मकवानपुर । राष्ट्रिय प्रजातान्त्र पार्टीबाट हेटौँडा उपमहानगरपालिकाका मेयर दिपकबहादुर सिंहले पत्रकार सम्मेलन गरि योजना सार्बजनिक गरेका छन। उन्ले आफू मेयरमा विजयी भए भने हेटौँडालाई भ्रष्ट्राचारमुक्त सहर बनाउने बताएका छन् । मेयरमा उम्मेद्वारी दिएपछि पहिलो पटक पत्रकार सम्मेलनको आयोजना गरि सिंहले आफ्ना योजनाहरु सार्बजनिक गर्दै भ्रष्ट्राचार न्युनिकरणलाई जोड दिएका हुन ।
भ्रष्ट्राचार नहुने वित्तिकै विकासका कामहरु तिब्र ढंगले बढने भन्दै सिंहले आफूलाई मतदान गर्नको लागि अनुरोध गरेका छन् । उनले भने ‘मैले र मेरो परिवारले बेईमानी गरेको पैसा एक कौडी पनि खाँदैन र एक कौडी पनि कसैलाई बेईमानी गर्न दिँदैन् ।’
हेटौँडा उपमहानगरको स्वास्थ्य क्षेत्र निकै कमजोर रहेको भन्दै उनले विशेषज्ञ सेवा सहितको सुविधायुक्त अस्पताल निर्माण गर्ने, हेटौँडाको चक्रपथलाई पुरा गर्ने, घरघरमा बृद्धाभत्ता पुर्याउने ब्यवस्था गर्ने लगाएतका कामहरु गर्ने बताए ।
हेटौँडालाई चार वर्षभित्र महानगरपालिका बनाउने सोच आफूले गरेको भन्दै राप्रपा विजयी भए विज्ञहरु नियुक्त गरि हरेक क्षेत्रको विकासमा आफ्नो पूर्ण ध्यान हुने बताए । उनले हेटौँडालाई सुन्दर, सभ्य, सफा तथा विकासको दृष्टिकोणले देशकै नमुना सहर बनाउने भिजन आफूसँग भएको दाबी गरे । मेयरमा विजयी भए कुनैपनि सरकारी सबारीसाधन नलिने भन्दै आफ्नो सेवासुविधाबापत आएको तलबभत्ता शिक्षा, स्वास्थ्य तथा विकासमा खर्च गर्ने उनले बताए ।
पत्रकार सम्मेलनमा बोल्दै उपमेयरकी उम्मेद्वार इन्दिरा न्यौपाने डल्लाकोटीले आफूहरु विजयी भए भ्रष्ट्राचार उन्मुलन, घरदैलो सेवा, विकासको कामलाई तिब्रता दिने बताईन् ।
मकवानपुर । मकवानपुरका उद्यमी तथा व्याडमिन्टन खेलको भेट्रान खेलाडी बीके बोसको निधन भएको छ । खुट्टाको क्यान्सरको उपचार गराइरहेका ६१ बर्षीय बोसकाे मंगलबार दिउँसो चितवन मेडिकल कलेजमा निधन भएको हो ।
हेटौंडा–४, गर्दोईका बोसको मंगलबार नै हेटौंडा–९, कुष्माण्ड त्रिवेणीधाममा अन्त्येष्टी गरिएको छ । लामो समय हेटौंडा औद्योगिक क्षेत्रस्थित सुपर लेमिकोट्स प्रालिको व्यवस्थापकको रुपमा काम गरेका बोसले पछिल्लो समय नारायणी मिल्क इन्डष्ट्रिज सञ्चालन गर्दै आएका थिए ।
उद्योग संघ मकवानपुरको द्वितीय उपाध्यक्षसम्म भएका बोस मकवानपुर उद्योग वाणिज्य संघको एसोसिएटतर्फका सदस्य समेत थिए । मकवानपुर जिल्ला व्याड्मिन्टन संघको अध्यक्ष समेत रहेका बोस व्याडमिन्टन खेलको भेट्रान खेलाडी थिए । व्याडमिन्टन खेलको विकासमा अग्रसर रहेका बोसका छोरा अभिषेक र छोरी माधवी दुबै खेलाडी राष्ट्रियस्तरका खेलाडी छन् ।
मकवानपुर । आसन्न स्थानीय तहको निर्वाचनमा मतदान गर्ने समय १० दिनमात्र बाँकी रहँदा सत्ताधारी ५ दलिय गठबन्धनले हेटौंडा नगरको लागि चुनावी प्रतिबद्धता पत्र सार्वजनिक गरेको छ ।
