मकवानपुर। मकवानपुर जिल्लामा कोरोना संक्रमण कम हुदै गएकाे तर काेराेनाकाे जाेखिम कायमै रहेकाे भन्दै निषेधाज्ञा थप गरिएकाे छ । प्रमुख जिल्ला अधिकारी भरतमणि पाण्डेको आइतबारकाे आदेशबाट निषेधाज्ञा थप गरिएको हो । अब मकवानपुरमा असार ३१ गतेसम्म कायम भएकाे छ । सार्वजनिक यातायात भने याे अवधीमा सञ्चालन हुने छैनन् ।
मकवानपुर जिल्लाभित्र कोभिड-१९ को संक्रमण रोकथाम, नियन्त्रण तथा व्यवस्थापनका लागि यस अघी असार २१ गते राती १२:०० बजेसम्म निषेधाज्ञा कायम गरिएकोमा जिल्लाभित्र संक्रमणको दर क्रमश: घट्दै गएको तर जोखिम यथावत नै रहेको हुँदा जिल्ला कोभिड व्यवस्थापन समिति, मकवानपुरको असार २० को सिफारिसले निषेधाज्ञा थप गरिएकाे हाे ।
जिल्ला सुरक्षा समितिको असार २० को निर्णय समेतको आधारमा संक्रामक रोग ऐन, २०२० को दफा २, कोभिड-१९ सङ्कट व्यवस्थापन अध्यादेश, २०७८ को दफा ४ र स्थानीय प्रशासन ऐन, २०२८ को दफा ६ को उपदफा ३ बमोजिम निषेधाज्ञालाई निरन्तरता दिई असार २१ गते सोमबार राती १२ बजेदेखि असार ३१ गते विहीबार राती १२ बजेसम्म निषेधाज्ञा थपिएकाे प्रजिअ पाण्डेद्वारा जारी आदेशमा भनिएकाे छ ।
यसअघि निषेधाज्ञामा तोकिएका व्यवसाय र क्षेत्र साविक अनुसार नै संचालन हुने र सार्वजनिक यातायातको बारेमा निर्णय नभएको जनाईएको छ । आदेशको बर्खिलाप भए, गरेको पाइएमा प्रचलित कानून बमोजिम कडा कारबाही हुने समेत प्रजिअकाे आदेशमा भनिएकाे छ ।
मकवानपुर जिल्लाका प्रमुख जिल्ला अधिकारीबाट जारी आदेश ।
मकवानपुर जिल्लाभित्र कोभिड-१९ को संक्रमण रोकथाम, नियन्त्रण तथा व्यवस्थापनका लागि यस जिल्लामा मिति २०७८ साल असार २१ गते राती १२:०० बजेसम्म निषेधाज्ञा कायम गरिएकोमा जिल्लाभित्र संक्रमणको दर क्रमश: घट्दै गएको तर जोखिम यथावत नै रहेको हुँदा जिल्ला कोभिड व्यवस्थापन समिति, मकवानपुरको मिति २०७८-०३-२० को सिफारिस र जिल्ला सुरक्षा समितिको मिति २०७८-०३-२० को निर्णय समेतको आधारमा संक्रामक रोग ऐन, २०२० को दफा २, कोभिड-१९ सङ्कट व्यवस्थापन अध्यादेश, २०७८ को दफा ४ र स्थानीय प्रशासन ऐन, २०२८ को दफा ६ को उपदफा ३ बमोजिम निषेधाज्ञालाई निरन्तरता दिई मिति २०७८ साल असार २१ गते सोमबार राती १२:०० बजेदेखि मिति २०७८ साल असार ३१ गते बिहीबार राती १२:०० बजेसम्म यस मकवानपुर जिल्लाभर निम्नबमोजिम हुने गरी यो आदेश जारी गरिएको छ । यो आदेशको बर्खिलाप भए, गरेको पाइएमा प्रचलित कानून बमोजिम कडा कारबाही हुने व्यहोरा समेत जानकारी गराइन्छ ।
देहाय:
१. अत्यावश्यक काम परी घर बाहिर निस्कनुपर्दा अनिवार्यरूपमा मास्कको प्रयोग गर्ने, भौतिक दूरी कायम गर्ने, भिडभाड नगर्ने, नगराउने ।
