मकवानपुर । मकवानपुरको झरना साहित्यिक परिवारले साहित्य श्रृखला अन्तरगत लटारम्भेश्वर पदयात्रा सहितकाे साहित्यिक कार्यक्रम गरेकाे छ । झरनाले सोमबार बकैया–ठिङ्गन–लटारम्भेश्वर साहित्यिक पदयात्रा सहित साहित्यक कार्यक्रम गरेकाे हाे ।
झरनाकाे २ सय ९०औँ साहित्य शृङ्खलाको अवसरमा ८० जनाको टोली सो क्षेत्रमा पदयात्रा सहितकाे साहित्यिक कार्यक्रम गरिएकाे झरनाका सचिव मसान उपासकले बताए । साहित्यिक टाेलीले लटारम्भेश्वरसम्म पदयात्रा गरी यात्राबाट फर्कनेक्रममा रचना वाचन कार्यक्रम गरेकाे हाे । कार्यक्रमलाई सचिव उपासकले सहजीकरण गरेका थिए ।
कार्यक्रममा बकैया गाउँपालिका अध्यक्ष धर्मराज लामिछाने, निमित्त प्रशासकीय अधिकृत मिलन दुलाल, बकैया गापा वडा नं. ८, ९, ११ र १२ का वडाअध्यक्षहरू, पुरस्कार संस्थापक तुल्सी गिरी, नेपाली भाषा शिक्षण समिति मकवानपुरका अध्यक्ष केशव सञ्जेललगायतकाे सहभागिता रहेको थियो ।
साहित्य सर्जकहरू केशव समर्पण, दीपक गौतम, चिरञ्जीवि लामिछाने, छवि अनित्य, सानु खनाल, डिबी बर्तौला, हरि पौड्याल, विशाल अधिकारी आशुतोष, यश लामा, स्वस्तिका दाहाल, अमृता लामिछाने, स्वस्तिका बानिया, प्रयासी प्रविना पौडेल लगाएत साहित्यकारहरुको उपस्थितिमा साहित्यिक रचना वाचन भएकाे हाे ।
पद यात्रामा आवश्यक आर्थिक सहयोग बकैया गाउँपालिकाको वडा नम्बर ११ र १२ का वडा अध्यक्षहरु गोपालबहादुर न्यासुर ज्ञानेन्द्र बजगाईँ गरेका थिए । मकवानपुरका साहित्यिक संस्थाहरूले साहित्यिक यात्रा, पदयात्रा, महोत्सव रचना वाचन, प्रतियोगिताहरू सक्रियरूपमा सञ्चालन गर्दै आइरहेका छन् । विभिन्न स्थानको पदयात्रा, महोत्सव, बहस, अन्तरक्रिया, स्रष्टा सम्मान तथा साहित्यिक कार्यशाला सञ्चालन गर्दै आएको साहित्यिक परिवार यस क्षेत्रको सक्रिय संस्था हो ।
भौगोलिक विकटताका कारण कठिन तर रोचक यात्रा रहने उक्त क्षेत्रमा स्थानीय तहले पैदल यात्राका लागि बाटो विस्तार, छेकबार लगायतका व्यवस्थापन तथा निर्माण कार्य गरिरहेको छ । त्यसलाई अझ सुधार गर्दै धेरैभन्दा धेरै पर्यटक भित्र्याउने र अन्य स्थानभन्दा भिन्न हावापानी, हुस्सुले ढिकिरहने विशाल पर्वतहरूको सिंहावलोकनका लागि यस स्थानलाई स्तरोन्नति गर्नेतर्फ ध्यान दिइएको जनप्रतिनिधिहरूले बताए ।
बकैया गाउँपालिका र भीमफेदी गाउँपालिकाकाे सिमामा रहेकाे लटारम्भेश्वर पछिल्लो पटक धार्मिक पर्यटनकाे तथा पदयात्राकाे लागि रोजाईमा रहेको छ ।
मकवानपुर । संघीय सरकारकाे आगामी आर्थिक वर्ष २०८०/८१ काे बजेट १७ खर्ब ५१ अर्ब ३१ करोड रुपैयाँको रहेकाे छ । संघीय संसदकाे संयुक्त बैठकमा अर्थमन्त्री प्रकाश शरण महतले उक्त बजेट प्रस्तुत गरेका हुन । यो चालु आर्थिक वर्ष २०७९/८० को बजेटको तुलनामा कम हो । चालु आर्थिक वर्षकाे बजेट १७ खर्ब ९३ अर्ब ८३ करोड ७३ लाख रुपैयाँकाे थियाे ।
