मकवानपुर । निर्वाचन आयोगले चौथो रणनीतिक योजना–२०८१/८२ को मस्यौदा तयार गरेको छ ।
आयोगले उक्त मस्यौदामा सुझाव दिन सार्वजनिक सूचनामार्फत सर्वसाधारणलाई आह्वान समेत गरेकाे छ । निर्वाचन व्यवस्थापनका क्रममा हालसम्मका रणनीतिक योजनाको समीक्षा गर्दै २०८१/८२ को मस्यौदा तयार गरेको हाे ।
हाल तेस्रो आवधिक रणनीतिक योजना कार्यान्वयनमा छ । हालसम्मका रणनीतिक योजनाको कार्यान्वयनबाट प्राप्त अनुभव, राजनीतिक दल तथा सरोकारवालासँग विभिन्न समयमा गरिएका छलफल, विश्लेषण, समीक्षा र अन्तरक्रियाबाट प्राप्त सुझावका आधारमा मस्यौदा तयार गरिएको आयोगका प्रवक्ता रघुराम विष्टले जानकारी दिए ।
उक्त मस्यदौलाई उन्नत बनाउन अगामी साउन ७ गतेभित्र आयोगको सचिवालयमा प्राप्त हुनेगरी सुझाव दिन आयोगले आग्रह गरेको छ ।
नेपालको संविधान, निर्वाचन व्यवस्थापनसम्बन्धी कानुन तथा अन्तर्राष्ट्रिय मापदण्डका आधारमा स्वच्छ, स्वतन्त्र, निष्पक्ष, समावेशी र विश्वसनीय निर्वाचनका लागि आयोगलाई सक्षम र सुदृढ तुल्याउने ध्येयले आर्थिक वर्ष २०६५/६६ देखि पञ्चवर्षीय योजना लागू भएको थियो ।
मस्यौदा आव्हानकाे विज्ञप्ति
Press_Release_2081_03_27- पुष्प अधिकारी अन्जलि
जीवनको सहज बाटो त जसले पनि हिँडछन् तर गजलकार हरि चालिसे एबिसीले गजलको एउटा अप्ठ्यारो बाटो हिँडदैछन्। गजलको राजमार्गलाई अनन्तसम्म पुर्याउन चाहन्छन् यही अप्ठ्यारो बाटो हिँडेर। समयका थुप्रै थुप्रै भिन्नभिन्न बादबिबादहरुलाई छिचोलेर एउटा सग्लो र उज्यालो जीवनको गन्तव्य खोज्दै छन् गजलको राजमार्ग बनाएर।
साठीको दशकमा चितवनमा सँगै यात्रा गरेर हिँडेका यी युवा साहित्यिक पत्रकारका रुपमा पनि सुपरिचित छन् । उनका कलमबाट जन्मिएका थुप्रै भोगाईहरु अनुभूतिहरूको एउटा लामो जुलुस छ । जसलाई हरेक राजमार्गले छोएर गएका छन्। करिब डेढ दशक लामो अवधि नेपाली गजलको संघर्षमा नेपाली गजलको क्षेत्रमा बिताएका एक जुझारु संघर्षशील गजलकार हरि चालिसे यतिखेर नेपाली गजलको क्षेत्रमा एउटा साधकका रुपमा स्थापित भैसकेका छन्। उनीसँगको धैर्यता र संयमता ले नै आज एउटा असल गजलकारको परिचय दिएको छ ।
उनी चितवनमा रहँदा गजलको क्षेत्रलाई फराकिलो बनाउन गजल सन्ध्या चितवनको अध्यक्ष भएर यो पँक्तिकारसँगै सहयात्रा गर्दै गजलमा थुप्रै ऐतिहासिक संगोष्ठी काव्य परिक्रमा र थुप्रै गजल श्रृंखलाहरु गरिसकेका छन्। यतिखेर उनको नवीनतम गजलकृति “ज्यूने रहर” बजारमा आइसकेको छ। नेपाली गजलको विकास र संरक्षणमा निरन्तर समर्पित रहिरहने यो क्रियाशीलतालाई मैले नजिकबाट नियालेको छु।
