हेटौंडा । मकवानपुरमा आइतबार एकै दिन थप ७२ जनामा कोरोना भाइरस संक्रमण पुष्टि भएको छ । संक्रमण देखिएकाहरु २ वर्षिय बालक देखि ७३ वर्षिय बृद्धा सम्म छन् । संक्रमित अधिकांश हेटौंडा उपमहानगरपालिका क्षेत्रका रहेका छन् ।
गत भदौ १९ गते स्वाब संकलन गरिएका २ सय ७५ जना मध्यमा ७२ जनामा संक्रमण देखा परेको उपमहानगरपालिकाका स्वास्थ्य अधिकृत भोलानाथ चौलागाईले जानकारी दिए ।
आज थपीएका संक्रमितमा ४३ जना पुरुष र २९ जना महिला रहेका छन् । आइतबार कैलाश गाउँपालिकाका ४ जना, मकवानपुर गढी गाउँपालिकाका २ जना, भीमफेदी गाउँपालिका क्षेत्रका ४ जना रहेका छन् । ६२ जना हेटौंडा उपमहानगरपालिका क्षेत्रका रहेकाे चाैलागाईले बताए ।

आँचल साहित्य कला पुञ्जकाे भर्चुअल भेटघाट
Tags: No Comments
मकवानपुर । आँचल साहित्य कला पुञ्ज मकवानपुरले मसिक नियमित भेटघाट जुममार्फत भर्चुअल गरेकाे छ । संस्थाले साे अवसरमा मकवानपुरमा कृयाशील पत्रकार तथा कवि शुभलक्ष्मी प्रभाका पाँच कविता सुनेकाे बताइएकाे छ ।
कवि प्रभाकाे कविता माथी अन्तरक्रिया तथा काव्य गाेष्ठी कार्यक्रम आयाेजना गरेकाे छ । आँचल साहित्य कला पुञ्जकी संस्थापक अध्यक्ष मुना अर्यालकाे प्रमुख अातिथ्यमा सम्पन्न कार्यक्रममा साहित्यकार शान्ति प्रियवन्दना, देवकी तिमल्सिना, नीरा शर्मा, अनिता अर्याल नेपाल, सविता तिमल्सिना, भवानी तिमल्सिना, अर्चना दाहाल, एलिजा पुडासैनी, ज्याेत्सना श्रेष्ठ, बगेकी गंगा, अनु राेक्का, शुभद्रा हुमागाई, चण्डिका गाैतम लगाएतले रचना वाचन गरेका थिए ।
पुञ्जले हरेक महिनाकाे तेस्राे शनिबार गर्ने साे कार्यक्रममा महिला साहित्यकारहरू मात्र सहभागी गराउँदै कार्यक्रम गर्दै आइरहेकाे संस्थाकी सचिव भावना सापकोटाले बताईन । कार्यक्रम संस्थाकी कार्यवाहक अध्यक्ष अनिता न्याैपानेकाे सभाधक्ष्यतामा कार्यक्रम भएको हाे ।
मकवानपुर । पश्चिम मकवानपुरको मनहरी गाउँपालिकामा शनिबार बृहत् रक्तदान कार्यक्रम अायाेजना गरिएकाे छ । मदन भण्डारी स्पोर्टस् एकेडेमी मनहरी गाउँपालिका कमिटी र सामुदायिक रेडियो मनहरी एफएमले आयोजना गरेको बृहत् रक्तदान कार्यक्रममा १२५ जनाले रक्तदान गरेका छन् ।
यो संख्या चालू आर्थिक बर्ष २०७७।७८ मा भएका रक्तदान कार्यक्रममध्येको सबैभन्दा बढी रहेको रक्त सञ्चार केन्द्र हेटौँडाले जनाएको छ । यसअघि २०७७ साउन यता मुस्लिम युवा समाजले ६७ जनाको रगत संकलन गरेको थियो ।
नेपालमा रेडक्रस स्थापनाको ५८ बर्ष पुगेको अबसर तथा कोरोना संक्रमणका बेला भएको रगत अभावलाई ध्यानमा राखी रक्तदान कार्यक्रम आयोजना भएको हो । अन्य थुप्रै युवाहरु रक्तदानका लागि तयार भएपनि रगत राख्ने ब्यागको अभावमा १२५ जनाको मात्रै रगत संकलन गर्न सकिएको आयोजक एकेडेमीका अध्यक्ष पुकार सुवेदीले बताए ।
