मकवानपुर । हेटौंडाका एक जनामा मृत्युपछी कोरोना भाइरस संक्रमण पुष्टि भएको छ । हेटौंडा १ जरुवाटोलमा ६१ वर्षिय बृद्धकाे साेमबार कोरोना परीक्षणका लागि स्वाब संकलन गरिएकाे थियो ।
उहाँकाे मंगलबार राती मृत्यु भएपछी बुधबार प्राप्त कोरोना परीक्षण रिपोर्टमा कोरोना संक्रमण देखिएको हेटौंडा उपमहानगरपालिकाका स्वास्थ्य शाखाका अधिकृत भोला चौलागाईले जानकारी दिनुभयो ।
हेटाैडाकाे प्रादेशिक कोरोना प्रयोगशालामा गरिएको परीक्षणमा कोरोना सङ्क्रमण पुष्टि भएको चौलागाईले बताउनु भयो ।मतृक हेपाटाइटिस, प्रेसर लगायतका रोगबाट ग्रसित भइ लामो समयदेखि उपचारत रहेकाे बताइएकाे छ।
सोमबार स्वाब नमूना सङ्कलन गरिए पनि निधन भएपछि उहाँको स्वाबको नमूना आज बिहान परीक्षण गरिएको हो । स्वाब नमूनाको चापका कारण तत्काल परीक्षण गर्न सक्ने अवस्था छैन । मृतक वृद्धमा कसरी सङ्क्रमण भयो भन्ने जानकारी हुन बाँकी रहेकाे चौलागाईले बताउनुभयाे ।
यसै बिच मृत्यु पश्चात कोरोना संक्रमण पुष्टि भएका हेटौँडा उपमहानगरपालिका वडा नंबर १ का बृद्धको शवलाई नेपाली सेनाले व्यवस्थापन गर्ने भएको छ । मकवानपुरका प्रमुख जिल्ला अधिकारी दिपकराज नेपालले कोभिड १९ को शव व्यवस्थापन कार्यविधि अनुसार नेपाली सेनाले जिल्लाको उपयुक्त स्थानमा शव व्यवस्थापन गर्ने बताउनु भयाे ।
प्रजिअ नेपालले भन्नुभयाे ‘नेपाली सेनाको शव व्यवस्थापन टोलीले काम सुरु गरिसकेको छ । अब चाँडै शव व्यवस्थापन हुनेछ ।’
हेटौँडा–हेटौँडा ६ गौरीटारस्थित आइसोलेसनमा कोरोना संक्रमितहरुप्रति स्वास्थ्यकर्मीले गरेको ब्यवहारबारे हेटौँडा अस्पताल प्रशासनले चासो व्यक्त गरेको छ ।
सामाजिक सञ्जाल तथा अनलाइन मिडियाहरुमा आइतबार बिहान साबुन बितरण गर्दा हु-याइएको, मास्क बितरण पनि व्यवस्थित नभएको तथा ‘बहिनी’ भनेर सम्बोधन गर्दा सिस्टर भन्नका लागि दबाब दिएको जस्ता घटनाहरु सार्बजनिक भएको थियो । स्वास्थ्यकर्मीका कमजोरी सार्बजनिक भएलगत्तै आइसोलेसनका इन्चार्ज डाक्टर सागर काफ्लेले स्वास्थ्यकर्मीहरुसँग छलफल गरी संक्रमितहरुको मनोविज्ञान नकारात्मक नहुनेगरी काम गर्न निर्देशन दिनु भएको छ ।
उहाँले साबुन फालिएको र मास्क फालिएको बिषयमा पनि स्वास्थ्यकर्मीहरुसँग सोधपुछ गर्नु भएको थियो । स्वास्थ्यकर्मीहरुले इन्चार्ज डाक्टर काफ्लेसँग साबुन बितरण गर्दा टाढैबाट दिइएको भन्दै सामान्य जबाफ दिएका थिए ।
