मकवानपुर । मकवानपुर प्रहरीले पेट्रोलियम पदार्थ अबैध रुपमा बिक्री गर्ने ट्याङ्कर चालक सहित ४ जनालाई नियन्त्रणमा लिएकाे छ ।
नेपाल आयल निगम, अमलेखगंजबाट नेपाल आयल निगम, थानकोट डिपोकाे लागि पेट्रोलियम पदार्थ लैजादै गरेको ना.४.ख ९३७७ नम्बरको ट्याङ्करबाट अवैध रूपमा पट्रोल झिक्ने कार्य भईरहेको अवस्थामा मकवानपुर प्रहरीले उक्त ट्याङ्कर चालक तथा पेट्रोल पम्पमा काम गर्ने ३ जनालाई नियन्त्रणमा लिइएकाे जनाएकाे छ ।
मकवानपुरकाे मनहरी गाउँपालिका वडा नं. ८ स्थित जय शिव शरणम् फ्यूल सेटर प्रा.लि. उक्त ट्याङ्करबाट पेट्राेलियम पदार्थ झिक्दै गरेका अवस्थामा चालक पम्पमा काम गर्ने ३ जनासहित ४ जनालाई नियन्त्रणमा लिइएकाे जिल्ला प्रहरी कार्यालय मकवानपुरले जानकारी दिएकाे छ । नियन्त्रणमा लिइएका उनीहरुलाई थप अनुसन्धान भइरहेकाे प्रहरीले जनाएकाे छ ।
मकवानपुर । मकवानपुरकाे हेटौंडा उपमानगरपालिका ४ स्थित भुटनदेवी माध्यमिक विद्यालय (प्राविधिक शिक्षालय) का प्रधानाध्यापक माधवप्रसाद दाहालले सेवाबाट अवकाश पाएका छन् । उमेर हदका कारण अवकाश भएका उनकाे आइतबार बिदाइ गरिएको छ ।
गत शनिबारबाट ६० वर्षे उमेर हदका कारण अनिवार्य अवकाश भएपछि आइतबार बिद्यालयले उनकाे बिदाइ गरेको हो । दाहालको अवकाश पश्चात निमित्त प्रअकाे जिम्मेवारी विद्यालयमै कार्यरत सहायक प्रअ सूर्यप्रसाद घिमिरेलाई दिइएको छ । दाहालकाे बिदाइ कार्यक्रममा निमित्त प्रअ घिमिरेकाे स्वागत समेत गरिएकाे हाे ।
दाहाल ५ जेठ २०४८ मा माध्यमिक तहको गणित बिषय शिक्षकको रुपमा भुटनदेवी माविमा नियुक्त भइ करिब ३५ वर्ष सेवारत रहे । २०६३ सालमा स्थायी नियुक्ति भए पश्चात दाहाल ७ कात्तिक २०६७ देखि उक्त बिद्यालयको प्रअ नियुक्त भइ कार्यरत थिए । उहाँकाे प्रअ कार्यकालमा २०७० सालबाट साधारणतर्फ अंँग्रेजी माध्यमसँगै प्राबिधिक धारतर्फ पनि पठनपाठन शुरु भएको विद्यालयले जनाएकाे छ । करिब ७ सयको संख्यामा अध्ययन रहेकाे विद्यालयमा साधारण र प्राविधिक धारतर्फ समेत गरि २४ सय बिद्यार्थीहरु अध्ययनरत छन् ।
बिदाइ कार्यक्रममा दाहालले भने ‘विद्यालय मेरो मुटु हो, मलाई माया गरिरहँदा विद्यालयको शैक्षिक विकासमा समेत योगदान गर्नुहाेस् ।’ बिद्यालयले समपसापेक्ष परिस्कृत बिषय तथा कार्यक्रमहरु थप्दै जानुपर्ने सुझाव समेत दिए । उनले विद्यार्थी संख्या वृद्धिसँगै गुणस्तरीय शिक्षामा समेत ध्यान दिनुपर्ने उनले जोड दिए । आफू निवृत भए पनि बाँकी समय समेत शिक्षासँगै सामाजिक क्षेत्रमा विताउने उनले बताए ।
