मकवानपुर । जिल्ला प्रहरी कार्यालय मकवानपुरले जिल्लाको विभिन्न स्थान र नाकामा सुरक्षा व्यवस्थामा कडाई गर्दै आएकाे छ । मकवानपुर प्रहरीले जिल्ला प्रवेश गर्ने नाका रातोमाटेमा सोमबारबाट कुकुर सहितको जाँच सुरुवात गरेको जनाएकाे छ । प्रहरीले असोज २१ गते आइतबार चाडपर्व लक्षित सुरक्षा योजना सार्वजनिक गरेकाे थियाे ।
राजमार्गमा हुने लुटपाटलगायत अपराधिक घटना नियन्त्रण गर्ने उद्देश्यले कुकुर सहितको विशेष सुरक्षा जाँच गर्न थालिएकाे हाे । असोज २९ गतेदेखि जिल्लाकाे हेटौंडा उपमहानगरपालिका १५ स्थित रातोमाटे चेकपोष्टमा बागमती प्रदेश प्रहरी कार्यालय, ईलाका प्रहरी कार्यलय पशुपतिनगर र प्रहरी चौकी रातोमाटेले तालिम प्राप्त कुकुरसहितकाे जाँच गर्न थालेकाे जिल्ला प्रहरी कार्यालय मकवानपुरका प्रवक्ता लक्ष्मी भण्डारीले जानकारी दिए ।
प्रहरीले नेपालीकाे दशैं तिहारलगायतकाे चाडपर्वलाई लक्षित गरी मकवानपुर जिल्लामा प्रवेश गर्ने तथा बाहिरिने सवारी साधनहरुमा प्रतिबन्धित बस्तुहरु पटका, लागु औषध, भन्सार छलीका समानहरुलगायत अन्य बिष्फोटक पदार्थहरु समेत ओसारपसार हुन सक्ने भएकोले तालिम प्राप्त कुकुरसहितको विशेष चेकिङ शुरु गरिएको भण्डारीले बताए ।
यसअघि मकवानपुर प्रहरीले चाडपर्व लक्षित सुरक्षा याेजना सार्वजनिक गर्दै हेटौंडा १४ रातोमाटेमा एम्बुलेन्ससहितको यात्रु हेल्प डेस्कको स्थापना गरेको छ । त्यस्तै हेटौंडा ११ थानाभर्याङमा चालक निगरानीको लागि अस्थायी रिफ्रेससेन्टरको स्थापना गरेको प्रहरीले जनाएको छ । चाडपर्वको समयमा कुनैपनि यात्रु नठगिउन भन्ने उदेश्यले सुमो काउन्टर क्षेत्रमा प्रहरीले यात्रु सहायता कक्षको स्थापना गरेका छ । साथै, आरक्षण सीटको स्टीकर मेटिएका सार्वजनिक यातायातमा स्टीकर टाँस्ने काम समेत गरिएकाे छ ।
चाडपर्व लक्षित सचेतनाका लागि तयार पारिएका जिङ्गलहरु बजार चोकमा मात्र नभई जिल्लाभरिका विद्यालयहरुमा विहानको राष्ट्र गानपछि बजाएर विद्यार्थीहरुलाई जानकारी गराउने गरिएकाे उनले बताए । प्रहरीहरु सुरक्षा नाका,अस्पतालका बिरामी रेफर,लामो दूरी सवारी चेकजाच, यात्रु सहायक कक्षजस्ता सुरक्षाकार्यमा प्रहरी खटाईएको जिल्ला प्रहरी कार्यालय मकवानपुरले जानकारी दिएकाे छ ।
जिल्ला प्रहरी कार्यालय हेटौडाले मोटरसाइकल र गाडीसहित ४० जनाको ‘क्वीक रेस्पोन्स टोली बनाई गस्ति र चेकजाच गरिरहेको छ । चाडवाड लक्षित सुरक्षा योजनाका लागि ८ सय १४ जना प्रहरी परिचालन गरिएकाे मकवानपुर प्रहरी प्रमुख प्रहरी उपरीक्षक सिताराम रिजालले जानकारी दिए ।