कार्यक्रममा मनहरी गाउँपालिकाका सबै वडाहरु, राक्सिराङ र कैलाश गाउँपालिकाका युवाहरु समेत सहभागी भएका थिए । लामो समयपछि औपचारिक कार्यक्रममा सहभागी भएका युवाहरुले देशलाई अफ्ठ्यारो परेका बेला रगत दिएर सहयोग गर्न तत्पर रहेको बताएका थिए ।
रक्तदानअघि आयोजित छोटो औपचारिक कार्यक्रमलाई सम्बोधन गर्दै बागमती प्रदेश सभा सदस्य ओमबहादुर ग्लानले रगतको बिकल्प अहिलेसम्म पत्ता लाग्न नसकेको प्रसंग सुनाउँदै मानवीय हिसावले रक्तदान गर्नुजत्तिको पुण्य काम अर्काे नभएको बताए । मनहरी गाउँपालिका अध्यक्ष एकराज उप्रेतीले संकटका बेला युवाहरुको सक्रियतामा आयोजना भएको रक्तदान कार्यक्रमले सामाजिक क्षेत्रमा युवाहरुको अग्रसरता देखिने भन्दै प्रशंशा गरे ।
कार्यक्रममा गाउँपालिका उपाध्यक्ष मनिला बिष्ट, नेपाल रेडक्रस सोसाइटी मकवानपुरका कार्यबाहक सभापति लालबहादुर थापा, मन्त्री खेमराज सापकोटा, कोषाध्यक्ष पिताम्बर बास्तोला, कार्यालय प्रमुख लक्ष्मण भट्राई, रक्त सञ्चार केन्द्र प्रमुख टंक दाहाल, वडाध्यक्षहरु साधुराम अधिकारी, दिलबहादुर स्याङ्तान, राक्सिराङ गाउँपालिका ३ नं वडाध्यक्ष बाबुलाल स्याङ्तान, इलाका प्रहरी कार्यालय मनहरीका प्रमुख श्री शंकर श्रेष्ठ, शसस्त्र प्रहरी आइआरटी पोष्टका प्रमुख मानबहादुर खड्का, मकवानपुर उद्योग बाणिज्य संघ पश्चिम क्षेत्र समिति सभापति नारायण सुवेदी लगायतको सहभागिता रहेको थियो । एकेडेमीका अध्यक्ष पुकार सुवेदीले कार्यक्रमको सभाध्यक्षता गरेका थिए ।
मकवानपुर । जिल्ला समन्वय समिति मकवानपुरका प्रमुख रघुनाथ खुलालले कोरोनाबाट आफु जोगिएर समुदायलाई जोगाउने तर्फ लाग्न सबैलाई आग्रह गरेका छन् । शुक्रबार हेटौंडा उपमहानगरपालिका वडा नम्बर १९ का निर्वाचित जनप्रतिनिधि, राजनीतीक दलका प्रतिनिधि, टोलविकासका प्रतिनिधि, स्वास्थ्यकर्मी संगको भेटघाटका क्रममा उनले स्वास्थ्य मापदण्डको पालना गर्ने र गराउने कुरामा जोड दिँदै कोरोनाबाट जोगिने र जोगाउने तर्फ सबैलाई लाग्न आग्रह गरेका हुन ।
समुदायमा कोरोनाले पारेको प्रभाव र नियन्त्रणकालागि भए गरेका कामहरुको जानकारी लिने तथा आवश्यक परामर्श र सल्लाह आदान प्रदान गर्ने उदेश्यले बिगत केहि दिनदेखि प्रमुख खुलालले नियमित रुपमा हेटौंडा उपमहानगरपालिकाका विभिन्न वडाहरुमा छलफल कार्यक्रमलाई निरन्तरता दिएका छन् । सोहि क्रममा शुक्रबार १९ नम्बर वडा अध्यक्षलगायत अन्य निर्वाचित जनप्रतिनिधि, राजनैतिक दलका प्रतिनिधि, टोलविकास संस्थाका प्रतिनिधि, स्वास्थ्यकर्मीलगायतसंग छलफल गरेका हुन ।
