मकवानपुर । मकवानपुरमा मंगलबार १ सय ८५ जनामा डेंगु संक्रमण पुष्टि भएको छ । जिल्ला स्वास्थ्य कार्यालय मकवानपुरले सार्वजनिक गरेको तथ्याङ्क अनुसार जिल्लामा १ सय ८५ जनामा डेंगु संक्रमण पुष्टि भएको हो । योसँगै जिल्लामा डेंगु पुष्टि हुनेको संख्या २ हजार ६ सय ९१ जना पुगेको छ ।
मंगलबार डेंगु संक्रमण पुष्टि हुनेमा १ सय ५३ जना हेटौंडा उपमहानगरपालिकाका रहेका छन् । याे सँगै हेटौडामा डेंगुका २ हजार ४ सय १६ जनामा डेंगु संक्रमण पुष्टी भएकाे छ । यस्तै मकवानपुरगढी गाउँपालिकाका मंगलबार ५ जना डेंगु संक्रमण थपिएसँगै हालसम्म ४२ जनामा पुष्टि भएकाे छ । मंगलबार बागमती गाउँपालिकाका ५ जना थपिएसँगै हालसम्म ६ जनामा डेंगु संक्रमित भएका छन् ।
यसैगरि मंगलबार १ जना संक्रमित थपिएसँगै हालसम्म कैलाश गाउँपालिकाका ५ जनामा, १२ जना संक्रमित थपिएसँगै हालसम्म मनहरी गाउँपालिकाका ११५ जनामा, ७ जना संक्रमित थपिएसँगै हालसम्म भीमफेदी गाउँपालिकाका २६ जनामा, २ जना संक्रमित थपिएसँगै बकैया गाउँपालिकाका हालसम्म ५ जनामा र १ जना संक्रमित थपिएसँगै राक्सिराङ गाउँपालिकाका हालसम्म ३ जनामा संक्रमण पुष्टि भएको स्वास्थ्य कार्यालयले जनाएको छ ।
कार्यालयकाे तथ्याङ्क अनुसार मंगलबार ठेगाना नखुलेकाे १ जना तथा अन्य जिल्लाकाे २ जनामा समेत डेंगु संक्रमित पुष्टि भएकाे छ । यस्तै मकवानपुरकाे थाहा नगरपालिकामा हालसम्म ५६ जनामा संक्रमण पुष्टि भएकाे छ भने इन्द्र सराेवर गाउँपालिकामा हालसम्म डेंगु संक्रमित पुष्टि भएकाे छैन । जिल्लामा डेंगु संक्रमणका कारण जनाकाे मृत्यु भएकाे छ ।
स्वास्थ्य तथा जनसंख्या मन्त्रालयका अनुसार हालसम्म देशभर २५ हजार ५ सय ४३ जना डेंगु संक्रमणका बिरामी भेटिएका छन् । सातै प्रदेश अन्तर्गत ७६ जिल्लामा डेंगु संक्रमण फैलिएकाे मन्त्रालयकाे तथ्याङ्कमा उल्लेख छ । नेपालमा हालसम्म डेंगुका कारण ३२ जनाको मृत्यु भएको छ ।
नेपालमा २०६१ सालमा पहिलो पटक डेंगुको बिरामी देखिएका थिए । त्यसपछि वर्षेनी डेंगुका बिरामी नेपालमा देखिएका छन् ।
मन्त्रालयका अनुसार हालसम्म प्रदेश १ मा ७ सय ७५, मधेश प्रदेशमा ३ सय ८०, बागमतीमा १९ हजार ९ सय १०, गण्डकीमा ५ सय ५६, लुम्बिनीमा २ हजार ८ सय ८७, कर्णालीमा २ सय ३१ र सुदुरपश्चिम प्रदेशमा ८ सय ४ जनामा डेंगु देखिएको छ ।
स्वास्थ्य कार्यालयकाे तथ्याङ्क

स्वास्थ्य मन्त्रालयकाे तथ्याङ्क

मकवानपुर । हेटौंडामा जारी जिल्लास्तरीय महिला भलिबल प्रतियोगिताको सेमीफाइनल समीकरण पूरा भएको छ । केशवलाल श्रेष्ठ स्मृति केन्द्रीय प्रतिष्ठानको आयोजनामा सोमबारदेखि सुरु प्रतियोगितामा समूह चरणको खेल मंगलबार सकिएसँगै सेमीफाइनल समीकरण पूरा भएको हो ।