मकवानपुर । मकवानपुर प्रहरीले लागुऔषध गाँजा मुद्दा फरार प्रतिबादी १२ वर्ष पछि पक्राउ गरेको छ । पक्राउ पर्नेमा थाहा नगरपापलिका–१२, भञ्जाङ बस्ने ६९ वषीय नाईके भन्ने धनमाँया लामा रहेको जिल्ला प्रहरी कार्यालय मकवापुरले जनाएको छ ।
२०६८ साल माघ १ गते मकवानपुरको साबिक टिस्टुङ गा.बि.स. वडा नम्बर ६ मा बस्ने लामालाई थाहा १२ भञ्जाङबाट पक्राउ गरेको प्रहरीले जनाएको छ ।
लामाले आफ्नो घर पछाडी बारीमा १ हजार ४ सय ४० किलो लागुऔषध गाँजा लुकाई छिपाई गरी राखेको अबस्थामा प्रहरीले फेला पारेको थियो । फरार रहेका लामाको खोजतलासको क्रममा सोमबार बिहान आफ्नै घरमा लुकी बसेको अवस्थामा पक्राउ गरिएको जिल्ला प्रहरी कार्यालय मकवानपुरले जानकारी दिएको छ ।
मकवानपुर । मनहरी गाउँपालिका ७ नम्बर वडा कार्यालयले आफ्नै भवनबाट सेवा प्रदान गर्ने भएकाे छ । मनहरी ७ स्थित बिजौनामा कार्यालय भवन बनेसँगै सेवा सुरु हुने भएकाे छ । आईतबार ७ नम्बर वडा कार्यालयकाे नवनिर्मित भवन नेपाली कांग्रेस बागमती प्रदेश सभापति एवं बागमती प्रदेशसभा सदस्य ईन्द्रबहादुर बानियाँले उद्घाटन गरेसँगै सेवा सुरु हुने भएकाे हाे ।
‘संघीय लोकतान्त्रिक गणतन्त्र पछि धेरै उत्तरचढावका बाबजुद स्थानीय तहको स्थापना भयाे’ भवन उद्घाटन गर्दै नेता बानियाँले भने ‘वडा कार्यालय भवनबाट अब जनताले सहजरुपमा सम्पूर्ण सेवा लिन पाउनेमा खुशी छु ।’ संघीयतामा सबैको अस्थित्व र पहिचानलाई स्थायित्वको लागि स्थानीय तह अपरिहार्य रहेको बताउँदै नेता बानियाँले जनताको अवस्था परिवर्तन गर्न स्थानीय निकायको भूमिका महत्वपूर्ण रहेको बताए ।
लोकतान्त्रिक गणतन्त्र स्थापनापछि निजामती कर्मचारी र राजनीतिमा भएका गल्ती कमजोरीलाई क्रमशः सुधार गर्दै लानुपर्ने बताउँदै कांग्रेस बागमती प्रदेश सभापति बानियाँले आउँदै गरेको चाडपर्वहरु विजयादशमी, दिपावली, छठ, क्रिसमसलगायतका चाडपर्वहरुको शुभकामना दिएका छन् ।मनहरी गाउँपालिकाको बजेटमा रत्नकुमारी एण्ड सन्स् प्रालि हेटौंडाले ८७ लाखमा सो भवन निर्माण गरेको वडाध्यक्ष ठाकुरराम तितुङले जानकराी दिए ।
कार्यक्रममा वडाभित्र रहेका रमन्टार मावि र रोटरी माविमा टाढाटाढाबाट अध्ययनका लागि आउने जेहेन्दार छात्रछात्राहरुलाई २ लाख बराबरको २३ वटा साईकल वितरण गरिएको थियो । टाढाबाट आउने विद्यार्थीहरुलाई लक्षित गरी वडा कार्यालयले खरिद गरेको २३ वटा साइकल वितरण गरिएको हो । साइकल खरिदमा लागि वडाले २ लाख रुपैयाँ खर्च गरेको छ ।