उनको गजलमा नविन चेतना र क्षमता प्रचुर मात्रामा छ। गजलमा आफ्नो सिंगो जीवन व्यतित गरी रहने संघर्षशिल स्रष्टा हरि चालिसे एबिसी निकै शसक्त गजल हस्ताक्षर हुन। उनको प्रकाशित गजल संग्रह ज्यूने रहरमा एक सय एक गजलहरू समाविष्ट छन्। सबै गजलहरु उत्तिकै प्रभावशाली छन्। देश समाज र जीवनलाई नजिकबाट नियाल्न सक्ने काव्यिक क्षमता भएका जुझारु युवा गजलकार आफ्ना गजल शेरहरुमा सामाजिक विषयवस्तुहरूलाई महत्वपूर्ण रुपमा उठान गरिरहेका छन्। उनले आफ्ना गजलमा मनोवैज्ञानिक ढङ्गले विचारहरु प्रस्तुत गरेका छन् र उनका गजलहरूमा राजनीतिक सामाजिक आर्थिक लैङ्गिक समानताको आग्रह र हार्दिकताको नवीकरण गरिएको छ।
समयको एउटा सुकिलो बिहान बोकेर झोलाभरि शब्दका बीऊहरू राखेर प्रत्येक गाँऊ बस्तीहरूमा काव्यिक चेतनाको टुकी बालेर निरन्तर हिडिरहेका स्रष्टा हुन् यी गजलकार। यतिखेर यिनको प्रभावशाली गजल सङूग्रह “ज्यूने रहर” मेरो हातमा छ । उनका गजल सङ्ग्रहमा समसामायिक आवाजहरूसंगै जीवनका सुक्ष्म सुक्ष्म बिषयबस्तुहरूलाई उठान गरिएको छ । करिव दुई दशक अगाडि शब्दयात्राको जुलुशमा भेटिएका यी प्रभावशाली गजलकार धेरै समय चितवन बसेर निरन्तर गजल साधना र सङ्घर्षमा बिताएका छन्।
गजलकारले जीवन बांच्ने र अरूलाई सहज जीवन दिने क्रममा लामो समय चितवनमा बसेरपनि आफ्नो नेपाली गजल र शब्द साहित्यका निम्ति निरन्तर आगो जस्ता सिर्जनाहरू लेखिरहे ।एउटा कुशल लेखक शालीन गजलकार हुन हरि चालिसे एबिसी। कति धैर्यता कति प्रतिबद्धता कति सङघर्ष कति साधना चाहिन्छ भन्ने कुरा गजलकार हरि चालिसेलाई अनुभूत छ। नेपाली गजलमा उनले धेरै सिके र धेरैलाई सिकाएका छन। नेपाली गजल र गजलको लय संरचना शब्द संयोजनमा निकै अब्बल देखिएका छन ।
उनका हरेक गजलका शेरहरू अर्थपूर्ण र सामाजिक रूपान्तरणको यथार्थ चित्रण छ। चितवनको लामो बसाईमा उनले सिर्जना गरेको गजलहरू कतिपय देश माटो र बा आमा अनि आफ्नी पत्निको सम्झनामा लेखेका छन।समसामायिक स्वर राजनैतिक अस्थिरता सामाजिक सांस्कृतिक र मानवीय संवेदनाका बिषयमा उठाइएको छ प्रायः गजलहरू । उनि एऊटा सचेत गजलकार हुन।
गजलकारले आफ्ना नाङगा पैतालाहरूमा देश खोजिरहेका छन। कयौं जिन्दगीका सुदूर सपनाहरू खोजिरहेका छन् । मैले उनका थुप्रै गजलहरू पढेको छु र उनको जिन्दगी पढेको छु। उनी धेरै लेख्दैनन् तर जति लेख्छन अत्यन्त गहन र भावपूर्ण र मान्छेका थुप्रै निर्जीव सपनाहरू लेख्छन् ।बिचारको पहाड अग्लो बनाएर लेख्छन्। युद्धबाट थाकेको देश, निर्दोष मान्छेहरूको रगतले पोतिएको माटो, आमाको स्नेहले निथ्रुक्कै भिजेको ममताको आंचलमा लागेको कालो दाग कहांनिर दुखेको छैन मन ? यस्तै यथार्थ चित्रण छ गजल सङ्ग्रहभित्र । गजलकारले देश छातीभित्र राखेर मानवीय संवेदना खोजिरहेको असङ्ख्य दस्तावेजहरू छन्।