बिदाइ कार्यक्रममा हेटौंडा उपहानगरपालिका २ नम्बर वडाध्यक्ष तथा भुटनदेवी अल्मुनाई एसोशियसन अध्यक्ष बिष्णु गोपाल महर्जन, विद्यालयका निमित्त प्रधानाध्यापक सुर्य प्रसाद घिमिरे, श्रमिक माविका प्रअ तथा शैक्षिक गुणस्तर सुधार समिति ४ नम्बर वडा संयोजक श्रीराम दाहाल, विद्यालयका पूर्व प्रधानाध्यापक देव श्रेष्ठ लगायतले दाहालकाे सेवा निवृत्त जीवन सहज क्रियाशीलताकाे कामना गरेका थिए ।
विद्यालय व्यवस्थापन समितिका अध्यक्ष एवं हेटौंडा ४ का वडाध्यक्ष नवीन सिग्देलको प्रमुख आतिथ्यतामा भएको कार्यक्रममा आधुनिक माविका प्रअ रामसागर गुरागाईं, विद्यालय व्यवस्थापन समिति सदस्यहरु, शैक्षिक व्यक्तित्व तथा बिद्यालयका शिक्षक, कर्मचारीलगायतकाकाे उपस्थिति थियो ।
मकवानपुर । अविरल वर्षासँगै पहिरो खस्दा हेटौंडा–कुलेखानी–सिस्नेरी–दक्षिणकाली सडकखण्ड अवरुद्ध भएकाे छ । मकवानपुरको इन्द्रसरोवर गाउँपालिका वडा नं. ३ ज्यामिरेमा पहरो खस्दा उक्त सडकखण्ड अबरुद्ध भएकाे मकवानपुर प्रहरीले जनाएकाे छ ।
निरन्तर परिरहेको वर्षाका कारण शनिबार साँझ गएको पहिरोले सडक पूर्ण रूपमा बन्द भएको जिल्ला प्रहरी कार्यालय मकवानपुरले जनाएको छ । प्रहरीका अनुसार सडक डिभिजन कार्यालयकाे समन्वयमा पहिरो खसेको स्थानमा बाटो खुलाउने प्रयास भइरहेको छ । प्रहरीले यात्रुहरूलाई आवश्यक नपरी यो सडक प्रयोग नगर्न र वैकल्पिक मार्ग प्रयोग गर्न आग्रह समेत गरेको छ । प्रहरीका अनुसार हेटौंडा काठमाडो जाने अन्य सडक खण्डमा अवरोध रहेकाे छैन ।
मकवानपुर । भ्रामक सूचना बीच सत्य–तथ्य समाचारको जिम्मेवारी बढाउने बिषयमा हेटौंडामा अन्तरक्रिया गरिएको छ । कार्यक्रममा जेन–जी आन्दोलनपछी पत्रकारिता क्षेत्रमा समस्या र चुनौती पनि उत्तिकै बढेको र अहिलेको अवस्थामा विभिन्न सामाजिक सञ्जालमा आएका भ्रामक खवरहरुलाई सञ्चार माध्यमहरुले चिरेर सत्य समाचार नागरिकलाई पस्कनु अहिलेको आवश्यकता रहेको बताएका छन् ।
कार्यक्रममा नेपाल पत्रकार महासंघ बागमती प्रदेशका अध्यक्ष कृष्णसारु मगरले अहिलेको अवस्थामा पत्रकार झनै जिम्मेवार भएर नागरिकलाई आधिकारिक सूचना प्रदान गर्नुपर्ने बताए । पत्रकारका लागि सरकारपक्ष र नागरिक पक्षबाट पनि निकै चुनौती खेप्नुपरेको उनकाे भनाई छ । तर, पत्रकारले लेख्ने विषयमा भने चुनौतीको सामना गर्दै अगाडी बढ्नुपर्ने उनले बताए ।
सामाजिक सञ्जालमा अहिले अराजक तत्वहरुले गर्दा थप समस्या भएको र उनीहरुले राखेका फेक समाचारका कारण पनि समस्या बढेको अध्यक्ष मगरले बताए । सामाजिक सञ्जालमा आएका नकारात्मक विषयलाई चिर्न जरुरी रहेको उनको भनाइ छ ।