‘अब जे जे भयो भयो, संक्रमितहरुलाई सम्मानपूर्वक व्यवहार सबैले गर्नुपर्छ’, छलफलमा डाक्टर काफ्लेले कर्मचारीलाई निर्देशन दिनु भएको छ । उहाँले दिदीबहिनी भनेर बोलाउँदा भावनात्मक रुपमा नजिक हुने भन्दै सिस्टर भनेर सम्बोधन गरिरहनुनपर्ने पनि स्वास्थ्यकर्मीहरुलाई स्पष्ट पार्नु भएको बताइएको छ । ‘हिँजोबाट सेवा सुरु गरेका हौँ, धेरै कुरा मिल्दैछ’, डाक्टर काफ्लेले भन्नुभयो–‘हामीहरुका व्यवहारले बाहिर नकारात्मक धारणा नबनोस् भन्नेमा हामी दृढ छौँ ।’ । गल्ती कमजोरीहरु भएका भए स्वीकारेर अघि बढ्ने क्रममा रहेको उहाँले बताउनुभयो ।
हेटौँडा अस्पताल विकास समितिका अध्यक्ष प्रकाश पौडेलले भर्खरै सुरु भएको सेवाबारे अनेकन कमीकमजोरी भएको हुन सक्ने भन्दै कमीकमजोरीबाट पाठ सिकेर अघि बढ्ने बताउनुभयो । उहाँले पहिलो दिन समयमै खाना समेत खुवाउन नसकिएको भन्दै सबै कुराहरु मिल्न अझै एक साता लाग्न सक्ने बताउनुभयो । ‘कर्मचारीहरुका तर्फबाट गल्ती कमजोरी भएमा सुधार्नका लागि समितिले पनि पहल गर्नेछ’, अध्यक्ष पौडेलको भनाई थियो–‘जसको सेवा गर्न बसेका छौँ, उ नै खुसी भएन भने सेवा गर्नुको अर्थ हुनेछैन ।’ सुधारकै क्रममा आफूहरु रहेको उहाँको भनाई छ ।
घटनाले संक्रमितहरुको स्वाभिमान र सम्मानपूर्वक उपचार पाउनुपर्ने मानव अधिकारको समेत उल्लंघन हुनसक्ने बहस भइरहँदा मकवानपुरका प्रमुख जिल्ला अधिकारी दिपकराज नेपालले गल्ती कमजोरी भएको भए सुधार गर्न वा स्वास्थ्यकर्मीको बैकल्पिक व्यवस्था गर्नका लागि अस्पताल प्रशासनलाई सुझाव दिइने बताउनुभयो ।
शुक्रबारदेखि गौरीटारमा आइसोलेसन सञ्चालनमा छ । संक्रमितहरुले पहिलो दिन नै खाना नपाएको, मास्क नपाएको, औषधीहरु समेत नपाएको भन्दै आलोचना भएको थियो । तर, हेटौँडा अस्पताल विकास समितिले सबै आलोचनाहरुबाट पाठ सिकेर सुधारका कामहरु गरिरहेको बताएको छ ।
मकवानपुर । समयमा उचित व्यवस्थापन नहुँदा हेटौंडा उपमहानगर–६ मा रहेको गौरिटार आइसोलेसनमा रहेका कोरोना संक्रमितहरु भोक भोकै बस्नु परेको छ ।
खाना दिन्छौ दिन्छौ भन्दै दिउँसो २ बजेसम्म खाजा र खानेकुरा नदिएको कोरोना संक्रमितहरुले गुनासो गरेका छन् । भोकले छटपटाएको बिरामीले भमिट गर्दा सम्म स्वास्थ्यकर्मीले वास्ता नगरेको आइसोलेशनमा बस्नेहरुले गुनासो गरेका छन् । कर्राको आइसोलेशनबाट बिरामी थपिएपछि स्वास्थ्यकर्मीहरुले झनै बिरामीको ख्याल गर्न नसकेको पाइएको छ ।
रंगशालाको ब्वाईज होस्टेलको रुपमा रहेको स्थानलाई कोरोना संक्रमण भएकाहरुलाई राख्न आइतबार पहिलो चोटि आइसोलेनको रुपमा सञ्चालन गरिएको हो, तर व्यवस्थापनमा कमजोरी हुँदा कोरोनासँग लडिरहेका संक्रमितहरुलाई दिनभर भोकै राखिएको छ । आइसोलेसनमा न्युनतम आधारभूत भौतिक तयारी समेत नगरी संक्रमितहरु राख्न थालेको संक्रमितको गुनासो छ ।