२. पसल व्यवसायको सन्दर्भमा
२.१ औषधी पसल, कृषि बीउबीजन तथा मल विक्री वितरण गर्ने पसल र भेटनरी, पेट्रोल पम्प, ग्याँस डिपो, अक्सिजन सिलिण्डर पसल नियमित सञ्चालन गर्नुपर्ने,
२.२ अत्यावश्यक उपभोग्य वस्तु (खाद्यान्न, पानी, दूध, माछा, मासु, अण्डा, फलफूल तथा तरकारी) विक्री वितरण गर्ने पसलहरू विहान ४:०० बजेदेखि विहान १०:०० बजेसम्म मात्र खोल्न पाइने,
२.३ पुस्तक तथा स्टेसनरी, इलेक्ट्रिक तथा इलेक्ट्रोनिक्स पसलहरू, हार्डवेयर पसल, भाँडा पसल, कपडा पसल, टेलर, जुत्ताचप्पल पसल, सुनचाँदी पसल, कस्मेटिक पसल, फर्निचर/फर्निसिङ, सवारी साधन मर्मत गर्ने वर्कसप तथा मोटर पार्टस् विक्रीवितरण गर्ने पसल दिनको १२:०० बजेदेखि दिनको ४:०० बजेसम्म मात्र सञ्चालन हुने गरी खोल्न पाइने । तर, फुटपाथमा पसल
राख्न नपाउने,
२.४ प्रेस तथा फोटोकपी पसलहरू र फोटो स्टुडियोहरू विहान १०:०० बजेदेखि दिनको ४:०० बजेसम्म मात्र खोल्न पाइने,
२.५ रेष्टुरेन्ट, मिठाई तथा खाजा पसलहरूबाट टेकअवे र होमडेलिभरी हुने गरी मात्र दिनको १२:०० बजेदेखि दिनको ४:०० बजेसम्म खोल्न पाइने,
२.६ पसल तथा व्यवसाय सञ्चालन गर्दा अनिवार्यरूपमा मास्कको प्रयोग, भौतिक दूरी कायम, जनस्वास्थ्यका मापदण्ड पालना र भिडभाड नहुने सुनिश्चितता सम्बन्धित व्यवसायीले गर्नुपर्ने । उल्लेखित जनस्वास्थ्यका मापदण्डहरू पालना नभएको पाइएमा अनुगमन समितिको सिफारिसमा उक्त पसल तथा व्यवसाय निषेधाज्ञा अवधिभरको लागि बन्द गरिनेछ ।
२.७ माथि उल्लेखित बाहेकका अन्य सबै प्रकारका पसल तथा व्यवसायहरू बन्द रहने ।
३. यातायात सञ्चालन सन्दर्भमा
३.१ एम्बुलेन्स, बिरामी बोकेका गाडी, खाद्य वस्तु, तरकारी, दूध, खानेपानी, पेट्रोलियम पदार्थ बोक्ने ट्याङ्कर, स्वास्थ्य सामग्री र अक्सिजन ढुवानी गर्ने साधन, शव वाहन, फोहोर व्यवस्थापन गर्ने गाडी, पशुपंक्षीका दाना बोक्ने गाडी, कृषि मल तथा बीउबीजन बोक्ने गाडी, स्वास्थ्यकर्मी, सञ्चारकर्मी, दूरसञ्चार, विद्युत, इन्टरनेट सेवा प्रवाह गर्ने सवारी साधन तथा सुरक्षा निकायले प्रयोग गर्ने सवारी साधन र जिल्ला प्रशासन कार्यालयहरूबाट अनुमति प्राप्त सवारी साधन बाहेक अन्य कुनै पनि प्रकारका यात्रुबाहक सार्वजनिक यातायात सञ्चालन गर्न नपाइने,
३.२ निजी यात्रुबाहक सवारी साधनहरू (मोटरसाइकल समेत) र मयुरी, अटो, ट्याम्पो (दुई जना भन्दा बढी यात्रु बोक्न नपाउने गरी) गते अनुसार जोड बिजोड प्रणालीका आधारमा सञ्चालन गर्न पाइने,
