मकवानपुर । बागमती प्रदेश राजधानी हेटौंडामा एउटै मञ्चमा ६ जना व्यक्ति सम्मानित भएका छन् । शनिबार भीम विराग संगीत, साहित्य, कला प्रतिष्ठान नेपालले ६ जना व्यक्तित्वलाई शनिबार एउटै मञ्चमा प्रादेशिक पुरस्कार समर्पण गर्दै सम्मान गरेको हो ।
प्रादेशिक पुरस्कार समर्पण समारोहमा प्रमुख अतिथि वरिष्ठ साहित्यकार तुल्सी थापा प्रतिष्ठान अध्यक्ष ह्याग्रीव आचार्य तथा समाजसेवी मुक्ति गाेविन्द वैद्य तथा पुरस्कार संस्थापककाे तर्फबाट पुरस्कार प्राप्त गर्ने व्यक्तित्वलाई सम्मानित गरेका थिए ।
प्रतिष्ठानले यस वर्षको चिनुकुमारी लामा स्मृति साहित्य पुरस्कारबाट साहित्यकार बासुदेव गुरागाईँलाई सम्मानित भएका छन । साहित्यमा पिडालु पण्डितको उपनामले चिनिने गुरागाईँलाई १५ हजार रुपैयाँ राशीसहित पुरस्कृत गरिएको हो । गुरागाईं नुवाकाेटमा जन्मिएर हेटौंडा १८ हर्नामाडीका स्थायी बासिन्दा रहि नेपाल सरकारको सह सचिबबाट सेवा निवृत कर्मचारी हुन । हाल काठमाडौ गोंगबु निवासी गुरागाईका लघुकथा, कविता, हास्यब्यङ्यलगायतका सहित्य सग्रह प्रकशित छन्।
प्रतिष्ठानकाे यस वर्षको तुलसीमाया शिवकुमारी सिर्जनशील नारी पुरस्कारबाट मकवानपुरे साहित्यकार भावना सापकोटा सम्मानित भएकी छिन । सापकोटालाई १० हजार रुपैयाँ राशिसहित पुरस्कृत गरिएको हो । सरकारी शिक्षक पेशामा आवद्ध रही साहित्य सिर्जनामा क्रियाशील सापकोटा आँचल साहित्य कला पुञ्ज मकवानपुरकी अध्यक्ष समेत हुन् ।
यस्तै भीम–मथुरा बाल प्रतिभा पुरस्कार २०७९ बाट हेटौंडा–२ स्थित बालजागृति इंग्लिस सेकेण्डरी स्कूलकी छात्रा सुविज्ञा सुवेदी पुरस्कृत भएकी छिन । बालसाहित्यमा सक्रिय सुवेदीलाई प्रदान गरिएको पुरस्कारको राशी ७ हजार ५ सय रुपैयाँ रहेको छ । पुरस्कार समर्पण कार्यक्रममा सुविज्ञा अनुपस्थित रहे पछी उनका बुबा विनाेद सुवेदीले पुरस्कार ग्रहण गरेका थिए ।
यसैगरी विजय बानियाँ स्मृति लोक संगीत पुरस्कार २०७९ मकवानपुरका लोक गायक रविन्द्रकुमार चेपाङलाई प्रदान गरिएको छ । सरिखेत पलासेका स्थायी बासिन्दा चेपाङ रेडियो नेपालबाट ५० को दसकमा लिइएको स्वर परिक्षामा समेत सफल गायक हुन । चेपाङलाई २० हजार रुपैयाँ राशीसहित पुरस्कृत गरिएको हो ।
यसैगरी मंगलादेवी स्मृति स्वास्थ्य सेवा पुरस्कार २०७९ बाट स्वास्थ्यकर्मी बेला वैद्यलाई पुरस्कृत गरिएको छ । बैद्यलाई १० हजार रुपैयाँ राशीको पुरस्कारबाट सम्मानित गरिएको हो । बैद्य स्वास्थ्य सेवामा स्थायी कर्मचारीको रुपमा कार्यरत रही सेवा निवृत कर्मचारी तथा हेटौंडाकी सफल स्वास्थ्य ब्यबसायी समेत हुन् ।
यस्तै अजित सेन गुप्ता स्मृति भिन्न क्षमता पुरस्कार हेटौंडा–५, पिप्लेस्थित बालज्योति माविमा कार्यरत दृष्टिविहिन शिक्षक विदुर अधिकारीलाई प्रदान गरिएको छ । दृष्टिविहिन विद्यार्थीलाई नै पढाउँदै आएका अधिकारीलाई १० हजार रुपैयाँ राशीको पुरस्कारबाट सम्मान गरिएको हो ।
