मकवानपुर । ११ औं जिल्ला अधिवेशनबाट निर्वाचित नेपाल कम्युनिष्ट पार्टी (एमाले) मकवानपुरका नवनिर्वाचित पदाधिकारी र सदस्यहरुले मंगलबार पद तथा गोपनियताको सपथ ग्रहण गरेका छन् ।
मंगलबार एमाले मकवानपुरको पार्टी कार्यालय हेटौंडामा भएको कार्यक्रममा अध्यक्ष एकलाल श्रेष्ठलाई निर्वाचन मण्डलका अधिकृत अर्जुन अर्यालले सपथ ग्रहण गराएका हुन् । यस्तै, उपाध्यक्ष लालबहादुर थापा, सचिव नविन सिग्देल, उपसचिव हिदम लामा र सीता विष्टलाई अध्यक्ष श्रेष्ठले सपथ ग्रहण गराएका हुन् ।
यसैगरी, अध्यक्ष श्रेष्ठले सदस्यहरु क्रमशः जुना दाहाल, सुनिल मोक्तान, मदन दाहाल, रमिला सापकोटा, फुर्वा दोर्जे लामा, सुमित्रा काफ्लेलाई सपथ ग्रहण गराएका हुन् । एमालेका निवर्तनमान अध्यक्ष तथा अध्यक्ष पदका प्रत्याशी बद्रीप्रसाद लम्सालको अध्यक्षता भएको कार्यक्रममा बागमती प्रदेशका पूर्व मुख्यमन्त्री डोरमणि पौडेल, निर्वाचन मण्डलका अध्यक्ष रामेश्वर राना, कृष्णप्रसाद दाहालसहितका नेताहरुको आतिथ्यता रहेको थियो ।
एमाले मकवानपुर जिल्ला अधिवेशन गत पुस २३ गतेदेखि २५ गतेसम्म भएको थियो । ११ औँ जिल्ला अधिवेशनले मकवानपुरमा अध्यक्ष एकालाल श्रेष्ठको नेतृत्वमा १ सय ५ सदस्यीय जिल्ला कमिटि निर्विरोध चयन गरेको जनाएकाे थियो ।

मकवानपुर । पछिल्लो २४ घण्टामा १२ हजार ८ जना कोरोना संक्रमित थपिएका छन् । थप १२ हजार ८ जनामा कोरोना भाइरस (कोभिड-१९) को संक्रमण पुष्टि भएको स्वास्थ्य तथा जनसंख्या मन्त्रालयले जनाएकाे छ । साेही अवधीमा काेराेना संक्रमण भएका ८ जनाको मृत्यु भएको छ ।
मन्त्रालयका अनुसार १८ हजार १ सय ३ नमुनाको पीसीआर परीक्षण गर्दा ९ हजार ४ सय ३२ तथा ७ हजार ८ सय ६ नमुनाको एन्टिजेन परीक्षण गर्दा २ हजार ५ सय ७६ जनामा संक्रमण पुष्टि भएको हाे । मंगलबार थपिएका समेत नेपालमा कोरोना संक्रमितको कूल संख्या १० लाख ४५ हजार ६ सय ३४ पुगेको छ । मंगलबार मृत्यु भएका थप ८ जना समेत मृत्यु हुनेको कूल संख्या ११ हजार ६ सय ६७ पुगेको छ । यसैगरी ८ लाख २७ हजार २ सय ७९ जना संक्रमणमुक्त भएका छन् ।
हाल देशभरमा ८८ हजार ९ सय ३४ सक्रिय संक्रमित छन् । मन्त्रालयका अनुसार हाल देशभर सक्रिय संक्रमितमध्ये ८७ हजार १ सय १७ जना होम आइसोलेसनमा रहेका छन् भने १ हजार ८ सय १७ जना संस्थागत आइसोलेसनमा छन् । कोरोनाका बिरामीमध्ये २ सय ४५ जना आईसीयू र ४४ जना भेन्टिलेटरमा उपचाररत् छन् ।
मकवानपुरमा थप १ सय ४६ जनामा कोरोना संक्रमण
मकवानपुरमा मंगलबार थप १ सय ४६ जनामा कोरोना भाइरस संक्रमण पुष्टि भएको छ ।
पछिल्लो २४ घण्टामा १ सय १९ जनामा पीसीआर परीक्षण गर्दा ७८ जना र १ सय २१ जनामा एन्टीजेन परीक्षण गर्दा ६८ जना गरि थप १ सय ४६ जनामा कोरोना संक्रमण भएकाे स्वास्थ्य कार्यलय मकवानपुरले जनाएको छ ।
