मकवानपुर । आगामी फागुन २१ गते हुने प्रतिनिधिसभा निर्वाचनको सुरक्षाका लागि निर्वाचन प्रहरी भर्ना प्रक्रिया औपचारिक रूपमा सुरु भएको छ ।
देशभरका जिल्ला प्रहरी कार्यालयहरूले आ-आफ्नो कोटा अनुसार सूचना जारी गर्दै आज शुक्रबारदेखि आवेदन माग गरेका छन् ।
यसअघि प्रहरी प्रधान कार्यालयले नेपाल प्रहरीको कोटाअनुसार १ लाख ३३ हजार ९ सय ८० जनाका लागि मात्रै आवेदन खुलाएको थियो । तर, गृह मन्त्रालयको निर्देशनपछि जिल्लाहरूले सशस्त्र प्रहरीको कोटा १५ हजार १ सय १० जना समेत समेटेर संयुक्त रूपमा आवेदन आह्वान गरेका हुन् ।
सशस्त्र प्रहरीले आफ्नो कोटाको भर्ना कसरी गर्ने भन्ने विषयमा गृह मन्त्रालयमा छलफल गरेपछि दुवै निकायको कोटा उल्लेख गरेर सूचना निकाल्न निर्देशन दिइएको थियो ।
सूचनामा नेपाल प्रहरी र सशस्त्र प्रहरीको कोटा छुट्टाछुट्टै उल्लेख भए पनि छनोट प्रक्रिया भने संयुक्त रूपमा गरिने जनाइएको छ । सबै प्रक्रिया टुंगिएपछि मात्रै कुन उम्मेदवार नेपाल प्रहरी र कुन सशस्त्र प्रहरी मातहत रहने भन्ने तय हुनेछ । त्यसपछि दुवै सुरक्षा निकायले आ-आफ्नो टोलीलाई १० दिनको तालिम दिनेछन् ।
तालिमपछि करिब एक महिनासम्म निर्वाचन सुरक्षामा खटाइने निर्वाचन प्रहरीको करार अवधि ४० दिन (तालिमसहित) तोकिएको छ । यद्यपि, निर्वाचनको अवस्था अनुसार म्याद थप वा नियुक्ति बदर हुन सक्ने व्यवस्था सूचनामा उल्लेख गरिएको छ । निर्वाचन स्थगित वा रद्द भएमा नियुक्ति स्वतः रद्द हुने पनि स्पष्ट पारिएको छ ।
निर्वाचन प्रहरीले दैनिक ८६९ रुपैयाँ ४० पैसाका दरले ४० दिनको ३४ हजार ७ सय ७६ रुपैयाँ तलब पाउनेछन् । साथै, आवतजावत भत्ता, खाजा भत्ता, पोशाक खर्च र अन्य सुविधा नेपाल प्रहरीका जवान सरह उपलब्ध गराइनेछ । सबै रकम बैंक खातामार्फत भुक्तानी गरिने व्यवस्था गरिएको छ । निर्वाचनमा खटिँदा घाइते वा मृत्यु भएमा सरकारले तोकेअनुसार क्षतिपूर्ति पनि उपलब्ध गराइनेछ ।
इच्छुक नेपाली नागरिकले आजदेखि पाँच दिनभित्र देशभरका जिल्ला प्रहरी कार्यालयमार्फत आवेदन दिन सक्नेछन् । यो भर्ना प्रक्रियाले निर्वाचन सुरक्षासँगै ठूलो संख्यामा युवालाई अस्थायी रोजगारीको अवसर प्रदान गर्ने अपेक्षा गरिएको छ ।
देवघाटधाम । तनहुँ,चितवन र नवलपरासी(नवलपुर) काे संगमस्थल प्रसिद्ध धार्मिकस्थल देवघाटधाममा ‘मकर-काव्य-यामिनी’ २३ औं शृङ्खला हुने भएकाे छ । देवघाट क्षेत्रकाे तनहुँ जिल्लामा अवस्थित ‘महेश संस्कृत विद्यापिठ गुरुकुलम्’को आयोजनामा ३० पुस २०८२ काे साँझ ‘मकर-काव्य-यामिनी’को २३ औँ शृङ्खलाकाे नियमित आयोजना हुने भएको हाे ।