समूह ‘क’ को विजेता बन्दै बकैया गाउँपालिका समेफाइनलमा प्रवेश गरेकाे छ । बकैयाले सेमीफाइनलमा समूह ‘ख’ को उपविजेता हेटौंडा उपमहानगरपालिका ११ नम्बर वडाको टिमसँग खेल्ने छ । यस्तै समूह ‘ख’ को विजेता बन्दै सेमीफाइनल प्रवेश गरेकाे मकवानपुरगढी गाउँपालिका समूह ‘क’ को उपविजेता थाहा नगरपालिकासँग सेमीफाइनलमा भेट पक्का गरेको छ। सेमीफाइनल चरणको खेल बुधबार बिहान हुनेछ भने फाइनल खेल बुधबार दिउँसो हुने आयाेजक प्रतिष्ठानका महासचिव वसन्त कुमार सिटौलाले बताए ।
सोमबारदेखि सुरु जिल्लास्तरीय महिला भलिबल प्रतियोगितामा ७ वटा टिमको सहभागिता रहेको थियो । हुप्रचौरमा जारी प्रतियोगिताको उपाधि विजेताले नगद ५० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछ । यसैगरि उपविजेताले २५ हजार रुपैयाँ नगदसहित शिल्ड, मेडल तथा प्रमाणपत्र प्राप्त गर्ने सिटौलाले जानकारी दिए ।
मकवानपुर । निर्वाचन आयोगले असोज १२ गते बुधबारबाट निर्वाचन आचारसंहिता, २०७९ लागू गर्ने निर्णय गरेको छ । आयाेगले आगामी मंसिर ४ गते हुने प्रतिनिधि सभा र प्रदेश सभा निर्वाचनको आचारसंहिता बुधबारदेखि लागू गर्ने निर्णय गरेको हो ।
निर्वाचन आयोगको मंगलबार बसेको बैठकले भोलि १२ असोजदेखि निर्वाचन आचारसंहिता कार्यान्वयन गर्ने निर्णय गरेको प्रमुख निर्वाचन आयुक्त दिनेश थपलियाले जानकारी दिए ।आचारसंहिताको पालना र कार्यान्वयन गर्न सबैको सहयोगको अपेक्षा गरेको छु,’ निर्वाचन आयोगका प्रमुख निर्वाचन आयुक्त दिनेश कुमार थपलियाले भने ।
राजनीतिक दल तथा उम्मेदवारहरूलाई ६० बुँदे निर्देशन
यसैबीच निर्वाचन आयोगले निर्वाचनसम्बन्धी कानुन तथा आचारसंहिताको प्रभावकारी कार्यान्वयनका लागि राजनीतिक दल तथा उम्मेदवारहरूलाई ६० बुँदे निर्देशन जारी गरेको छ ।
आयोगका प्रवक्ता शालिग्राम शर्मा पौडेलले विज्ञप्ति जारी गर्दै ६० बुँदे निर्देशन दिइएको जानकारी गराएका छन् ।
आचार संहिता
निर्देशन
ऋषिराम भुसाल
१.
सधैँ अन्धकार हुने झुप्रोमा दियालो बाल्नु पर्नेछ
खोले फाँडो नपाक्ने झुपडीमा दाल गाल्नु पर्नेछ
सपना देखेर मरूभूमिको तातो बालुवामा जल्दैछु !
भत्किएको छाप्राको एकछेउ जसरी टाल्नु पर्नेछ ।
२.
राजतन्त्र फाल्यौँ गणतन्त्र ल्यायौँ भनेर मात्र हुदैन
सिंहदरबारमा बदलिइरहने तस्विर गनेर मात्र हुदैन
हिजो कलेटी परेका ओठ आज पनि शुष्क नै छन् !
चर्केका मन टाल्नुस् हजुर ठूलो मान्छे बनेर मात्र हुदैन ।
३.