सो क्रममा उनले समुदायमा जनचेतना अभिबृद्धि गर्ने, सामाजिक बिकृति फैलन नदिने, सामाजिक सद्भाव कायम राख्ने, स्वास्थय सम्बन्धी मापदण्डको पालना गर्ने र गर्न लगाउने कुरामा विशेष भूमिका खेल्न सम्पुर्णलाई आग्रह गरे । ‘बिशेष गरी सामाजिक दुरी,व्यक्ति–व्यक्तिबीचको दुरी कम्तीमा दुई मिटरको कायम गर्ने, घरबाट बाहिर निस्किँदा अनिवार्य मास्क लगाए निस्कने, साबुन पानीले नियमित हात धुने वा स्यानिटाइजरमार्फत हात सफा गरेमा कोरोनाको जोखिम धेरै कम हुने हुँदा समुदायमा यसबारेमा सचेतना अभिबृद्धिमा लाग्नुहोस’ उनले भने । समुदायमा संक्रमितलाई गरिने दव्र्यवहारलाई निरुत्साहित गर्ने र समाजिक सद्भाव कायम राख्न सचेतना अभिबृद्धि गर्ने कुरामा लाग्न उनले सबैलाई आग्रह गरे ।
छलफलकामा १९ नम्बर वडा अध्यक्ष नवराज सुवेदीले वडाको समग्र अवस्थाका बारेमा जानकारी दिँदै वडाहरुमा अभिभावकत्वको कमि महसुस गरेको बताए । सुवेदीले हाल सम्म वडाका १२ जनामाकोरोना संक्रमण पुष्टि भएको तथा दुई जनाको कोरोनाबाट ज्यान गएको र संक्रमित अन्यलाई होम आइसोलेसनमै राखिएको जानकारी दिँदै वडा स्तरबाट कोरोना नियन्त्रणका लागि सक्दो प्रयास भएको बताए । माथिल्लो निकायबाट कोरोना नियन्त्रणका लागि वडा कार्यालयलाई सहयोग प्राप्त नहुँदा केहि समस्या भएको उनले बताए । उनले वडामा जनप्रतिनिधिको नेतृत्वमा, राजनैतिक दलका प्रतिनिधि, टोल विकास समितिका प्रतिनिधिलगायतको समिति गठन गरेर काम गरेको जानकारी दिए ।
कोरोनाको महामारीपछि पहिलो पटक जिसस प्रमुख आउनुभएर वडाको अवस्था बुझ्नुका भएकोमा धन्यवाद दिँदै यसले आफुहरुलाई काम गर्न थप हौसला मिलेको उनले बताए । सो क्रममा प्रमुख खुलालले १९ नम्बर वडामा कोरोना संक्रमणबाट स्वर्गारोहण हुनुभएका परिवारका सदस्यहरुसंग समेत भौतिक दुरी कायम गरेर भेटघाट समेत गरेका थिए।
मुख्यमन्त्री र बानियाँले परेवा भीरमा कसरी ढाक्लान् लाज ?
Tags: No Comments
राष्ट्रिय बहसको बिषय बनेको राक्सिराङ गाउँपालिका ४ स्थित परेवाभीर खण्डमा सडक बनाउने बिषयमा त्यस क्षेत्रका प्रतिनिधि सभा सांसद विरोध खतिवडाले प्रतिबद्धता पूरा गरेका छन् ।
उनले परेवाभीर खण्डमा सडक निर्माण गर्ने प्रतिबद्धता जाहेर गरिरहँदा नेपाल कम्युनिष्ट पार्टीभित्रको जीवनमा नै हलचल आउने गरी सांसद खतिवडासहितका अभियन्ताहरुलाई ‘गुटबन्दी’ गरेको आरोप मात्रै लागेन, काँग्रेसपरस्त समेत भनियो ।
कारण थियो–राक्सिराङ गाउँपालिकाले परेवाभीर खण्डमा सडक निर्माणको बहसलाई उच्च विन्दुमा पुर्याएर बजेट समेत बिनियोजन गरिसकेको थियो । राक्सिराङ गाउँपालिकामा काँग्रेस नेतृत्वको सरकार छ । सांसद खतिवडाको परेवाभीर सडक खण्डका लागि संघीय सरकारबाट कुनै पनि शीर्षकमा बजेट बिनियोजन गरिछाड्ने प्रतिबद्धता जनाएपछि भने प्रमुख बिपक्षी दलका नेता तथा त्यस क्षेत्रका प्रदेश सांसद इन्द्रबहादुर बानियाँले पनि व्यक्तिगत खर्चमै बाटो बनाउने घोषणा गरे ।