कार्यक्रममा नेपाल पत्रकार महासंघ बागमती प्रदेशका संस्थापक अध्यक्ष प्रताप विष्टले सामाजिक सञ्जालमा आएका नकारात्मक विषय आम नागरिक पत्याएकाे बताएका छन् । त्यसलाई बुझ्न जरुरी रहेकोले सत्य विषय समाचारका माध्यमबाट लिन पनि नागरिकलाई उनले आग्रह गरे । अहिले पनि फेक समाचारका पछाडी लाग्ने समाजका कारण थप समस्या भएको उनकाे भनाई छ ।
प्रस्तुतीकरण गर्दै नेपाल पत्रकार महासंघ मकवानपुरका अध्यक्ष बालकृष्ण अधिकारीले सामाजिक सञ्जालमा गलत सूचना, हल्ला र अपुष्ट समाचार बढेपछि परम्परागत सञ्चारमाध्यमले विश्वसनीयता कायम गर्न कठिन भएको जानकारी दिए । तुरुन्त र छोटो रूपमा सूचना चाहने भएकाले मिडियाले समाचारको गहिराइभन्दा गति र ट्रेन्डमा ध्यान दिनुपर्ने दबाब बढेको उनले बताए ।
‘अनलाइन माध्यममा निःशुल्क सामग्री र विज्ञापनमा गिरावटले परम्परागत सञ्चार माध्यमका आर्थिक स्रोत घटेका छन्। पुस्ताले बहुआयामिक सूचना स्रोत प्रयोग गर्ने भएकाले मिडियाले तथ्य–जाँचमा अझ कडा मापदण्ड कायम गर्नुपर्ने भएको छ‘ अधिकारीले भने ‘सामाजिक सञ्जालका समाचार वितरणमै प्रभुत्व जमाएका छन्, जसले परम्परागत माध्यमको पहुँच घटाएको छ ।’ अनलाइन प्लेटफर्ममा अभिव्यक्ति स्वतन्त्रताको नाममा अनियन्त्रित सामग्री आउँदा कानुनी र नैतिक दुवै चुनौती बढेको उनले बताए ।
बागमती प्रदेशसभाका प्रवक्ता मनोज कुमार गुप्ताले देशका सातै प्रदेशका सरकारका संरचना जलाइएको र बागमती प्रदेशसभा जेनजी आन्दोलनबाट ध्वस्त भएको बताए । प्रदेश संरचना र सरकारका राम्रा गरिएका काम बाहिर ल्याउन नसक्दा पनि प्रदेश प्रति जनताको वितृष्णा बढेको उनले बताए ।
प्रदेशसभाले गरेका कामहरुलाई हेर्न जरुरी रहेको बताउँदै उनले भने ‘प्रदेशसभाले ८२ वटा कानून निर्माण गर्ने भनिएको र हाल सम्म ५० वटा कानून मात्र निर्माण भएको छ । दोस्रो कार्यकालमात २२ वटा मात्र कानून निर्माण भएको छ ।’ प्रदेशसभाको विषयलाई लिएर अरु बाँकी कानून निर्माण किन हुन सकेनन् भनेर प्रश्न उठाउने ठाउँ रहेको उनले बताए । ‘प्रदेशसभाका संरचनामा आगोलागी हुँदा ३३ करोड रुपैयाँको क्षति भएको छ’ उनले भने ‘मुख्यमन्त्री कार्यालयको सभाहललाई मर्मत गरेर प्रदेशसभाको बैठक बस्ने तयारी गरिरहेका छौं ।’
कार्यक्रममा मकवानपुरका अग्रज पत्रकार रामकुमार एलन, स्वतन्त्र पत्रकार संघका बागमती प्रदेश महासचिव सुरेश श्रेष्ठ, नेपाल पत्रकार महासंघ मकवानपुरका उपाध्यक्ष भावना रिजाल, प्रेस चौतारी मकवानपुरका अध्यक्ष सरिता दाहाल, प्रेस युनियन मकवानपुरका अध्यक्ष सुवास विडारी, बागमती प्रदेशसभाका रिपेश दाहाल, गंगा लामिछानेलगायतकाको आतिथ्यता रहेको थियो ।
