मकवानपुर । मकवानपुर प्रहरीले सुन र चाँदीको गरगहनासहित १ जनालाई पक्राउ गरेको छ । पक्राउ पर्नेमा भारत बिहारको सितामडी थाना परिहार पोष्ट अन्धौली ३ बिसनपुर बस्ने २२ वर्षीय सोलार साह भन्ने राजा साह रहेको जिल्ला प्रहरी कार्यालय मकवानपुरले जनाएकाे छ ।
साहलाई बिहिबार ईलाका प्रहरी कार्यालय पशुपतिनगर मकवानपुरबाट खटिएको प्रहरी टोलीले भन्सार छली चोरी पैठारी गरी ल्याएको २ लाख ५ हजार २ सय ६० रुपौयाँको सुन र ४ लाख ४० हजार ८ सय ६२ रुपैयाँ चाँदीको विभिन्न गरगहनासहित पक्राउ गरेको प्रहरी नायव उपरीक्षक जयश्वर रिमालले जानकारी दिए ।
विहीबार दिउँसो पथलैयाबाट हेटौंडातर्फ आउँदै गरेको प्रदेश २–०३–०२० प ८२४५ नम्वरको मोटरसाईकललाई हेटौंडा १५ राटोमाटे चेकपोष्टमा रोकी चेकजाँच गर्ने क्रममा प्रहरीले साहको साथबाट तिलहरी, झुम्का, फुली, बाला, पाउँजु, सिक्री, ब्रासलेट, औठी, गणेश लक्ष्मीको मूर्ती, पाउजु लगायत गरी सुन २४ ग्रा. ०६२ मिलीग्राम र २ किलो १८ ग्राम चाँदी बरामद गरेको गरेकाे हाे ।
उक्त गरगहना फेला परेपछी साहलाई प्रहरीले पक्राउ गरेको हो । पक्राउ परेका उनलाई थप अनुसन्धानको लागि राजश्व अनुसन्धान कार्यालय पथलैया पठाईएको मकवानपुर प्रहरीले जनाइएको छ ।
मकवानपुर । स्तुती गुरागाईं ‘नवोदय स्टार अफ स्टार्स’ बनेकी छिन् । नवोदय शिशु सदनले आयोजना गरेको ‘नवोदय स्टार अफ स्टार्स’ २०७८ को उपाधि जित्दै स्तुती स्टार्स बनेकी हुन् । शुक्रबार भएको प्रतियोगितामा ९ जना प्रतिस्पर्धीलाई पछाडि पार्दै उनी नवोदय स्टार अफ स्टार्स घोषित भएकी छिन् । स्टार्स घोषित भएकी उनलाई ट्रफी प्रदान गरिएको छ ।
नवोदय गायन स्टार, नवोदय नृत्य स्टार र नवोदय नाटक स्टारबाट उत्कृष्ट तीन छनौट भएका प्रतिस्पर्धीहरुले नवोदय स्टार अफ स्टार्स प्रतियोगितामा सहभागिता जनाएका हुन् । नवोदय गायन स्टारबाट उत्कृष्ट ३ मा आशुतोष पोखरेल, आयुष खरेल, चिराग डङ्गोल छनौट भएका थिए । यसैगरी नवोदय नृत्य स्टारबाट उत्कृष्ट तीनमा अपेक्षा विडारी, दर्शना सापकोटा, अस्मी घिमिरे, समीक्षा उप्रेती छनौट भएका थिए । नृत्य स्टारमा भोटिङ र निर्णायकको आधारमा अपेक्षा विडारी र समीक्षा उप्रेतीले समान अङ्क हासिल गरेका थिए । यसैगरी नवोदय नाटक स्टारमा स्वर्णिमा अधिकारी, स्तुती गुरागाईँ र प्रसिद्धि मिश्र उत्कृष्ट घोषित भएका थिए ।

कार्यक्रममा उत्कृष्ट भएका विद्यार्थीहरुलाई विद्यालयले शिल्ड प्रदान गरेको थियो । क्रियटिभ आर्ट (सि.ए) का संयोजक प्रलय चौलागाईँको अध्यक्षतामा भएको कार्यक्रममा रेडियो नेपालले आयोजना गरेको आधुनिक गायन प्रतियोगिता २०२२ मा प्रथम भई गोल्ड मेडल जित्न सफल सुशिला पाण्डे मानन्धरको प्रमुख आतिथ्यता रहेको थियो ।