मकर संक्रान्तिको पूर्व सन्ध्यामा सञ्चालन हुने भएकाले यस कार्यक्रमको नाम मकर-काव्य-यामिनी राखिएको आयोजक संस्थाले जनाएको छ । मकर काव्य यामिनी- २०८२ प्राडा भागवत शर्माको प्रमुख आतिथ्य तथा कवि मनु मञ्जीलको विशेष उपस्थितिमा हुने भएकाे छ । राष्ट्रियस्तरका कवि, साहित्यकार तथा विशिष्ट विद्वान्हरूको उपस्थिति रहँदै आएको कार्यक्रम पुस महिनाको अन्तिम साँझबाट माघको बिहानसम्म सञ्चालन हुने गरेको छ ।
यसका साथै यामिनीमा चितवन, मकवानपुर, कास्की, नवलपरासी, काठमाडौं तथा देशका विभिन्न स्थानका काव्यसाधकहरूको सहभागिता रहनेछ । “देवघाट महाकाव्य ” “म र मेरा” र “महापुरुष” का स्रष्टा निराजन पन्त, छन्दकवि सुदेश सत्याल, कवि नगाधिराज, कवि तथा गजलकारलगायतका स्रष्टा मकर काव्य यामिनीका प्रतिनिधि हुन् ।
“सतत झुमिरहेझैँ मोह मायाविनीमा,
अनवरत डुबेझैँ भाव-मन्दाकिनीमा । हृदयरस पगाल्ने भावकी मोहिनीमा,
सहृदयसँग मिल्दै पाल्नुहोस् यामिनीमा ॥”
चितवन, नवलपरासी र तनहुँको संगम वेणीमा माघ १ गतेको अघिल्लो रात श्रद्धालुले भजनकीर्तन गर्दै जागा बसेर भोलिपल्ट स्नान गर्ने चलन छ। तिनैमध्येका काव्यपारखीलाई रातभर काव्यको आनन्द दिलाउनका लागि ‘काव्य यामिनी’ आयोजना गरिँदै आएको महेश संस्कृत गुलुकुलमले जनाएकाे छ । माघ १ गते देवघाटमा माघेसङ्क्रान्ति मेलामा तीर्थस्नान गर्नुपूर्व अघिल्लो रात काव्यपान गर्न पाउनुलाई सुअवसरका रुपमा लिने गरिएको छ ।
देवघाट धार्मिक, आध्यात्मिक र शैक्षिक क्षेत्रका साथसाथै साहित्यिक क्षेत्रको उर्वर भूमिका रूपमा परिचित गराउन मकर-काव्य-यामिनी सफल भएको छ । काव्यप्रेमी साहित्यानुरागी स्रष्टा तथा दर्शक श्रोताहरूलाई यामिनीमा आयोजकले निमन्त्रणा गरेकाे छ ।
सवारीसाधनबाट आउने व्यक्तिहरू रामनगर ठिमुराको पुल तथा जुगेडीको पुलबाट महेश संस्कृत गुरुकुलमा पुन्न सक्नेछन् । अन्य व्यक्तिहरू नारायणगढ आँपटारी हुँदै झोलुङ्गे पुलबाट गुरुकुल पुग्न सक्नेछन् । सबै अतिथिलाई खाने र बस्ने व्यवस्था आयोजकले गर्ने बताइएकाे छ । २०६० सालबाट निरन्तर सञ्चालन भइरहेको मकर-काव्य-यामिनी राष्ट्रियस्तरको काव्यिक महोत्सव हो ।
भावको स्निग्ध धागोमा शब्दका फूल गाँस्दछिन् ।
कविका मनमा रम्दै यामिनी मस्त हाँस्दछिन् ।।
शब्दउद्यानका माली! अलङ्कारसुवासिनी ।
काव्यका पारखी ! ‘आऊ’ भन्दछिन् काव्य-यामिनी ।।
मकवानपुर । आगामी राष्ट्रियसभा निर्वाचनमा बागमती प्रदेशतर्फमा नेपाली कम्युनिष्ट पार्टीले एक महिला र एक पुरुषको मनाेनयन दर्ता गराएको छ । यस अघि नेकपा एमाले नेपाली काँग्रेस र जनता समाजवादी पार्टीसँग गठबन्धन गर्ने तयारी भएपनि सहमति टुटेपछी नेपाली कम्युनिष्ट पार्टीले एकल उम्मेदवार दर्ता गरेको हाे ।