काेराेना पुष्टि भएकाहरुमा १ सय २ जना हेटौंडा उपमहानगरपालिका भित्रका रहेका छन् । १८ जना मकवानपुरगढी गाउँपलिकाका, १६ जना मनहरी गाउँपालिकाका, ८ जना थाहा नगरपालिकाका र २ जना बकैया गाउँपालिका भित्रका रहेका छन् ।
यसैगरि,जिल्लामा आज थप २ सय ३६ जना संक्रमितले कोरोना जितेका छन् । हाल जिल्लामा १ हजार ६ सय २७ जना सक्रिय संक्रमित उपचाररत रहेका छन्।
मकवानपुर । मकवानपुरमा १ सय ६६ जना काेराेना संक्रमित थपिएका छन् । मकवानपुरमा साेमबार सोमबार १ सय ६६ जनामा कोरोना संक्रमण पुष्टि भएको स्वास्थ्य कार्यालय मकवानपुरले जनाएकाे छ । पछिल्लो २४ घण्टामा कोरोना परीक्षण गराएका ४ सय ९२ जनामध्ये उक्त संख्यामा काेराेना संक्रमण पुष्टि भएको हो ।
पीसीआर विधिबाट १ सय ३५ परीक्षण गर्दा ९३ जनामा र एन्टिजेन विधिबाट ३ सय ५७ परीक्षण गर्दा ७३ जनामा कोरोना संक्रमण पुष्टि भएको कार्यालयले जनाएकाे छ । संक्रमण पुष्टि हुनेमा १ सय ४० जना हेटौंडा उपमहानगरपालिका रहेका छन् । यसैगरी थाहा नगरपालिकाका १२ जना, मनहरी गाउँपालिकाका ११ जना, मकवानपुगढी गाउँपालिकाका २ जना र बकैया गाउँपालिकाका १ जना रहेका छन् । याे सँगै मकवानपुरमा हालसम्म कोरोना संक्रमण हुनेको संख्या ५९ हजार १ सय ८७ जना पुगेको छ ।
यस्तै पछिल्लो २४ घण्टामा नै होम आइसोलेसनमा उपचाररत हेटौंडाका १३ जना र मनहरीका ७ जना गरी २० जना कोरोनामुक्त भएका छन् । जिल्लामा हाल १ हजार ७ सय १७ जना कोरोना भाइरसका सक्रिय संक्रमित रहेका छन् । जसमा १० जना संस्थागत आईसोलेसनमा र १ हजार ७ सय ७ जना होम आईसोलेसनमा नै रहेर उपचाररत रहेको स्वास्थ्य कार्यालयले जनाएको छ ।
संस्थागत आइसोलेसनमा रहेका १० जना हेटौंडाका हुन् भने होम आइसोलेसनमा हेटौंडाका १ हजार २ सय ३४ जना, मनहरीका २ सय ५ जना, मकवानपुरगढीका १ सय जना, थाहाका ९३ जना, बकैयाका ४० जना, भीमफेदीका २० जना, कैलाशका ६ जना, इन्द्रसरोबरका ५ जना तथा बागमती र राक्सिराङका २/२ जना रहेका छन् ।
२५ प्रतिशत स्वास्थ्यकर्मीमा कोरोना पुष्टि
मकवानपुरमा कार्यरत स्वास्थ्यकर्मीमध्ये २५ प्रतिशतभन्दा बढीलाई कोरोना भाइरस (कोभिड–१९) संक्रमण पुष्टि भएको छ । कोरोनाको तेस्रो लहर सुरु भएयता जिल्लामा कार्यरतमध्ये २५ प्रतिशत अर्थात् १ सय २५ जना स्वास्थ्यकर्मीमा संक्रमण पुष्टि भएको स्वास्थ्य कार्यालय मकवानपुरका निमित्त प्रमुख भीमसागर गुरागाईंले जानकारी दिए ।
गुरागाईंका अनुसार सबैभन्दा बढी हेटौंडा अस्पतालका ५९ जना स्वास्थ्यकर्मीमा कोरोना पुष्टि भएकाे छ । यसैगरी, मनहरी प्राथमिक स्वास्थ्य केन्द्र र स्वास्थ्य चौकीका २२ जना, हेटौंडा उपमहानगरपालिकाभित्रका स्वास्थ्य चौकी र शहरी स्वास्थ्य केन्द्रका १६ जना, कैलाश गाउँपालिकाअन्तर्गत कार्यरत ४ जना स्वास्थ्यकर्मीमा संक्रमण पुष्टि भएको हो ।
