा अस्पतालमा स्वास्थ्य सेवा लिन आउने सेवाग्राहीलाई स्वास्थ्य सेवाको अभावले गर्दा बाहिरी जिल्ला जानुपर्ने बाध्यता हटाउन आफूले पहल गरिरहेको बताइन् ।
यसैगरी, अस्पतालको मेडिकल सुपरिटेन्डेण्ट सापकोटाले हाल अस्पतालमा संघीय सरकारको सहयोगसंगै भेन्टिलेटरको संख्या १२ वटा पुगेको जानकारी दिए ।
मकवानपुर । सोनाम ल्होछारमा बागमती प्रदेशमा ३ दिन सार्वजनिक बिदा दिन माग गरिएकाे छ । नेपाल तामाङ घेदुङ संघीय कार्य समितिले बागमती प्रदेशमा सोनाम ल्होछारका अवसरमा ३ दिन सार्वजनिक विदा दिन माग गरेको हाे ।
बुधबार बागमती प्रदेशका मुख्यमन्त्री राजेन्द्र प्रसाद पाण्डेलाई ज्ञापन पत्र बुझाउँदै उक्त बिदाको माग गरिएको हो । प्रदेशमा सोनाम ल्होछारलाई मुख्य पर्वको रुपमा मनाउने तामाङ समुदायको अत्याधिक बाहुल्यता रहेको र यस समुदायले ५ दिनसम्म यो पर्व मनाइने परम्परा रहेकाेले कम्तीमा ३ दिन सार्वजनिक बिदाको माग गरिएको ज्ञापन पत्रमा उल्लेख छ ।
ज्ञापन पत्र बुझ्दै मुख्यमन्त्री पाण्डेले मन्त्रिपरिषदमा बिदाकाे विषयमा छलफल गरि निर्णय गरिने प्रतिकृया दिए । ज्ञापन पत्र बुझाउन नेपाल तामाङ घेदुङका केन्द्रीय उपाध्यक्ष कुमार घिसिङ, महासचिव बाबु घिसिङ अन्तर्राष्ट्रिय तामाङ परिषदका वरिष्ठ उपाध्यक्ष टासी लामा, संघीय कमिटि सदस्य सुनिल मोक्तान, बागमती प्रदेश कमिटिका अध्यक्ष लिलाकुमार घलान, निवर्तमान अध्यक्ष सोमबले तामाङ लगायतको उपस्थिति थियो ।

मकवानपुर । राष्ट्रियसभा सदस्यको निर्वाचन अन्तर्गत बागमती प्रदेशमा सत्तारुढ गठबन्धनका उम्मेदवार सहजै विजयी भएका छन् । फागुन २० गते रिक्त हुने १९ पद अन्तर्गत बागमती प्रदेशबाट प्रतिनिधित्व गर्ने २ पद रिक्त हुनेमा बुधबार भएको मतदानमा सत्ता गठबन्धनबाट संयुक्त उम्मेदवार महिलामा गोमादेवी तिमल्सिना र अन्यमा कृष्णप्रसाद पौडेल विजयी भएका हुन् ।
तिमल्सिना नेकपा एकीकृत समाजवादीबाट र पौडेल नेपाली कांग्रेसबाट विजयी भएका हुन् । महिला सदस्यमा तिमल्सिनाले ४ हजार ८ सय २४ मतभार प्राप्त गरेकी छिन् भने उनका निकटम प्रतिस्पर्धी नेकपा एमालेकी उम्मेदवार निरुकुमारी कुँवरले ४ हजार ३ सय ६२ मतभार र नेमकिपाको महिला उम्मेदवार गिता काफ्लले १ सय ३२ मतभार प्राप्त गरेको मुख्य निर्वाचन प्रमुख निर्वाचन अधिकृत डिल्लीरत्न श्रेष्ठले बताए छ ।
यसैगरी, सदस्य पदमा गठबन्धनको तर्फबाट उम्मेदवार बनेका कृष्णप्रसाद पौडेलले ४ हजार ७ सय ९४ मतभार प्राप्त गर्दा उनका निकटतम एमालेका उमेदवार गोपाल शाक्यले ४ हजार ३ सय ४४ मतभार प्राप्त गरेका छन् । त्यस्तै नेमकिपाका उम्मेदवार कृष्णबहादुर तामाङले १ सय ३२ मतभार प्राप्त गरेका छन् । तिमल्सिना र पौडेलले क्रमश ४ सय ६३ र ४ सय ५० मतभारले विजयी भएका हुन् ।
हेटौंडा–८ स्थित औद्योगिक क्षेत्र व्यवस्थापन लिमिटेडको कार्यालयमा १ महिला र १ अन्य पदमा राष्ट्रियसभा सदस्यका लागि हुने निर्वाचनको लागि २ मतदान स्थल तयार गरिएको थियो । प्रदेश सभाका सदस्य मतदाताहरुकाे लागि र स्थानीय तहका प्रमुख अध्यक्ष तथा उप प्रमुख उपाध्यक्ष मतदाताहरुकाे लागि छुट्टा छुट्टै मतदान स्थल बनाइएकाे हाे ।
यसअघि विवेकशील साझा पार्टी र राष्ट्रिय प्रजातन्त्र पार्टीले राष्ट्रियसभा निर्वाचनमा मतदान नगर्ने बताउँदै आएको थियाे । विवेकशील पार्टी संसदीय दलको मंगलबार काठमाडौंमा बसेको बैठकले मतदान प्रक्रियामा सहभागी नहुने निर्णय गरेको थियो । साेही अनुसार प्रदेश सभामा प्रतिनिधित्व गर्ने उसकाे ३ जना सांसदले मतदान प्रक्रियामा भाग लिएनन् ।
प्रदेश १ बाहेक अरू प्रदेशमा आफ्ना उम्मेदवार नभएकोले आफ्नो पार्टीले मतदान नगर्ने निर्णय गरेको राप्रपाले राष्ट्रियसभाको निर्वाचन अन्तर्गत बागमती प्रदेशमा मतदान गरेका छन। बागमती प्रदेशसभा सदस्यहरू रिना गुरुङ र रिता माझी मतदान गरेका हुन्।
यसैबिच बागमती प्रदेशमा भएको चुनावमा सांसद हिमाली लामाले आफैंले मतदान गरेको तस्बीर खिचेको र प्रमुख निर्वाचन अधिकृत न्यायधिश डिल्लीरत्न श्रेष्ठले मोबाइल खोसेको निहुँमा भएको विवादले केही बेर मतदान स्थल तनावग्रस्त बनेको थियो । माओवादीकै अर्का सांसद राजकाजि महर्जनले प्रमुख निर्वाचन अधिकृत श्रेष्ठ बीच भनाभन भए पछी स्थिती तनावग्रस्त बनेको थियो ।