मकवानपुर । बागमती प्रदेशका मुख्यमन्त्री इन्द्रबहादुर बानियाँले प्राविधिक शिक्षा अहिलेकाे आवश्यकता भएकाे बताएका छन् । मकवानपुरगढी गाउँपालिका वडा नम्बर–५ धादिङमा रहेको शारदा माध्यमिक विद्यालयको स्वर्ण महोत्सव उद्घाटन गर्ने उनले यस्तो बताएका हुन् ।
सोमबारबाट सुरु शारदाकाे सप्ताहव्यापी स्वर्ण महोत्सव कार्यक्रममा बानियाँले भने ‘अहिलेकाे शिक्षा भनेको देश भित्रै र बिदेशमा समेत विकाउ हुन आवश्यक छ ।’ प्रावविधिक शिक्षा तर्फ जोड दिंदै उनले यसका लागि विद्यालयलाई आवश्यक सहयोग गर्न प्रदेश सरकार तयार रहेको बताए । ‘परम्परागत शिक्षा भन्दा प्रविधिसँग जोड्ने शिक्षा अबकाे आवश्यक हाे’ उनले भने । अब पढ्दै, सिक्दै, काम गर्दै गर्न सक्ने शिक्षा आवश्यक रहेको उनले बताए ।
मुख्यमन्त्री बानियाँले शारदा गाना बिमोचन तथा स्तम्भ अनावरण समेत गरेका छन् । स्वर्ण महाेत्सव शुभारम्भकाे अवसरमा बिद्यालयका शिक्षकहरुलाई सम्मान गरिएको थियो । कार्यक्रममा मकवानपुरगढी गाउँपालिकाका अध्यक्ष दोर्जे लामा स्याङतान, निवर्तमान अध्यक्ष विदुर हुमागाई, उपाध्यक्ष मान कुमारी पाख्रिन नेपाली, शिक्षा विकास निर्देशनालयका महानिर्देशक गोपाल कंडेल, राष्ट्रिय परीक्षा वोर्ड हेटौंडा प्रमुख बद्री पाठक, विद्यालयका पूर्व अध्यक्ष बलराम घिमिरेलगायत उपस्थित थिए ।
यसैबिच, शारदा माविको स्वण महोत्सवका अवसरमा सप्ताहव्यापी कार्याक्रम अन्तरगत जिल्ला स्तरीय शिक्षक बुद्धिचाल प्रतियोगिता भएको छ । प्रतियोगितामा शिक्षक भीम तिमल्सिना प्रथम, प्रअ इन्द्रबहादुर कार्की द्वितीय, रामजीप्रसाद हुमागाईं तृतीय र दिवस दुलालले सान्त्वना स्थान हात पारेका छन् । बिद्यालयले आफ्नो स्थापनाको स्वर्ण महोत्सवका अवसरमा एक साता सम्म ५८ वटा विभिन्न कार्यक्रमको आयोजना गरी मनाउँदैछ ।
प्रधानध्यापक कार्कीले स्वागत गरेकाे उद्घाटन कार्यक्रम बिद्यालय व्यावस्थापन समितिका अध्यक्ष युवराज सापकोटाको अध्यक्षतामा भएको हाे ।
मकवानपुर । बागमती प्रदेशमा भएको मानव अधिकार रक्षकहरुको भेलाले प्रदेश स्तरीय सञ्जाल गठन गरेको छ । अनौपचारिक क्षेत्र सेवा केन्द्र (इन्सेक) को आयोजनामा भएको भेलाले बागमती प्रदेश स्तरीय मानव अधिकार रक्षक सञ्जाल गठन गरेको हो ।
अधिवक्ता दीपेन्द्र ढकालको संयोजकत्वमा गठित प्रदेश स्तरिय सञ्जालले मानव अधिकारका विविध चुनौती, कानुन कार्यान्वयन, जातीय विभेद, लैङ्गिक हिंसा, बालअधिकार, पर्यावरणीय हक तथा सङ्क्रमणकालीन न्यायलगायतका सवालमा समस्या पहिचान गर्दै निराकरणको लागि पहल गर्नेछ । सञ्जालले प्रदेश तथा जिल्ला स्तरमा रहेका अधिकारवादी अन्य सञ्जाल, संघसंस्था तथा सरोकारवाल निकायहरुसँग समन्वय गरेर काम गर्ने संयोजक ढकालले बताए ।
सञ्जाल गठनपछि तत्कालको गर्ने केही कार्ययोजना समेत तय गरिएको बताइएको छ । नजिकिदै गरेको लैङ्गिक हिंसा विरुद्धको १६ दिने अभियानको क्रममा ९ डिसेम्बर (मानव अधिकार रक्षक दिवस) को दिन सञ्जाल परिचयात्मक कार्यक्रम गर्ने र अभियान भर सबै दिवसहरुमा समन्वयात्मक रुपमा काम गर्ने योजना तय भएको संयोजक ढकालले बताए । सञ्जालमा सह संयोजकमा सिन्धुपाल्चोकका नातीबाबु धिताल, सचिवमा मकवानपुरको सरिता दाहाल, कोषाध्यक्षमा रामेछापको अर्जुन श्रेष्ठ चयन भएका छन् ।