३.३ सरकारी कार्यालय, सार्वजनिक संस्थान, बैंक तथा वित्तिय संस्था एवं अत्यावश्यक सेवा प्रदान गर्ने क्षेत्रमा कार्यरत कर्मचारी तथा कामदारहरूलाई सम्बन्धित कार्यालयले जारी गरेको परिचयपत्रको आधारमा कार्यालय समयमा मात्र र समाचार संकलन/सम्प्रेषण कार्यमा खटिएका सञ्चारकर्मीहरूको हकमा पहिचान खुल्ने फोटो सहितको परिचयपत्रका आधारमा
सवारीसाधन सञ्चालन र आवतजावत गर्न दिइने,
३.४ अन्य जिल्लाबाट आएका पूर्व-पश्चिम राजमार्ग भई जाने लामो दूरीका सवारी साधन, मालवाहक सवारी साधनहरू तथा निर्माण सामग्री ढुवानीका साधनहरू यस जिल्लामा नरोकिने गरी आवत जावत गर्न पाइने,
३.५ औद्योगिक कच्चा पदार्थ, तयारी उत्पादन एवं खाद्यान्न बोक्ने सवारी साधनहरू हेटौडा बजार क्षेत्रभित्र विहान १०:०० बजेदेखि दिनको ४:०० बजेसम्म मात्र आवत जावत एवं लोड अनलोड गर्न पाइने ।।
४. अत्यावश्यक सरकारी सेवाहरू भिडभाड नहुने सुनिश्चितता गरी आलोपालो प्रणालीबाट सञ्चालन गर्ने ।
५. बैंक, इन्स्योरेन्स कम्पनी, मनी ट्रान्सफर तथा वित्तिय सहकारी संस्थाहरूबाट प्रदान गरिने सेवाहरू जनस्वास्थ्यका मापदण्ड अनिवार्य अवलम्बन गरी भिडभाड नहुने सुनिश्चितता गरी विहान १०:०० बजेदेखि दिनको २:०० बजेसम्म मात्र सञ्चालन गर्ने । वित्तिय तथा सहकारी संस्थाहरूबाट घर दैलोमा गई रकम संकलन गर्ने र समूह भेला गरी रकम संकलन गर्ने, गराउने कार्य पूर्णरूपमा
बन्द हुनुपर्ने ।
६. होटल/लज, शैक्षिक संस्थाहरू (विद्यालय, कलेज, ट्युसन सेन्टर, तालिम केन्द्र), सबै प्रकारका सभा, गोष्ठी, तालिम, सेमिनार, प्रदर्शन, भेला तथा सम्मेलन, सिनेमा हल, पार्टी प्यालेस, डान्सबार लगायतका मनोरञ्जन स्थल, पिकनिक स्थल, सार्वजनिक पुस्तकालय, सङ्ग्रहालय, चिडियाखाना, स्पा, सैलुन तथा ब्युटी पार्लर, स्विमिङ पुल, जिमखाना लगायत हेल्थ क्लब, सपिङ मल, स्ट्रिट फुड पसल, समूहमा खेलिने खेलकुद र खेलमैदानमा हुने प्रस्तुति, फुटसल पूर्णरूपमा बन्द रहने ।
७. मठ, मन्दिर, मस्जिद, गुम्बा, चर्च लगायतका धार्मिक स्थलहरूमा नित्य पूजा मात्र सञ्चालन गरी अन्य समयमा अनिवार्य बन्द गर्ने । धार्मिक, सांस्कृतिक र सामाजिक लगायत कुनै पनि प्रकारको जमघट तथा भेला हुने क्रियाकलाप सञ्चालन गर्न नपाइने । तर, विवाहका लागि बढीमा १५ जनासम्म नजिकको प्रहरी इकाईसँग समन्वय गरी आफ्नै निवासमा जनस्वास्थ्यका मापदण्ड पालना
गरी सम्पन्न गर्न सकिने ।
८. विवाहका लागि जिल्लाभित्र एक ठाउँबाट अर्को ठाउँ वा अन्तर जिल्ला जानुपर्ने भएमा एकवटा सवारी साधनमा ७ (सात) जनासम्म मात्र जान सकिने ।
९. औद्योगिक प्रतिष्ठानहरूले उद्योगमा कार्यरत मजदूर कर्मचारीहरूलाई जनस्वास्थ्यका मापदण्डहरू अनिवार्य पालना गरी, गराई उद्योग प्रतिष्ठानमा कार्यरत मजदूर कर्मचारीहरूसँग समन्वय गरी उद्योग सञ्चालन गर्न सक्ने ।