बाहिरी रुपमा आकर्षक भौतिक संरचना भएपनि आन्तरीक व्यवस्थापन नभएको उहाँहरुले बताउनु भयो । “बिहान देखि पानी खाएर बसिरहेका छौं, सोधपुछ गर्दा एकछिनमा आउँछ भनेर टार्ने गरिन्छ” एक जना संक्रमितले भन्नुभयो “२ बजेपछी दुईवटा जेरि र एउटा फुलौरा दिए ।” मदन भण्डारी स्वास्थ्य विज्ञान प्रतिष्ठान (हेटौंडा अस्पताल) अन्तर्गत रहेको आईसोलेसनले गम्भीर लापरबाही गरिरहेको छ ।
आइसोलेसनका व्यवस्थापन हेरिरहेका हेटौंडा अस्पताल विकास समितिका अध्यक्ष प्रकाश पौडेलले भान्छे नपाएर केहि समस्या भएको बताउनु भयो । उहाँले सकेसम्म काम गरिरहेको दाबी गर्दै नयाँ आइसोलेसनका लागि भान्छा र जनशक्ति नभएको तर चाँडै व्यवस्थापन गर्ने बताउनु भयो ।
३५ वटा वेड भएको हेटौंडाको श्रमिक माविमा बेडको अभाव भएपछि आइतबारबाट राष्ट्रिय खेलकुद प्रष्ठिान रङ्गशालामा रहेको हेस्टलमा आइसोलेशन तय गरिएको थियो ।
कोरोना संक्रमित लगातार थपिँदै गएपछि हेटौंडा उपमहानगरपालिका ६ गौरिटारमा रहेको केन्द्रीय खेलकुद प्रतिष्ठान (गौरिटार रंगशाला) क्षेत्रमा रहेको ब्वाइज होस्टललाई कोरोना आइसोलेसन वार्ड बनाइएको हो । व्यवस्थित आइसोलेसन बेडको अभाबका कारण कोरोना संक्रमण पुष्टि भएका बिरामिलाई होम आइसोलसनबाट निकाल्न हेटौंडामा व्यवस्थित आइसोलेसन वार्ड निर्माण गरिएको हो । यहाँ १ सय २० बेड क्षमताको आइसोलेसन वार्ड तयार भएसँगै कर्रामा रहेका र होम आइसोलेसनमा रहेका संक्रमितलाई गौरीटार लगिएको छ ।
३ तल्ले भवनमा सञ्चालनमा ल्याएको आइसोलेसनको तल्लो तल्लामा अस्पतालका कर्मचारी र उपचारको क्रममा खटिएका चिकित्सक सहितको टोली रहने व्यवस्था सहित वार्ड सञ्चालनमा ल्याएको कोबिड अस्पताल गौरीटारका इन्चार्ज डाक्टर सागर काफ्लेले बताउनु भयो । उहाँका अनुसार अहिले व्यवस्थित ढंगबाट काम गरीरहेका छौं, संक्रमितलाई सुबिधा पु¥याउने उद्देश्य सहित व्यवस्थापन मिलाइएको छ । अहिले कर्रामा बेड नभएर होम आइसोलेसनमा रहेका पेन्डिङ बसेका बिरामी र नयाँ थपिएका बिरामीलाई उपचारका लागि ल्याएको उहाँले जानकारी दिनुभयो ।
बेड अभाबका कारण होम आइसोलेसनमा रहेका बिरामीलाई उनीहरुको इच्छा अनुसार ल्याउने तयारी थालिएको छ । आउन चाहनेलाई ल्याउछौं अन्यथा घरमै न्युनतम मापदण्ड पुरा गरेर घरमै रहन चाहनेलाई चिकित्सकको सम्पर्कमा रहने गरी छोडिने डाक्टर काफ्लेले बताउँछन् । कर्राबाट २१ जना र थपिएका १२ जनालाई गौरीटार लगिएको छ । शनिबार लगिएका २१ जना मध्य होम आइसोलेसनमा रहेर उपचार गराइरहेका पनि रहेको उहाँले बताउनु भयो । शनिवार थपिएका २० जना मध्य १२ जना गौरीटार लगिएको छ ।
आइसोलेसन वार्डमा बेडको अभाब भएपछि ६० जना बिरामी घरमा रहेर उपचार गराईरहेका थिए । जिल्लामा १ सय ७५ जना कोरोना संक्रमितको संख्या पुग्दा हेटौंडामा मात्रै १ सय जना रहेका छन् । कर्रामा रहेको ३५ बेड क्षमताको आइसालेसनबाट बिरामी गौरीटार लगिएपछि केहि संख्यामा मात्र कर्रामा रहेको हेटौडा उपमहानगरपालिकाका सिनियर अहेब भोला चौलागाईले बताउनु भयो ।