प्रतियोगितामा तरङ्ग सांस्कृतिक परिषदका अध्यक्ष उज्ज्वल शर्मा भण्डारी, गायिका सुनिता शर्मा लुईँटेल, गायक तथा सङ्गीतकार पूर्णविक्रम अधिकारी र कलिउड कला केन्द्रका सञ्चालक सुजन श्रेष्ठले निर्णायकको भूमिका निर्वाह गरेका थिए । कार्यक्रममा नवोदय विद्यालयका निर्देशक दीपेश जोशीले प्रतियोगिताले विद्यालयको प्रतिभा प्रस्फुटन हुने भएकाले प्रतियोगितालाई हरेक वर्ष निरन्तरता दिइने बताए । कार्यक्रममा विद्यालयका सहायक प्रधानाध्यापक दुर्गाप्रसाद भट्टराई, विद्यालयका शैक्षिक संयोजक अव्यक्त खनाललगायतको आतिथ्यता रहेको थियो ।

मकवानपुर । नेपाली कांग्रेस मकवानपुरको फागुन १५ गते हुने अधिवेशनमा जिल्ला सभापति पदमा आनन्दराम पराजुलीले उम्मेदवारी घोषणा गरेका छन् । पराजुलीले शुक्रबार हेटौंडामा पत्रकार सम्मेलन तथा उम्मेदवारी घाेषणा कार्यक्रमकाे आयोजना गरी आफ्नो उम्मेदवारी घाेषणा गरे । उनले आफ्नाे उम्मेदवारी संस्थापन पक्षबाट रहेको दावी समेत गरेका छन् ।
पराजुलीले आफु सभापति पदमा विजयी भएमा मकवानपुर जिल्लालाई कांग्रेसमय बनाउने, तीनै तहको निर्वाचनमा कांग्रेसलाई विजयी गराउने, जनताको सुख दुःखमा साथ दिने र विकास निर्माणमा सधै लागि पर्ने प्रतिवद्धता जनाए । साथै उनले आफुलाई कांग्रेसको केन्द्रीय सह–महामन्त्री महालक्ष्मी उपाध्याय डीना र कांग्रेस बागमती प्रदेश सभापति इन्द्रबहादुर बानियाँको समर्थन रहेको दावी गरे ।
उम्मेदवारी घोषणा कार्यक्रममा कांग्रेसका नेताहरु दामोदर खनाल, सुशान्त श्रेष्ठ, यतिराज सापकोटा, विश्वलाल लामा, राजवीर मोक्तान, प्रकाश बर्तौला, भूमिनन्द गौतमलगायत विभिन्न वडा सभापतिहरुको उपस्थिति रहेको थियो ।

१४ बुँदे प्रतिबद्धता सार्वजनिक
शुक्रबार काँग्रेस मकवापुरको जिल्ला सभापतिकाे उम्मेदवार घाेषणा गरेका पराजुलीले १४ बँदे प्रतिबद्धता सार्वजनिक गरेका छन् । चुनावी तयारीलाई तीब्रता दिएका पराजुलीले आफुलाई मत दिन अपिल गर्दै विहीबार प्रतिबद्धता सार्वजनिक गरेका हुन् । सभापति पदमा उम्मेदवार घाेषणा कार्यक्रममा उक्त प्रतिबद्धता पत्र समेत बाडिएकाे थियाे ।
पराजुलीले सार्वजनिक गरेकाे प्रतिवद्धता पत्रमा एकताबद्ध सुदृढ र सबल पार्टी निर्माण, समावेशी स्वरुप र समावेशी प्रतिनिधित्वमूलक पार्टी निर्माण, तीनै तहको सरकार निर्माण, निर्वाचनमा निरन्तर क्रियाशील, योग्य र लोकप्रिय उम्मेदवारी, युवामैत्री काँंग्रेस निर्माण छन् । यसैगरी प्रतिबद्धता पत्रमा अग्रजहरुको पहिचानसहित उच्च सम्मान, भातृ तथा शुभेच्छुक संस्थाको योगदान अभिलेख, हाम्रो पहिचान राजनीतिसँग स्वरोजगार अभियान, काँग्रेसलाई मकवानपुरमा पहिलो पार्टी बनाउने अभियान, सक्रिय कार्यकर्ताको उल्लेखनीय बृद्धि, कार्यकर्ताको मनोबल उच्च राख्न कार्यकर्ता प्रशिक्षक कार्यक्रम गर्ने उल्लेख छ ।