यस्तै, जिल्लामा कोरोनाविरुद्धको खोपको पहिलो मात्रा लगाउनेको संख्या ८२ प्रतिशत र दोस्रो मात्रा लगाउतेको संख्या ६१ प्रतिशत पुगेको स्वास्थ्य कार्यालयले जनाएको छ । चेपाङ बाहुल्य क्षेत्र राक्सिराङ र कैलाश गाउँपालिकामा ३ दिनमा २ हजार ५ सय जनाले खोप लगाएको गुरागाईंले बताए ।
मकवानपुर । मकवानपुरको मकवानपुरगढी गाउँपालिकामा २ सय ५९ औं विजय उत्सव मनाईएको छ ।
२ सय ५९ वर्ष अघि माघ १० गतेका दिन गोरखा सेना र विदेशीबीच भएको युद्धमा गोरखा सैनिकले पहिलो पटक विदेशी सेना अर्थात मुगल सेनालाई पराजित गरेको थियो । सोहि दिनको स्मरणमा हरेक वर्षको माघ १० गते मनाउँदै आईएको विजय उत्सव यस वर्ष भने कोभिड १९ संक्रमणको जोखिमलाई मध्यनजर गर्दै सामान्य ढङ्गले मनाईएको छ ।
एतिहासिक मकवानपुरगढी विजय उत्सव मूल समारो समिति मकवानपुरगढीको आयोजनामा भएको विजयी उत्सव कार्यक्रममा मकवानपुर क्षेत्र नंबर १ का सांसद कृष्णप्रसाद दाहालको प्रमुख आतिथ्यता रहेको थियो । कार्यक्रममा गढी दरबार परिसरमा नेपाली सेनाले निर्माण गरेको मकवानपुरगढी र नेपाली सेना सम्बन्ध अङ्कित शिलालेख बोर्ड तथा दरबार परिसरमा झन्डोत्तोलन गरिएको थियो ।
गाउँपालिकाका अध्यक्ष बिदुर हुमागाईंको अध्यक्षतामा भएको विजय उत्सव कार्यक्रममा नेपाली सेनाका २८ नंबर गणका प्रमुख सेनानी भाइकाजी थापा,पुरानो गोरख गणका गुणराज अधिकारी,गाउँपालिकाको उपाध्यक्ष हर्कमाया रुम्बा,गाउँपालिकाका प्रमुख प्रशासकीय अधिकृत रामकुमार पुडासैनि,वडा अध्यक्षहरु,सदस्यहरु,कार्यपालिका सदस्यहरु,राजनीतिक दलका प्रतिनिधिहरुको सहभागिता रहेको थियो ।

मुगल सेनाका फौज पराजित भएपछि उत्साहित बनेका पृथ्वीनारायण उत्सवमा सहभागी हुन मकवानपुरगढी पुगेका थिए । सेनवंशीय मकवानपुरका अन्तिम राजा दिग्वन्धन सेन मकवानपुरगढी अन्तर्गत रहेको हरिहरपुर गढीको लडाइ हारेपछि बंगालका नवाब मीर कासिम अलीसँग सहयोग माग्न पुगेका थिए । नबाव अलीको सहयोगमा २ हजार लडाकु र १ हजार बन्दोबस्तीसहित ३ हजार फौज लिएर गोर्खा नियन्त्रणमा रहेको मकवानपुरगढीमा बिक्रम सम्वत १८१९ माघ १० गते आक्रमण गरिएको थियो ।
उक्त लडाईमा मुगलका करिब सत्र सय फौज र गोर्खाली फौज तर्फ करिब ३० जनाको मृत्यु भएको थियो । उक्त युद्धमा गौर्खाली सेनाले ५ सय भन्दा बढी आधुनिक हातहतियार र शक्तिशाली तोप २ थान हात पारेको थियो ।
मकवानपुरगढीमा रहेको नन्दु शाहको नेतृत्वको फौज र पृथ्वीनारायण शाहले दहचोकबाट पठाएको वंशीराज पाण्डेको फौजसँग माघ १० गते मीर कासिमका सेना पराजित भएकाले सोही दिन जीत हासिल गरिएकोले विजय उत्सव मनाउने गरिएको हो ।
