मकवानपुर । नेपालमा माैसमकाे आगमन भएकाे छ । बंगालको खाडी आसपास बिकशित भएको न्यून चापीय क्षेत्रका कारण जेठ २८ गते शुक्रबार नेपालमा माैसमकाे आगमन भएकाे जल तथा माैसम विज्ञान विभाग माैसम पूर्वानुमान महाशाखाले जनाएकाे छ ।
नेपालको पूर्वी भूभाग प्रदेश १, प्रदेश २ र बागमती प्रदेशमा मनसुनको आगमन (Monsoon Onset) भएको छ। एक दुई दिनमानै मनसुन देशैभरी फैलिने सम्भावना रहेको महाशाखाले जनाएकाे हाे ।
आगामी साता मनसुन सक्रिय भई देशका धेरै स्थानहरुमा हल्का देखि मध्यम वर्षा, केहि स्थानहरुमा भारी वर्षा र थोरै स्थानहरुमा धेरै भारी वर्षाको सम्भावना रहेको हुनाले आवश्यक सतर्कता अपनाउन हुन अनुरोध छ।
हाल देशको पुर्वी र मध्य भूभागमा उत्तर पश्चिम बंगालको खाडी र आसपास बनेको न्यून चापीय क्षेत्रको प्रभाव तथा पश्चिमी भूभागमा पश्चिमी वायु र स्थानीय वायुको मिश्रित प्रभाव रहेको छ । अहिले देशभर आंशिक देखि सामान्य बदली भई थोरै स्थानहरुमा वर्षा समेत भईरहेको अवस्था छ ।
जेठ २९ शनिबार देशभर सामान्य देखि पूर्ण बदली रहनेछ । देशका धेरै स्थानहरुमा मेघगर्जन/चट्टयाङ्ग सहित हल्का देखि मध्यम वर्षाको सम्भावना रहेको छ। गण्डकी प्रदेश, लुम्बिनी प्रदेश र कर्णाली प्रदेशका थोरै स्थानहरुमा भारी बर्षाको समेत सम्भावना रहेकाे माैसम पूर्वानुमान महाशाखाले जनाएकाे छ ।
देशका धेरै स्थानहरुमा मेघगर्जन/चट्याङ्ग सहित हल्का देखि मध्यम वर्षा तथा गण्डकी प्रदेश, लुम्विनी प्रदेश र कर्णाली प्रदेशका थोरै स्थानहरुमा भारी बर्षाको समेत सम्भावना देखिएकोले आवश्यक सतर्कता अपनाउनु हुन समेत महाशाखाले अनुरोध गरेकाे छ।
काठमाडौं । खोप अभियान सुरु भएको १ सय ३४ दिनसम्ममा देशभर कुल जनसंख्याको ७ प्रतिशतले कोरोनाविरुद्धको खोप लगाएका छन्् । स्वास्थ्य तथा जनसंख्या मन्त्रालयको तथ्यांकअनुसार हालसम्म २२ लाखले पहिलो मात्रा र ८ लाखभन्दा बढी नागरिकले पहिलो तथा दोस्रो खोप लगाएका हुन् ।
तथ्यांकमा नेपालको कुल जनसंख्या ३ करोड ३ लाख ६६ हजार ४ सय ८५ उल्लेख छ । सरकारले आगामी १७ पुससम्म लक्षित समूह २ करोड १७ लाख नागरिकलाई खोप लगाइसक्ने योजनासमेत बनाएको छ । गत १४ माघ २०७७ देखि कोरोनाविरुद्धको खोप अभियान सुरु गरिएको हो ।
हाल, चीनले अनुदान उपलब्ध गराएको १० लाख मात्रा भेरोसिल खोप लगाउने अभियान जारी छ । यद्यपि, काठमाडौं महानगरपालिकासहित केही पालिकामा खोप सकिएपछि अभियान स्थगित भएको छ ।
स्वास्थ्य मन्त्रालयले तयार पारेको कोभिड–१९ खोपका लागि लक्षित समूहको प्राथमिकीकरणमा २ करोड १७ लाख ५६ हजार ७ सय ६३ जनालाई लगाउनुपर्ने देखिएको छ ।