जनपत्र मिडिया प्रालिको आयोजनामा कार्यक्रम गरिएको अध्यक्ष हरि हुमागाईले बताए।
मकवानपुर । मकवानपुरकी प्रमुख जिल्ला अधिकारी (प्रजिअ) स्कीम श्रेष्ठले ‘जेनजी’ आन्दोलनका क्रममा तोडफोड र आगजनीमा संलग्नलाई कारबाही गर्न प्रशासन तयार रहे पनि माथिल्लो निकायबाट स्पष्ट निर्देशन नभएकाे बताएकी छिन् ।
मंगलबार जिल्ला प्रशासन कार्यालयमा भदौ २३ र २४ गतेका घटना छानबिन गर्न गठित न्यायिक जाँचबुझ आयोगका अध्यक्ष गौरीबहादुर कार्की सहितको टोलीसँगको अन्तरक्रिया कार्यक्रममा बोल्दै प्रजिअ श्रेष्ठले भदौ २३ गतेको आन्दोलन र २४ गते भएका आगजनी तथा लुटपाटका घटनालाई फरक प्रकृतिको भएको बताइन् ।
उनले आन्दोलन र अपराधलाई एउटै डालोमा राख्न नहुनेमा जोड दिइन् । भएका घटनाहरूमा आन्दोलन र आपराधिक गतिविधिलाई फरक–फरक रूपमा हेरिनुपर्ने बताइन् । घटनालगत्तै प्रहरी कार्यालयहरूमा आक्रमण गर्नेहरूको पहिचान भइसकेको र कारबाही सुरु गर्न खोजिएको उनले बताइन् । ‘आन्दोलन गर्ने र आन्दोलनको नाममा क्षति गराउने वर्ग फरक छ । व्यक्तिगत प्रोफाइल र भिडियो फुटेज हेर्दा तोडफोडमा संलग्नहरू वास्तविक आन्दोलनकारी नभई विभिन्न आपराधिक पृष्ठभूमि भएका व्यक्तिहरू देखिन्छन्’ उनले भनिन् ।
‘प्रहरीकाे बयानका आधारमा हामीले दोषीहरूको खोजी कार्य सुरु गरेका थियौँ । तर दुई–तीन दिनमै ‘अहिले केही नगर्नू, राय प्राप्त भएपछि मात्र कारबाही गर्नू’ भन्ने निर्देशन आयो’ उनले भनिन् ‘काठमाडौँमा पक्राउ परेका व्यक्तिसमेत छुटेपछि जिल्लामा पनि खोजी कार्य रोक्यौं फेरि ‘फौजदारी कसुरमा कानुनबमोजिम अघि बढ्नु’ भन्ने अर्को निर्देशन आए पनि पहिलेको निर्देशनले गर्दा कारबाही प्रक्रियामा अन्योल छाएको थियो । के गर्ने भन्नेमा केही स्पष्टता भए पनि कार्यान्वयन गर्न स्पष्ट निर्देशन हामीले पाएनौँ ।’
प्रजिअ श्रेष्ठले सुरक्षा निकायलाई काम गर्नका लागि ‘घुमाउरो’ नभई ‘सोझो र स्पष्ट’ निर्देशन चाहिने बताइन् । ‘सुरक्षा निकायलाई सोझो भाषामा ‘गर्नेलाई गर, नगर्नेलाई नगर’ भन्ने आदेश आएमा काम गर्न अत्यन्तै सजिलो हुन्छ’ उनले भनिन् । आयोगको स्थलगत भ्रमण र यथार्थ जानकारीपछि अब राज्यले गर्ने काम–कारबाहीमा थप स्पष्टता आउने र पीडितले न्याय पाउनेमा आशा गर्न सकिने उनले बताइन् ।
आयोगको देश भ्रमणपछि गृह मन्त्रालयबाट स्पष्ट निर्देशन आउने अपेक्षा व्यक्त गर्दै उनले भनिन् ‘केन्द्रको निर्देशनको अभावमा सुरक्षा निकायको मनोबल केही खस्किएपनि आफूहरू मनोबल उच्च राखेर शान्ति सुरक्षा कायम गर्न सक्षम छौं ।