मकवानपुर । नेकपा एमालेको केन्द्रीय कमिटी बैठक आज पनि बस्ने भएको छ । बैठक दिउँसो ३ बजे बस्ने भएको हो ।
एमालेको केन्द्रीय कमिटीको दोस्रो दिन मंगलबारको बैठक प्रधानमन्त्री शेरबहादुर देउवालाई विश्वासको मत दिने पार्टीका सांसदहरुलाई कारवाहीबारे कुनै निर्णय नगरी सकिएको छ । बैठकमा १० बुँदे सहमतिलाई कार्यान्वयन गर्दै एकताका निम्ति निरन्तर प्रयास गर्ने निर्णय गरेको बताइएकाे छ । बैठकमा पार्टीमा उत्पन्न समस्या समाधानका लागि गठित कार्यदलले गरेका कामबारे ब्रिफिङ भएको थियो ।
केन्द्रीय कमिटीको पहिलाे दिन सोमबारकाे बैठकले माधव समूहका सांसदहरुलाई पार्टीले २४ घण्टे स्पष्टीकरण सोध्ने निर्णय गरेको थियो । स्पष्टीकरण सोधेको २४ घण्टा पुरा नभएको कारण मंगलबार त्यसबारे कुनै निर्णय भएकाे छैन । मंगलबारकाे बैठकमा सातैवटा प्रदेशका पार्टी अध्यक्षहरुले रिपोर्ट पेश गरेका थिए । मंगलबारकाे बैठक आज बुधबार ३ बजे पुनः बस्ने गरी स्थगित भएको थियाे ।
मकवानपुर । नेपाल सरकारकाे विभिन्न सेवा समूहमा कार्यरत निजामति तर्फका २ हजार ३ सय ८४ जना कर्मचारीले अवकास पाउने भएका छन् । अवकास पाउनेमा विशिष्ट श्रेणीका सचिव देखि कार्यालय सहयाेगीसम्मका कर्मचारी रहेका छन् । राष्ट्रिय किताबखाना (निजामती) ले असार ५ गते मंगलबार चालु आर्थिक वर्ष २०७८/७९ मा अवकाश हुने कर्मचारीको अनुमानित सूची सार्वजनिक गरेर अवकासकाे जानकारी गराएकाे हाे ।
अवकाश हुने कर्मचारीको अनुमानित सूची अनुसार निजामति कर्मचारीमा नेपाल सरकारका विशिष्ट श्रेणी (सचिव) १३ जना रहेका छन् । १३ जना मध्य ३ जनाले २०७८ साल साउन महिनाभित्रै अनिवार्य अवकाश पाउँदैछन् ।
निजामती किताबखानाका अनुसार सूचना तथा सञ्चार प्रविधि मन्त्रालयका सचिव हरिप्रसाद बस्यालले आज बुधबारदेखि नै अनिवार्य अवकाश पाएका छन् । अर्थ मन्त्रालयका सचिव रामशरण पुडासैनीले साउन २४, बागमती प्रदेशको मुख्यमन्त्री तथा मन्त्रिपरिषद् कार्यालयका प्रमुख सचिव मुकुन्दप्रसाद पौड्यालले साउन २६ गते अवकाश पाउँदैछन् ।
हेर्नुहाेस अवकास पाउने कर्मचारीकाे विवरण
नेपाली कांग्रेसले पार्टीको १४औं महाधिवेशन धकेलिने भएको छ । कांग्रेसले वडा तहदेखि केन्द्रसम्मकै पूर्वनिर्धारित कार्यतालिकामा केही हेरफेर गर्दै एक सातादेखि १० दिनसम्म महाधिवेशन सार्ने तयारी गरेको हो ।
प्रधानमन्त्रीसमेत रहेका कांग्रेस सभापति शेरबहादुर देउवाले आइतबार प्रतिनिधि सभामा विश्वासको मत प्राप्त गरेपछि महाधिवेशन भदौभित्रै हुने तर केही दिन सर्ने तय भएको देउवा निकट एक नेताले जानकारी दिए ।
‘प्रधानमन्त्रीमा देउवाले लिने विश्वासको मतसँगै कांग्रेस महाधिवेशन जोडिएको थियो, विश्वासको मत नपाएको अवस्थामा भने देश निर्वाचनतर्फ जान सक्ने सम्भावना रहन्थ्यो, त्यसो हुँदा पार्टीको महाधिवेशन ओझेलमा पर्न सक्थ्यो, अब केही दिन सर्छ तर भदौभित्रै महाधिवेशन हुन्छ,’ देउवा निकट ती नेताले भने ।
