मकवानपुर । मकवानपुरको हेटौडाबाटबाट लागुऔषध चरेशसहित प्रहरीले दुई जनालाई नियन्त्रणमा लिएकाे छ । मकवानपुर प्रहरीका अनुसार पर्साको सखुवा प्रसौनी गाउँपालिका–१ का २६ वर्षीय हरी गौरव र नवलपरासीको पण्डितपुर वनगरिया गाउँपालिका–१ का ४३ वर्षीय अनिल भर चौधरीलाई १० किलो २५० ग्राम चरेश सहित नियन्त्रणमा लिइएकाे हाे ।
बिहिबार प्रहरी चौकी रातोमाटेबाट खटिएको टोलीले हेटौंडा–१५, चुरीमाईस्थित पुर्व–पश्चिम सडक खण्डमा हेटौंडाबाट पथलैयातर्फ जादै गरेको ना ६ ख ५८३९ नम्बरको यात्रुबाहक बसलाई सुरक्षाजाँच गर्ने क्रममा बसमा सवार उनीहरुलाई उक्त परिमाणकाे लागुऔषध चरेशसहित पक्राउ गरेको हो ।
प्रहरीले उनीहरुकाे झोलाभित्र लुकाएर राखिएको चरेश १० किलो २ सय ५० ग्राम फेला पारी बरामद गरेको जिल्ला प्रहरी कार्यालय मकवानपुरले जनाएको छ । दुवै जनालाई नियन्त्रणमा लिएर जिल्ला अदालत मकवानपुरबाट १० दिनको म्याद लिएर अनुसन्धान गरिरहेको प्रहरीले जनाएको छ ।
मकवानपुर । बागमती प्रदेशका नवनियुक्त प्रदेश प्रमुख दीपकप्रसाद देवकोटाले पदभार ग्रहण गरेका छन्।
शुक्रबार प्रदेश राजधानी हेटौंडास्थित कार्यालयमा उनले पदधार ग्रहण गरेका हुन् । देवकोटा बागमती प्रदेशका चौथो प्रदेश प्रमुख हुन् ।
गत साउन १४ गतेको संघीय मन्त्रिपरिषद्ले बागमती प्रदेश प्रमुख देवकोटालाई नियुक्तिका लागि राष्ट्रपति रामचन्द्र पौडेलसमक्ष सिफारिस गरेको थियो ।मन्त्रिपरिषद्को सिफारिसअनुसार राष्ट्रपति पौडेलले देवकोटालाई बुधबार प्रदेश प्रमुखमा नियुक्त गरेका थिए भने बिहीबार पद तथा गोपनीयताको शपथ गराएका थिए ।
यसैबीच निवर्तमान प्रदेश प्रमुख यादवचन्द्र शर्मालाई शुक्रबार बिदाइ गरिएको छ । नवनियुक्त प्रदेश प्रमुख देवकोटाले शर्मालाई बिदाइ गरेका हुन् ।
पदभार कार्यक्रममा बागमती प्रदेशका मुख्यमन्त्री बहादुरसिंह लामा, प्रदेश सभाका सभामुख भुवनकुमार पाठक, प्रदेशका मन्त्रीहरू, मन्त्रालयका सचिव तथा सुरक्षा निकायका प्रमुखहरूको उपस्थिति रहेको थियो ।
मकवानपुर । देशभर मनसुनी वायुको प्रभाव रहेकोले हाल आंशिकदेखि साधरणतया बदली रहेको छ । छ । मनसुनको न्यून चापीय रेखा सरदर स्थानको आसपास अवस्थित रहेको मौसम पूर्वानुमान महाशाखाले जनाएको छ।
जसको प्रभावले गण्डकी प्रदेशको थोरै स्थानहरू साथै कोशी र बागमती प्रदेशको एक–दुई स्थानमा हल्का वर्षा भइरहेको छ । मनसुनी वायुको प्रभावका कारण बिहीबार राती धेरैस्थानमा पानी परेकाे थियाे । शुक्रबार दिउँसो देशभर आंशिक देखि साधरणतया बदली रहने महाशाखाले जनाएकाे छ ।
कोशी, बागमती, गण्डकी र लुम्बिनी प्रदेशका केही स्थानहरूमा तथा बाँकी प्रदेशको थोरै स्थानहरूमा चट्याङ्गसहित हल्कादेखि मध्यम वर्षाको सम्भावना रहेको छ भने मधेस र कोशी प्रदेशकाे तराईका केही स्थानहरूमा हावाहुरीको समेत सम्भावना रहेको महाशाखाले जनाएकाे छ । महाशाखाकाे अनुसार कोशी, बागमती, गण्डकी र कर्णाली प्रदेशका एक–दुई स्थानमा भारी वर्षाको पनि सम्भावना रहेको छ ।