मनहरी ७ का वडाध्यक्ष तितुङको अध्यक्षतामा भएको कार्यक्रममा जिल्ला समन्वय समितिका उपप्रमुख सानुकाजी लुईटेल, नेपाली कांग्रेस मकवानपुरका सभापति बुद्ध लामा, मनहरी गाउँपालिका कावा अध्यक्ष शिवप्रसाद खनाल, नेपाली कांग्रेस मनहरी गाउँपालिका सभापति प्रकाश बर्तौला, नेकपा एमाले मनहरी अध्यक्ष नवीन सुवेदी, मनहरी गाउँपालिकाका निवर्तमान अध्यक्ष एकराज उप्रेती, मनहरी शिक्षा श्रोतव्यक्ति विदुर थापा, मनहरी ५ नम्बर वडा अध्यक्ष दीपेन्द्र अधिकारी, मनहरी ७ का वडा सदस्य नवराज सुवेदी, मनहरी गाउँपालिकाका प्रमुख प्रशासकीय अधिकृत मोहनकुमार श्रेष्ठ, डिपार्ट सामुदायिक वन मनहरीका अध्यक्ष डम्बरबहादुर मोक्तानलगायतकाे उपस्थिति थियाे ।
मकवानपुर । नारायणी बहुउद्देश्यीय सहकारी संस्था लिमिटेड हेटौंडाको २७ औं वार्षिक साधारणसभा शनिबार भएको छ । सहकारीका अध्यक्ष जंगबहादुर गुरुङले आव २०७९/८० को वार्षिक प्रतिवेदन र आव २०८०/८१ को नीति तथा कार्यक्रम, सचिव नारायणप्रसाद खतिवडाले आ.व. २०७९/८० को लेखापरीक्षण प्रतिवेदन, लेखा सुपरिवेक्षण समितिका संयोजक धर्मप्रसाद मिश्रले आव २०७९/८० को आन्तरिक लेखापरीक्षण प्रतिवेदन, ऋण उपसमितिका संयोजक रामचन्द्र अर्यालले आव २०७९/८० को ऋणको प्रतिवेदन र व्यवस्थापक महेश अधिकारीले आव २०८०/८१ को लागि प्रस्तावित आयव्यय विवरण साथै संस्थाको आन्तरिक नीति तथा सदस्य भेटघाट कार्यविधी र संरक्षित पुँजी फिर्ता कोष कार्यविधी प्रस्तुत गरेकोमा साधारणसभाले पारित गरेको छ ।
२०५३ सालमा स्थापित सहकारीको कूल बचत २३ करोड ४४ लाख ४६ हजार, जगेडा कोष दुई करोड १८ लाख ७८ हजार र कूल ऋण लगानी २३ करोड ५९ लाख ७३ हजार रुपैंया रहेको छ । भवन, जग्गासहित सहकारीको कूल सम्पती ३६ करोड ६० लाख ३१ हजार तथा अन्य कोष ६३ लाख ९१ हजार रुपैंया छ । एक हजार एक सय ३३ महिलासहित दुई हजार दुई सय ५९ जना शेयर सदस्य रहेको सहकारीको ६ करोड १८ लाख ८६ हजार शेयर पुँजी रहेको छ ।
साधारणसभामा प्रमुख अतिथि ललित घलानले सहकारीहरु बचत र ऋणमा सिमित नभई उद्योगहरु खोल्न ध्यान दिनुपर्ने बताए । ‘नेपालको संविधानमै समाजवाद उन्मुख रहने उल्लेख छ,’ उनले भने, ‘त्यसैले देश विकासको लागि सहकारीहरुको भूमिका र महत्व धेरै रहेको छ ।’ आमनागरिकलाई धेरै सुपथ पसलको आवश्यक्ता देखिएको भन्दै प्रमुख घलानले त्यस्ता पसल खोल्दै कृषकहरुको उत्पादनलाई विक्री वितरण गर्न आग्रह गरे ।
जिल्ला समन्वय समिति मकवानपुरका प्रमुख ललित घलानको प्रमुख आतिथ्य तथा नारायणी बहुउद्देश्यीय सहकारीका अध्यक्ष जंगबहादुर गुरुङको सभाध्यक्षतामा भएको साधारण सभामा हेटौंडा उपमहानगरपालिका सहकारी शाखा प्रमुख हिमप्रसाद पौडेल, हेटौंडा उपमहानगरपालिका ९ का वडा सदस्य विष्णु राना, निवर्तमान वडा अध्यक्ष लक्ष्मणप्रसाद भण्डारी, राष्ट्रिय सहकारी महासंघका पूर्व संचालक बद्री लम्साल, मकवानपुर जिल्ला बहुउद्देश्यीय सहकारी संघका अध्यक्ष रामहरी न्यौपाने, दिब्यतारा बहुउद्देश्यीय सहकारी संस्था लिमिटेड हेटौंडाका अध्यक्ष डा. गणेश लामा, शिवम् सिमेन्टका बिक्रम खतिवडा, कुष्माण्ड त्रिवेणीधाम विकास समितिका अध्यक्ष ईश्वरी न्यौपाने, नारायणी सहकारीका उपाध्यक्ष रामचन्द्र दाहाल लगायतकाे उपस्थिति रहेकाे थियाे ।