पराजुलीले आफू सभापति हुँदा आर्थिक समृद्धिको लागि सुदृढ सुशासन, एकता समन्वय र सहकार्यका लागि लचकता सहितको अभियान र संगठन सुदृढिकरणका लागि विकास अभियान संचालन गरिने समेत प्रतिवद्धतामा दाबी गरेका छन् ।
जिल्लाको कुनाकन्दरासम्म पुगेर कार्यकर्तामाझ लोकप्रिय देखिएका उनले आफु सभापतिमा निर्वाचित भएपछि जिल्लामा गुटरहित पार्टी बनाएर सबैलाई एकबद्ध बनाउन जोड दिने समेत बताए ।
मकवानपुर । जनप्रतिनिधि विहीनताको अवस्थामा कृषिबाट जीवनस्तर धान्न नसकिएको भन्दै वैदेशिक रोजगारको क्रममा युवा शक्तिको पलायन खेप्दै आएको मकवानपुर जिल्लाको मकवानपुरगढी गाउँपालिका अहिले कृषिमा समृद्धि हासिल गर्दै छ ।
स्थानीय तहको निर्वाचनसँगै गाउँपालिकाको अध्यक्षमा निर्वाचित भएपछि विदुर हुमगाईको ध्यान कृषिको समृद्धि कसरी गर्ने भन्नेमा प¥यो । दैनिक पलायन हुँदै आएको युवा शक्तिलाई आफ्नो भूमिमा रमाएर कृषिमा समृद्धि ल्याउने सुनौलो सपना देखे अध्यक्ष हुमगाईले । उनको सपनालाई बल दियो गाउँपालिकाको सिंगाे जनप्रतिनिधिको र कर्मचारीको समूहले ।
निर्वाचित जनप्रतिनिधिको ५ वर्षे कार्यकाल सकिदै गर्दा मकवानपुरगढी गाउँपालिकाले कृषि समृद्धिमा धेरै फड्को मारेको छ ।
कृषिमार्फत सर्वसाधारणको जनजीविका उकास्न सकिने सत्यलाई मनन गर्दै मकवानपुरगढी गाउँपालिकाले कृषिमा लगानीलाई विशेष प्राथमिकता दिंदै आएको हो । गाउँपालिकाले स्थानीय उत्पादनहरुको मुल्य निर्धारण गर्नेदेखि दुध, मासु तथा फलफूलमा अनुदान दिने कार्यक्रमहरु समेत लागु गरेको छ । जसको कारण आफूहरुलाई कृषिमै रमाउन थप बल पुगेको मकवानपुरगढी गाउँपालिका वडा १ की कृषक सृजना योञ्जनले बताइन् ।
मकवानपुरगढी गाउँपालिकामा प्लाष्टिक घर भित्र गोलभेडालगायतका तरकारी बालीखेतीको आकर्षण बढेको छ । हाल यस गाउँपालिकाभित्र झण्डै ८२ हजार वर्गमिटर जमिनमा टनेलभित्र मौसमी र बेमैसमी गरी विभिन्न प्रकारमा तरकारी बाली लगाइएको छ । गाउँपालिकामा प्लाष्टिक घर भित्र गोलभेडालगायतका तरकारी खेतीगर्ने कृषकहरुको संख्या दिनानुदिन बढदै गएको र ती कृषकहरुले यो प्रविधिको माग समेत अत्याधिक गर्न थालेको गाउँपालिका कृषि विकास शाखा प्रमुख चन्द्रकान्त चौधरीले बताए ।

गाउँपालिकाले कृषि बाली अन्तरगत बढेको टनेलभित्र तरकारी खेतिमा बढेको आकर्षणलाई अध्ययन गरेर अनुदानको कार्यक्रमहरु वितरण गरेको कृषिशाखा प्रमुख चौधरीले बताए । बिगत केहीवर्षदेखि यस मकवानपुरगढी गाउँपालिकाका कृषकहरुले फाटफुट रुपमा साविक जिल्ला कृषि विकास कार्यालय मकवानपुर र केही गैर सरकारी संस्थाहरुको सहयोगमा प्लाष्टिक घरभित्र बेमौसमी गोलभेडा तथा अन्य तरकारीहरु उत्पादनमा लागिपरेको उनले बताए । स्थानीय तहको निर्वाचन पश्चात मकवानपुरगढी गाउँपालिका र कृषि ज्ञान केन्द्र चितवनको सहयोग तथा सहकार्यमा प्लाष्टिक घरभित्र गोलभेडा तथा अन्य तरकारीहरु व्यवसायिक रुपमा उत्पादन गर्ने कृषकहरुको संख्यामा उल्लेख्य वृद्धि भएको उनले बताए ।