नेपालीले अरुसँग कदापी सिर झुकाउनु हुन्न
स्वार्थकालागि नेपाली अस्मिता सुकाउनु हुन्न
नेपाल र नेपालीको हीतका खातिर सबै जुटौ !
लाभकालागि वीरताको इतिहास चुकाउनु हुन्न ।
चन्द्रागिरी, काठमाडौँ
आगामी ४ मंसिरका लागि प्रतिनिधिसभा र प्रदेशसभा निर्वाचनका लागि निर्वाचन आयोगमा बुझाएको समानुपातिक बन्दसूची विषयले कांग्रेसभित्र खैलाबैला मच्चिएको छ ।
संस्थापन पक्षले ‘एकलौटी रूपमा आयोगमा उम्मेदवारको बन्दसूची बुझाएको’ भन्दै कांग्रेसभित्रको डा. शेखर कोइरालाले नेतृत्व गरेको संस्थापन इतर पक्ष असन्तुष्ट बनेको हो । सो समूहका दोस्रो तहका नेताले ‘सभापतिको एकलौटी निर्णयविरुद्ध विद्रोह गर्नेदेखि पार्टी केन्द्रीय कार्यालयमा धर्ना बस्ने’सम्मको कार्यक्रम तयारी गरेका छन् ।
सभापति शेरबहादुर देउवाले गत २ असोजमा समानुपातिकतर्फको उम्मेदवार बन्दसूची आयोगमा पठाएका थिए । सो सूचीमा आफ्ना समूहका नेतालाई कमजोर स्थान दिएको र संख्यामासमेत हेपेको भन्दै इतर पक्ष रुष्ट रहँदै आएको छ । इतर पक्षले ‘आयोगमा बुझाइएको सूची नसच्याइए पार्टीभित्र विद्रोह गर्ने’सम्मको चेतावनी दिँदै आएको छ ।
इतर पक्षको दोस्रो तहका नेताको सोमबार ठमेलमा बसेको बैठकले ‘पार्टी नेतृत्वलाई दबाब दिन’ भन्दै केन्द्रीय कार्यालयमा धर्ना बस्नेगरी कार्यक्रम तय गरेको छ ।
भेलाले ‘समान हक र न्यायका लागि नेतृत्वलाई दबाब दिन आन्दोलन घोषणा गरेको’ नेता जगदीशनरसिंह केसीले जानकारी दिए । उनका अनुसार समानुपातिक बन्दसूची सच्याएर आफ्नो समूहका नेताका नाम समावेशका लागि दबाब दिन भोलि बुधबार पार्टी केन्द्रीय कार्यालय सानेपामा धर्ना कार्यक्रम तय गरिएको हो ।
यसैगरी, बिहीबार दोस्रो तहका नेताले इतर समूहका पहिलो तहका नेतासँग छलफल गर्ने कार्यक्रम तोकिएको छ । संघीय र प्रतिनिधिसभा निर्वाचनको टिकट वितरण गर्दा ४० प्रतिशत भाग पाउनुपर्ने माग गर्दै इतर समूहका दोस्रो तहका नेताले दबाबमूलक कार्यक्रम गर्दै आएका छन् ।
उनीहरूले शुक्रबारसम्म पनि माग सुनुवाइ नभए कठोर निर्णय लिनेसमेत चेतावनी दिएका छन् । तर, ‘कठोर निर्णय कस्तो हुने ?’ भन्ने’ खुलाइएको छैन ।
इतर पक्षले सभापतिले पार्टी सञ्चालनमा एकलौटी गरेको, निर्वाचन मुखमा इतर पक्षलाई बेवास्ता गरेको र टिकट वितरण प्रक्रिया र छलफलमा पनि मनोमानी गरेको आरोप लगाउँदै आएको छ ।
सो पक्षले गत शनिबार राजधानीमा आफ्ना पक्षका नेतालाई भेला गरेर ‘आगामी निर्वाचनमा विद्रोह हुने’सम्मको चेतावनी दिएको थियो । यसअघिसमेत इतर पक्षले ‘सभापति देउवाले पार्टीका भ्रातृ तथा शुभेच्छुक संस्थाका नेतृत्वमा एकलौटी गरेको’ भन्दै आपत्ति जनाउँदै आएको थियो । राजधानी दैनिकबाट