मकवानपुर । युवा बचत तथा ऋण सहकारी संस्थाको बचत रकम १८ करोड ८ लाख ११ हजार ५ सय ७१ रुपैयाँ पुगेको छ । गत वर्षको शेयर सदस्य संख्या २ हजार २ सय ३६ बाट वृद्धि गरी २ हजार ५ सय ९२ पुऱ्याईएको संस्थाले जनाएको छ ।
शनिबार भएको साधारण सभामा यस्तो प्रतिवेदन सार्वजनिक गरिएको हो । कार्यक्रममा बागमती प्रदेश सभा सदस्य लक्ष्मी श्रेष्ठले सहकारीहरू महिलाको जिवनस्तर उकास्न सहयोगी हुनुपर्ने बताएकी छिन् । युवा बचत तथा ऋण सहकारी संस्थाको १७ औं बार्षिक साधारण सभामा प्रदेश सभा सदस्य श्रेष्ठले यस्तो बताएकी हुन् ।
साधारण सभामा हेटौंडा उपमहानगरपालिकाका सहकारी शाखा प्रमुख हिम शर्मा पौडेलले सहकारी घर आँगनको बैंक भएको बताए । रोजगार सिर्जना गर्न देखि व्यवसायिक प्रगति पनि गरेको उनले बताए । हेटौंडा उपमहानगरपालिकाको नीति विधि र सिद्धान्तसंग मेल नखाएमा नगरपालिकाले कुनै पनि हालतमा नछाड्ने पौडेलले बताए । “सहकारीले ऋण, बचत व्याज मात्रै हैन, आम्दानीमा जोड्ने नीति ल्याउनु पर्छ, मन्दीमा सहकारीको भूमिका के हो ?” पौडेलले भने । सहकारीले काम गर्ने बानीको विकास गर्न पर्ने उनले बताए ।
कार्यक्रममा सहकारी अध्यक्ष राजुप्रसाद गौतमले आर्थिक वर्ष २०८०/२०५१ को वार्षिक लक्षित कार्यक्रमहरु प्रस्तुत गरेका थिए । यस आवमा सहकारीले शेयर सदस्य २ हजार ५ सय ९२ बाट वृद्धि गरी ३ हजार १ सय पुन्याउने, संस्था अभिकर्ता भई सदस्य तथा कर्जा बिमा कार्य गरिने, सहकारीका कर्मचारीहरुलाई १ लाख, २ लाख र ७ लाखको विमा संस्थाले गरिदिने, काउन्टर तथा रुट विमा गरि सुरक्षाको व्यवस्था गरिने, बैंक, वित्तिय संघ संस्था संगको सहकार्य र कारोबारलाई निरन्तरता दिईने, सुविधाकर्जा वापत सदस्यको जम्मा बचतको ८० प्रतिशत जुनसुकै बेलामा पनि उपलब्ध गराईने र सो कर्जामा सेवा शुल्क नलाग्ने, कर्जा लगानीको सिमा संस्थाको प्राथमिक पुजिकोषको आधारमा नियमानुसार गरिने योजना रहेको अध्यक्ष गौतमले बताए । यसैगरी संचालक समिती, उप समिती तथा शेयर सदस्यलाई उत्कृष्ट सहकारी अध्ययन अवलोकन भ्रमणको व्यवस्था गरिने गौतमले बताए । १५ हजार शेयर रकम नपुगेका सदस्यलाई पुर्याउनका लागि पहल गर्दै शेयरको माथिल्लो सिमा एक लाखसम्म प्रति सदस्य शेयर दिइनेछ । कर्जाको समय सिमालाई कर्जाको प्रकृति हेरि १ वर्ष देखि १० वर्षसम्मको समय सिमा कायम गरिएकोछ । सहकारीले विभिन्न बिधाम उत्कृष्ट शेयर सदस्यहरूलाई सम्मान समेत गरेको छ ।