मकवानपुर । मकवानपुरकाे हेटौंडा–२ स्थित बालजागृति इंग्लिस सेकेण्डरी स्कुलको क्याप्टेनमा रोजन मैनाली निर्वाचित भएका छन् ।
शुक्रबार भएकाे निर्वाचनबाट ३९६ मतसहित कक्षा ९ का मैनाली स्कूल क्याप्टेनमा निर्वाचित भएका हुन् । यसैगरी स्कुलको भाइस क्याप्टेनमा कक्षा ९ कै दिपिका लम्साल ३१० मतसहित निर्वाचित भईन् । क्याप्टेन र भाइस क्याप्टेनमा ४/४ जनाको उम्मेदवारी दिएका थिए ।
यस्तै रातो सदनको क्याप्टेनमा कक्षा ९ का प्रतिक ढकाल ८५ मतसहित विजयी हुँदा भाइस क्याप्टेनमा कक्षा ८ की अनुज्ञा विडारी ६३ मतसहित विजयी भईन् । पहेंलो सदनको क्याप्टेनमा ९ कक्षाका अमिष दाहाल (९४ मत) र भाइस क्याप्टेनमा ८ कक्षाकी समृद्धि केसी (७३ मत) निर्वाचित भएका छन् । हरियो सदनको क्याप्टेन र भाइस क्याप्टेनमा ८ कक्षाका अस्मिता थिङ (८७ मत) र प्रियांशु थिङ (७७ मत) चयन भए । यसैगरी निलो सदनको क्याप्टेन र भाइस क्याप्टेनमा ९ कक्षाका सहर्ष गौतम (७४ मत) र दिपिक्षा न्यौपाने (७९ मत) निर्वाचित भएका छन् ।
यस्तै वातावरण क्लबको क्याप्टेनमा ९ कक्षाका आर्यन खड्का (२६८) र भाइस क्याप्टेनमा ८ कक्षाकी सौरभी हुमागाई (२१०), साहित्य क्लबको क्याप्टेनमा ९ कक्षाका गन्तव्य राज पौडेल (३९६ मत) र भाइस क्याप्टेनमा ८ कक्षाकी सदीक्षा हुमागाई (३७३ मत) निर्वाचित भए । फाइन आर्ट क्लबको क्याप्टेनमा ७ कक्षाकी श्रेयशी गौतम (३७३ मत), भाइस क्याप्टेनमा ७ कक्षाकै अञ्जनप्रसाद यादव (२५२ मत), खेलकुद क्लबमा ७ कक्षाका साइमन उप्रेती (२५१ मत) र भाइस क्याप्टेनमा ९ कक्षाका सुवास्टिन महत (३०१ मत) निर्वाचित भएका छन् ।

शुक्रबार बिहान ७ बजेबाट दिउँसो ४ बजेसम्म मतदानको समय तोकिएको निर्वाचनमा ४ कक्षादेखि १० कक्षासम्मका ७ सय ५८ जना विद्यार्थीले मतदान गरेको प्रमुख निर्वाचन अधिकृत उमेश अर्यालले जानकारी दिए । निर्वाचनमा कक्षा ६ देखि ९ कक्षासम्मका विद्यार्थी उम्मेदवार हुन पाउने व्यवस्था गरिएको थियाे ।
विद्यालयका विविध क्रियाकलापमा विद्यार्थीको सहभागिता तथा विद्यार्थीमा नेतृत्व विकास, प्रजातान्त्रिक अभ्यासको अवगत गराउने उद्देश्यले बालजागृतिले २०७४ सालदेखि निर्वाचनको अभ्यास गराउँदै आएको प्रिन्सिपल विनोद सुवेदीले जानकारी दिए ।
मकवानपुर । मकवानपुरको मनहरी गाउँपालिका वडा नम्बर ९ रजैयामा ग्याँस बुलेट गाडीमा मोटर साइकल ठोक्किदाँ एक जनाको मृत्यु भएको छ ।