स्थापनाकालदेखि नै साहित्य, संगीत, सँस्कृति र कलाका क्षेत्रमा १२ वटा पुरस्कारको व्यवस्थापन गर्दै आएको प्रतिष्ठानले दोस्रो चरणको ६ वटा पुरस्कार आगामी माघ महिनामा प्रदान गर्ने बताइएको छ । प्रतिष्ठानले पुष ७ गते बुधबार हेटौंडामा पत्रकार सम्मेलन गरी पहिलो चरणमा विभिन्न क्षेत्रबाट पुरस्कृत हुने ६ जना व्यक्तिको नाम र प्रादेशिक पुरस्कर सार्वजनिक गरेको थियो ।
पुरस्कार वितरण तथा सम्मान कार्यक्रममा पुरस्कार संस्थापक तथा मकवानपुरका विभिन्न पेशा व्यवसायमा आवद्ध व्यक्ति तथा साहित्यकारहरुकाे उपस्थित रहेकाे थियाे ।
वरिष्ठ कलासाधक कवि एवम् गीतकार भीम विरागकाे व्यक्तित्वप्रति सम्ममान स्वरुप भाषा साहित्य र कला क्षेत्रकाे संरक्षण एवम् संवर्धन गर्ने उद्देश्यले २०५९ सालमा स्थापना भएकाे प्रतिष्ठानले साहित्य संगीत साँस्कृतिक र कला क्षेत्रमा १२ वटा पुरस्कारकाे व्वस्थापन गर्दै आएकाे छ ।
मकवानपुर । मकवानपुर जिल्ला अदालत बार एशोसिएशन अध्यक्षमा अधिवक्ता अप्सरा बस्नेत चयन भएकी छिन । शनिबार सम्पन्न बारको साधारण सभाबाट बस्नेत अध्यक्षका प्रत्याशी ऋषि केबीलाई ३ मतले पराजित गर्दै जिल्ला बारको अध्यक्षमा निर्वाचित भएकी हुन् ।
शनिबार बारका अध्यक्ष र उपाध्यक्ष लगायत चयनका लागि २४ जना कानुन व्यवसायीहरुले मतदान गरेका थिए । बस्नेतले १३ मत प्राप्त गर्दै विजयी हुँदा जिल्ला बारका निवर्तमान अध्यक्ष ऋषि केबीले १० मत प्राप्त गरेका थिए । यस्तै उपाध्यक्षमा लागि जयराम सुवेदी बुद्धि ढकाललाई पराजित गर्दै विजयी भएका छन । सुवेदीले १४ मत ल्याई विजयी हुँदा ढकालले १० मत प्राप्त गरे ।
बार सचिवमा कृष्ण प्रसाद छत्कुली र शान्ति माया मोक्तानले १२–१२ मत प्राप्त गरी बराबर भएपछि सहमतिको आधारमा २ वर्षे कार्यकाल कृष्ण छल्कुलीले सचिवको भूमिकामा रहनुहुने बताईएको छ । बारको सह–सचिवमा रमिता चौलागाई र कोषाध्यक्षमा राधाकृष्ण मैनाली निर्विरोध चयन भएका छन । यस्तै सदस्यहरुमा पंकज अधिकारी, जगन्नाथ सुवेदी र दीपेन्द्र ढकाल चयन हुदा केन्द्रीय पार्षद उत्तमकुमार बस्नेत चयन भएका छन् ।
मकवानपुर । भीम विराग संगीत, साहित्य कला प्रतिष्ठान नेपालले विजुली माया वनः संगीत राष्ट्रिय पुरस्कार २०७९ वरिष्ठ गायक, सङ्गीतकार, लेखक तथा निर्देशक डा. किरण प्रधानलाई प्रदान गर्ने भएको छ ।
प्रतिष्ठानले २०६४ सालमा स्थापना भएकाे विजुली माया वनः श्रेष्ठ अन्तर्राष्ट्रिय सङ्गीत पुरस्कारद्वारा भीम विरागकाे स्मृती दिवसको अवसरमा प्रधानलाई सम्मान गर्न लागेकाे हाे । हेटौंडाका कुशल व्यवसायी, सङ्गीतप्रेमी, समाजसेवी कन्हैयाकृष्ण श्रेष्ठले आफ्नी ममतामयी आमाको नामबाट स्थापना गरेकाे उक्त पुरस्कारकाे राशी १ लाख रुपैया रहेकाे छ ।