विनयाेजन बजेट मध्ये चालुतर्फ ११ खर्ब ४१ अर्ब ७८ करोड अर्थात् ६५.२० प्रतिशत, पूँजीगततर्फ ३ खर्ब २ अर्ब ७ करोड अर्थात् १७.२५ प्रतिशत र वित्तीय व्यवस्थातर्फ ३ खर्ब ७ अर्ब ४५ करोड अर्थात् १७.५५ प्रतिशत रहेको छ । कुल विनियोजनमा प्रदेश र स्थानीय तहमा वित्तीय हस्तान्तरण तर्फ ४ खर्ब ८ करोड रूपैयाँ विनियोजन रहेको छ ।
आगामी आर्थिक वर्षका लागि अनुमान गरिएको खर्च मध्ये राजस्वबाट १२ खर्ब ४८ अर्ब ६२ करोड र वैदेशिक अनुदानबाट ४९ अर्ब ९४ करोड रूपैयाँ व्यहोरिने भएकाे छ भने ४ खर्ब ५२ अर्ब ७५ करोड रुपैयाँ न्यून हुनेछ । न्यून बजेट पूर्ति गर्न वैदेशिक ऋणबाट २ खर्ब १२ अर्ब ७५ करोड रूपैयाँ जुटाइनेछ बजेटमा उल्लेख गरिएकाे छ । राजस्व परिचालन र वैदेशिक सहायता परिचालन गर्दा नपुग हुने खुद २ खर्ब ४० अर्ब रूपैयाँ आन्तरिक ऋणबाट व्यहोरिने भएकाे छ ।
यसैगरी आगामी आर्थिक वर्षमा ६.० प्रतिशत आर्थिक वृद्धि हुने प्रक्षेपण बजेटमा छ । त्यसैगरी मुद्रास्फिति ६.५ प्रतिशत रहने सरकारको अनुमान रहेकाे अर्थमन्त्रीले प्रस्तुत गरेका छन् ।
सरकारले गत वर्षको बजेट भाषणमा ५.८ प्रतिशत आर्थिक वृद्धि हुने अनुमान गरेको थियो । तर, यो २.१६ प्रतिशतमा खुम्चिने भएको छ । विश्व अर्थतन्त्रको शिथिलता तथा केही आन्तरिक कारणले आर्थिक गतिविधिमा सुस्तता आएको हुँदा आर्थिक वृद्धि न्यून हुने देखिएको अर्थमन्त्रीको भनाइ छ ।
बजेटकाे पूर्णपाठ
मकवानपुर । बागमती प्रदेश सरकारले पत्रकार तथा विभिन्न विधाका व्यक्ती गरी १२ जनालाई सम्मान गरेकाे छ । प्रदेश सरकारले विकास र समृद्धिमा भूमिका खेलेको भन्दै १६ औँ गणतन्त्र दिवस २०८० का अवसरमा सोमबार गणतन्त्र दिवस कार्यक्रमा ६ जना पत्रकारलाई नगदसहित सम्मान गरेको हो भने प्रदेश सरकारले खुला लेख प्रतियोगिता मार्फत् ६ जनालाई पुरस्कृत गरेको छ ।
प्रदेशमा पत्रकारिता मार्फत समाजको बहु आयामिक विकासमा टेवा पुर्याएकोमा अग्रज पत्रकार सम्मानबाट सिन्धुपाल्चोकका सुरेश कसजु, विकाश पत्रकारिता सम्मानबाट चितवनका पत्रकार अनिल ढकाल, ग्रामीण पत्रकारिता सम्मानबाट मकवानपुरका पत्रकार शिवकुमार रिजाल ‘काशी’, प्रदेश गौरव पत्रकारिता सम्मानबाट नुवाकोटकी पत्रकार शक्तिमाया तामाङ र युवा पत्रकारिता सम्मानबाट सिन्धुलीका विक्रम रत्नलाई पुरस्कृत गरियो । पुरस्कारको राशि जनही २० हजार रुपैयाँ रहेको छ।
उक्त अवसरमा प्रदेश सरकारले खुला लेख प्रतियोगिता मार्फत् ६ जनालाई पुरस्कृत गरेको छ । प्रदेश सरकारको तर्फबाट आन्तरिक मामिला तथा कानून मन्त्रालयले उक्त लेख सङ्कलन तथा मूल्याङ्कन गरेको थियो । मन्त्रालयले सञ्चार रजिस्ट्रारको कार्यालयबाट मूल्याङ्कन गरिएका ६ जनालाई पुरस्कृत गरेको हो ।
जसमा आन्तरिक मामिला तथा कानुन मन्त्रालयका अधिकृत सुरेन्द्र कार्की प्रथम भएका छन् । कार्की मन्त्रालयका सूचना अधिकारी समेत हुन् । त्यस्तै प्रतियोगितामा मकवानपुरमा क्रियाशील रहेका पत्रकार सुनिता विष्ट, प्रेमकला पौडेल द्वितीय भए भने काठमाडौँका पत्रकार फणीन्द्र फुयाँल, पत्रकार अनीश मिजार, शिवराज योगी तृतीय भए । उनीहरू क्रमशः १५ हजार रुपैयाँ, १०/१० हजार रुपैयाँ र ५/५ हजार रुपैयाँ नगदसहित पुरस्कृत भए ।