शुक्रबार राति कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका केही स्थानहरूमा तथा मधेस प्रदेशको थोरै स्थानहरूमा चट्याङ्गसहित हल्कादेखि मध्यम वर्षाको सम्भावना रहेको छ। कोशी, कर्णाली र सुदूरपश्चिम प्रदेशका थोरै स्थानहरूमा तथा बाँकी प्रदेशको एक–दुई स्थानमा भारी वर्षाको पनि सम्भावना रहेको छ ।
कोशी, बागमती, गण्डकी, कर्णाली र सुदूरपश्चिम प्रदेशका एक–दुई स्थानमा भारी वर्षाको साथै मधेस र कोशी प्रदेशको तराईका केही स्थानहरूमा हावाहुरीको पनि सम्भावना रहेकाले ती क्षेत्रमा हुन सक्ने गेग्रान बहाव, बाढी, पहिरो तथा भूक्षय जस्ता प्रकोपको जोखिम वा क्षतिबाट बच्न आवश्यक सतर्कता अपनाउन महाशाखाले अनुरोध गरेको छ ।
मकवानपुर । तीनवटा प्रदेशका प्रदेश प्रमुखहरूले राष्ट्रपति रामचन्द्र पौडेलबाट पद तथा गोपनियताको सपथ लिएका छन् ।
नेपाल सरकारको सिफारिसमा राष्ट्रपति पौडेलले बागमती लुम्बिनी र कर्णाली प्रदेशको प्रमुखहरुलाई सपथ गराइएका हुन् ।
१४ साउन सोमबार बसेको संघीय सरकारको मन्त्रिपरिषद्को बैठकले सिफारिस गरेअनुसार बागमतीमा कैलालीका दिपकप्रसाद देवकोटा, लुम्बिनीमा रोल्पाका कृष्णबहादुर घर्तीमगर र कर्णाली प्रदेशमा बझाङका यज्ञराज जोशी प्रदेश प्रमुख नियुक्त भएका थिए ।
त्यसपछि राष्ट्रपति पौडेलले बुधबार नियुक्ति गरेका उनीहरूले बिहीबार सपथ ग्रहण गरेका छन् । समारोहमा उपराष्ट्रपति, प्रधानमन्त्री,सभामुख, राष्ट्रियसभा अध्यक्षलगायत विशिष्ट अधिकारीहरूको उपस्थिति रहेको थियो ।
को हुन बागमतीका प्रदेश प्रमुख देवकोटा
बागमतीको प्रदेश प्रमुख नियुक्त भएका दिपकप्रसाद देवकोटा २०१५ साउन २ गते पाल्पाको तत्कालीन देवीनगर गाउँ पञ्चायत–२ मा जन्मिएका थिए । वि स २०३१ सालदेखि पाल्पा जिल्लामै रहेर शिक्षण पेसामा आबद्ध उनी २०३४ सम्म अध्यापन जारी राखे ।
त्यसपछि उनले पाल्पामा हुँदा तत्कालीन तानसेन नगर पञ्चायतमा लेखापालको काम गरे । वि स ०३८ सालमा पाल्पाबाट देवकोटा कञ्चनपुरको महेन्द्रनगर गएपछि तत्कालीन महाकाली अञ्चल अदालतमा उनी ०३९ माघसम्म विचारी काम गर्थे। त्यसपछि लोक सेवा आयोगबाट मुखिया बनेका उनको बैतडी हुलाकमा सरुवा भयो।
०४२ मा कैलालीमा हुँदा उनी बढुवा भएर खरिदार बने। ०४८ सालमा निजामती कर्मचारी आन्दोलनमा सहभागी भएपछि काठमाडौँको भद्रकालीमा २२ दिन आमरण अनशन बसे । यही आन्दोलनमा सहभागी भएको कारण उनलाई खरिदारको जागिरबाट अवकाश दिइयो।
सरकारी नोकरी बाट अवकाश पाएपछि उनी एमालेको सक्रिय राजनीतिमा आए । ०४९ मा देवकोटा धनगढी नगरको उपप्रमुखमा एमालेको तर्फबाट चुनावी प्रतिस्पर्धा गरे तर पराजित भए।
