मकवानपुर । मकवानपुरमा ४ जनाले हतियार बुझाएका छन । जिल्ला प्रशासन कार्यलय मकवानपुरले जिल्लाका इजाजत प्राप्त हातहतियारहरु चैत मसान्तभित्र अनिवार्य बुझाउन आग्रह गरेपनि ४ जनाले मात्र हतियार बुझाएका हुन ।
बैशाख ३० गते हुने स्थानीय निर्वाचनलाई भरभर्दो एवं विश्वसनीय बनाउन मकवानपुर प्रशासनले इजाजत प्राप्त हातहतियार नजिकको प्रहरी चौकीमा बुझाउन अनुरोध गरेकोमा ४ जनाले मात्र हतियार बुझाएका हुन् ।
जिल्ला प्रहरी कार्यलय मकवानपुरका प्रहरी प्रवक्ता टेकबहादुर कार्कीले ४ जनाले मात्र प्रहरी कार्यलयमा हतियार बुझाएको बताए ।
जिल्लामा दर्ता गराएका ४९ थान हातहतियार मध्ये ४ जनाले मात्र हतियार बुझाएका हुन् । जिल्ला प्रशासन कार्यलय मकवानपुरका सहायक प्रमुख जिल्ला अधिकारी बद्रीनाथ गैह्रेले हतियार नबुझाउनेहरुको विषयमा सुरक्षा समितिको बैठक बसेर आवश्यक निर्णय लिईने बताए । उनले जिल्लामा ४९ थान हातहतियार दर्ता भएकोमा उक्त हतियारहरु ३८ जना व्यक्ति र संस्थाहरुको नाममा रहेको बताए ।
मकवानपुर/ आसन्न स्थानीय तहको निर्वाचनमा नेकपा एमालेसँग चुनावी गठबन्धन गरेको राप्रपा नेपालले मकवानपुरको हेटौंडा उपमहानगरपालिकाको उपमेयरसहित केही वडाको वडाध्यक्ष दाबी गरेको छ ।
एक साता अघि जिल्ला कमिटी गठन गरेको राप्रपा नेपालले प्रदेश एक मात्रै उपमहानगरपालिकाको उपमेयर सहित शक्तिशाली वडाको वडा अध्यक्षमा दाबी गरेपछि यो बिषयले चर्चा पाएको छ ।
दुबै पार्टीको केन्द्रिय कमिटीबीच गठबन्धनको सहमति भएको थियो । त्यसको भोलिपल्ट आज बिहीबार मकवानपुरका स्थानीय तहमा तालमेल गर्ने विषयमा दुई पार्टीबीच छलफल भएपछि यस्तो दाबि गरिएको हो ।
आज बिहीबार एमाले पार्टी कार्यालयमा भएको छलफलमा उपमहानगरपालिकासहित केही पालिकामा तालमेलको विषयमा छलफल भएको राप्रपा नेपाल मकवानपुरका अध्यक्ष गुरुप्रसाद सापकोटाले बताए ।
उपमहानगरको उपमेयरसहित एमालेले हारेका वडाहरुमा आफ्नो दाबी रहने उनले बताए । यद्यपि अहिले नै पदको विषयमा छलफल सुरु नभइसकेको सापकोटाको भनाइ छ । राप्रपा नेपालले हेटौंडा उपमहानगरपालिकाको उपमेयरसहित उपमहानगरको वडा नम्बर ६, १ र १२ सहितका वडा र जिल्लाकै अर्को एक गाउँपालिकामा राप्रपा नेपालले दावी गरेको छ । तालमेलका विषयमा शुक्रबार र शनिबार थप छलफल हुने सापकोटाले बताए ।
नेकपा एमाले मकवानपुरका अध्यक्ष एकालाल श्रेष्ठले राप्रपा नेपालसँग चुनावी तालमेलको कुरा भएको तर सहमति हुन बाँकी रहेको बताए । “अहिले सांगठनिक अवस्थाको बारेमा दुबै पार्टीले तयारी गर्ने र फेरि छलफलमा बस्ने सहमति भएको छ” अध्यक्ष श्रेष्ठले “अहिले पदको बारेमा कुनै टुङ्गो भएको छैन तैपनि सहकार्यको कुरामा माग दाबी रहिहाल्छ, यो स्वभाविक हो ।” छलफलमा एमालेका केन्द्रीय सदस्य तथा जिल्ला सह-इन्चार्ज कृष्णप्रसाद दाहाल, केन्द्रीय सदस्य जुनेली श्रेष्ठ, जिल्ला अध्यक्ष एकालाल श्रेष्ठ, उपाध्यक्ष लालबहादुर थापा सहभागी थिए ।
राप्रपा नेपालको तर्फबाट महामन्त्री राजाराम बर्तौला, केन्द्रीय सदस्य बालकृष्ण कार्की, दामोदर वाग्ले र जिल्ला अध्यक्ष सापकोटा सहभागी थिए । तत्कालिन राप्रपाले २०७४ को निर्वाचनमा हेटौंडा उपमहानगरमा मेयरमा ७ हजार र उपमेयरमा ७ हजार ४ सय मत पाएको थियो ।