नेपाली कांग्रेस, नेकपा माओवादी केन्द्र, नेकपा एकीकृत समाजवादीसहितको पाँच दलीय गठबन्धनले आगामी स्थानीय तहको नेतृत्व लिँदा गर्ने कामहरुको बारेमा प्रतिवद्धतापत्र सार्वजनिक गरेको हो । हेटौंडा रिसोर्टमा आज प्रतिवद्धतापत्र सार्वजनिक गरिएको हो ।
प्रतिवद्धतापत्रमा उपमहानगरपालिकावासीलाई ३ सय युनिटसम्मको बिजुली नि:शुल्क प्रदान गर्नेदेखि प्रत्यक वडामा एमबीबीएस डाक्टरसहितको स्वास्थ्य सेवा उपलब्ध गराउने उल्लेख गरिएको छ । ज्येष्ठ नागरिक तथा अशक्तलाई घरमै पुगी स्वास्थ्य सेवा दिइने पनि प्रतिवद्धतापत्रमा उल्लेख गरिएको छ ।
एक घर एक रोजगारीलाई प्राथमिकता राख्नुका साथै न्युन मध्यम व्यावसायिक कार्यका लागि सिप विकास, सहुलियत ऋण, बजार व्यवस्थापनको लागि सहयोग गर्ने प्रतिवद्धता पनि जनाइएको छ ।
नगरभित्र हरेक घरमा मासिक १० हजार लिटर खानेपानी निशुल्क गर्ने,हेटौंडा विकास प्राधिकरण गठन गर्ने, नगर यातायातको गुरुयोजना तयार गरी कार्यान्वयन गर्ने प्रतिवद्धता जनाइएको छ । हरेक वर्ष कम्तीमा ५ जनालाई एमबीबीएस अध्ययनको लागि छात्रवृत्ति प्रदान गर्नुका साथै सामुदायिक विद्यालय तथा कलेजमा स्वास्थ्यकर्मीको व्यवस्था गर्न पनि गठबन्धनका उम्मेदवारहरु प्रतिबद्ध रहेको जनाएका छन् ।
नगरभित्रका नदी खोलाहरुको व्यवस्थापन गरी अस्थायी स्वीमिङ पुल निर्माण, जलबिहार तथा पार्कहरु निर्माण गरी पर्यटनमैत्री नगर बनाउने योजना पनि अघि सारिएको छ । धार्मिक क्षेत्रहरुको सुधार तथा पर्वद्धन गर्नुका साथै हरेक वडामा फलफूलको बगैचा बनाउने पनि प्रतिवद्धतापत्रमा उल्लेख गरिएको छ ।
नगरमा सुविधासम्म सार्वजनिक शौचालयको निर्माण तथा व्यवस्थापन गर्ने कुरामा पनि गठबन्धनका उम्मेदवारहरुले ध्यान दिएक छन् ।
गठबन्धनको प्रतिबद्धतामा नगरको भोकाहरुकोे लागि खानाको व्यवस्थापन गर्ने पनि उल्लेख छ । नगरस्तरीय प्रज्ञा प्रतिष्ठान स्थापना, प्रवर्धन र विकासका कार्यक्रम गर्न पनि गठबन्धन प्रतिवद्ध बनेको छ भने नगरस्तरीय नाट्याशाला निर्माण गर्ने योजना पनि अघि सारिएको छ ।
प्रतिवद्धतापत्र सार्वजनिक कार्यक्रममा गठबन्धनबाट मेयर पदका उम्मेदवार मीना लामा, उपमेयर पदका उम्मेदवार राजेश बानियाँ, नेपाली कांग्रेस बागमती प्रदेश सभापति ईन्द्रबहादुर बानियाँ, नेकपा एकीकृत समाजवादीका नेता केदार न्यौपाने, विरोध खतिवडा, नेकपा माओवादी केन्द्रकी नेतृ प्रमिला पुलामी, नेपाली कांग्रेस मकवानपुरका सभापति वुद्ध लामालगायतको उपस्थिति रहेको थियो ।
गठबन्धनको प्रमुख प्रतिस्पर्धी नेकपा एमालेले भने हेटौंडा नगरको सवालमा आफ्नो प्रतिबद्धता पत्र सार्वजनिक गरेको छैन ।
मकवानपुर । नेकपा एमाले हेटौंडाले आसन्न स्थानीय तहको निर्वाचन प्रचारप्रसार कार्यक्रम अन्तरगत पहिलो चरणको घरदैलो कार्यक्रम आजबाट सकेको छ ।
मेरो वडा म जिताउछु भन्ने अभियानको रूपमा सुरू गरिएको पहिलो चरणको घरदैलो कार्यक्रम आजबाट सकिएको हो । “भोलिबाट हामी अभियानका क्रममा छुटेका घरदैलो र व्यक्तिलाई भेट्ने छौ” एमाले वडा सचिब सुरेश लामिछानेले भने । अभियानको क्रममा पाएको समर्थनबाट नतिजासंग एकदम उत्साहि रहेको पार्टी वडा सचिब लामिछानेले बताए ।