चितवनबाट हेटौँडा आउँदै गरेको एएस-२५ डिसी ०२१२ नम्बरको बुलेट गाडीमा विपरित दिशाबाट आएको ग ७ प २३०४ नम्बरको मोटरसाइकल ठोक्किदाँ मोटरसाइकलमा सवार पोखरा उपमहानगरपालिका ११ फुलबारी बस्ने ३३ वर्षका निर्मला अधिकारीको हेटौँडा स्थित सिएमसी चुरेहिल हस्पिटलमा उपचारको क्रममा मृत्यु भएको प्रहरीले जनाएकाे छ ।
मोटरसाइकल चालक सोही स्थान बस्ने वर्ष ३१ का सुवास गुरुङको सिएमसी चुरेहिल हस्पिटलमा उपचार भइरहेको छ । ग्याँस बुलेट चालक भारतको विहार राज्य पटियार थाना सदियान सुदमी बस्ने ३७ वर्षका मनीन्द्र कुमार दास र ग्याँस बुलेटलाई इलाका प्रहरी कार्यालय मनहरीले नियन्त्रणमा लिएर आवश्यक अनुसन्धान गरिरहेको जिल्ला प्रहरी कार्यालय मकवानपुरका प्रवक्ता एंव डिएसपी लक्ष्मी भण्डारीले बताए ।
आफ्नो अगाडी नम्बर नखुलेको सेतो हाइलक्सले अचानक ब्रेक लगाउँदा सोही गाडीमा ठक्कर दिई बुलेट गाडीमा पुगेको घाइते मोटरसाइकल चालक गुरुङले प्रहरीलाई बताएको प्रवक्ता भण्डारीले जानकारी दिए ।
मकवानपुर । मकवानपुरमा रुखकाे हाँगाले लागेर एक जनाकाे मृत्यु भएकाे छ ।
मंगलबार बिहान आएको हावाहुरीका कारण रुखकाे हाँगाले लागेर मकवानपुरकाे मनहरी गाउँपालिका-२ स्थित ट्याङ्की दमारका राम बहादुर गोलेकाे मृत्यु भएको मकवानपुर प्रहरीले जनाएकाे छ ।
प्रहरीका अनुसार २२ वर्षीय गोले आफ्नै बारीमा घाँस काटिरहेको अवस्थामा आएको हावाहुरीका कारण रुखको हाँगा भाँचिएर लाग्दा घटनास्थलमै उनकाे मृत्यु भएको हो।
मकवानपुर । मकवानपुरकाे मनहरी गाउँपालिकामा ३ वटा पक्की पुल निर्माण सम्पन्न भएकाे छ । आईतबारकाे गाउँकार्यपालिका बैठकले निर्माण सम्पन्न पुलको उद्घाटन जेठ २६ गते गर्ने निर्णय गरेकाे छ ।
कार्यपालिकाले उद्घाटन गर्ने निर्णय गरेसँगै मकवानपुर क्षेत्र नं २(ख) बाट निर्वाचित बागमती प्रदेश सभा सदस्य ईन्द्र बहादुर बानियाँले पुलकाे उद्घाटन गर्ने कार्यक्रम रहेकाे गाउँपालिका अध्यक्ष रन्जन कालाखेतीले बताए ।
गाउँपालिकाले गत आर्थिक वर्ष ०७७/७८ मा आन्तरिक श्रोतकाे ३३ करोड ४० लाख ६५ हजार लागतमा ५ वटा पक्की पुल निर्माणको काम सुरु गरेको थियो । गाउँपालिकाकाे वडा नं १,२,३, र ४ जोड्ने च्यापल खोला, हाँडिखोला, ट्वाङ्रा खोला, मसिने खोला र ठाडो खोलामा गरी ५ वटा पुलको ठेक्का मार्फत निर्माण थालिएकाे थियाे ।