उनको गजलमा गजलको शिल्प शैली र संरचनागत हिसावले मजवुत छन ।उनले कतिपय आफ्ना प्रायः गजलहरूमा प्रेमील रङहरु भरेका छन् । नयाँ घामको आगमन खोजिरहेका छन्। बाटो बिराएकाहरूलाई गजल मार्फत बाटो देखाएका छन्। यस्तै जीवनका थुप्रै आयामहरू निर्माण गरेका छन। “ज्यूने रहर” गजल कृति सबैको निम्ति एउटा दस्तावेज बनेको छ।
उनले कयौं मनहरूलाई गजल सिकाए र बने आफू गजलको अभियन्ता साधुवाद छ एबिसीलाई। यतिखेर उनी गल्कोट बाग्लुङ काँडेबासमा एउटा उच्च माध्यमिक विद्यालयको प्राचार्य भएर शैक्षिक सफलता खोजिरहेका छन्। भर्खरमात्रै उनले गल्कोट बहुमुखी क्याम्पसमा एउटा भव्य सभ्य साहित्यिक कार्यक्रम सम्पन्न गरेका छन्। अन्तमा उनको यो लामो गजलकारिता गजलको यो सुन्दर राजमार्ग अझै फराकिलो हुन सकोस। “ज्यूने रहर”गजल कृति गजल इतिहासमा एउटा उपलब्धिमूलक शोधपत्र बन्न सकोस् । सबैले सिक्नेछन उनको यो कृतिबाट।
म उनको गजलकरितालाई सलाम गर्छु। म उनको यस कृतिको पूर्ण सफलताको कामना गर्छु। हार्दिक बधाई शुभकामना हरि चालिसे एबिसी भाइलाई। साहित्यिक क्षेत्रमा थप उर्जा मिलोस्। राम्रा राम्रा कृतिहरु जन्मियोस् हृदयदेखि शुभकामना।
गजलगृह, भरतपुर, चितवन
मकवानपुर । हाल बागमती र गण्डकी प्रदेशका केही स्थानहरूमा तथा कोशी र लुम्बिनी प्रदेशका एक–दुई स्थानहरूमा हल्का देखि मध्यम वर्षा भइरहेको छ।
मनसुन न्यून चापीय रेखा पश्चिममा सरदर स्थानको आसपास र पूर्वमा सरदर स्थानभन्दा उत्तरतर्फ रहेको प्रभावले देशभर साधरणतया बदली रहेको जल तथा माैसम विज्ञान विभागकाे माैसम पूर्वानुमान महाशाखाले जनाएकाे छ ।बिहीबार दिउँसो देशभर साधरणतया देखि पूर्णतया बदली रहने छ भने कोशी, मधेस, बागमती, गण्डकी र लुम्बिनी प्रदेशका अधिकांश स्थानका साथै कर्णाली र सुदूरपश्चिम प्रदेशका केही स्थानहरूमा चट्याङ्गसहित हल्कादेखि मध्यम वर्षाको सम्भावना रहेको महाशाखाले जनाएकाे छ।
बिहीबार कोशी, मधेस, बागमती, गण्डकी र लुम्बिनी प्रदेशका केही स्थानहरूमा, सुदूरपश्चिम र कर्णाली प्रदेशका एक–दुई स्थानमा भारी वर्षाको सम्भावना रहेको छ। बिहीबार राति कोशी, मधेस, बागमती, गण्डकी र लुम्बिनी प्रदेशका अधिकांश स्थानहरूमा साथै कर्णाली र सुदूरपश्चिम प्रदेशका धेरै स्थानहरूमा चट्याङ्गसहित हल्कादेखि मध्यम वर्षाको सम्भावना रहेको छ। उल्लेखित प्रदेशका केही स्थानहरूमा, सुदूरपश्चिम र कर्णाली प्रदेशका एक–दुई स्थानमा भारी वर्षाको सम्भावना रहेको छ।
कोशी, मधेस, बागमती, गण्डकी र लुम्बिनी प्रदेशका एक–दुई स्थानमा धेरै भारी देखि अति भारी वर्षाको सम्भावना रहेकोले उक्त क्षेत्रमा हुन सक्ने बाढी, पहिरो, भू–क्षयका जस्ता प्रकोपको जोखिम वा क्षतिबाट बच्न आवश्यक सतर्कता अपनाउन मौसम पूर्वानुमान महाशाखाले अनुरोध गरेको छ ।
मकवानपुर । बागमती प्रदेश खेलकुद विकास परिषद्ले प्रदेशका ६ जिल्लामा खेलकुद विकास समितिको अध्यक्ष नियुक्त गरेकाे छ । परिषद्ले मकवानपुरसहित ६ जिल्लामा अध्यक्ष नियुक्त गरेको हो ।