यसैगरि सदस्यहरुमा अधिकारकर्मीहरु अधिवक्ता अप्सरा बस्नेत, कुमारी वाइवा, सिता मल्ल, शारदा चौलागाई, बिमला गोपाली, अञ्जिना गिरी, आशिष बुढाथोकी, रुद्रबहादुर खड्का, विनोद ढकाल, अस्मिता प्रजा, पवित्रा विश्वकर्मा, आश्मा भण्डारी, गोबिन्द प्रसाद न्यौपाने, सुमित्रा आचार्य, कवि पौडेल, अविनाश प्रजा र पवन गौतम रहेका छन् ।
साथै सञ्जालका सल्लाहकार तथा पर्वेक्षक समिति समेत गठन गरिएको छ । जसमा मानव अधिकार आयोग बागमती प्रदेशका प्रमुख उपसचिव चन्द्रकान्त चापागाईं, बाल कल्याण समाजका प्रकाश खतिवडा,सिविन बाल हेल्प लाइनका प्रमुख झविन्द्र ज्ञावली, गैसस प्रदेश कार्यवाहक अध्यक्ष कमलकुमार विश्वकर्मा, जिल्ला अध्यक्ष रमिला सापकोटा युवा अभियन्ता रञ्जन पौडेल रहेका छन् ।
कार्यक्रममा राष्ट्रिय मानव अधिकार आयोगका उपसचिव चन्द्रकान्त चापागाईंले महिलाअधिकार, बालअधिकार, शिक्षा, स्वास्थ्य, जातीय विभेद तथा लैङ्गिक तथा यौनिक अल्पसङ्ख्यकका अधिकारका विषयमा सञ्जालले सहकार्य र पहल गर्नुपर्नेमा बताए । कार्यक्रममा गैरसरकारी महासंघका केन्द्रीय सदस्य बुद्धचरण लामाले मानव अधिकार रक्षकहरुले आत्मसमिक्षा गर्दै समयानुकूल आफ्नो भूमिका परिवर्तन गर्न आवश्यक रहेको बताए ।
इन्सेक बागमती प्रदेश संयोजक शिवप्रसाद खकुरेल तथा प्रलेख अधिकृत बरुण बस्यालले सञ्जाल निर्माणको लागि विशेष सहजिकरण गरेका थिए ।
मकवानपुर । नेपाल आयल निगमले पेट्रोलियम पदार्थको मूल्य बढाएको छ । निगमका अनुसार पेट्रोलमा २ र डिजेलमा ३ रुपैयाँ मूल्य बढाइएको हो ।
भारतीय आयल निगमबाट पेट्रोलमा २ रुपैयाँ ४५ पैसा र डिजेलमा ६ रुपैयाँ ५३ पैसा बढेर मूल्यसूची आएकोले मूल्य बढाइएको निगमले जनाएको छ । तर निगमले उपभोक्ताको हितलाई ध्यान दिदै पेट्रोलमा २ र डिजेलमा ३ रुपैयाँमा मात्रै वृद्धि गरेको जनाइएको छ ।
निगमका अनुसार बढेको मूल्य शनिबार राति १२ बजेबाट लागू भएको छ ।

मकवानपुर । नेकपा (एमाले) मकवानपुरले शनिबार शक्ति प्रदर्शनी गरेको छ ।
देशब्यापी कार्यक्रम अनुसार मकवानपुरको हेटौंडामा पनि शक्ति प्रदर्शन गरेको हो । मकवानपुरको १० वटै स्थानीय तहबाट आएका नेकपा एमालेका कार्यकर्ताहरुले हेटौंडाको लोकतान्त्रिक चौरमा सभा गरेको थियोे ।
सभामा पार्टी प्रदेश इन्चार्ज राजन भट्टराई, जिल्ला इन्चार्ज रामेश्वर राना, केन्द्रिय सदस्य महेश बर्तौलालगायतले सम्बोधन गरे । जिल्लाको ४ दिशाबाट मोटरसाइकल र्याली मार्फत कार्यकर्ता हेटौंडा आएका थिए ।
सम्बोधन गर्ने बक्ताहरूले विघटित प्रतिनिधिसभा पुनःस्थापना र जेनजी आन्दोलनका क्रममा भएको तोडफोडमा संलग्नहरूलाई कारबाहीको माग गरे ।
हेटौंडामा उत्तरी क्षेत्रका एमालेका कार्यकर्ता मोटरसाइकलमा सामरी पुलबाट, दक्षिण क्षेत्रका एमालेका नेता कार्यकर्ताहरु हेटौंडाको कर्रापुल तर्फबाट, पूर्व क्षेत्रका नेता कार्यकर्ताहरु फुर्केचौर क्षेत्रबाट र पश्चिम क्षेत्रका एमालेका नेता कार्यकर्ताहरु राप्ती पुल हुँदै हेटौंडाको मुख्य बजारमा मोटरसाइकल र्याली सहित प्रवेश गरेका एमाले मकवानपुर उपाध्यक्ष हिदम लामाले बताए ।