स्वास्थ्यमन्त्री शेरबहादुर तामाङले खोप खरिदका लागि सरकार लागिपरेको भन्दै केही दिनमै खोप आउने विश्वास दिलाएका छन्् । ‘केही दिनमै खोपसम्बन्धी सुखद समाचार सुन्नुहुनेछ,’ मन्त्री तामाङले शुक्रबार राजधानीसँग भने, ‘तर सबैभन्दा मुख्य कुरा सुरक्षित भएर बस्नु नै हो ।’
सरकारले १४ लाख ज्येष्ठ नागरिकलाई हालसम्म कोभिसिल्ड खोप दोस्रो मात्रा लगाइसक्नुपर्ने हो । तर, भारत सरकारमार्फत खरिद गरिएको खोप उपलब्ध नहुँदा ‘कहिले लगाउने ?’ भन्ने अन्योल छ ।
स्वास्थ्य सेवा विभागअन्तर्गत परिवार कल्याण महाशाखा निर्देशक डा. तारानाथ पोखरेलले कोभिसिल्ड खोप लगाएकालाई एस्ट्रेजेनिका लगाइने जानकारी दिए । तर, सो खोप पनि ‘कहिले आउने ?’ कुनै टुगो छैन ।
औषधि व्यवस्था विभागले कोभिसिल्ड, भेरोसिल, कोभ्याक्सिन, स्पुतनिक भी र साइनोभ्याकलाई आपतकालीन प्रयोगका लागि अनुमति दिएको छ ।
यसैबीच, देशभर शुक्रबार थप ५ हजार २ सय २५ निको भएसँगै हालसम्म ५ लाख २० हजार ८ सय १६ संक्रमित घर फर्केका छन् । नेपालमा संक्रमित निको दर ८६ दशमलव २ प्रतिशत रहेको छ । स्वास्थ्य मन्त्रालयका अनुसार पछिल्लो २४ घण्टामा ९ हजार ५ सय ९८ जनाको पीसीआर र ५ हजार ५ सय ८४ जनाको एन्टिजेन विधिबाट कोरोना परीक्षण गरिएको छ ।
पीसीआरबाट २ हजार ७ सय ९ र एन्टिजेनबाट १ हजार ४१ संक्रमित थपिएका छन्् । शुक्रबार देशभर थप ६७ जनाको मृत्यु भएको छ । योसँगै कोरोनाबाट अहिलेसम्म ८ हजार ३ सय ५ को मृत्यु भएको छ ।
यसैगरी, देशभर १ हजार १ सय ८९ आईसीयू र ३ सय ६६ संक्रमित भेन्टिलेटरमा छन्् । प्रदेश १ मा १ सय ९६ आईसीयू र ५४ भेन्टिलेटर, प्रदेश २ मा ५८ आईसीयू र १४ जना भेन्टिलेटरमा उपचाररत छन्् । बाग्मती प्रदेशमा ६ सय ८७ आईसीयू र २ सय ४१ जना भेन्टिलेटरमा छन् ।
स्वास्थ्य मन्त्रालयका अनुसार गण्डकी प्रदेशमा ८९ आईसीयू र २७ भेन्टिलेटर, लुम्बिनी प्रदेशमा १ सय १६ आईसीयू र १८ जना भेन्टिलेटर, कर्णालीमा २२ जना आईसीयू र चार जना भेन्टिलेटर, सुदूरपश्चिम प्रदेशमा २१ आईसीयू र आठ जना भेन्टिलेटरमा उपचाररत छन् । राजधानीबाट
काठमाडौं । जनता समाजवादी पार्टी (जसपा) अध्यक्ष महन्थ ठाकुर र वरिष्ठ नेता राजेन्द्र महतो समूह नयाँ दल दर्ता तयारीमा जुटेको छ । जसपामा अल्पमतमा रहेका ठाकुर र महतो समूह निर्वाचन आयोगमा केन्द्रीय कार्यकारिणी समिति बहुमत सदस्यको हस्ताक्षर बुझाउन नसकेपछि नयाँ दल दर्ता तयारीमा जुटेको हो ।