परिषद्ले खेलकुद विकास समिति मकवानपुरको अध्यक्षमा राजकुमार मोक्तानलाई नियुक्त गरेकाे छ । समिति मकवानपुरमा दुई जना सदस्यहरु पनि नियुक्त गरेको छ । सदस्यमा मदन उप्रेती र कृष्ण रुम्बालाई नियुक्त गरिएकाे छ ।
विगत साढे ३ महिनादेखि खेलकुद विकास समिति अध्यक्षबिहीन रहेका थिए । बागमती प्रदेशको १३ जिल्लामध्ये मकवानपुर, धादिङ, काभ्रे, सिन्धुली, काठमाडौं र सिन्धुपाल्चोक जिल्लामा अध्यक्ष नियुक्त गरिएको प्रदेश खेलकुद विकास परिषद्का सदस्य सचिव सूर्यलाल भण्डारीले जानकारी दिए ।
बागमती प्रदेश खेलकुद विकास परिषद्को शुक्रबारको बैठकले मकवानपुरसहित, धादिङको अध्यक्षमा प्रताप तामाङ, काभ्रेको अध्यक्षमा मानवीर वाइवा, सिन्धुलीको अध्यक्षमा वीरबहादुर थिङ, काठमाडौंको अध्यक्षमा सानुभाई बलामी र सिन्धुपाल्चोकको अध्यक्षमा रामकृष्ण दंगाललाई नियुक्त गरिएको भण्डारीले बताए ।
समितिकाे कार्यकाल यसअघि दुई वर्ष रहेकोमा त्यसलाई बढाएर परिषद्ले चार वर्ष बनाएको छ । अहिलेकाे समितिको कार्यकाल चार वर्षको हुनेछ । खेलकुद विकास समिति अध्यक्ष रिक्त रहेकाे प्रदेशका चितवन, रसुवा, दोलखा, नुवाकोट, रामेछाप ललितपुर र भक्तपुर गरी ७ जिल्लामा भने अध्यक्ष नियुक्त गरिएकाे छैन् ।
मकवानपुर । ऋषिराम पाेखरेलकाे पुस्तक अनुभूतिका आँखाहरु सार्वजनिक भएकाे छ । सर्जक सञ्जाल मकवानपुरले पाेखरेलकाे पहिलाे कृति अनुभूतिका आँखाहरु सार्वजनिक गरेकाे हाे ।
लामाे समय शिक्षण पेशमा आवद्ध रही अवकाश हुनु भएका पोखरेलले आफ्नाे जीवनका विभिन्न अनुभूति समेटी लेखेकाे पुरस्कारकाे प्रकाशक हेटौडा स्कुल अफ म्यानेजमेन्टका प्रिन्सिपल पुरनबहादुर जाेशी रहेका छन् । लेखक पाेखरेलले आफ्नाे कृतिलाई अनुस्मरण भनेका छन् ।
समालाेचक घनश्याम घिमिरेले कृतिमा लेखक आफूले भाेगेका विभिन्न अनुभवहरु र गरेका अनुभूतिहरु जस्ताकाे तस्तै उतारेकाे बताए । कृतिकारले समाजमा रहेका स्वार्थी व्यक्तित्व र वैचारिक रुपमा स्खलित भएकाहरुप्रति कडा प्रहार गरेकाे समेत गरेकाे घिमिरेले जानकारी दिए । कृतिमा कलात्मक र साहित्यिक पक्षमा भने केही कमजाेरी रहेकाे उनकाे भनाइ छ ।
कार्यक्रममा साहित्यकार देवराज तिवारी र शान्तिप्रिय बन्दनाले पनि कृतिभित्रकाे वैचारिक पाटाे, नारीवादी चेतका साथै विभिन्न सकारात्मक र सुधारात्मक पाटाेबारे चर्चा गरेका थिए ।
बागमती प्रदेशसभा सदस्य प्रेमबहादुर पुलामी, जिल्ला समन्वय समिति मकवानपुरका प्रमुख ललित घलान, हेटाैंडा-४ नम्बर वडाका अध्यक्ष नवीन सिग्देल, श्यामप्रसाद शर्मा स्मृति प्रतिष्ठानका अध्यक्ष ईन्द्र नेपाल, सर्जक सञ्जाल मकवानपुरका अध्यक्ष निमेष निखिल, शिक्षासेवी देव श्रेष्ठलगायतले शुभकामनाका साथै कृतिका बारे धारणा राखेका थिए ।