शिक्षा मन्त्रालयले विद्यालयमा आइसोलेसन वार्ड नराख्न निर्देशन दिएपछि गौरिटार रंगशालाको भवनमा आइसोलेसन वार्ड सारिएको हो । कर्रामा पनि केहि समयमा लागि स्वाब संकलनका लागि आइसोलेसन वार्ड कायम राखिने बताइएको छ । कर्रामा ३५ बेड क्षमताको आइसोलेसन प्रदेश सरकार अन्तर्गत हेटौंडा अस्पतालले सञ्चालन गरेको हो ।
“व्यवहार सुधाराैं कोरोना परास्त गराैं ”
Tags: No Comments
मकवानपुर / मकवानपुर जिल्लाको मनहरी गाउँपालिका भारत–काठमाडौं जोड्ने राजमार्गमा अवस्थित छ । बोर्डरमा रहेको यस गाउँपालिकामा चैतदेखि हालसम्म १२ जनालाई कारोना पुष्टि भएको थियो । हाल सबैजना स्वस्थ्य भएर घर फर्केका छन्, यद्यपि कोरोना संक्रमणको संभावना उच्च भएको भन्दै हाल यस गाउँपालिकाको मनहरी बजार र बजार क्षेत्रबाट ५० मिटर दाँयाबाँया निषेधाज्ञा जारी रहेको छ । यस गाउँपालिकाले कोरोना नियन्त्रणको लागि विगतदेखि हालसम्म गरिरहेको प्रयासबारे
प्रमुख कार्यकारी अधिकृत देबराज चौलागाईंसँग गरिएको कुराकानिको सार :
मनहरी गाउँपालिकामा कोरोनाको अवस्था के छ ?
चिनको बुहान शहरबाट गत डिसेम्बर महिनामा शुरुवात भएको कोरोना भाईरस (कोभिड–१९) ले यति बेला विश्व आक्रान्त बनिरहेको छ । महामारीको रुपमा देखापरेको यस रोगको संक्रमण ढिलो गरि भएतापनि हाम्रो मुलुकमा समेत प्रवेश गरिसकेको छ । शुरुमा भारत तथा तेस्रो मुलुकबाट रोजगारी गरि फर्किएका नेपाली दाजुभाई दिदिबहीनीहरुमा फाट्टफुट्ट देखापरेको यसको संक्रमण हाल मुलुकका केही शहरहरुमा समुदायस्तरमा प्रवेश गरेको छ ।
यस संक्रामक रोगको प्रकोपबाट हामी बाँच्नु र हाम्रालाई बचाउनु अहिलेको प्रमुख आवश्यकता हो । संघ, प्रदेश तथा स्थानीय सरकार आ–आफ्नो भूमिकामा लागीपरिरहेको यस जटिल अवस्थामा तीनै तहकै सरकार बिच अझ बढि समन्वय र सहकार्य अपरिहार्य देखिन्छ । जनताको नजिक भएको र प्रत्यक्षरुपमा संग्लन रहनुपर्ने जिम्मेवारीका कारणले स्थानीय सरकारहरु बढि जागरुक र संवेदनशिल बन्नु पर्दछ भन्ने मेरो ठम्याई छ ।
रोग लागेपछि उपचार गर्नु भन्दा पहिला रोग लाग्नै नदिन स्थानीय सरकारहरुको भूमिका महत्वपुर्ण हुन्छ । संक्रमण फैलिरहेको क्षेत्रबाट आएका आफ्ना नागरिकलाई सुरक्षित रुपमा क्वारेन्टाइन गर्ने, आवश्यकता अनुसार परीक्षण गराउने, संक्रमित व्यक्तिलाई आईसोलेशन गर्ने कार्य जति संवेदनशिल भएर गरिन्छ त्यति नै संक्रमणको जोखिम कम हुन जान्छ ।
यस गाउँपालिकाले महामारी नियन्त्रणको लागि के कस्ता प्रयास गर्दै आएको छ ?