१०. विकास आयोजना तथा निर्माण कार्य सञ्चालन गर्दा आयोजनास्थल वा निर्माणस्थलमा नै कामदार तथा कर्मचारी रहने व्यवस्था मिलाई जनस्वास्थ्यका मापदण्ड अनिवार्य पालना गरी, गराई निर्माण कार्य सञ्चालन गर्न सकिने ।


मकवानपुर । मकवानपुरको हेटौंडामा रहेकाे नेम ईन्टिच्युटले एसईई दिएर बसेका विद्यार्थीहरुलाई अनलाईन मार्फत निःशुल्क ब्रिज कोर्ष गराउने भएको छ । ईन्टिच्युटका संचालक किशोर अर्यालले एसईई दिएर बसेका विद्यार्थीहरुलाई निःशुल्क ब्रिज कोर्ष गराउने तयारी गरेको बताए ।
आइतबार हेटौंडामा पत्रकार सम्मेलन गर्दै ईन्टिच्युटले कोरोना संक्रमण जोखिमको कारण घरमै बसेका विद्यार्थीलाइ सहयाेगकाे उदेश्यले सामाजिक उत्तरदायित्व बहन अन्तर्गत अनलाईन मार्फत निःशुल्क ब्रिज कोर्ष गराउने तयारी गरेकाे जनाएकाे छ । संचालक अर्यालका अनुसार देशभरका विद्यार्थीलाइ निःशुल्क ब्रिज कोर्ष गराइने छ । एसईई दिएका विद्यार्थीलाई विज्ञानको ब्रिज कोेर्ष,व्यवस्थापन संकायको ब्रिज कोर्षको अनलाइन कक्षा निशुल्क संचालन गर्ने उनले बताए ।
अर्यालका अनुसार एक विद्यार्थीलाई १५ हजार खर्च हुने ब्रिज कोर्ष निः शुल्क संचालन गर्न लागिएको हो । इमान्दार र लगनशील विद्यार्थी ब्रिज कोर्षमा उपस्थित गराउनकाे लागि ५ सय रजिष्टर शुल्क तोकिएको छ । उक्त शुल्कले कक्षा संचालन अवधिभर शिक्षकका लागि इन्टरनेट जडान गरिदिने र अन्तिममा उत्कृष्ट नतिजा ल्याउने विद्यार्थीको लागि पुरस्कारको समेत व्यवस्था गरिएको संचालक अर्यालले जानकारी दिए ।
ब्रिज कोर्ष लिन चाहाने देशभरका विद्यार्थीले आउँदो असार २५ गते भित्र र्फम भर्न सक्ने र समयमै फर्म भरेका विद्यार्थीहरुलाई इमेल मार्फत जुम आइडी र पासवर्ड जानकारी दिईने बताइएकाे छ । कोर्ष असार २७ गतेदेखि दैनिक बिहानकाे समयमा ३ देखि ४ घण्टाको रहनेछ ।
मकवानपुर । बागमती प्रदेशसभाको बैठक आइतबार पनि अबरुद्ध पारिएको छ । बैठक शनिबार पनि अबरुद्ध गरिएको थियो। आइतबार बैठक अबरुद्ध भएपछि सोमबार दिउँसो १ बजेसम्मका लागि स्थगित भएको छ ।
आईतबार बिहान ११ बजे बोलाइएको बैठक अपराह्न ३ बजेका लागि सारिएको थियो । सो बैठक विशेष कारण भन्दै सोमबारको लागि स्थगित गरिएको बागमती प्रदेशसभा सचिवालयले जनाएको छ ।
प्रदेशसभाको यसअघि शनिबार बसेको बैठकमा प्रमुख प्रतिपक्ष र प्रतिपक्ष दलहरुले अवरुद्ध गरेका थिए । उनीहरुले विनियोजित बजेटमाथि छलफल गर्ने क्रममा आगामी आर्थिक वर्ष २०७८/०७९ को लागि माग गरिए अनुसारको योजना र बजेट वितरणमा पक्षपात गरेर आफ्नो दलका नेताहरुलाई लक्षित गरेको आरोप लगाँदै प्रदेशसभा बैठक अवरुद्ध गरेका थिए ।