आगामी माघ १५ गते हेटौंडामा सांगितिक कार्यक्रमको आयोजना गरी प्रधानलाई पुरस्कार प्रदान गर्ने प्रतिष्ठानले शनिबार जानकारी दिएकाे छ । प्रतिष्ठानका अध्यक्ष ह्यग्रीव आचार्यका अनुसार २०१० सालमा काठमाडौंमा जन्मिएका प्रधानको के सोचें मैले के भयो अहिले, छातीमा मेरो यो छोटो भोटो, भुल हो तेरो भागी हिँड्नु जीवनदेखि, रातो र चन्द्रसूर्य जङ्गी निशान हाम्रो, पत्थरको मुटु बोकेर मान्छे तिमी नबनिदे, अभागी आमा कुन देशमा, विपना नभई बाँचिदिने म भित्रका मेरा सपनालगायत ४ सय बढी गीतहरुमा स्वर दिएका छन् ।
यस अघी विजुलीमाया वनः श्रेष्ठ अन्तर्राष्ट्रिय सङ्गीत पुरस्कारबाट अम्बर गुरुङ (२०६४), प्रेमध्वज प्रधान (२०६५), भक्तराज आचार्य (२०६६), फत्तेमान राजभण्डारी (२०६७), शान्ति ठटाल (२०६८), प्रकाश श्रेष्ठ (२०६९), दीप श्रेष्ठ (२०७०), न्हुच्छे बहादुर डंगोल (२०७१), मीरा राणा (२०७२), कर्म योञ्जन (२०७३), चेतन कार्की ( २०७४) दावा ग्याल्माे (२०७७) र दीपक जङ्गम (२०७८) पुरस्कृत भइसकेका अध्यक्ष आचार्यले जानकारी दिए ।
वरिष्ठ कलासाधक कवि एवम् गीतकार भीम विरागकाे व्यक्तित्वप्रति सम्ममान स्वरुप भाषा साहित्य र कला क्षेत्रकाे संरक्षण एवम् संवर्धन गर्ने उद्देश्यले २०५९ सालमा स्थापना भएकाे प्रतिष्ठानले साहित्य संगीत साँस्कृतिक र कला क्षेत्रमा १२ वटा पुरस्कारकाे व्वस्थापन गर्दै आएकाे छ । शनिबार मात्र ६ जना व्यक्तित्वलाई ६ विधाकाे पुरस्कारद्वारा सम्मान गरेकाे प्रतिष्ठानले अन्य विधाकाे पुरस्कार चाडै घाेषणा गरी प्रदान गर्ने बताइएकाे छ ।
मकवानपुर । संविधानमा भनिए झै शिक्षामा समान हक कहाँ छ ? मकवानपुर जिल्ला मनहरी गाउँपालिका वडा ६ रूपाचुरी,खरिवाङ्लगायतका बालबालिका बिद्यालय टाढा भएकै कारण बिचैमा पढाइ छोड्न बाध्य छन् । स्थानीय सरकार प्रदेश सरकार र संघीय सरकारको दायित्व के हो ? कस्लाई भनेर आफ्ना सन्तानको शिक्षा सम्बन्धी हकको रक्षा होला ? यहाँ बालविवाहको अवस्था पनि त्यस्तै डरलाग्दो छ । वडा अध्यक्ष युवराज थपलियासंगको कुराकानी भिडियाेमा हेर्नुहाेस
मकवानपुर । बागमती प्रदेशमा राष्ट्रिय पोल्ट्री दिवस सप्ताहव्यापी रुपमा मनाइदै छ । कृषि तथा पशुपन्छी विकास मन्त्रालय बागमती प्रदेशको आयोजनामा १० औं राष्ट्रिय पोल्ट्री दिवस सप्ताहव्यापी रुपमा मनाइने भएको हो ।
मन्त्रालयले मातहतका निकाय तथा सरोकारवाला संस्थाहरुसंगको सहकार्यमा दिवस मनाउने जानकारी पुस ८ गते पत्रकार सम्मेलन गरि जानकारी गराईएको छ । `पोल्ट्री सोको विकासमा सर्वपक्षीय सहभागिता, खाद्य र पोषण सुधार हाम्रो प्रविद्धता’ नारा सहित मन्त्रालयले बागमतीमा पहिलो पटक यस दिवस मनाउन लागेको हो । पुस ११ गतेदेखि १७ गतेसम्म विभिन्न कार्यक्रम आयोजना गरि दिवस मनाइने मन्त्रालयका सचिव शरणकुमार पाण्डेले बताए ।