यस कार्यमा स्थानीय सरकारहरु शुरुबाट नै सक्रिय रुपमा संग्लन हुनु परेको यथार्थ हाम्रो सामुन्ने छर्लङ्ग छदैछ । मनहरी गाँउपालिका क्षेत्रबाट भारत तथा तेस्रो मुलुकमा रोजगारीका लागी जाने व्यक्तिहरुको संख्या उल्लेख्य रहेको सन्दर्रभमा हामीले शुरुबाटै ९२०७६ चैत्रको अन्तिम हप्ता ० बाट त्यस्ता व्यक्तिहरुको तथ्याङ्क लिन शुरु ग-यौं ।
यहाँका ४६ हजार ८ सय ५३ कुल जनसंख्या मध्ये करिव ३ हजार जना रोजगारीका लागी भारत, तेस्रोमुलुक र देशकै अन्यत्र रहेको संन्र्दभमा हामीले सोही बमोजिम क्वारेन्टाइन निर्माण र सञ्चालनको लागी ५ वटा स्थलहरु छनौट गरी तयारी सुरु ग-यौं । क्वारेन्टाइन निर्माण र सञ्चालन, राहत वितरण, जनचेतना मुलक कार्यक्रम, फेवर ल्किनिक सञ्चालन, स्वास्थ्यकर्मी घरभेट कार्यक्रम सुरुदेखि हालसम्म निरन्तर चलिरहेकै छन् । स्थानीय विपद व्यवस्थापन समितिको नेतृत्वमा सुरक्षाकर्मी, राजनैतिकदलहरु, रेडक्रस,सञ्चारकर्मी, समाजसेवीहरु सबैको सहयोग र समर्थन प्राप्त भईरहेको छ । पालिकाले निर्माण गरेकाे क्वारेण्टाइनहरूमा हाम्रा जनप्रतिनिधि ज्यूहरूले नियमित रेखदेख तथा त्यहाँ रहनुभएकाहरूकाे आत्मबल बढाउनकाे लागि लागिपरिरहनुभयाे ।

क्वारेण्टाइनमा रहेकाहरूसँग भेटघाटपछि तस्विर खिचाउँदै गाउँपालिका उपाध्यक्षा मनिला विष्ट ।
मनहरी गाउँपालिकाले हालसम्म करिव ३ हजार २ सय घरपरिवारलाई बन्दाबन्दिका कारण परेको संकट टार्न राहत वितरण गरिसकेको छ । यसैगरी करिब २ सय ५० जना आफ्ना नागरिकलाई देशका अन्य शहरहरु तथा भारतीय सिमा नाकाबाट उद्वार गरेर ल्याई क्वारेण्टाइन गरेको, करिब ३ सय ५० व्यक्तिको पिसिआर परीक्षण गराएको तथा कोरोना पोजिटिभ देखिएका १२ जना लाई आईसोलेसन पठाईएको छ । पोजेटिभ देखिएका व्यक्तिहरु पनि हाल स्वस्थ भएर घर फर्किसकेका हुंदा हाल मनहरी गाउँपालिकामा सक्रिय सक्रमित रहेका छैनन ।

यस गाउँपालिकाका स्थानीयवासीसँग के अपेक्षा गरेको छ पालिकाले ?
यो सबै कार्यमा जनप्रतिनिधि, राजनैतिक दल, कर्मचारी, सञ्चारकर्मी तथा स्वास्थकर्मीको महत्वपुर्ण साथ र सहयोग प्राप्त भएको छ । नेपाल सरकारको नीति निर्देशन तथा प्रदेश सरकारको समन्वयमा हालसम्म यस मनहरी गाँउपालिकामा कोरोना सक्रमण नियन्त्रण मै रहेको देखिन्छ ।
तर दिनानुदिन यसको जोखिम बढ्दै गईरहेको सन्दर्भमा हामी आमनागरिकहरु पनि थप सचेत र अनुशासित हुनुपर्ने देखिन्छ । व्यक्ति–व्यक्ति बिचको सामाजिक दुरी कायम गर्ने, नियमित साबुन पानीले हात धुने वा सेनिटाईजर प्रयोग गर्ने, अत्यावश्यक काम बाहेक घर बाहीर ननिस्कने तथा निस्कनुपर्दा अनिवार्य रुपमा माक्सको प्रयोग गर्ने गरि हाम्रो ब्यवहार सुधार गर्नुपर्ने देखिन्छं ।
हालसम्म काेराेनाको प्रभावकारी उपचार पद्धति पत्ता नलागेको हुंदा यसको सक्रमण हुनबाट आफूलाई जोगाउनु नै एकमात्र उपाय हो । तसर्थ आफ्ना बानि व्यहोरालाई सुधार गरी आफू र आफ्नालाई बचाउदै कोरोनालाई परास्त गरौं भन्न चाहन्छु ।
केन्द्रीय सरकारबाट कस्तो सहयोग पाइरहनु भएको छ ?