जसपा कार्यकारिणी समिति ५१ सदस्यीय छ । जसमा तत्कालीन राष्ट्रिय जनता पार्टी (राजपा)बाट २६ र संघीय समाजवादीबाट २५ जना थिए । तर, तत्कालीन राजपाका तर्फबाट कार्यकारिणी समितिमा रहेका नवलकिशोर साह, रामनरेश यादव, महेन्द्रराय यादव, रमेश यादव, मृगेन्द्रकुमार सिंह यादव र गजाधर यादवले अन्तिम समय ठाकुर र महतोको साथ छोडेका छन् ।
जसपा नेताका अनुसार ठाकुर समूह अल्पमतमा परेपछि नयाँ दल दर्ता तयारीमा छ । ‘कार्यकारिणी समितिमा अल्मतमा परेपछि ठाकुर र महतोजीहरू नयाँ दल दर्ताका लागि आन्तरिक तयारीमा हुनुहुन्छ,’ जसपा स्रोतले शुक्रबार राजधानीसँग भन्यो ।
उपप्रधामन्त्रीसमेत रहेका महतोनिकट साह प्रदेश २ मा सामाजिक विकासमन्त्री छन् । महेन्द्रनिकट रामनरेश पनि प्रदेश २ मा वन तथा वातावरणमन्त्री छन् । त्यस्तै, महेन्द्रनिकटका रमेश जसपा उपेन्द्र यादव समूहमा पुगेका छन् । संघीय सरकारमा उद्योग तथा वाणिज्यमन्त्रीमा नियुक्त राजकिशोर यादवनिकट गजाधर उपेन्द्र समूहमा गएका छन् ।
स्रोतअनुसार राजपाबाट कार्यकारिणी समितिमा रहेका ६ नेता उपेन्द्र समूहमा पुगेपछि ठाकुर र महतो समूह अल्पमतमा परेको हो । प्रधानमन्त्री केपी शर्मा ओली सरकारमा ‘सहभागी हुने कि नहुने ?’ विवादले पार्टीभित्र चर्को बहस भएको थियो । तर, ठाकुर र महतो समूह सरकारमा सहभागी भएपछि पार्टी पनि विभाजन भएको छ ।
विवाद चर्किंदै गएपछि एकअर्कालाई स्पष्टीकरण सोधेर अनुशासन कारबाहीसमेत गरियो । गत १८ जेठमा उपेन्द्र समूहले ठाकुर, महतो, लक्ष्मणलाल कर्ण र सर्वेन्द्रनाथ शुक्ल र सोही दिन उपेन्द्रलाई समेत ठाकुर समूहले कारबाही ग¥यो । दुवै समूहले एकअर्कालाई पार्टी साधारण सदस्यसमेत नरहनेगरी कारबाही गरेर निर्वाचन आयोगलाई पार्टी अभिलेख अद्यावधिक गर्न माग गर्दै निवेदन दिएका थिए ।
गत १९ जेठमा आयोगले दुवै निवेदन राजनीतिक दलसम्बन्धी नियमावली २०७३ (पहिलो संशोधन)अनुरूप नभएपछि बदर गर्दै अनुसूची १८ बमोजिमको फारामसमेत भरेर पठाउन भन्दै पत्राचार गरेको थियो । तर, ठाकुर समूहले सोबमोजिम निवेदन पेस गर्न सकेको छैन ।
अनुसूची १८ मा दल विवरण हेरफेर गर्नुपर्ने भएमा सो ढाँचाअनुसार निर्वाचन आयोगमा लेखी पठाउनुपर्ने व्यवस्था छ । आयोगले पत्रमा ठाकुर पक्षलाई केन्द्रीय कार्यकारिणी समिति बैठकमा उपस्थित सदस्यको हस्ताक्षरसहितको माइन्युटसमेत आयोगमा पेस गर्न भनेको थियो ।
यादवले भने केन्द्रीय कार्यकारिणाी समितिको बहुमत सदस्यको हस्ताक्षरसहित ठाकुरलाई कारबाही गरिएको पत्र बुझाएका कारण उनलाई अनुसूची १८ को फाराम मात्रै भर्न भन्यो । यादवले गत २० जेठमै भरेर बुझाइसकेका छन् ।
