मकवानपुर । मकवानपुरकाे मनहरी गाउँपालिकाकाे आगामी आर्थिक वर्ष २०८०/८१ को लागि ९० करोड २१ लाख ७१ हजार ८ सय ७३ रुपयाँ ६६ पैसा बराबरकाे वजेट गाउँसभामा प्रस्तुत गरिएकाे छ ।
शुक्रबार गाउँपालिकाको १३ औँ गाउँसभाकाे दोस्रो वैठकमा उपाध्यक्ष सीता पुलामी मगरले उक्त बजेट पेश गरेकी हुन् । गाउँसभामा पेश गरेकाे ९० करोड २१ लाख ७१ हजार ८ सय ७३ रुपयाँ ६६ पैसाको वजेट सभाले शुक्रबारकाे गाउँसभाकाे दाेस्राे वैठकले पारित गरेको छ ।
गाउँपालिकाले सुशासन तथा संस्थागत विकासमा १४ करोड २९ लाख १२ हजार ८७३ पैसा ६६ मात्र (१५.८० प्रतिशत) आर्थिक विकास तर्फ ४ करोड ३० लाख (४.८० प्रतिशत) सामाजिक विकास तर्फ ३० करोड २३ लाख ५९ हजार (३३.५० प्रतिशत) पूर्वाधार विकास तर्फ ३२ करोड ६४ लाख (३६.२० प्रतिशत) वन, वातावरण तथा विपद् व्यवस्थापन तर्फ १ करोड २५ लाख (१.४० प्रतिशत) तथा गाउँपालिकाकाे वडाहरुकाे लागि ७ करोड ५० लाख (८.३० प्रतिशत) बजेट विनियोजन गरेकाे छ ।
गाउँपालिकाले असार १० गते आगामी आर्थिक वर्ष २०८०/०८१ काे नीति तथा कार्यक्रम प्रस्तुत गरी पारित गरेकाे थियाे ।
मकवानपुर । मकवानपुरकाे बकैया गाउँपालिकालाई बालश्रम मुक्त बनाउन कार्ययोजना तय गरिएकाे छ । बालश्रम निबारणको लागि स्थानीय तहको भूमिकासम्बन्धी अन्तरकृया गर्दै गाउँपालिकालाई बालश्रम मुक्त बनाउन कार्ययोजना तय गरिएकाे हाे ।
पालिका अध्यक्ष, उपाध्यक्ष, बडा अध्यक्षहरु, कार्यपालिका सदस्य र बालमैत्री सहजकर्ता र बाल क्लबको प्रतिनिधीहरु सहभागी कार्यक्रममा श्रम रोजगार तथा सामाजिक सुरक्षा मन्त्रालयका उपसचिब अम्बिकाप्रसाद अधिकारीले बालश्रम मुक्त स्थानीय तह घोषणा कार्यबिधि, २०७७ का व्यवस्था अनुसार आगामी कार्ययोजना तय गर्न सहजिकरण गरेका थिए । अधिकारीले नेपालमा बालबालिका तथा बालश्रमको अबस्था, दिगो बिकाशमा बालश्रमको लक्ष, बालश्रम मुक्त समाज निर्माणको लागि नेपाल सरकारको बिद्यमान नीति, बालश्रम मुक्त स्थानीय तह घोषणा किन आवश्यक छ भन्ने विषयमा सहजिकरण गरिएकाे बताइएकाे छ ।
बकैया गाउँपालिका र बाल कल्याण समाज, मकबानपुरको संयुक्त आयोजना तथा स्वातन्त्रता अभियान र राष्ट्रिय बाल संरक्षण संजाल नेपालको समन्वय र सहकार्य ग्लोबल मार्चको सहयोग भएकाे कार्यक्रममा बकैया गाउँपालिकाको अध्यक्ष धर्मराज लामिछानेले बालश्रम अन्त्यको लागि बिधालय जाने उमेरका बालबालिकालाई बिधालय पठाउने वातावरण बनाउन पर्ने बताए ।
बालबालिकाको बिधालय छोडने दर घटाउदै बालबालिकालाई बिधालयमा टिकाउने कार्य गरियो भने बालश्रममा जान रोक्न सकिने भएकोले पालिकाले यसै अनुरुप कार्य गरिहेको लामिछानेले बताए । ‘दिबा खाजाले बालबालिकालाई बिधालयमा टिकाउन सहज भएको छ’ उनले भने–‘अब टोलटोलमा शिक्षा समिती लाई जिम्मेबार बनाउदै गुणस्तरिय शिक्षा र बिपन्न, सिमान्तकृत बालबालिकाको शिक्षा पाउने अधिकार सुनिश्चितको योजना रहेको छ ।’