केन्द्रीय सरकारले नीति नियम बनाउने, अफ्ठ्यारा परिस्थितीहरुमा स्थानीय तहहरुलाई हामीले गर्नुपर्ने कामहरुमा सहजिकरण गर्ने, नीति निमय अनुसार काम भएन नभएको अनुगमन गर्ने हो त्यो भैरहेको छ । केन्द्र सरकारको तर्फबाट हुनु पर्ने सहजिकरण भएको छ, हामीले गरेको हेस्टेमा हैंसे भएकै छ ।
कोरोना रोकथामको लागि केन्द्रीय सरकारले चाल्नु पर्ने कदमहरुमा यहाँको केही सुझाव छन् की ?
कोरोना संक्रमणको रफ्तार मकवानपुर जिल्लामा पनि पछिल्लो साता ह्वात्तै बढेको छ । हामी (मनहरीवासी) तराइ र काठमाडौं जोड्ने बोर्डरमा छौ । यहाँका होटल व्यवसायहरुलगायत विभिन्न उद्योगहरु सञ्चालित छन्, । त्यसैले गत सोमबार रातिबाट आगामी साउन ३२ गतेसम्मको लागि यस गाउँपालिकाको मनहरी बजार क्षेत्रमा पनि निषेधाज्ञा जारी गरिएको छ । यो निषेधाज्ञा मात्रै कोरोना रोकथामको उपाय हैन । केन्द्र सरकारसँग यस पालिकाको तर्फबाट एउटै अनुरोध यो छ कि : कोरोना संक्रमण जाँचको लागि पीसीआर परीक्षण बढाउँदै यसलाई सहज बनाउनु प-यो । केन्द्र सरकारले सर्वसाधारण जनताको लागि पनि पीसीआर जाँच गर्ने नीति नियम बनाइदिने हो भने कोरोना फैलने अवस्थामा नियन्त्रणमा ल्याउन सकिने थियो ।
अन्तमा
सबै गाउँपालिकावासीलाइ संयमित भएर, काेराेना विरूद्ध लाग्न अनुराेध गर्दछु । यस पालिकाकाे गतिविधि यहाँकाे सञ्चार माध्यममा स्थान दिनुभइ सचेतना अभिवृद्विमा साथ दिनुभएकाेमा यहाँकाे सञ्चार माध्यमलाइ पनि धेरै धेरै धन्यवाद छ ।
काठमाडौँ / काेराेनाकाे जाेखिम बढेपछी आवतजावतमा कडाइ गर्न थालिएकाे छ । यसैबिच आजबाट गृह मन्त्रालयले मुलुकभरका जिल्ला प्रशासन कार्यालयलाई सवारी पास वितरण बन्द गर्न निर्देशन दिएको छ । ७७ वटै जिल्लाका प्रमुख जिल्ला अधिकारीलाई परिपत्र गर्दै मन्त्रालयले साउन २९ गते ‘अर्थात’ आजदेखि लागू हुने गरी सवारी पास वितरण नगर्न निर्देशन दिएको हो ।
कोभिड –१९ को जोखिम उच्च भएकाले नेपाल सरकारबाट विभिन्न समयमा भएको निर्णय र मन्त्रालयबाट भएको निर्देशनसमेतका आधारमा उक्त परिपत्र जारी गरिएको हो ।
“हालसम्म जारी हुँदै आएको सवारी पास व्यवस्थालाई अर्को व्यवस्था लागू नभएसम्मका लागि साउन २९ गते ‘अर्थात’ आजदेखि सवारी पास वितरण नगर्नू नगराउनुहुन आदेशानुसार अनुरोध छ”, मन्त्रालयद्वारा बुधबार जारी सूचनामा उल्लेख छ ।
यसअघि सरकारले अत्यावश्यक कामका लागि अन्तरजिल्ला जान सवारी पास वितरण गर्दै आएको थियो । पछिल्लो समयमा मुलुकभर कोभिड –१९ को संक्रमण बढ्दो छ । काठमाडौँ उपत्यकामा समेत सङ्क्रमण बढिरहेकाले प्रवेशमा कडाइ गरिएको छ । मकवानपुरकाे हेटाैंडा बजार र मनहरी गाउँपालिकाकाे मनहरी बजार क्षेत्रमा ३ दिन अगाडि अर्थात साेमबारबाट जारी गरीएकाे निषेधाज्ञा जारी छ । निषेत्धाज्ञाका कारण बजार क्षेत्रपूर्ण रूपमा सुनसान देखिएका छन् ।