बहुमत केन्द्रीय कार्यकारिणी सदस्यले यादवको पक्षमा हस्ताक्षर गरेकाले ठाकुर पक्षलाई बहुमत जुटाउन सकस भएको हो ।
ठाकुर पक्षले आयोगले भने बमोजिम पत्र पेस गर्न नसकेपछि गत २३ जेठमा एक हप्ताको समय माग गरेको छ । ठाकुर पक्षले मागेको समय शुक्रबार सकिएको छ ।
जसपा संसदीय दलमा ठाकुर र महतो समूहको बहुमत रहेको थियो । २० सांसदसहित बहुमतमा रहेको ठाकुर समूहले महतोलाई संसदीय दलको नेता चयन गरेको थियो । तर, प्रतिनिधिसभा विघटन भएकाले अब कार्यकारिणी समितिमा अनिवार्य बहुमत सिद्ध गर्नुपर्नेहुन्छ । यद्यपि, कार्यकारिणी समितिमा उपेन्द्र समूहको बुहमत रहेकाले ठाकुर र महतो समूहले नयाँ दल दर्ता गर्नुपर्नेहुन्छ । राजधानीबाट
नेपालको राष्ट्रिय फुटबल टिम फिफा विश्वकप २०२२ र एसियन कप २०२३ को संयुक्त छनोटमा अस्ट्रेलियासँग पराजित भएको छ । संयुक्त छनोट अन्तर्गत दोस्रो चरणमा समूह बी को अन्तिम खेलमा अस्ट्रेलियासँग नेपाल ३-० गोल अन्तरले पराजित भएको हो ।
अस्ट्रेलियाले नेपालविरुद्ध पहिलो हाफमा २ गोल गरेको थियो भने दोस्रो हाफमा एक गोल गरेको थियो । पहिलो हाफको ४५औ मिनेटमा नेपाली खेलाडी रोहित चन्दले रातो कार्ड पाएपछि १० खेलाडीमा सिमित भएको थियो । कुवेतस्थित जाबेर अल अहमद अन्तर्राष्ट्रिय स्टेडियममा भएको खेलमा पहिलो हाफमा अस्ट्रेलियाले खेलको छैटौ र ३८औ मिनेटमा १/१ एक गोल गरेको थियो भने दोस्रो हाफको ५७औ मिनेटमा तेस्रो गोल गरेको थियो ।
विश्वकपको छनौट अन्तर्गतनै नेपालले २०१९ मा अस्ट्रेलियाविरुद्ध ५-० को हार बेहोरेको थियो । योसँगै नेपालले विश्वकपको छनौट खेलमा ८ खेलमा ६ खेलमा हार र २ खेलमा जितसहित ६ अंकसहित आफ्नो यात्रा टुंगाएको छ । फिफा वरीयतामा ४१ औ स्थानमा रहेको अष्ट्रेलिया नेपालभन्दा १३० स्थान माथि छ । नेपाल १७१औं स्थानमा छ ।
अष्ट्रेलियाविरुद्ध नेपालका ३ युवा खेलाडीले डेब्यु गरेका छन् । पहिलो पटक राष्ट्रिय टिममा परेका आयुष घलान, सुरजज्यु ठकुरी र कमल थापाले दोस्रो हाफमा मेदान प्रवेश गर्दै डेब्यु गरेका हुन् ।
यसैगरी अष्ट्रेलियाविरुद्ध नेपालको प्रदर्शनबाट खुशी रहेको नेपाली राष्ट्रिय फुटबल टोलीका प्रशिक्षक अब्दुल्लाह अलमुताइरीले प्रतिक्रिया दिएका छन् । नेपाल अष्ट्रेलियासँग पराजित भए पनि खेल प्रशंसनीय रहेको अलमुताइरीले बताएका हुन् ।
‘अनुमति लिएर राहत वितरण गर्नु पर्ने’
Tags: No Comments