देउवाले विश्वासको मत पाएसँगै कांग्रेस नेतृत्वको ध्यान सरकार, कोरोना महामारी र पार्टीको महाधिवेशनतर्फ केन्द्रित भएको हो । प्रधानमन्त्रीको सरकारी निवास वालुवाटारमा गत शुक्रबार बसेको कांग्रेस पदाधिकारी बैठकमा समेत महाधिवेशनलाई विश्वासको मतसँगै जोडेर हेरिएको थियो । यस्तै, बैठकमा महाधिवेशन, क्रियाशील सदस्यता र समयावधिका विषयमा छलफल भएको थियो ।
हाल कांग्रेसको क्रियाशील सदस्यता छानबिन समितिले ७५ जिल्लाका क्रियाशील सदस्यतासम्बन्धी काम सकिएको बताउँदै आएको छ । सप्तरी र बारामा भने बढी विवाद देखिएको छ । समितिले ती दुई जिल्लाको विवाद थाँती राखेर क्रियाशील सदस्यताको सूची सभापतिलाई बुझाउने तयारी गरिरहेको छ । कांग्रेसमा महाधिवेशनका लागि विदेशस्थित जनसम्पर्क समितिबाटसमेत गरी करिब ९ लाख क्रियाशील सदस्य पुग्ने सदस्यता छानबिन समितिले अनुमान गरेको छ ।
कांग्रेसले निर्धारण गरेको महाधिवेशन कार्यतालिकाअनुसार १२ साउनबाट वडा अधिवेशन सुरु भइसक्नुपर्नेछ । यसैगरी, गाउँ र नगरको अधिवेशन १६ साउन, प्रदेशसभा क्षेत्रीय अधिवेशन २० साउन, प्रतिनिधिसभा क्षेत्रीय अधिवेशन र एक मात्र प्रतिनिधिसभा निर्वाचन क्षेत्र भएको जिल्ला अधिवेशन २३ साउनका लागि तय छ । यस्तै, एकभन्दा बढी प्रतिनिधिसभा निर्वाचन क्षेत्र भएको जिल्ला अधिवेशन २६ साउन र प्रदेश अधिवेशन १ र २ भदौका लागि तय छ । यसैगरी, केन्द्रीय महाधिवेशन १६ देखि १९ भदौसम्म काठमाडौंमा गर्ने कांग्रेसको तयारी छ । अब यी सबै तहका कार्यतालिका केही दिन पर सर्नेछ ।
हालसम्म कांग्रेसको क्रियाशील सदस्यता छानबिन समितिले १ सय ४३ निर्वाचन क्षेत्रको सदस्यताको छानबिन सकेको जनाएको छ । समितिले २२ निर्वाचन क्षेत्रको विवाद भने टुंग्याउन सकेको छैन । हालसम्म समितिले छानबिन गरेको १ सय ४३ निर्वाचन क्षेत्रको सदस्यताको छानबिन गर्दा ७० वटा वडाको सदस्यता स्थगित गरिएको समितिका सदस्य तथा प्रवक्ता प्रदीप पौडेलले जानकारी दिए ।
कांग्रेसले २० असारभित्रै सदस्यताको काम सक्नेगरी यसअघि कार्यतालिका बनाएको थियो । सो मिति प्रभावित भइसकेको छ । यस्तै, ३० गते सभापतिले क्रियाशील सदस्यताको सूचीमा हस्ताक्षर गर्ने कार्यक्रम थियो सो पनि प्रभावित भइसकेको छ । सभापतिले सदस्यताको सूचीमा हस्ताक्षर नगर्दासम्म निर्वाचन समितिले अधिवेशनको काम अघि बढाउँदैन ।
नयाँ र पुराना गरी विदेशबाट बाहेक ८ लाख ५० हजार २ सय ३२ जनाले क्रियाशील सदस्यतासम्बन्धी फाराम भरेका छन् । त्यसमध्ये ४ लाख ४४ हजार १ सय ४१ नयाँ छन् । बाँकी पुराना सदस्यतामा भने विवाद छैन ।
सदस्यतामा सबैभन्दा बढी प्रदेश २ मा विवाद देखिएको छ । प्रदेश २ को बारा र सप्तरीका सबै निर्वाचन क्षेत्र, सर्लाही क्षेत्र नम्बर २, धनुषा क्षेत्र नम्बर ३, सिरहाको एउटा क्षेत्र र रौतहट क्षेत्र नम्बर १ को क्रियाशील सदस्यतामा विवाद देखिएको छ । सदस्यतामा विवाद देखिएपछि पार्टी केन्द्रीय कार्यालयमा ती जिल्लाका प्रतिनिधिहरू धर्नासमेत बस्दै आइरहेका छन् ।