मुख्यमन्त्री शालिकराम जम्कट्टेलको अध्यक्षता तथा प्रदेश प्रमुख यादवचन्द्र शर्माको प्रमुख आतिथ्यता कार्यक्रम भएकाे थियो ।
मकवानपुर । दैनिक जिविको पार्जनका लागि समस्यामा पर्दै आएका परिवारका बालवालिकाका लागि हेटौंडामा निःशुल्क डिप्लोमा कम्प्युटर तालिम प्रदान गरिएको छ ।
हेटौंडा उपमहानगरपालिकाको आर्थिक सहयोगमा हेटौंडा १६ र १७ का बिपन्न परिवारका बालवालिकालाई कम्प्युटर तालिम दिइएको हो । कम्प्युटर शिक्षामा चासो राख्ने तथा बेसिक कम्प्युटर काेर्ष लिइसकेका दुई वडाका बालबालिकालाई स्थानीय कम्प्युटर शिक्षा सञ्चालन समितिले डिप्लोमा कम्प्युटर सम्बन्धी निःशुल्क तालिम दिएको हो । छ महिने डिप्लोमा तालिम सकेका १६ र १७ का बालबालिकालाई हेटौंडा उपमहानगरपालिकाका नगर प्रमुख मीनाकुमारी लामाले प्रमाण पत्र हस्तान्तरण गरेकी थिइन् ।
उनले शिक्षा लिएकाहरुकाे उज्जवल भविष्यको कामना गर्दै बिद्यालय स्तरमा प्लस टु सक्ने बित्तीकै बैदेशीक मोहमा बालबालिका रहेकाले त्यसलाई रोक्नका लागि सोच्ने बेला भएकाे बताइन् । उनले बैदेशीक यात्रा होइन नेपालमा नै भबिष्य खोज्ने वाताबरण बनाउन जरुरी रहेकाे बताउँदै उपमहानगरका अन्य वडाहरुका बिद्यार्थिहरुलाई लक्षित गर्दै कम्प्युटर शिक्षा र लाईबेरीको व्यवस्थापन गर्ने बताइन् ।
त्यसक्षेत्रका कम्प्युटर शिक्षामा इच्छा राख्नेहरुलाई लक्षित गर्दै ५ वटा कम्प्युटरबाट सञ्चालन भएको तालिम केन्द्रमा अहिले १८ वटा कम्प्युटर रहेको छ । समितिले व्यवस्थापनका लागि केहि शुल्क लिएपनि बजारमा बेसीक र डिप्लोमा कक्षाका लागि लाग्ने भन्दा न्यून रहेको समितिका अध्यक्ष कृष्णबहादुर राईले बताए । दैनिक रुपमा शिक्षा लिने बिद्यार्थिको चाप उच्च रहेपनि बिद्युत व्यवस्थापनका लागि इन्भटरको समस्या रहेको बताए । तालिमका लागि समितिले २ जना प्रशिक्षकको व्यवस्था गरेको उनले जानकारी दिए ।
समितिका अध्यक्ष राईको अध्यक्षतामा भएको प्रमाणपत्र बितरण तथा डिप्लोमा कक्षा समापन कार्यक्रममा हेटौंडा १७ का वडा सदस्य कृष्ण अधिकारी, १६ का सदस्य संगिता बिश्वकर्मा, रेडक्रस सोसाईटी १६ र १७ का सभापति राजकुमार बास्तोला लगायकाले सिपलाई व्यवहारमा उतार्न आग्रह गरेका थिए । समितिले दैनिक रुपमा कम्पुटरको बेसिक र डिप्लोमा कक्षा सञ्चालन गर्दै आएको छ ।
मकवानपुर । बागमती प्रदेश प्रमुख यादवचन्द्र शर्माले देशलाई सुशासन, विकास एवं समृद्धिको पथमा लम्किने आधार गणतन्त्रबाट निर्माण भएको बताएका छन् । जेठ १५ गते सोमबार मनाइँदै गरिएको १६ औं गणतन्त्र दिवसका अवसरमा शुभकामना सन्देश दिँदै उनले उक्त कुरा बताएका हुन् ।