अवरुद्ध प्रदेशसभा बैठक संचालन गर्न बागमती प्रदेशसभाका सभामुख सानुकुमार श्रेष्ठको सक्रियतामा आज हेटौँडामा बसेको सर्वदलीय बैठकले विनियोजित बजेटमाथि छलफल गर्न प्रदेशसभा बैठक पुनः सुचार गर्ने निर्णय गरेको नेकपा एमाले संसदीय दलका प्रमुख सचेतक दीपक निरौलाले जानकारी दिए ।
उक्त बैठकमा सरकारको तर्फबाट आन्तरिक मामिला तथा कानून मन्त्री केशवराज पाण्डे, नेकपा माओवादी केन्द्रका नेता शालिकराम जम्मकट्टेल, नेपाली कांग्रेसका नेता इन्द्रबहादुर बानियाँ, साझा विवेकशील दलका नेता रमेश पौड्याल र सत्तारुढ दलका प्रमुख सचेतक दीपक निरौला सहभागी थिए ।
सोमबार बस्ने प्रदेशसभाको बैठकमा सरकारको तर्फबाट एक जना मन्त्रीले सरकारले ल्याएको बजेट विनियोजनमा भएका सत्यतथ्य विवरण सार्वजनिक गर्ने, प्रतिपक्ष दलहरुले उठाएको सरोकारको विषयमा स्पष्टिकरण दिने र प्रतिपक्षहरुले व्यक्त गरेको भावनालाई कदर गर्दै विनियोजित बजेटमा फेरबदल हुनसक्ने सम्भावना रहेको नेकपा एमाले संसदीय दलका प्रमुख सचेतक निरौलाले बताए ।
बजेटमा चित्त नबुझेको भन्दै विपक्षी दलले सभा अबरुद्ध गर्दै आएको छ ।
मकवानपुर / बागमती प्रदेश सभा अवरुद्ध भएको छ । सरकारले पक्षपाती ढंगले बजेट ल्याएको, बजेट पुस्तिकामा न्यायोचित वितरण नदेखिएको र प्रदेश सरकारले आफै संचारगृह चलाउने विषय फिर्ता लिनुपर्ने लगायका विषयलाई लिएर नेकपा माओवादी केन्द्र र नेपाली कांग्रेसले संसद अवरुद्ध
गरेका हुन् ।
शनिबार बागमती प्रदेशका आर्थिक मामिला तथा योजनामन्त्री कैलाश ढुंगेलले विनियोजन विधेयक २०७८ माथि विचार गरियोस् भन्ने प्रस्ताव माथि बोल्दै विपक्षी दलहरुले संसद अवरूद्ध गरेका हुन् ।
पुर्वाग्रही बजेट नसच्याए पास हुँदैन: माओवादी
प्रदेश सभाको वैठक अवरुद्ध गर्नु अघि बोल्दै प्रमुख प्रतिपक्ष दल नेकपा माओवादी केन्द्रका संसदीय दलका नेता शालिकराम जम्कट्टेलले स्थानीय तहमा जाने सशर्त अनुदान बजेटमा समेत पूर्वाग्रही ढंगले विनियोजन गरेको भन्दै आपत्ति जनाए । उनले सशर्त बजेट नसच्याउने भए बजेट छलफद अघि नबढ्ने बताए । जम्मकट्टेलले सुरूङमार्ग र बिद्युतीय बसबारेसमेत असन्तुष्टि व्यक्त गर्दै बजेटबाट हटाउन माग गरे ।
ऐन नै नभएको अवस्था र देश आर्थिक रूपमा टाट पल्टने अवस्थामा प्रदेश सरकारले आफै संचारगृह चलाउने विषय फिर्ता लिनुपर्ने उनले बताए ।
संघिय सरकारको इकाइ जस्तो देखियो: कांग्रेस
यस्तै विपक्षी दल नेपाली कांग्रेस संसदीय दलका नेता इन्द्रबहादुर बानियाँले सरकार संविधान र संघीय लोकतान्त्रिक गणतन्त्रलाई कमजोर बनाउन संघीय सरकारको इकाइको रूपमा अघि बढेको आरोप लगाए ।