यसैगरी पालिकाको उपाध्यक्ष भक्त बहादुर खत्रीले पालिकाले अनुगमन गर्दा पालिका भित्र बालश्रम नभेटिएको तर पालिकाबाट अन्य जिल्लामा बालश्रममा गएकोमा ध्यानाकर्षण भएकोे बताए । अब बालबालिकालाई बालश्रममा जान रोक्ने र बालबिकास र बालसंक्षणको सबालमा कार्य गर्ने उनले बताए । बालश्रम मुक्तका लागि पालिकाले श्रमिक बालबालिकाको आबाजको सुनुवाई गर्दै लगानी योजना बनाउन आबश्यक रहेको बाल कल्याण समाजका अध्यक्ष प्रकाश खतिवडाले बताए । बालश्रम निबारण सम्बन्धी राष्ट्रिय गुरु योजनालाई कार्यान्वयनमा ल्याई तिनैतहको सरकार र नागरिक समाजको समन्वय र सहकार्यबाट बालश्रमको अन्त्य गर्न सकिने खतिबडाले जानकारी दिए ।
यसैगरी श्रम कार्यालय हेटौडाका प्रमुख छन्द नारायण श्रेष्टले बालश्रम अन्त्यको लागि पालिकामा बालश्रमको अनुगमन र भेटिएको बालश्रमको ब्यबस्थापन गर्न पालिकासँग सहकार्य गरिने बताए । बालश्रमको अन्त्य, बाल बिबाहको अन्त्य, शिक्षाको अधिकारको सुनिश्चितता र बाल संरक्षण निकै चुनौती रहेकोले स्थानीय तह सँगसँगै प्रदेश र संघीय सरकारको समेत बिशेष योजना रहनु पर्ने सहभागी जनप्रतिनिहरुले बताएका थिए ।
पालिका अध्यक्ष लामिछानेको प्रमुख आतिथ्यता तथा समाज अध्यक्ष एबं राष्ट्रिय बाल संरक्षण संजालको केन्द्रिय अध्यक्ष प्रकाश खतिवडाकाे सभाध्यक्षतामा भएकाे कार्यक्रममा पालिका उपाध्यक्ष खत्री र श्रम रोजगार तथा सामाजिक सुरक्षा मन्त्रालयको उपसचिब अधिकारीको बिशेष आतिथ्यता र प्रमुख प्रशासकीय अधिकृत महेश श्रेष्टको आतिथ्यतामा रहेकाे थियाे ।
मकवानपुर । हेटौंडा उपमहानगरपालिकालाई बाल मैत्री घोषणाको लागि तयारी तिव्र पारिएको छ । नगरभित्र बालश्रम निवारणको लागी स्थानीय तहको भुमिका बारे जनप्रतिनिधिहरु र सरोकारवालहरु बीच अन्तरक्रिया गरिएको छ ।
हेटौडा उपमहानगर पालिकालाई बालश्रम मुक्त बनाउने उद्धेश्यले बालमैत्री स्थानीय शासन नगर समितीसंग बालश्रम निवारणको लागी पहल जारी राखिएको हो ।
हेटौडा उपमहानगरपालिका र बाल कल्याण समाज, मकवानपुरको संयुक्त आयोजना, स्वतन्त्रता अभियान र राष्ट्रिय बाल संरक्षण संजाल नेपालको समन्वय तथा ग्लोबल मार्चको सहयोगमा कार्यक्रम गरिएको हो ।
कार्यक्रममा हेटौंडा उपमहानगरपालिकाको उपमेयर राजेश बानियाँले हेटौडा उपमहानगरपालिकाले बालश्रम मुक्त सहित बालमैत्री नगर घोषणा गर्ने अभियानमा साथ दिने संघसस्थाहरुलाई आग्रह गरेका छन् ।
कार्यक्रममा श्रम रोजगार तथा सामाजिक सुरक्षा मन्त्रालयको उपसचिब अम्बिकाप्रसाद अधिकारीले,बालश्रम मुक्त स्थानीय तह घोषणा कार्यविधि २०७७ को बारेमा प्रस्तुती गरेका थिए ।
यसैगरी बाल मैत्री स्थानीय शासन घोषणाका लागी भएका कृयाकलापको बारेमा बाल कल्याण समाजको अध्यक्ष एबं राष्ट्रिय बाल संरक्षण संजाल अध्यक्ष प्रकाश खतिवडाले प्रस्तुती दिएका थिए ।