प्रदेश १ मा सोलुखुम्बु र सुनसरी निर्वाचन क्षेत्र नम्बर ४ मा विवाद कायमै छ । लुम्बिनीमा कपिलवस्तु–३ र प्युठानमा विवाद कायमै छ भने सुदूरपश्चिमको डडेल्धुरा र कैलालीमा विवाद देखिएको छ । विवादित स्थानका सदस्यता नटुंगिए १३औं महाधिवेशनकै सदस्यतालाई आधार मानेर अधिवेशन गर्न सिफारिस गर्ने छानबिन समितिको तयारी छ । rajdhanidaily.com बाट समाचार साभार गरिएकाे
एमाले अध्यक्ष एवं निवर्तमान प्रधानमन्त्री केपी शर्मा ओलीले वर्तमान शेरबहादुर देउवा नेतृत्वको सरकार र देउवा सरकार बनाउन सहयोग गर्ने दलहरूप्रति आक्रोश पोखेका छन् । देउवा सरकारले विश्वासको मत पाएको भोलिपल्ट सोमबार बसेको पार्टी केन्द्रीय कमिटी बैठकमा बोल्दै उनले पार्टीका वरिष्ठ नेता माधवकुमार नेपाल, माओवादी केन्द्रका अध्यक्ष पुष्पकमल दाहाललगायतप्रति आक्रोश पोखेका हुन् ।
बैठकमा ओलीले कांग्रेस विगतदेखि नै आफैं आक्रमण गर्ने, आफंै मुद्दा हाल्ने प्रवृत्तिको पार्टी भएको आरोप लगाए । उनले आफ्नो नेतृत्वको सरकार बहिर्गमनपश्चात बनेको गठबन्धनको देउवा सरकारलाई ‘टालाटुली’को संज्ञा दिए । ‘अब सत्ताको दुरुपयोग गरेर हामीमाथि हमला सुरु गर्छन् । देउवाले लिएको विश्वासको मत कवाडीको रिसाइकलबाट भाडाकुँडा बटुलेर बनेको टालाटुली बाटुली कति राम्री पुतली भन्ने खालको हो,’ ओलीले भने ।
बैठकलाई सम्बोधन गर्दै अध्यक्ष ओलीले नेता नेपाललाई ‘विषवृक्ष’ को संज्ञा दिए । प्रधानमन्त्री देउवालाई विश्वासको मत दिएका नेपालप्रति आक्रोशित अध्यक्ष ओलीले भने, ‘पार्टीमा उहाँ (माधव)लाई सम्मान भएन रे । विषवृक्षलाई अझै सम्मान ?’
माओवादी केन्द्रका दाहालप्रति प्रहार गर्दै ओलीले भने, ‘माओवादी शिथिल छ । नत्र ऊ पनि अपराधको कर्मबाट आएको पार्टी हो । हुन त प्रतिपक्ष कसरी अगाडि बढ्छ भन्ने कुरा हो । विगतलाई फर्केर हेर्दा हामी आवश्यकताअनुसार परिआए जुझारु ढंगले सशक्त प्रतिवाद गर्न तयार हुनुपर्छ ।’
बैठकमा अध्यक्ष ओलीले पार्टी उपाध्यक्ष भीम रावलको भने प्रशंसा गरेका थिए । अनैतिक राजनीतिक खेलमा सहभागी नहुने भन्दै प्रतिनिधिसभाको सदस्यबाट राजीनामा दिएका एमाले उपाध्यक्ष रावलले देउवालाई विश्वासको मत नहालौं पार्टी एकताबद्ध बनाउनभन्दा नेता नेपालले म विधि निर्णय मान्दिनँ एक्लै भए पनि भोट हाल्छु भनेर हप्काएर पठाएको ओलीको भनाइ छ ।
ओलीले रावललाई आग्रह गर्दै भने, ‘हतारिएर किन राजीनामा दिएको ? सल्लाह गर्नुपर्ने ? अझै पनि सकिन्छ भने राजीनामा फिर्ता लिनू ।’
२२ सांसदसँग २४ घण्टे स्पष्टीकरण
नेपाल कम्युनिस्ट पार्टी (एमाले)ले पार्टीका वरिष्ठ नेता माधव कुमार नेपालसहित २२ जना सांसदलाई २४ घण्टे स्पष्टीकरण सोधेको छ । प्रधानमन्त्री शेरबहादुर देउवालाई पार्टी निर्णयविपरीत फ्लोर क्रस गरेर विश्वासको मत दिएको भन्दै उनीहरूलाई २४ घण्टाभित्र स्पष्टीकरणको जवाफ पेस गर्न भनिएको हो ।