मकवानपुर/मनमा सकारात्मक संकल्प छ भने, जस्तोसुकै समयमा पनि सकारात्मक योजना बुन्न सकिन्छ । यसको गतिलो उदाहरण बनेका छन्, हेटौंडा उपमहानगरपालिका वडा नं ९ का वडा अध्यक्ष लक्ष्मणप्रसाद भण्डारी । उनैको नेतृत्वमा विगतमा डरलाग्दो झाडीको रुपमा रहेको र वर्षायाममा स्थानीयवासीको लागि अभिसाप बनेको खहरेले पार्कको रुप लिदैंछ ।
एक स्थानीय तह एक पार्क निर्माण गर्ने अबधारण अनुसार पार्क निर्माणको खोजिमा रहेको वडा कार्यालयले खहरेको झाडी सफा गरेर पर्यटकीय स्थल बनाएको हो । जहाँ स्थानीय वडावासीदेखि सांसद र प्रदेश सरकारले हेस्टेमा हैंसे गरे ।
यसरी जन्मियो पार्कको अबधारण
पहिलो चरणमा कोरोना भाइरसको प्रकोपले देशव्यापी लकडाउन भयो । दैनिक ज्याला मजदुरी गरेर खाने वर्गहरुको चुल्हो बल्न छाड्यो । छाक टार्नकै लागि दैनिक ज्यालामजदुरीमा जानेहरुको बालबालिका भोकभोकै पर्न थालेपछि सबैजसो स्थानीय तहहरुले खाद्यान्न वितरणको कार्यक्रमहरु अघि सारे । हेटौंडा उपमहानगरपालिका –९ ले पनि खाद्यान्न वितरण ग-यो । स्वार्थ र लोभले भरीएका मानिस कोही न केही जहाँ पनि भेटिन्छन्, यहाँ पनि भेटिए । घरमा खाद्यान्न प्रर्याप्त भएका, काम गर्न लाज मान्नेहरु पनि राहत थाप्न आए । खानै पाइन भन्दै राहत लिन आउनेलाई दिनै प-यो । वडा अध्यक्ष भण्डारीलाई यसरी सही काम भएको लागेन । राहतमा वितरण गरेको चामल गाईलाई खुवाएको आफैंले देखे । “यस्तो चामल हामी खादैनौ, उर्जा खान्छौं भन्दै चामल गाईलाई खुवाए, अनि मैले राहत वितरण गर्ने सोच फेरे” भण्डारी भन्छन् । सित्तैमा पाएपछि लिने र फाल्ने परम्परा हटाउन श्रममा आधारीत राहत वितरण थाले उनले ।

पार्क निर्माणको सपनाले अब मुर्त रुप लिने यहि अवसर बन्न सक्छ भन्ने सोच झ्वाट्ट आयो । बजेटको अभावको कारण डरलाग्दो झाडी फाँड्न सकिएको थिएन । लकडाउनमा खाद्यान्नको समस्या हुनेले आफ्नो घरेलु हतियार प्रयोग गरेर झाडी फाँड्नमा सहभागी हुने र साँझ राहत लिएर फर्कने भन्ने उर्दी टोल विकास मार्फत उनले आफ्नो वडावासीलाई सुनाए । अनि साँच्चै राहत आवश्यक पर्नेहरु काममा आउन थाले । वडा अध्यक्ष भण्डारी आफ्नो निजी गाडीमा राहत बोकेर बाड्न थाले ।
अहिले त्यही विगतको डरलाग्दो झाडी सबैको आकर्षणको केन्द्र विन्दु अर्थात व्यवस्थित दिव्य बाल उद्यान बन्ने क्रममा छ । पिकनिक स्पोट सहितको पार्क । हेटौंडा–९ बेतखोल्सी सामुदायिक वन क्षेत्र र खोलाको किनारमा रहेको १८ बिगाहा जमिन अब विगतको जस्तो पस्नै डराउनु पर्ने झाडी छैन । बरु मन बहालाउने रहर लाग्दो पार्कमा परिणत हुँदै छ । पार्कको केही संरचना निर्माण भैसकेको छ ।