यसैगरी बालमैत्री स्थानीय शासनको लागि भएका प्रयासहरुको बारेमा हेटौडा उपमहानगर पालिकाको महिला तथा बालबालिका महाशाखा प्रमुख बिष्णुकुमारी लामीछानेले प्रस्तुतिकरण गरेकी थिइन् ।
बाल मैत्री स्थानीय शासन नगर समितिले सबै ५१ वटा सुचक केलाएर ठोस कार्य गर्ने बेला आएको बानियाँले बताए । बालश्रम अन्त्यको लागि तयार भएको कार्य योजना अनुरुपको कार्य सबैको समन्वय र सहकार्य नगरपालिकाले गर्ने बानियाँले बताए ।
श्रम रोजगार तथा सामाजिक सुरक्षा मन्त्रालय का उपसचिब अधिकारीले नेपालको मौजुदा बालबालिकाको अबस्था र बालश्रमको अबस्थाको चित्रण, दिगो विकासमा बालश्रमको लक्ष्य, बालश्रम मुक्त समाज निर्माणको लागि नेपाल सरकारको विद्यमान नीति, बालश्रम मुक्त स्थानीय तह घोषणाको औचित्य, बालश्रम मुक्त घोषणा कार्यबिधि २०७७ को उद्धेश्य , यसमा भएका लक्षित समुह र सुचकको बारेमा जानकारी गराएका थिए ।
बालश्रम मुक्त सहित बालमैत्री पालिका घोषणा गर्न पालिकाले लगानी योजना बनाउन आवश्यक रहेको बाल कल्याण समाजका अध्यक्ष खतिवडाले बताए । घोषणा पश्चात पनि दीगोपनको लागि लगानी कार्य योजना नभए उपलब्धिपूर्ण नहुने उनले बताए ।
मकवानपुर । हेटौंडा उपमहानगरपालिकाको आगामी आर्थिक बर्ष २०८०/०८१ को नीति तथा कार्यक्रम र बजेट पारित भएको छ । उपमहानगरपालिकाको शनिबार १३ औं नगरसभाको दोस्रो वैठकले आगामी आर्थिक बर्ष कुल २ अर्ब ६८ करोड ६० लाख १० हजार ८ सय रुपैयाँको बजेट पारित गरेको हो।
असार २ गते १३ औं नगरसभाको पहिलाे वैठकमा उममेयर राजेश बानियाँले आगामी आर्थिक बर्ष २०८०/०८१ को नीति तथा कार्यक्रम प्रस्तुत गर्दै कुल २ अर्ब ६० करोड रुपैयाँ बराबरकाे बजेट प्रस्तुत गरेका थिए । प्रदेश सरकारकाे बजेट असार १ गते सार्वजनिक भएकाे तर स्थानीय तहकाे अनुदानकाे रकम प्राप्त नभएकाे अवस्थामा हेटौडाले असार २ गते २ अर्ब ६० कराेड बजेट सभामा प्रस्तुत गरेकाे थियाे ।
प्रदेशबाट प्राप्त अनुदानकाे रकम थप भए पछि नगर सभाकाे पहिलाे बैठकमा पेश भएकाे बजेटकाे आकार ८ कराेड बढेकाे हाे । यसैगरी शनिबारकाे नगरसभाकाे दाेस्राे वैठकले आर्थिक विधेयक २०८०, विनियोजन विधेयक २०८० सर्वसम्मत रुपमा पारित गरेकाे छ ।
नगर सभमा २५ मिटर सडक विस्तार पारित
हेटौँडा उपमहानगर क्षेत्र भएर गएकाे राष्ट्रिय राजमार्गकाे विस्तार २५ मिटर अभियानमा उपमहानगरकाे नगर सभाले सर्वसम्मत निर्णय गरेकाे छ । यससँगै विगत केही बर्ष देखि चर्चामा रहेको २५ मिटर सडक विस्तार अभियानमा स्थानीय सरकारको साथ रहकाे भएकाे छ ।