स्थानीय तहको निर्वाचनमा नेकपा एमालेको सुर्य चुनाव चिन्हबाट निर्वाचन लड्ने सहमति गरेको राप्रपा नेपालका नेताहरुले आज नेकपा एमालेका नेताहरुसँग औपचारिक भेट गरेका छन् ।
नेकपा एमाले पार्टी कार्यालय हेटौँडामा भएको भेटमा यहि बैशाख ३० गते हुने स्थानीय तहको निर्वाचनमा हुने तालमेलको विषयमा छलफल भएको थियो । बैठकमा जिल्लामा गठबन्धनलाई बलियो र परिणाममुखी बनाउने विषयमा छलफल भएको थियो । गठबन्धनको निष्कर्षमा पुग्नका निमित्त तथ्यसंगत ढंगबाट छलफल थप अगाडी बढाउने दुवै पार्टीका प्रतिनिधिबीच सहमती भएको छ ।
बैठकमा एमाले मकवानपुरका सह–इञ्चार्ज एवम् प्रतिनिधिसभा सांसद कृष्णप्रसाद दाहाल, केन्द्रिय सदस्य एवम् प्रदेशसभा सांसद जुनेली श्रेष्ठ, अध्यक्ष एकालाल श्रेष्ठ, उपाध्यक्ष लालबहादुर थापा सहभागी थिए । यसैगरी राप्रपा नेपालका तर्फबाट महामन्त्री राजाराम बर्तौला, केन्द्रिय सदस्य बालकृष्ण कार्की, मकवानपुर अध्यक्ष गुरुप्रसाद सापकोटा, मकवानपुर १ (ख) का अध्यक्ष दामोदर वाग्ले लगायतको सहभागी रहेका थियो ।
प्रकृतिकाे नयाँ वर्ष वसन्तः नेपालमा बैशाख १ गतेबाट नयाँ वर्ष सुरु हुने गर्छ । तर ऋतुका हिसाबले चैत महिनामै प्रकृतिले नयाँ वर्ष मनाउँछ । वसन्त भन्नाले बहार (यौवनावस्था) भन्ने बुझिन्छ । वसन्त ऋतुमा प्रकृतीको बहार आउँछ । हिन्दू धर्मको महान ग्रन्थ गीतामा भगवान श्री कृष्णले अर्जुनलाई ‘म ऋतुहरूमा वसन्त ऋतु हुँ’ भनेका छन्। पौराणिक तथा आधुनिक कविहरूले वसन्त ऋतु माथी सयौँ कविताहरू लेखेका छन् । वसन्त ऋतु राम्रो, रमाइलाे र मनमोहक ऋतु हो। बसन्त ऋतुमा सबै बोटबिरुवाहरूको पुरानो पात झर्छ र नयाँ पात पलाउँछ। बसन्त ऋतुमा छाउने हरियालीले सवैकाे मन लाेभ्याउँछ । त्यसैले यस ऋतुलाई ऋतुराज पनि भनिन्छ। तस्विरहरुः सरिता दाहाल र आरपी गुरागाईं






- वासुदेव गुरागाईं
चुनाव आउन पन्ध्र दिन मात्र बाँकी छ । प्रचार प्रसारमा आउनेको भिडभाड छ गाउँमा। जो जाे आउँछन सबै एउटा न एउटा आश्वासन दिएर जान्छन् गाउँले मतदातालाई। पर्चा बॉड्छन् । किताबमा लेखेका, रेडियोले भनेका, टिभीले देखाएका कुरा साँचा हुन्छन भनेर एकछापे दिमाग बनाएका गाउँले तिनका पर्चा पढछन् । भाषण सुन्छन् । त्यस विषयमा मज्जाले छलफल गर्छन । फुर्सद छ अहिले गाउँलेलाई । खेती किसानीको समय छैन । त्यसमाथि बलिष्ठ हात पाखुरा विदेशिएका बेला खेती गर्नेहरू पनि कति नै छन् र गाउँमा ! विदेशिएका लोग्ने, स्वास्नी, छोरा, छोरी, भाइ, भतिज, मामा, भाञ्जा आदिले विदेशबाट सम्प्रेषित गरेका दुःख र कष्टका खबर सुन्नु सुनाउनु बढ्ता नियति बनेको छ अचेल तिनीहरूको।
एउटी उम्मेदवार आइन् र यसरी कडैसँग खोकिन्”आदरणीय आमाबुबा, दाजुभाइ, दिदीबहिनी तथा उपस्थित मेरा प्यारा प्यारा आदरणीय जनसमुदाय, म तपाईंहरूकी छोरी यस निर्वाचन क्षेत्रको उम्मेदवार भएकी छु । मेरा विषयमा तपाईंहरू सबैलाई भलिभाँती थाहा छदै छ । मैले “तपाईहरूका यहाँका समस्या र आवश्यकता राम्राेसँग पहिचान गरेकी छु । मलाई तपाईंहरूको अमूल्य भोटको आवश्यकता छ। तपाईंहरूको भोट अवश्य पाउँछु भन्ने मैले विश्वास लिएकी छु। तसर्थ मैले जितेपछि म गाउँलाई स्विट्जरल्यान्ड बनाइदिन्छु, बुझ्नु भो।”