मकवानपुर । कोरोना संक्रमणकाे बेला संक्रमित तथा परिवारलाई राहत वितरण गर्दा अनुमित लिएर मात्र विरतर गर्न जिल्ला प्रशासन कार्यालय मकवानपुरले आग्रह गरेको छ । २८ गते शुक्रबारकाे जिल्ला काेभिड व्यवस्थापन समितिले निर्णय गरेर राहत वितरण गर्ने व्यक्ति तथा संस्थालाइ सम्वन्धित स्थानीय तह, जिल्ला प्रशासन कार्यालयसँग अनुमति लिएर मात्र राहत वितरण गर्न भनेकाे हाे ।
शुक्रबार सुचना जारी गरी जिल्लामा पछिल्लो समय राहत सामग्री आफु खशी ढंगबाट वितरण भएको जनगुनासो बढेकोले राहत बितरण गर्न इच्छुक व्यक्ति वा संस्थाले स्थानियतह तथा कोभिड व्यवस्थापन समिति, मकवानपुरबाट अनुमति लिएर मात्रै राहत सामग्री वितरण गर्न गराउन भनिएको छ । प्रशासनले आफूखुसी राहत बितरण नगर्न आग्रह गर्दै अनुगमनको क्रममा अनुमति बेगर राहत सामग्री वितरण गरिएको पाईएमा प्रचलित कानुन बमोजिम कारवाही समेत गरिने सूचनामा उल्लेख गरिएको छ ।
जिल्ला काेभिड व्यवस्थापन समितिका निर्णयहरू:-
- उद्योग तथा प्रतिष्ठानहरूमा कार्यरत मजदूर कर्मचारीहरू कोभिड-१९ बाट संक्रमित भएमा उद्योग प्रतिष्ठानले आफैले स्थापना गरेको आइसोलेशसन सेन्टर वा संस्थागत आइसोलेशसन सेन्टरमा निजहरूलाई राख्ने व्यवस्था उद्योग संघ, मकवानपुरले मिलाउने ।
- कोभिड-१९ बाट संक्रमित भई संस्थागत आइसोलेशन तथा होम आइसोलेशनमा बसिरहेकाहरूलाई एकीकृत ग्रामीण विकास सेवा, मकवानपुरले सम्बन्धित पालिकासँग समन्वय गरी मनोसामाजिक परामर्श प्रदान गर्ने ।
- कोभिड-१९ बाट संक्रमितहरूको उपचार गर्ने सन्दर्भमा हेटौडा अस्पतालले बालबालिका मैत्री संरचना समेत तयार गर्ने ।
- आगामी दिनमा हुनसक्ने कोभिड-१९ को तेस्रो लहर र बालबालिकाहरूलाई हुनसक्ने सम्भावित जोखिमलाई मध्यनजर गर्दै हेटौडा अस्पतालले आवश्यक पूर्वतयारी एवं स्रोतसाधनको आँकलन सहित जिल्ला कोभिड व्यवस्थापन समितिको आगामी बैठकमा योजना पेश गर्ने ।
- स्वास्थ्य कार्यालय, मकवानपुर र सबै स्थानीय तहहरूले कोभिड-१९ को परीक्षणको दायरा एवं संख्या बढाउने ।
- कोभिड-१९ बाट संक्रमित एवं प्रभावित परिवारलाई राहत सामग्री वितरण गर्ने सम्बन्धमा कतिपय व्यक्ति तथा संघ संस्थाले सम्बन्धित निकायबाट अनुमति नै नलिई राहत सामग्री वितरण गरिरहेको सूचना एवं गुनासो प्राप्त भएको सन्दर्भमा राहत सामग्री वितरण गर्न इच्छुक व्यक्ति तथा संघ संस्थाले सम्बन्धित स्थानीय तह वा जिल्ला कोभिड व्यवस्थापन समितिबाट अनुमति लिई मात्र राहत वितरणको कार्य गर्ने, गराउने ।
- निषेधाज्ञाको प्रभाव एवं आगामी रणनीतिका सम्बन्धमा जिल्ला कोभिड व्यवस्थापन समितिका सदस्यहरू (आमन्त्रित समेत)ले क्षेत्रगतरूपमा आ-आफ्ना राय आगामी बैठकमा पेश गर्ने ।