हेटौँडा उपमहानगरपालिकाकाे क्षेत्र भएर राष्ट्रिय राजमार्ग पूर्वपश्चिम राजमार्ग र त्रिभुवन राजपथले राजधानी तथा अन्य मुख्य शहरलाई जाेडछ । उपमहानगरपालिकाको शनिबार सम्पन्न १३ औं नगरसभाको दोस्रो वैठकले सडक विस्तार कार्य गर्न सर्वसम्मत निर्णय गरेको उपमहानगरका प्रवक्त एवम् हेटौँडा–१ का वडाध्यक्ष सविन न्यौपानेले बताए । उनले सडक विस्तार पछि उत्पन्न हुने समस्या र व्यवसायीहरुको व्यवस्थापन, क्षतिपूर्तिका लागि उपमहानगरले सम्बन्धित निकायलाई पहल र समन्वय गर्ने जानकारी दिए ।
डिभिजन सडक कार्यालयले हेटौंडाले असार १० गते हेटौँडा बजार क्षेत्रमा सडकको २५ मिटर भित्र पर्ने घरटहार र संरचना हटाउन ३५ दिने सूचना राष्ट्रिय दैनिक पत्रिकामा प्रकाशित गरी सकेकाे छ । हेटौडाकाे सडक विस्तार अभियान २०७४ सालमा सुरु भएकोमा अदालतको अन्तरिम आदेशका कारण रोकिएको थियो । यस अघी हेटाैडाकाे सडक विस्तार अभियान राजनैतिक दलहरुले निर्वाचनकाे समयमा प्रयाेग गर्ने गरेका थिए ।
सूर्तीजन्य पदार्थको विक्रीवितरणमा रोक लगाइने
हेटौंडा उपमहानगरपालिकाले सूर्तीजन्य पदार्थको विक्रीवितरणमा रोक लगाउने भएको छ । शनिबारकाे १३ औं नगरसभाको दोस्रो वैठकले आगामी आर्थिक वर्षबाट नगरको सीमाभित्र सूर्तीजन्य पदार्थको विक्रीवितरणमा रोक लगाउने निर्णय गरेको हाे । ‘सूर्तीजन्य पदार्थ विक्रीवितरणमा रोक लगाउने निर्णय भएकाे छ’ उपमहानगरका प्रवक्ता न्यौपानेले भने ‘कार्यविधि निर्माण गरेर निर्णय कार्यान्वयन गर्नेछाै ।’
मकवानपुर । कृषि विकास बैंक हेटौंडा शाखाले हेटौंडा अस्पताललाई टेलिभिजन सहयोग गरेको छ । बैकले संस्थागत सामाजिक उत्तरदायित्व अन्तरगत टेलिभिजन सहयोग गरेको हो ।
अस्पतालमा आउने बिरामी तथा बिरामीको आफन्तलाई सेवा पुग्नेगरी मदन भण्डारी स्वास्थ्य विज्ञान प्रतिष्ठान शिक्षण अस्पताल हेटौडालाई टेलिभिजन हस्तान्तरण गरिएको हो । अस्पतालका अध्यक्ष राजेश प्रशाई, निमित्त मेडिकल सुपरिटेन्डेन्ट रामचन्द्र सापकोटा, अस्पताल सञ्चालक समिति सदस्य उत्सव चौलागाईं, लेखा अधिकृत खिमानन्द पौडेल,अस्पतालका नर्सिङ प्रमुखको उपस्थितिमा टेलिभिजन हस्तान्तरण गरिएको बैंकले जनाएको छ । झण्डै एक लाख रुपैयाँ पर्ने ६५ इन्चकाे टेलिभिजन प्रदान गरिएकाे हाे ।
कृषि विकास बैंक लिमिटेड प्रदेश कार्यालयका वरिष्ठ शाखा प्रमुख नुरप्रसाद गौतम, हेटौडा शाखाका प्रबन्धक तीर्थराज पौडेल तथा बैंकका कर्मचारीहरु समेतको उपस्थितिमा टेलिभिजन हस्तान्तरण गरिएको हो । कृषि विकास बैंकले देशभरको २८५ भन्दाबढी शाखाबाट आधुनिक बैकिङ सुविधा सहित कारोबार गरिरहेकोले बैंकको सेवाबाट लाभ लिन कृषि विकास बैंकका वरिष्ठ शाखा प्रमुख नुरप्रसाद गौतमले बताए ।
अस्पतालका मेडिकल सुपरिटेन्डेन्ट रामचन्द्र सापकोटाले बैंकको संस्थागत सामाजिक कार्यक्रम अन्तरगत प्राप्त सहयोगबाट अस्पतालका सेवाग्राही लाभान्वित हुने बताए । यसबाट स्वास्थ्य सम्बन्धी उपयोगी सूचना तथा जानकारी प्रदान गर्नको सहज हुने अपेक्षा गरिएकाे हेटौडा शाखाका प्रबन्धक तीर्थराज पौडेलले बताए ।