खासगरी बेमौसमी तरकारी उत्पादनका प्रविधिहरु भित्रिएपछि कृषकहरु ब्यवसायिक रुपमै बेमौसमी कृषि उपज उत्पादन गर्न सफल भएका छन् । बेमौसममा उत्पादित कृषि उपजहरुले उच्चमुल्य पाउने भएकोले उत्पादनलागत केहि बढि भएता पनि उत्पादन आय अरु बढि बढ्ने भएकोले कृषकहरुको समग्र आय उच्चहुने र पारिवारी समृद्धि छिटै हुने गरेको छ । भौगोलिक बिबिधता उपयोग गर्दै, प्रतिकुल मौसममा पनि बजार मागलाई सम्बोधन गर्ने गरी तरकारी उत्पादन गर्ने र बढिभन्दा बढि आयआर्जन गर्ने बाली पद्धती नै बेमौसमी तरकारी उत्पादन प्रविधि भएको चौधरीले बताए ।
प्लाष्टिक घर निर्माण गरि गरिने खेती प्रविधि बेमौसमी तरकारी उत्पादन प्रविधिको हिसाबले सबैभन्दा सफल र लोकप्रिय बन्दै गएको उनले बताए । चिसो हिँउद र झमझम पानी परिरहने बर्षात मौसममा समेत तरकारी फलाएर बजारको मागपूर्ति गरि मनग्य आम्दानी लिन सकिने प्रविधि नै प्लाष्टिक घरमा उत्पादन गरिने तरकारी खेति प्रविधि हो ।

गाउँपालिकाको सबै वडामा प्लाष्टिक घरमा गोलभेडा खेति
गाउँपालिकाको ८ वटै वडाहरुमा प्लाष्टिक घरमा गोलभेडा खेति भएको छ । तथ्याँक अनुसारगाउँपालिकामा कुल ९ सय ७ प्लाष्टिक घरहरु रहेका छन । सबै भन्दा बढि प्लाष्टिक घर वडा न.८ बुढीचौरमा ३ सय ५३ वटा रहेका छन् । यसैगरी वडा २ मा १ सय ९९ वटा प्लास्टिकको घरभित्र टनेल तरकारी खेति गरिएको छ । पालिकाको वडा १ मा सबै भन्दा कम २७ वटा टनेल घरमा तरकारी खेति गरिएको छ । गाउँपालिकाको तल्लोे क्षेत्रभन्दा माथिल्लो क्षेत्रमा बढि मात्रामा प्लाष्टिक घरहरु रहेका छन् । प्लाष्टिक टनेलनिर्माण तथा खेतीकार्यमा तपशिल अनुसारका संस्थाहरुले विभिन्न प्रकृतिको सहयोग गरेकाे चाैधरी बताउँछन् ।
पालिकाको कृषि विकास शाखा प्रमुख चौधरीद्वारा गरिएको अध्ययन अनुसार ९ सय ७ वटा प्लास्टीक घरहरु मध्ये ९५ प्रतिशत प्लास्टीक घरहरु गोलभेडा खेतीको लागि प्रयोग भएका छन । बाँकी ५ प्रतिशतजति घरहरु अन्य तरकारी खेतीमा प्रयोग भएका छन् । जसमा अकबरे खुर्सानी,र घरायसी प्रयोजनमा समेत प्रयोग भएको पाईन्छ । ब्यवस्थापकीय कमजोरीका कारण सबै प्लास्टीक घरहरुबाट एकै नासको उत्पादन आउन सकेको अवस्था छैन ।

असार मसान्त सम्ममा लिईएको तथ्याँक अनुसार कृषकहरुले प्रति टनेल (६ ह १२ मी. साइज) औषतमा ६ सय किलोग्राम गोलभेडा बिक्रि गरि करिव २४ हजार बराबरको गोलभेडा बिक्री गरिरहेका छन् । बार्षिक रुपमा करिब प्रतिवर्गमीटर सरदर १० किलोको दरले ८ लाख १६ हजार २ सय ७० किलो उत्पादन हुने देखिन्छ । यसबाट प्रतिवर्गमीटर कूल आम्दानी सरदर ४ सय हुन आउने उनले बताए । यसबाट गाउँपालिकाले करिव ३२ करोड ६५ लाख आम्दानी गरेको छ । तुलनात्मक रुपमा अन्य तरकारीको तुलनामा गोलभेडा खेतिबाट सन्तोषजनक आम्दानि भैरहेको वडा नम्बर ७ मा कृषक राजकुमार दोङले बताइन् । गोलभेडा बाहेक मौसमअनुसारका अन्य तरकारीहरुबाट पनि उत्पादनर आम्दानि भइरहेको छ ।