हेटौंडाको हुप्राचौरमा आयोजित जनसभालाई सम्बोधन गर्दै नेकपा एमालेका केन्द्रीय नेता समेत रहेका डाक्टर राजन भटराइले राष्ट्रियताको रक्षाका लागि सबै एकताबद्ध हुन आवश्यक रहेको बताए । भट्टराईले देशको राष्ट्रियतासँगै लोकतन्त्र र संविधानको रक्षाका लागि सबै एकताबद्ध हुन आवश्यक रहेको बताए । राष्ट्रियताका रक्षाका लागि सबै एकताबद्ध हुनुपर्ने भन्दै देशको राष्ट्रियता, लोकतन्त्र र संविधान जनताले जोगाउन सक्ने उनले बताए।
जेनजी आन्दोलनकै कारण पूर्वप्रधानन्यायाधीश सुशीला कार्कीको नेतृत्वमा अन्तरिम सरकार गठन भएको छ भने प्रतिनिधि सभा विघटन गरिएको छ। फागुन २१ गते प्रतिनिधि सभा चुनावको घोषणा गरिएको छ। तर, एमालेले भने प्रतिनिधि सभा विघटनको विरोध गर्दै त्यसलाई पुनर्स्थापना गर्नुपर्ने जिकिर गरिरहेको छ।
यसैबीच एमाले र्यालीमा पेट्रोल बांडिएको भन्ने भ्रामक हल्लाको पछि नलाग्न पार्टीले सर्वसाधारणलाई अनुरोध गरेको छ। नक्कली छाप राखेर ३ लिटर र ९३ लिटर लेखिएको अध्यक्ष उल्लेख्य गरि छाप लगाएको कागजको टुक्रा पार्टीको बदनामको लागि सामाजिक संजालमा भाइरल गराइएको छ । जसमा मिति समेत एक बर्ष पछिको उल्लेख्य छ ।
मकवानपुर । विकासकाे लागि शिक्षा पहिलाे प्राथमिकता रहेकाे हेटौंडा उपमहानगरपालिका वडा नम्बर ४ का वडाध्यक्ष नवीन सिग्देलले बताएका छन् । वडाकाे शैक्षिक गुणस्तर सुधार समितिकाे बैठकमा अध्यक्ष सिग्देलले यस्तो बताएका हुन् ।
‘हेटाैंडाकाे ४ नं. वडा बागमती प्रदेशकाे राजधानीकाे शैक्षिक केन्द्र भएकाेले शिक्षालाई पहिलाे प्राथमिकता दिईएकाे छ’ उनले भने ‘वडा कार्यालयले शिक्षालाई प्राथमिकतामा राखेर बजेट विनियाेजन गर्दै आएकाे छ ।’ शुक्रबारकाे समिति बैठकले हेटाैंडा उपमहानगरपालिका ४ नं. वडा कार्यालयद्वारा विनियाेजित शैक्षिक कार्यक्रम कार्यान्वयनबारे ६ महिने (मंसिर-बैशाख) कार्ययाेजना बनाएकाे छ ।
वडा कार्यालयमा भएकाे बैठकले शिक्षक तालिम तथा उत्प्रेरणा कार्यक्रम, बृहत् शैक्षिक तथा साँस्कृतिक मेला, वडास्तरीय बृहद खेलकुद प्रतियाेगिता, उत्कृष्ट शिक्षक तथा विद्यार्थी सम्मान तथा पुरस्कार वितरण कार्यक्रम, विद्यार्थी उद्यमशीलता कार्यक्रम, विद्यालयमा विनियाेजित पूर्वाधार निर्माण कार्य अगाडि बढाउने लगायतकाे निर्णयहरू गरेकाे छ ।
भुटनदेवी माविका प्रअ माधवप्रसाद दाहालकाे अनिवार्य अवकाशपछि शैक्षिक गुणस्तर सुधार समितिकाे रिक्त रहेकाे काेषाध्यक्ष पदमा भुटनदेवी माविका निमित्त प्रअ सूर्यप्रसाद घिमीरेलाई मनाेनित गरिएकाे समितिका सचिव रामसागर गुरागाईंले जानकारी दिए । बैठकले काेषाध्यक्ष दाहालले समितिमा रहेर पुर्याउनु भएकाे याेगदानकाे कदरसहित आभार व्यक्त गर्दै भुटनदेवी माविका निमित्ति प्रअ सूर्यप्रसाद घिमीरेलाई बधाई ज्ञापन गरेकाे छ ।
समितिका अध्यक्ष तथा श्रमिक माविका प्रअ श्रीराम दाहालकाे अध्यक्षतामा बसेकाे बैठकमा वडा सदस्य गीता त्रिपाठी भुटनदेवी मावि, आधुनिक राष्ट्रिय मावि, श्रमिक मावि, नवाेदय बाेर्डिङ्ग स्कुल, ब्रम्हदीक एकेडेमी, सत्यम् जेभियर्स, आमसाई बाेडिङ्ग स्कुल, राेज एकेडेमीका प्रिन्सिपल तथा प्रतिनिधि र वडाका कर्मचारीहरुकाे उपस्थित रहेकाे थियाे ।