उनले बजेट पुस्तिका नै दुई ढंगको नआउनु गलत भएको भन्दै एउटै पुुस्तक बनाएर नआएसम्म संसद अघि बढ्न नसक्ने बताए । नेता वानियाँले सिन्धुपाल्चोकलाई सरकारले झुक्याएको भन्दै विपदमा परेका जिल्लालाई सरकारले व्यवस्था गर्न नसक्ने भए कांग्रेसले आफ्नो सेवा सुविधा जनताको राहतमा खर्चिन तयार रहेको बताए । उनले प्रदेश सरकार आफैले संचारगृह चलाउने कुराको पनि विरोध गरेका छन् ।
साना दलको पनि विरोध
बागमती प्रदेश सभा बैठकमा प्रमुख प्रतिपक्ष दल नेकपा माओवादी केन्द्र, नेपाली कांग्रेस सहित साना दलहरु विवेकशील साझा पार्टी, नेपाल मजदुर किसान पार्टी, राप्रपाका सांसदहरुले पनि विनियोजन विधेयक विरुद्धमा एक भएका छन् ।
प्रदेश सभामा बोल्दै विवेकशील साझाका सांसद रमेश पौड्यालले असार १ गते बजेट पेश गरेर लामो समय छलफल भएकोमा आपत्ति जनाउँदै सिन्धुपाल्चोक क्षेत्रमा यातायात सुचारू गर्नुपर्नेमा जोड दिए । उनले विधि र प्रक्रिया विपरित समय नै नदिई बजेटका २ वटा पुस्तक छापेर अनधिकृत काम भएको बताए ।
संसदको अवहेलना गर्दै भएको गलत कामबारे यसको जवाफ मूख्यमन्त्रीले जवाफ दिनुपर्ने बताए । मिडिया हाउस सरकारले चलाउनु गलत हुने बताए । यस्तै नेमकिपाका सुरेन्द्र राज गोसाईले प्राकृतिक विपत्ति र कोभिड–१९ को मारमा परेका जनतालाई बजेटले सम्बोधन नभएको बताए । सांसदहरुको विरोध पछि बागमती प्रदेश सभा आइतबार विहान ११ बजेसम्मका लागि स्थगित गरिएकाे छ ।
पत्रकार अमृत चिमरियाकाे सहयाेगमा
- हेमलता उप्रेती
म शिक्षक । आफूलाई बाल मनोबिज्ञानको प्रयोगकर्ता ठान्छु । चार कक्षामा पढाउँदै थिएँ । पाठ थियो हाम्रा सास्कृतिक मूल्य मान्यता ।
त्यो बगैचाका सवै फूलहरु मेरालागि समान हुनु पथ्र्यो। थिए । तथापि चन्चलता बिशेष थिई किनकि ऊ मौरीको रानो जस्तै थिई । पढाउने क्रममा मैले देवीदेवताको कुरा गरें । त्यतिबेला ऊ पुलकित हुनुपथ्र्यो । भईन ।
अनि मैले कुरा गरें हजुरबा, हजुरआमाको । त्यतिबेला उसले रमाउँदै तिखो श्वरमा उसका हजुरबा हजुरआमाको इतिबृतान्त सुनाउनुपथ्र्याे । सुनाइन । ऊ पुक्क फुलेर बसिरही ।फेरि मैले कुरा गरें, गुरु र गुरुआमाहरुको । त्यतिबेला उसको जूनजस्तो मुहार खुसीले चम्किनु पथ्र्याे । अहँ । पटक्कै चम्किएन ।
उल्टो कालो बादल पो छायो त्यहाँ त ! मलाई असैह्रय भयो । अनि छेउमै गएर आँखै जुधाएर सोधें, “आज के भयो ? सन्चै त छ ?” आँखिर चन्चलता न थिई । उसको रिस कति बेर टिक्न सक्थ्यो र ? मुख फूलाउँदै मलाई आँखा तरेर उसले प्वाक्क बोली, “मैले अगि नमस्ते गर्दा किन नफर्काएको त ?”
इलाम नगरपालिका ७