ललितपुर च्यासलस्थित तुलसीलाल अमात्य प्रतिष्ठानमा सोमबार बसेको एमाले केन्द्रीय कमिटी बैठकले उनीहरूलाई स्पष्टीकरण सोध्ने निर्णय गरेको हो । एमाले सचिव एवं प्रवक्ता प्रदीप ज्ञवालीले पार्टी निर्णयविपरीत फ्लोर क्रस गरेर विश्वासको पक्षमा मतदान गर्ने २२ जना सांसदसँग स्पष्टीकरण सोध्ने निर्णय भएको बताए ।
एमालेको संसदीय दल र स्थायी कमिटी बैठकले प्रधानमन्त्री देउवालाई विश्वासको मत नदिने निर्णय गरेको थियो । पार्टी निर्णयविपरीत विश्वासको पक्षमा मतदान गरेपछि बैठकले स्पष्टीकरण सोध्ने निर्णय गरेको प्रवक्ता ज्ञवालीले बताए । मंगलबार बस्ने केन्द्रीय कमिटीको बैठकले बाँकी प्रक्रिया अघि बढाउने उनले बताए ।
बैठकले पार्टीभित्रको विवाद समाधानका लागि गठित कार्यदलले अघि सारेको १० बुँदे प्रस्ताव अनुमोदन गरेको छ । गल्ती स्वीकार गरी पार्टीमा फर्कन चाहनेलाई अन्तिम अवसर दिने निर्णयसमेत बैठकले गरेको प्रवक्ता ज्ञवालीले बताए ।
यी हुन् स्पष्टीकरण सोधिएका सांसदहरू
१. माधवकुमार नेपाल
२. विरोध खतिवडा
३. मेटमणि चौधरी
४. गोपाल बम
५. भवानी खापुङ
६. कलिला खातुन
७. मुकुन्द न्यौपाने
८. रामकुमारी झाक्री
९. प्रेम आले
१०. विनादेवी बुढाथोकी
११. किसान श्रेष्ठ
१२. समिना हुसेन
१३ कल्याणी खड्का
१४. सरला यादव
१५. धनबहादुर बुढा
१६. लक्ष्मी चौधरी
१७. जीवनराम श्रेष्ठ
१८. पुष्षाकर्ण कायस्थ
१९. निरा जैरु
२०. पार्वती विसङ्खे
२१. हिराचन्द्र केसी
२२. कृष्णलाल महर्जन
राजधानी दैनिकमा प्रकाशित समाचार साभार
मकवानपुर । राष्ट्रिय प्रजातन्त्र पार्टी राप्रपाका अध्यक्ष कमल थापाले स्थानीय तहकाे निर्वाचनकाे तयारीमा लाग्न निर्देशन दिएका छन् । साेमबार मकवानपुरकाे बकैयामा अगुवा कार्यकर्ताहरुकाे भेलालाई सम्बाेधन गर्दै थापाले भने ‘मुलुकमा अहिले माैलाउँदै गएकाे बिकृती र बेथितिको अन्त्यकाे लागि जनताले राप्रपालाई राेज्नु पर्नेछ ।
थापाले पछिल्लाे समयका सरकारकाे गठनकाे खेलले काङ्ग्रेस र कम्युनिस्टको असफलता भएकाेले उनीहरुले गरेकाे भ्रस्टाचार र कुशासनको भण्डाफोर गर्दै जनताको माझमा जानुपर्ने बताएका छन् ।
अध्यक्ष थापाले संगठन सुदृढीकरण र सक्रिय सदस्यता बितरण अभियान र जनताको सुखदुखमा साथै रहने कामलाई उच्चप्राथमिकता साथ अघि बढाउन कार्यकर्तालाई आग्रह समेत गरे । महाधिवेशन केन्द्रित हुँदै महाधिवेशन पश्चात पार्टीलाई राष्ट्रिय राजनीतिको मुल धारमा ल्याउन सबैले उच्च मनोबलका साथ काम गर्नुपर्ने अध्यक्ष थापा बताए ।
कार्यक्रममा राप्रपा कार्य सम्पादन समितिका सदस्य राजाराम बर्तौला, मकवानपुर अध्यक्ष गुरु प्रसाद सापकोटा , जिल्ला सदस्य अर्जुन तिमिल्सिना बकैया गाउँ कमिटी अध्यक्ष राजाराम अर्याल,महिला नेतृ लक्ष्मि जिम्बा ,गोबर्दन गौतम लगायतको उपस्थिति रहेको थियो ।