हाल ट्वाङ्रा खोला, मसिने खोला र च्यापल खोला पुलको निर्माण कार्य सम्पन्न भइसकेको छ । बानीयाँ कन्स्ट्रक्सनसँग सम्झौता गरी निर्माण सम्पन्न भएको उक्त ३ वटै पुलकाे जेठ २६ गते उद्घाटन गरिने अध्यक्ष कालाखेतीले जानकारी दिए ।
यसैगरी हाँडिखोला र ठाडो खोलामा निर्माणाधिन दुईवटा पुल २०८१ मंसिर महिनासम्म सम्पन्न भइसक्ने उनले बताए । उनका अनुसार ठाडोखोला पुलकाे निर्माण ८५ प्रतिशत र हाँडिखोला पुलकाे निर्माण ६३ प्रतिशत भएकाे छ ।
मकवानपुर । साहित्य संगम मकवानपुरले २ जना स्रष्टालाई शनिबार हेटौडामा सम्मान गरेकाे छ । साहित्य सङ्गम मकवानपुरले शनिबार गरेकाे लघुकथा उत्सव कार्यक्रममा शार्दुल भट्टराई र डा दामोदर पुडासैनी किशाेरलाई सम्मानित गरेकाे हाे ।
भट्टराईलाई गोपालप्रसाद रिमाल स्मृति साहित्य सम्मान तथा किशाेरलाई साहित्य सङ्गम मकवानपुर कृति सम्मान प्रदान गरिएकाे हाे । हेटाैंडा उपमहानगरपालिकाका उप प्रमुख राजेश बानियाँले सम्मानित व्यक्तिलाई नगद र प्रमाणपत्रसहित उनीहरुलाई सम्मानित गरेका हुन् ।
भट्टराई संगमद्वारा स्थापित २० हजार रुपैया राशिको ‘गोपालप्रसाद स्मृति सम्मान २०८१’ सम्मानित भए । नाटक, कविता, अनुवाद, सम्पादन तथा समीक्षामा क्रियाशील उनका ‘बाँसुरीको आतङ् (नाटकसङ्ग्रह)’ र ‘पुल खस्यो (कवितासङ्ग्रह)’ प्रकाशित छन् ।
संगमका संस्थापक सचिव केशव श्रेष्ठ ज्योतिले स्थापना गरेकाे २५ हजार रुपैयाँ राशिको ‘साहित्य सङ्गम कृति सम्मान २०८०’ ‘डोल्पो ओ डोल्पो’ कृतिका लागि पुडासैनी सम्मानित भएका हुन् । नमेटिएका चिठीहरू र गृष्मको निलो बतास पुडासैनीद्वारा लिखित कृतिहरू हुन् ।
हेटौंडा उपमहानगरपालिका उपप्रमुख राजेश बानियाँले भाषा र लेखन क्षेत्रमा साहित्यले महत्वपूर्ण भूमिका निर्वाह गर्ने बताए । साहित्यकारहरुसँग शिक्षाकाे खानी हुने भएकाेले धेरैकुरा सिक्न सकिने बताउँदै बौद्धिक व्यक्तिलाई सम्मान गर्दै राजनीति र सामाजिक क्षेत्रमा लाग्न उहाँहरुलाई उत्प्रेरित बनाउनु पर्ने बताए ।
‘साहित्य सम्बन्धी कार्यक्रमको लागि साहित्य संघसंस्था उपमहानगरपालिका धाउने हाेइनकी उपमहानगरले बाेलाएर छलफल गरी साहित्यकाे लागि कार्यक्रम बनाउनु पर्ने बताए । ‘स्थानीय सरकार भौतिक निर्माणमा मात्रै रमाएकाे अवस्था छ’ उनले भने । अवकाे विकास भनेकाे बौद्धिक क्षेत्रकाे साहित्यकाे भाषा कला र संगीतकाे हुनु पर्ने बताउँदै तव मात्रै समाजकाे विकासकाे मापन गर्न सकिने बताए ।