सरकारी स्तरबाट बारा जिल्लाको परवानीपुरमा निर्मित सेन्ट्रल ह्याचरीको समुद्घाटन २०१७ साल पौष १७ गते भएकोमा उक्त दिनको ऐतिहासिक महत्वलाई दृष्टिगत गरी २०७० सालबाट हरेक वर्ष पौष १७ गतेलाई राष्ट्रिय पोल्ट्री दिवसको रुपमा मुलुकभर विभिन्न कार्यक्रम सहित आयोजना गर्न थालिएको थियो ।
पुस ११ गते १३ वटै जिल्लाका भेटेरिनरी अस्पताल तथा विज्ञ केन्द्रहरुमा दिवसको विषयमा पत्रकार सम्मेलन गर्ने, सोही दिन कृषि तथा पशुपन्छी विकास मन्त्रीबाट मन्त्रालयमा दिवसको कार्यक्रम समुद्घाटन गर्ने, पशुपन्छी तथा मत्स्य विकास निर्देशनालयमा पोल्ट्रीसँग सम्बन्धित संघ संस्थाहरुसँगको अन्तरकृया कार्यक्रम आयोजना गर्ने, पोल्ट्री क्षेत्र सम्बन्धी पम्पलेट तथा ब्रोसर लगायतका प्रसार सामग्री तयारी तथा वितरण गर्ने, पत्रपत्रिका लगायत विभिन्न मिडियाबाट प्रचार प्रसार गर्ने कार्यक्रम रहेको छ ।
पुस १२ गते स्थानीय तह तथा पोल्ट्रीसँग सम्बन्धित संघसंस्थाको समन्वयमा भेटेरिनरी अस्पताल तथा पशु सेवा विज्ञ केन्द्रमार्फत् सामुदायिक विद्यालयमा अण्डा तथा मासु उपभोगको महत्व बारेमा स्कुल शिक्षा कार्यक्रम सहित अण्डा खुवाउने कार्यक्रम आयोजना गर्ने, पुस १३ गते गर्भवती महिला, कुपोषण र पुड्कोपना भएका बालबालिकाहरुलाई अण्डा वितरण कार्यक्रम आयोजना गर्ने, नेपाल भेटेरिनरी एशोसियसनको समन्वयमा भेटेरिनरी अस्पताल तथा पशु सेवा विज्ञ केन्द्रबाट पुस १४ गते पोल्ट्री कृषकहरुलाई पोल्ट्री व्यवसाय सम्बन्धी सचेतना कार्यक्रम, पुस १५ गते पोल्ट्री क्षेत्रसँग सम्बन्धित र सान्दर्भिक लेख रचना पत्रपत्रिकाहरुमा प्रकाशन गर्ने, १६ गते श्रमिक बजारमा श्रमिकहरुलाई अण्डाको परिकार वितरण गर्ने र पुस समापन कार्यक्रम आयोजना गर्ने मन्त्रालयले जनाएको छ ।
बागमती प्रदेशको अर्थतन्त्रमा विशिष्ट योगदान दिँदै आएको पोल्ट्री क्षेत्रको उचित सम्मान र सम्बोधन गर्दै राष्ट्रिय पोल्ट्री दिवस विभिन्न कार्यक्रमहरु सञ्चालन गरी सप्ताहव्यापी मनाउन मन्त्रालयले कार्ययोजना तयार गरेको पाण्डेले बताए । पोल्ट्री व्यवसाय वर्तमान अवस्थाको बारेमा समिक्षा गर्ने, पोल्ट्रीजन्य उत्पादनको उपभोग प्रबर्द्धन गर्ने, पोल्ट्रीजन्य उत्पादको पोष्टिक महत्वको बारेमा आम उपभोक्तालाई जानकारी गराई दैनिक उपभोगको लागि आकर्षित गर्ने मन्त्रालयको लक्ष्य रहेको बताएको छ ।
प्रदेशभित्रका विभिन्न स्थानमा सञ्चालित पोल्ट्री व्यवसायले मुलुकको कुल मासु तथा अण्डा उत्पादनमा क्रमश: करिब २२ र ६० प्रतिशत योगदान दिदै आएको उनले बताए ।