अर्को उम्मेदवार आयो र म यस वस्तीलाई सिङगापुर बनाइदिन्छु भनेर सन्कियो । अर्कोले युराेप बनाउने कुरा गर्यो। फेरि अर्को आयो र त्यसरी नै अमेरिका बनाइदिने आश्वासन दियो । यही क्रममा कसैले चाइनाकाे चुड्की बजायो । कसैले भारत भट्ट्यायो । कसैले जर्मन भनेर जङ्गियो । यसै गरी कसैले बेलायत भनेर बके, कसैले रुस भनेर रुमल्याए । कसैले फ्रान्सको फाल्तु वकालत गरे त कसैले बेल्जियम, कसैले नेदरल्यान्ड्स, कसैले डेनमार्क भनेर डङ्का पिटे।
चुनाव प्रचार प्रसारको समय सकियो। चुनावको मौन अवधि सुरु भयो। गाउँमा आउने उम्मेदवार र कार्यकर्ताको भिड एकाएक ओइलायो। गाउँलेको कानले शान्ति महसुस गर्यो।
चुनावको दुई दिन अघि गाउँले मतदाताको बैठक बस्यो । गाउँले सबै एकठ्ठ भएर बिर्खेलाई भोट हाल्ने कुरामा सहमत भए । बिर्खेलाई भोट हाल्ने कुरामा गाउँले एक मत हुनुमा एउटै मात्र कारण थियो- उसले नेपाललाई ‘नेपाल’ बनाउने उद्घोष गरेको थियो।
म्हेपी काठमाडौं
फुमन्तर लघुकथाहरुबाट
मकवानपुर । मकवानपुरे पत्रकार गिरिजा अधिकारी जनसेवाश्री मानपदवीबाट विभूषित भएका छन् । विहीबार सरकारले आयोजना गरेको विभूषण सुशोभन समारोहमा राष्ट्रपति विद्यादेवी भण्डारीले अधिकारीलाई उक्त ममनपदवीबाट विभूषित गरेकी हुन् ।
२ दशकभन्दा बढी निरन्तर पत्रकारिता क्षेत्रमा सक्रिय रहेका अधिकारीलाई सरकारले पत्रकारितामार्फत् समाजमा विशिष्ट योगदान पुर्याएको भन्दै सरकारले संविधान दिवस २०७८ को अवसर पारी जनसेवा श्री ममनपदवीबाट विभूषित गर्ने घोषणा गरेको थियो । २०५७ सालबाट पत्रकारितामा आवद्ध अधिकारीले पर्सा जिल्लाको वीरगञ्जबाट प्रकाशित हुने प्रतीक दैनिकबाट पत्रकारिता सुरु गरेका हुन् । अधिकारीले पत्रपत्रिका, एफएम रेडियो र टेलिभिजनमा सम्पादकीय विभागको नेतृत्व गरेर काम गरिसकेका छन् ।
काठमाडौँबाट प्रकाशित हुने नयाँ पत्रिका दैनिकको उपसम्पादक, सौर्य दैनिकको बरिष्ठ उपसम्पादक, हेटौंडाबाट प्रकाशित हुने थाहा सन्देश दैनिक र प्रदेश दैनिकको सम्पादक, टिम टेलिभिजनको डेक्स सम्पादक र साम साप्ताहिकको सम्पादकको रुपमा काम गरिसकेका उनी हाल तु खबर डटकमको सम्पादकको रुपमा कार्यरत छन् । मनकामना एफएम, नेशनल एफएम, पाल्पाको रेडियो पश्चिमाअञ्चल, रेडियो सगरमाथा, शक्ति एफएम, रेडियो सरोवरलगायतका एफएम रेडियोको रिपोर्टर, समाचार प्रमुख र सम्पादककाे उनले अनुभव बटुलेका छन् ।
पत्रकारका अलावा साहित्य र गीत लेखनमा समेत सक्रिय अधिकारीको अक्षरका जुलुसहरु, इतिहास र लाल झा र २५ प्रतिवाद नामक कविता संग्रहहरु प्रकाशित भएका छन् । उनले मकवानपुरे पत्रकारिता (इतिहास र समिक्षा), र मकवानपुरमा मिडिया नामक अनुसन्धानमुलक पुस्तकको सम्पादन गरेका छन् ।
यस अघी अधिकारी प्रेस काउन्सिल नेपालले युवा पत्रकारिता पुरस्कार, राष्ट्रिय सूचना आयोगको प्रादेशिक सूचना पुरस्कार, शिक्षा पत्रकारिता पुरस्कार, कान्तिपुर पत्रकारिता पुरस्कार, पहल उत्कृष्ठ खोज पत्रकारिता पुरस्कार र रिपोटर्स क्लबको क्रियाशील युवा पत्रकारिता पुरस्कारबाट समेत पुरस्कृत तथा सम्मानित भएका छन् ।