साहित्य सङ्गम मकवानपुरका सल्लाहकार सुवास खनालले सम्मानित व्यक्तिको बारेमा संक्षिप्त चर्चा गरेका थिए । कार्यक्रममा लघुकथा चौतारी मकवानपुरका अध्यक्ष तथा लघुकथाकार किशन पौडेलले लघुकथा लेखनमा महोत्सवले थप सहयोग पुग्ने बताए । यसैगरी साहित्य सङ्गम मकवानपुरका सल्लाहकार तुल्सी घिमिरेले मकवानपुरमा साहित्य क्षेत्र चलायमान हुँदै अगाडि बढ्दै गइरहेको बताए ।
कथा, कविता, गजल, मुक्तक लगायत साहित्यका विविध विधाको विधागत कार्यशाला, लेखन, वाचन, स्रष्टा सम्मानलगायतका कार्यक्रमहरू आयोजना गर्दै आइरहेको सङ्गम उपाध्यक्ष सानु खनालले जानकारी दिए ।
लघुकथा सिद्धान्त र बाटो बहस
‘लघुकथाः सिद्धान्त र बाटो’ बहसमा चितवनका टीकाराम रेग्मी, नुवाकोटका दीपक लोहनी र काठमाडौँकी सुमन वर्षा सहभागी थिए । एसके निधन सहजकर्ता रहेको यस सत्रको अभिभावकत्व साहित्य सङ्गमका सल्लाहकार तुलसी घिमिरेले गरेका थिए । बहसमा लघुकथाकार रेग्मीले लघुकथाको सुरूवात, मध्य र विचारको प्रयोग तथा यसको अन्त्य गरिने तौरतरिकाकाे जानकारी दिएका थिए ।
यस्तै लघुकथाकार सुमन वर्षाले लघुकथाका भिन्न स्वरुप रहेको र उठानका क्रममा राजनैतिक द्वन्द्व, समाजका विषयवस्तु, दैनिकीका कुराहरू जुनसुकै विषयवस्तु उठान गरेता पनि त्यसलाई निश्कर्षमा पुर्याएको छ वा छैन भन्ने विषयले पनि लघुकथाको भिन्नतालाई पहिचान गर्न सकिने बताइन् । वर्षाले लेखकले कसरी लेख्ने भनेर सूत्र हेरेर नलेख्ने बरू नवीन प्रयोग गर्दै लेख्ने जानकारी दिइन् ।
बहसका क्रममा लोहनीले लघुकथा पहिले लेखियो कि सिद्धान्त पहिले बन्यो भन्ने प्रश्नमा जुनसुकै लेखन पहिले हुने र सिद्धान्तमा हाल्ने काम पछि हुने जानकारी दिए ।
उत्सवमा मकवानपुरका किशन पौडेल, रमेशमोहन अधिकारी, रामकुमार विष्ट ‘विष्ट अङ्कल’, श्याम श्रेष्ठ, मिथिला अधिकारी, चितवनकी रचना शर्मा, बैतडीका धनदेव जोशी, प्युठानका हरि जिसी, काठमाडौँका किसान प्रेमी र केशव श्रेष्ठ ‘ज्योति’ लगायतले आ-आफ्ना लघुकथा वाचन गरेका थिए।
साहित्य सङ्गम मकवानपुरका अध्यक्ष डीवी बर्तौलाको अध्यक्षता तथा हेटौडा उपमहानगरपालिका उपप्रमुख राजेश बानियाकाे प्रमुख आतिथ्यतामा भएको कार्यक्रमलाई सङ्गमका सचिव मनोज पोखरेलले सहजिकरण गरेका थिए । कार्यक्रममा साहित्यसँग सम्बन्धित विभिन्न संघ संस्थाका प्रतिनिधि एवम् साहित्यकारहरुको उपस्थिती रहेको थियो ।