पार्क प्रवेश गर्ने मुख्य गेट निर्माण गरिएको छ । प्रवेश गर्ना साथ विभिन्न रङ्गको वाटर फाउण्डेसन निर्माण सम्पन्न छ । त्यसपछि बनेको छ कम्युनिष्ट नेता मदनकुमार भण्डारी र जीवराज आश्रितको आकर्षक प्रतिमा । यसैगरी शान्तिको प्रतिक गौतम बुद्धको प्रतिमा राखिएको छ ।
केही माथि नेपाल आमाको प्रतिमा राख्ने योजना रहेको वडा अध्यक्ष भण्डारीले बताए । “नेपाल आमाको प्रतिमा हामीले सबै भुगोलको सम्मान दर्शिने गरि राख्ने छौं” भण्डारीले भने । उनलका अनुसार नेपाल आमाको प्रतिमामा हिमाल पाहाड तराईवासीको भेषभुषा झल्कने गरी बनाइने छ । यसै गरी अन्य अन्य राष्ट्रिय बिभुतीहरुको प्रतिमा पनि राखिनेछ ।
एक स्थानीय तह एक बाल उद्यान नीति अनुसार यो पार्क निर्माण गर्न लागिएको हो । हालसम्म पार्क निर्माणको लागि गत आर्थिक वर्षमा ४५ लाख र चालु आर्थिक वर्षमा ३२ लाख खर्च भैसकेको छ । पार्क निर्माणको लागि बागमती प्रदेश सरकारले सबैभन्दा बढी लगानी गरेको छ । हेटौंडा उपमहानगरपालिका, ९ नम्बर वडाबाट पनि बजेट लगानी गरिएको भण्डारीले बताए । पार्कमा आन्तरीक तथा बाह्य रुपमा पिकनिक खाने रमाइलो गर्नको लागि स्पोट पनि तयारी रहेको छ ।

पार्क भित्र मानव सेवा आश्रमले गुलाब बगैँचा निर्माण गर्दै छ, जहाँ संसारमा पाइने सबै प्रजातिको गुलाबका फूलहरु फुल्नेछन् । वनस्पति कार्यालय हेटौंडा, सियान पुनस्र्थापना केन्द्र, गोर्खा लहरीले निश्चित स्थान लिएर आकर्षक व्यवस्थापन गर्ने काम जारी छ । “अहिले पनि मर्निङ वाक गर्न आउने आनन्द अनुभुति गर्छन” उनले भने । झाडीको रुपमा रहेको यो स्थानमा कोरोना महामारीको पहिलो लरहमा श्रममा आधारीत राहत वितरण कार्यक्रम गरेर झाडी हटाइएको थियो ।
खोलाको बगर भएकोले बिरुवा हुर्कने माटो भर्न समय लागेको उनले बताए । “बिरुवा हुर्काउन माटोकै अभाव छ, हामी आत्तिएका छैनौ, पानीको पूर्ण व्यवस्था भएकोले पनि अब धेरै समय लाग्दैन” उनले भने ।

“वर्षायाममा गाउँ नै बगाउला जस्तो गरी आउने खहरे खोलाको बगरमा पार्क बनाउने सपना देखेकै थिएनौ” स्थानीय आरबी पौडेलल भने “इच्छा भयो भने सकिने रहेछ ।” खोलाले बस्ती कटान गरेर आजित थियौ, तारबेर गरेर विस्तारै व्यवस्थित गर्दै थियौ अब त पर्यटकीय क्षेत्र बन्यो उनले भने ।
कोरोनाको समयमा दैनिक ३० जनाका दरले भौतिक दुरी कायम गर्दै काम गरिएको उनले सुनाए । झाडी सफा गर्न झण्डै २ सय जनाले श्रमदान गरेको बेतखोल्सी सामुदायिक वनका अध्यक्ष बासु प्याकुरेले बताए । त्यस लगतै लागत सहभागितासहित उपमहानगरपालिकाले प्रदान गरेको बजेटबाट पार्कमा बाटो खोल्ने, कम्पाउन्ड पर्खाल लगाउने कार्य भएका उनले बताए ।
भण्डारीले जहाँ हात हाल्छन्, त्यहाँ उदाहरणीय व्यवस्थापन गर्दछन् । उनले व्यवस्थापन गरेको बेतखोल्सी सावउस र यसै बाल उद्यानसंगै जोडिएको प्राथमिक बिद्यालय सुधार पनि उत्कृष्ट /उदाहरणीय छ।