गठबन्धनबाट बाहिरीएपछि एकल उम्मेदरवार मनोनयन नेपाली कम्युनिष्ट पार्टीले बागमतीमा प्रेमप्रसाद सापकोटा र सरोजकुमारी झाको मनोनयन दर्ता गरेको छ । सिन्धुपाल्चोक जिल्लाका सापकोटा हाल पार्टीको केन्द्रीय सदस्य हुन् । सापकोटाकाे लागि पार्टी नेता प्रेम बहादुर पुलामी प्रस्तावक र बकैया गाउँपालिका उपाध्यक्ष भक्त खत्री समर्थक रहेका छन् ।
यसै गरी सरोजकुमारी झाको प्रस्तावकमा हेटौंडा उपमहानगरपालिका मेयर मीना कुमारी लामा र समर्थकमा मनहरी गाउँपालिका उपाध्यक्ष सीता पुलामी मगर रहेका छन् ।
मकवानपुर । मकवानपुरको हेटौंडामा सार्वजनिक मैदान निर्माण हुने भएको छ । स्थानीय तह,प्रदेश तथा संघीय सरकारकाे सहयाेगमा सुविधा सम्पन्न मैदान निर्माण गरिने भएको हो ।
हेटौंडा उपमहानगरपालिका वडा नम्बर ४ स्थित भुटनदेवी माविकाे पूर्वी क्षेत्रमा खेलकुद तथा अन्य कार्यक्रम गर्न मैदान निर्माण गर्ने गरि तयारी थालिएको हेटौंडा ४ नम्बर वडा अध्यक्ष एवम् भुटानदेवी मावि विद्यालय व्यवस्थापन समिति अध्यक्ष नवीन सिग्देलले जानकारी दिए ।
फुटबल, भलिबल, क्रिकेट, बाँस्केटबल लगायतका खेलहरू तथा सार्वजनिक कार्यक्रम सञ्चालन र नियमित व्यायम लगायतका विभिन्न क्रियाकलाप सञ्चालन गर्न सकिने गरि बहुउदेश्यीय मैदान निर्माण गर्न लागिएको सिग्देलले बताए। ‘तत्काल मैदानकाे सरसफाई कार्य अगाडि बढाईएकाे छ’ उनले भने ‘उपमहानगरपालिका, वडा, प्रदेश र संघीय सरकारबाट सहयाेग जुटाएर सुविधा सम्पन्न मैदान निर्माण गर्ने उद्देश्यले छलफल भैरहेको छ ।’
‘खेल मैदान निर्माण पश्चात विद्यालय तथा क्लबहरूले विभिन्न खेलकुदकाे कार्यक्रम आयाेजना गर्नसक्ने छन् विद्यालयका प्रधानाध्यापक सूर्यप्रसाद घिमिरेले भने ‘अन्य संघ, संस्था, संगठन र दलहरूले विद्यालयकाे निति अनुसार अनुमति लिएर कार्यक्रम आयाेजना गर्न दिइनेछ ।’
मकवानपुर । आगामी राष्ट्रियसभा निर्वाचनमा बागमती प्रदेशतर्फको एक सिटमा गठबन्धनबाट नेपाली कांग्रेसले चितवनकी गीता कार्की देवकोटालाई उम्मेदवार बनाएको छ ।
गिताको लागि प्रस्तावकमा नेपाली काँग्रेसका प्रलाह सापकोटा र समर्थक नेकपा एमालेबाट बागमती प्रदेश सभा सदस्य तथा स्वास्थ्यमन्त्री किरण थापा रहेका छन् । माघ ११ मा हुने निर्वाचनमा नेपाली कांग्रेसले चितवनको महासमिति सदस्य रहेकी देवकोटालाई उम्मेदवार बनाएको हाे ।
उनी पेसाले मौरीपालक कृषक हुन् । रत्ननगर नगरपालिका–१४, डुम्री चोक निवासी देवकोटालाई ३२ वर्षे राजनीतिक यात्रामा पहिलो पटक चुनावी प्रतिस्पर्धामा उत्रिएकी हुन् ।
कांग्रेसको तर्फबाट राष्ट्रियसभा सदस्यको उम्मेदवार चयन भएकी देवकोटा विगत ३२ वर्षदेखि नेपाली कांग्रेसको राजनीतिमा निरन्तर सक्रिय छिन् । देवकोटाले उम्मेदवारीलाई उनको लामो राजनीतिक सङ्घर्ष र सामाजिक योगदानको रूपमा लिएको बताइन् ।