राष्ट्रिय बहसकै बिषय बनेर मिडियाहरु परेवाभीर पुग्ने र युट्युबरहरुले समेत यही बिषयलाई उठान गर्न थालेपछि दबाबमा परेको बागमती प्रदेश सरकार पनि ‘बजेट नहाल्ने भनिएको होइन, अनलाइनले गलत समाचार दियो’ भन्ने लाइनमा उभिन बाध्य भयो । यही बीचमा राक्सिराङ गाउँपालिकाले २ करोड रुपियाँ यसै बर्ष खर्चिने गरी परेवाभीर सडक खण्ड निर्माणका लागि प्रक्रिया पनि सुरु गरिसकेको छ । जनताले परेवाभीरको सुधारिएको बलियो बाटो हेर्न तम्तयार भएर बसेका छन् ।
यो खण्ड निर्माण गर्नका लागि सबैभन्दा बढी आवाज संसदमा उठाउने यसै क्षेत्रका अर्का सांसद हुन् ओमबहादुर ग्लान । उनले यो खण्डबाट कोही मान्छे मरेमा बुद्धचोकमा ल्याएर दाह संस्कार गरिने धम्की पनि संसदबाट सरकारलाई दिएका थिए । तर, बजेट नछुटिएपछि बिरक्तिएर अब सरकारकै बिकल्प खोज्नुपर्ने हो कि भन्नेसम्मको आक्रोश पोख्न भ्याए उनले ।
यतिखेर गाउँपालिका र संघीय सरकारको तर्फबाट समेत गरी २ करोड रुपियाँ कार्यान्वयन भई परेवाभीर खण्डमा सडक बन्ने कुराले सबैभन्दा बढी खुसी सांसद ग्लानलाई लागेको छ । उनले सामाजिक सञ्जालबाटै धन्यवाद तथा आभार ब्यक्त गरेका मात्रै छैनन्, थाहासन्देशसँग प्रतिक्रिया दिँदै भनेका छन्–‘यो सुखद् खबरले मनमा निकै शान्ति मिलेको छ ।’
त्यसो त अर्थ मन्त्रालयले लेखेको पत्र देखाउँदै राक्सिराङ गाउँपालिका अध्यक्ष राजकुमार मल्लले संघीय सांसद खतिवडालाई धन्यवाद दिँदै खुसीको खबर सामाजिक सञ्जालमा लेखेका छन् । संघीय सरकारको लगानी थपिएको कुराले यतिखेर पश्चिम मकवानपुरको कैलाश, राक्सिराङ तथा धादिङका समेत गाउँहरु लाभान्वित भइरहँदा यतिखेर जनताले यो अभियानमा छुटेका नेताहरुबारे चिन्ता ब्यक्त गर्न थालेका छन् ।
जस्तो कि यसै क्षेत्रका सांसद बानियाँले अब के गर्लान् ? ‘उहाँले व्यक्तिगत खर्चमा बाटो बनाउँछु भनेर सुपरहीट हुन बोलेको कुरा हो’, एक स्थानीयले भने–‘सस्तो बोली उहाँकै लागि गलपासो हुने निश्चित थियो ।’ ब्यापारिक पृष्ठभूमिका बानियाँले चतुरतापूर्वक आफैले बाटो बनाउँछु भनिरहँदा अर्का सांसद ग्लान चाहिँ मौन देखिएका थिए । कतिपय मानिसहरु ग्लानले बुद्धचोकमा सद्गद् गर्नेसम्मको धम्की दिँदा बानियाँले पनि साथ दिएको भए प्रदेश सरकारले परेवाभीरमा बजेट हाल्न सक्थ्यो ।
आफ्नै क्षेत्रका जनताले दुःख पाएको कुरा सदनमा अरुले नै उठाउँदा समेत बानियाँले समर्थन जनाएनन् । कारण थियो,–यस भेगका जनताका पीडा मर्कासँग उनी अभ्यस्त थिएनन् ।
अब यतिखेर बानियाँ र बागमती प्रदेश सरकारका मुख्यमन्त्री डोरमणि पौडेलको अग्निपरिक्षा परेवाभीरमा हुँदैछ ।
स्थानीय तहका प्रमुख मल्ल र संघीय सांसद खतिवडाले बोलेको कुरा पूरा गरिसके । आम जनताले यतिखेर दुई तिहाई बढी सांसद भएको बागमती प्रदेश सरकारले परेवाभीरमा थप लगानी गरेर लाज जोगाउँछ कि जोगाउदैन भन्ने बिषय हेरिरहेको छ भने सस्तो लोकप्रियताका लागि बोल्ने बानियाँले ब्यक्तिगत लगानीमा परेवाभीरमा के योगदान गर्न सक्लान् ? यो सर्बत्र चासोको बिषय छ ।
(थाहासन्देश दैनिकबाट)