गाउँपालिकामा उत्पादन भएका तरकारी लगायतका कृषि उपजहरुलाई बजारीकरणको समस्या भने नरहेको कृषकहरुको भनाइ छ । जिल्ला सदरमुकाम तथा बागमतीप्रदेशको राजधानी समेत रहेको हेटौडामा बजार प्रमुख रुपमा तरकारी खपत हुने
गरेको छ । त्यसैगरि तरकारीहरु स्थानीयबजारमा खपत हुनुका साथै काठमाण्डौ र तराईका बजारहरु श्रजीतपुर (बारा), बीरगञ्ज (पर्सा) सम्म पुग्ने गर्दछ । हाल सम्मको उत्पादनको अवस्थालाई हेर्दा अझै बढी मात्रामा उत्पादन गर्न सके यसै क्षेत्रमा खपत चौधरीले बताए ।

फागुन १२ गते विहीबारकाे सहीखबर साप्ताहिकमा प्रकाशित सामग्री
मकवानपुर । हेटौंडा उपमहानगरपालिकाकाे वडा नम्बर ६ पूर्ण संस्थागत सुत्केरी वडा घोषणा भएकाे छ । विहीबार हेटौंडा–६ चौघडामा रहेकाे हेटाैडा स्वास्थ्य चौकीमा कार्यक्रमकाे आयाेजना गरी वडालाई उपमहानगरपालिकाका मेयर हरिबहादुर महतले पूर्ण संस्थागत सुत्केरी वडा घोषणा गरेका हुन् ।
कार्यक्रममा मेयर महतले हेटौंडाका प्रत्येक वडामा स्वास्थ्यचौकी स्थापना भएकाे सुरु भएको याे अभियान हेटौंडाका १९ वटै वडाहरुमा क्रमश लागु गर्दै लगिने बताए । ६ नम्बर वडामा कुनैपनि गर्भवती महिलाहरु घरमा सुत्केरी नभइ स्वास्थ्यसंस्थामा आएर मात्र सुत्केरी गराइने भएको छ । कार्यक्रममा स्वास्थ्य चौकी प्रमुख टीएन ढुङगेलले वडाबासीहरुको सहयोग र साथ पाएकाले स्वास्थ्य चौकीलाई नगरकै उत्कृष्ट स्वास्थ्य चौकी बनाउन सफल भएको बताए ।
स्वास्थ्य चौकीले गरेको विभिन्न क्रियाकलापहरुको प्रचारप्रसार गरि सहयोग गर्ने स्थानीय सञ्चारकर्मी भीमसेन पौडेल र रुपेश दुलाललाई प्रशंसापत्र सहित दोसल्ला ओढाएर सम्मान गरिएको थियो । यसैगरी,स्वास्थ्य चौकी जाने बाटोको लागि जग्गा दान गर्ने भगवती ढकाल, मनिस ढकाल र दिनेश ढकाल, महिला स्वास्थ्य स्वयंसेविका र स्वास्थ्य चौकीका कर्मचारीहरुलाई पनि सम्मान गरिएको थियो ।

हेटौडा–६ का वडा अध्यक्ष अर्जुन प्रसाद चौलागाईको सभाध्यक्षमा सम्पन्न भएको कार्यक्रममा हेटौडा–७ का वडा अध्यक्ष राजन थापा, सामुदायिक वन उपभोक्ता महासंघ, मकवानपुरका अध्यक्ष साधुराम चौलागाई, बरिष्ठ पत्रकार प्रताप बिष्ट, सहयोगी मन नेपालका केन्द्रीय अध्यक्ष केदार प्रसाद चौलागाई, बंशगोपाल माविका प्रअ रमेश प्रसाद लामिछाने, जनकल्याण सहकारीका अध्यक्ष हिमाल पौडेल, टोल विकास संस्था वडा समन्वय समिति, हेटौडा–६ का अध्यक्ष केशव धिताल लगायतको आतिथ्यता रहेको थियो ।