लगातार ५ दिन वडाका उम्मेदवार तथा नगरको मेयर उपमेयरका उम्मेदवार समेतको उपस्थितिमा घरदैलो गरिएको पार्टी वडा अध्यक्ष पदम बजगाईंले बताए । “निर्वाचनको संघारमा आईपुग्दा हाम्रो माहोल राम्रो छ, सबैको साथ र समर्थन पाउनेमा आशावादी छु” वडा अध्यक्षको उम्मेदवार शुसिल घिमिरेले भने ।
आफू विगतमा पनि सामाजिक काम, स्थानीय क्षेत्रकै विकास बारे चासो र चिन्तन राख्ने व्यक्ति भएकोले आगामी दिनमा पनि सोहि जिम्मेवारीमा पुर्याउन उनले वडावासीसंग अनुरोध गरे ।
“वडाको विकास बारे आफूहरूको संकल्पसहित घरघर पुगेर मतदाता भेटेको र छु” घिमिरेले भने “अझै भेटघाट बाकी नै छ।” आजको घरदैलो कार्यक्रममा वडा सदस्यको उम्मेदवारहरू ज्ञनबहादुर थापा, रामबहादुर राई, रन्जिता सिलवाल, भगवती बि.क, पार्टी सचिवालय सदस्य ईश्वर ढुङ्गाना, सुधिर थापालगायतको उपस्थिति रहेको थियो ।
मकवानपुर/ नेकपा एमाले केन्द्रीय सदस्य जुनेली श्रेष्ठले आफूले चाहेर पनि स्थानीय तहको विकास चाहेजति गर्न नसकेको बताएकी छिन् ।
निर्वाचन लक्ष्यित चुनावी सभालाई सम्बोधन गर्दै उनले हेटौंडाको पदमपोखरीमा यस्तो बताएकी हुन् । आर्थिक उपार्जन, महिला सशक्तीकरण तथा मानवीय विकासको योजना लिएर एमाले अघि बढेको उनले बताइन् । एमाले आशा देखाउने भन्दा पनि काम गरेर देखाउने पार्टी भएको उनले बताइन् । आफ्नो टोल आफैं बनाउन आफ्नो समुदायबाट नेतृत्व गर्ने स्थानीय मतदाताले नै चनाखो भएर सुर्य चिन्हमा मतदान गर्ने उनले आग्रह गरिन ।
एमाले वडा कमिटीले आयोजना गरेको कार्यक्रममा पार्टी केन्द्रीय सदस्य भारती पाठकले कृषि, वनलगायतको व्यवस्थापन र विकासमा एमालेको विशेष योजनामा रहेको बताइन् । पदमपोखरी क्षेत्रमा मध्यवर्ती क्षेत्रको समस्या समाधानमा पहल एमालेले गर्ने पाठकले बताइन् । महिलाको सर्वपक्षीय विकास गर्न पनि स्थानीय नेतृत्वमा एमाले कै नेतृत्व चाहिने पाठकले बताइन् ।

कार्यक्रमा एमाले नेता श्रीधर पोखरेलले हेटौंडा नगरमा गठबन्धनले जिते भ्रष्टाचार बढ्ने छ भन्दै आशा र सर्तको पछि लागेर गठबन्धनलाई सहयोग नगर्न अनुरोध गरे । “एमाले प्रतिबद्धता लिएर नेतृत्वमा जान्छ, काम गरेर देखाउछ, अधुरा विकास पुरा गर्ने एमालेले गर्ने छ, युवालाई बिदेश हैन, आफ्नै माटोमा सुन फलाउन सिपालु बनाउने छ” पोखरेलले भने । चुनावी सभामा हेटौंडा उपमहानगरपालिकामा एमालेबाट मेयर र उपमेरका उम्मेदवारहरु अनन्त पौडेल र सुमित्रा काफ्लेले आफूहरुको जित सुनिश्चित भएकोले कार्यकर्ताहरुलाई संयमित भएर मत बदर नहुने गरी मतदान गर्न आग्रह गरे । हेटौंडा उपमहानगरपालिका वडा न. १२ का एमाले वडा अध्यक्ष बखानसिंह घलानको अध्यक्षतामा वडाको बराल टोल, सिग्रनी, मिलनटोललगायत विभिन्न ८ स्थानमा कोण सभा तथा कार्यकर्ता भेटघाट कार्यक्रम गरिएको थियो ।