नेपाल शाहवंशीय राजतन्त्रात्मक शासन व्यवस्थाको अन्त्य भई संघीय लोकतान्त्रिक गणतन्त्रात्मक शासन व्यवस्थामा प्रवेश गरेको ऐतिहासिक र गौरवमय दिनका रुपमा गणतन्त्र दिवसलाई प्रमुख शर्माले उल्लेख गरेका छन् । ‘यस महत्वपूर्ण दिनको अवसरमा स्वदेश तथा विदेशमा रहनुभएका सम्पूर्ण नेपाली दाजुभाई एवं दिदीबहिनीहरुमा हार्दिक बधाई तथा शुभकामना व्यक्त गर्दछु ।’ प्रदेश प्रमुख शर्माले भनेका छन्,‘गणतन्त्र स्थापनाका लागि विभिन्न कालखण्डमा भएका आन्दोलनहरुमा आफ्नो अमूल्य जीवन उत्सर्ग गर्नुहुने सम्पूर्ण ज्ञात, अज्ञात अमर शहीदहरूप्रति हार्दिक श्रद्घासुमन अर्पण गर्दै बेपत्ता,घाईते तथा अपाङ्ग योद्धाहरुमा उच्च सम्मान प्रकट गर्दछु ।’
प्रमुख शर्माले शुभकामना सन्देशमा ऐतिहासिक जनआन्दोलन २०६२/०६३ को बसन्त क्रान्तिको जगमा नेपाली जनताका प्रतिनिधिमार्फत २०६५ जेठ १५ गते संविधानसभाको पहिलो बैठकबाट हाम्रो देशलाई संघीय लोकतान्त्रिक गणतन्त्रात्मक मुलुक घोषणा गरिएको उल्लेख गरेका छन् । ‘यो दिनलाई हामी वंश परम्परामा चलिआएको निरंकुश, केन्द्रिकृत र एकात्मक शासन व्यवस्थाको अन्त्य गर्दै नेपाली जनतालाई सार्वभौमसत्ता सम्पन्न बनाउँने दिनका रुपमा स्मरण गर्दछौं’ प्रदेश प्रमुखको शुभकामना सन्देशमा भनिएकाे छ ।
गणतन्त्रात्मक व्यवस्थामा हामी संघीयता,धर्मनिरपेक्षता,समानुपातिकता एवं समावेशीतासहितको संविधान प्राप्त गर्दै अधिकार सम्पन्न नागरिक भएको प्रमुख शर्माको भनाई छ । यही व्यवस्थाबाट हाम्रो देशलाई सुशासन, विकास एवं समृद्घिको पथमा लम्किने आधार समेत निर्माण भएको उनको जोड छ । नेपालको संविधानले मौलिक हकका रूपमा व्यवस्था गरेका सम्मानपूर्वक बाँच्न पाउँने, स्वतन्त्रता, समानता, शिक्षा, स्वास्थ्य, रोजगारी, सामाजिक न्याय, सामाजिक सुरक्षा, श्रम, महिला, बालबालिका, दलितका हक जस्ता विषय हाम्रा लागि अत्यन्त सुखद् र खुशीको विषय भएको प्रमुख शर्माले सन्देशमा उल्लेख गरेका छन् । यी तमाम प्राप्त उपलब्धिको रक्षा र कार्यान्वयन गर्दै अघि बढेमा गणतन्त्र थप दिगो र दरिलो हुँदै जनताको जीवनमा सार्थक र सकारात्मक परिवर्तन अवश्य हुने विश्वास उनले सन्देश मार्फत लिएका छन् ।
आजको ऐतिहासिक दिनको सन्दर्भलाई स्मरण गरिरहँदा हामीले प्राप्त गरेको उपलब्धिमाथि धावा बोल्नेबाट सचेत रहँदै मुलुकको भौगोलिक अखण्डता, सार्वभौमिकता,राष्ट्रिय एकता, स्वाधीनता र स्वाभिमानलाई अक्षुण राख्दै संविधानको मर्म र भावना अनुसार चल्नु हामी सबै नागरिकको दायित्व भएको प्रमुख शर्माको भनाई छ ।
प्रमुख शर्माले आफ्नो सन्देशमा हाम्रो जीवनलाई आर्थिक,सामाजिक र सांस्कृतिक रुपान्तरणसहित सभ्य र सुसंस्कृत बनाउँदै समुन्नत समाज निर्माणमा गणतन्त्रले सदैव मार्ग प्रसस्त गरोस् भन्ने कामना गरेका छन् । साथै, देश निर्माणको महाअभियानमा लामबद्द हुन सबैलाई यो दिवसले प्रेरणा मिलोस् भन्दै प्रमुख शर्माले शुभकामना व्यक्त गरेका छन् ।