एमालेको नगर, जिल्ला कमिटी सदस्य हुँदै देवकोटा २०५९ मा नेकपा एमाले कैलालीको अध्यक्ष बने। दुई कार्यकाल एमाले कैलालीलाई हाँकेका उनले ०६५ सालमा राजीनामा दिए। देवकोटा ०६४ सालको पहिलो संविधानसभा निर्वाचनमा कैलाली ५ बाट चुनाव लडे पनि सफल हुन सकेनन्।
पार्टीको विभिन्न कमिटीमा काम गरेको अनुभवी देवकोटा भूमि आयोग कैलालीको अध्यक्ष बनेर ५ महिना काम गरेका थिए। नियुक्तिताका एमाले अनुशासन आयोगको सदस्य रहेका देवकोटा प्रदेश प्रमुख नियुक्त भएसँगै पार्टी राजनीतिबाट अलग भएको नेकपा एमालेले जनाएको छ । देवकोटा कुशल कर्मचारीसंगै सशक्त राजनीति नेतृत्वको रुपमा चिनिन्छन ।
मकवानपुर । बुधबारकाे बागमती प्रदेशसभाबाट एउटा विधेयक पारित भएकाे छ । बुधबारकाे प्रदेशसभा बैठकबाट विज्ञान प्रविधि नवप्रवर्तन तथा विकास कोष सम्बन्धमा व्यवस्था गर्न बनेको विधेयक सर्वसम्मत पारित भएकाे हाे ।
उक्त विधेयक सामाजिक विकास मन्त्री हरिप्रभा खड्गीले सभामा पेस गरेकी थिइन् । उनले पेश गरेकाे विधेयक पारित गरियोस् भन्ने प्रस्तावलाई सभामुख भुवन कुमार पाठकले निर्माणार्थ पेस गरेका थिए । उक्त विधेयकलाई बैठकमा उपस्थित सांसदहरूले सर्वसम्मतले स्वीकृत गरेका थिए ।
सभाबाट पारित विधेयक प्रमाणीकरणकाे लागि प्रदेश प्रमुख समक्ष पठाइने छ । प्रदेश प्रमुखबाट प्रमाणीकरण भएपछि विधेयक ऐन बन्नेछ ।
त्यसअघि प्रदेशसभा बैठकले उक्त विधेयक माथि छलफल गरी शिक्षा स्वास्थ्य तथा कृषि समितिले तयार पारेको निर्णयसहितको प्रतिवेदन पेस भएको थियो भने सो उपर छलफल भएको थियो ।सभामुख पाठकले ३ मिनेटको समय निर्धारण गरी छलफलमा सहभागी हुन रुलिङ गरे पनि प्रदेशसभाका कुनै सांसदले छलफलमा भाग लिएनन् ।
यसैगरी बागमती प्रदेशसभाका विभिन्न विषयगत समितिका सदस्य हेरफेर गरिएको छ । प्रदेशका समितिमा रहेका केही सांसद मन्त्री भएको र केही मन्त्रीबाट बाहिरिएकाले समितिकाे सदस्य हेरफेर सभामुख पाठकले सभामा जानकारी गराएका थिए ।
सभामुख पाठकले प्रदेशसभा बैठकमा कार्यव्यवस्था परामर्श समिति सदस्यमा हरिप्रभा खड्गीको स्थानमा समिता खड्गीलाई मनोनयन गरेको जानकारी दिए । प्रदेश मामिला समितिमा शालिकराम जम्कट्टेल, गंगानारायण श्रेष्ठ र जगन्नाथ थपलियालाई मनोनयन गरिएकाे छ ।
यस्तै सार्वजनिक लेखा समितिमा युवराज दुलाल, केशवप्रसाद पोखरेल र रामेश्वर श्रेष्ठ तथा शिक्षा, स्वास्थ्य तथा कृषि समितिमा कुमारी मोक्तान र एकालाल श्रेष्ठलाई मनोनयन गरिएको पाठकले बताए । समिति सदस्य मनोनयनलाई प्रदेशसभा बैठकले सर्वसम्मत अनुमोदन गरेको छ ।
प्रदेश सभाकाे बैठक अर्काे सूचना नभएसम्मकाे लागि स्थगित भएकाे छ । सभामुख पाठकले अर्को सूचना नभए सम्मकाे लागि बैठक स्थगित भएकाे जानकारी गराएका थिए ।