मकवानपुर । प्रधानमन्त्री पुष्पकमल दाहाल प्रचण्डले संघीय राजधानीबाट तराइलाई जोड्ने द्रुतमार्ग (फास्टट्रयाक) को निरीक्षण गरेका छन् ।
प्रम दाहालले ३ मन्त्रीसहित द्रुतमार्गको निरीक्षण गरेका हुन्। संघीय राजधानीबाट तराइलाई जोड्ने फास्टट्रयाक निर्माण स्थलको अवलोकनका क्रममा प्रम दाहालले कामको रफ्तार बढाउन निर्देशन दिएका छन् । निरीक्षणका क्रममा बोल्दै प्रचण्डले दु्रतमार्ग निर्माणको काम सन्तोषजनक भएको बताए ।
काठमाडौबाट मकवानपुरको बुदुनेमा नेपाली सेनाको हेलीकोप्टर मार्फत आईपुगेका प्रचण्डले दु्रतमार्गको काम सन्तोषजनक भएको बताए । प्रधानमन्त्री पुष्पकमल दाहाल प्रचण्ड सहित दु्रतमार्गको निरीक्षणका लागि उपप्रधान तथा रक्षा मन्त्री पुर्ण बहादुर खडका, अर्थ मन्त्री प्रकाश शरण महत र भौतिक पूर्वाधार मन्त्री प्रकाश ज्वला सहितको टोलीले निरीक्षण गरेको हो ।

यता बागमती प्रदेशका मुख्यमन्त्री शालिकराम जम्मकट्टेल, भौतिक पूर्वाधार बिकास मन्त्री युवराज दुलाल, सामाजिक विकास मन्त्री कुमारी मुक्तान पनि दु्रतमार्ग निरिक्षण कार्यक्रममा पुगेका थिए ।
नेपाली सेनाको हेलिकोप्टर मार्फत आएका दाहालले आज भीमफेदी गाउँपालिका–८ महादेवटारमा फाष्ट ट्रयाक अन्तरर्गत बनिरहेको सुरुङ मार्ग, मकवानपुरगढी गाउँपालिका वडा नम्बर–१ मा निर्माण भइरहेको सुरुङ मार्ग र बकैया–५ पावस र रानीवन खर्कटेमा बकैया खोलामाथिको निर्माण कार्य भइरहेको पुलको स्थलगत अनुगमन गरे ।
अनुगमनका क्रममा नेपाली सेनाका प्रधान सेनापति प्रभुराम शर्मा, मकवानपुरका प्रजिअ राजेन्द्रदेव पाण्डे, बागमती प्रदेश प्रहरी प्रमुख डिआइजी किरण राणा, सुरक्षानिकायका प्रमुखहरुको सहभागिता रहेको थियो।
राष्ट्रिय योजना अन्तरगतको फास्ट ट्रयाक २०७४ बैशाख २१ देखि नेपाली सेनाको जिम्मेवारीमा निर्माण भैरहेको छ ।
मकवानपुर । गैसस मकवानपुरले नववर्ष २०८० को अवसरमा शुभकामना आदनप्रदान तथा परिचयात्मक कार्यक्रम गरेको छ ।
कार्यक्रममा जिल्ला समन्वय समिती मकवानपुर प्रमुख ललित घलालनले मकवानपुर जिल्लामा गैससहरूको सहकार्य अन्त्यन्तै प्रभावकारी रहेको बताए ।
गैरसरकारी संघसंस्थाहरूको योगदान समाजिक विकासमा महत्वपुण रहेको गैसस मकवानपुर पुर्व अध्यक्ष तथा नेकपा एकीकृत समाजवादी नेतृ मुनु सिग्देलले बताइन् । गैससहरूले सामाजिक सचेतना अभिवृद्धि संगै सबैखाले बिकासमा महत्त्वपूर्ण भूमिका खेलेको उनले बताइन् ।
कोरोना महामारीको समयमा व्यक्ति बचाउका लागि होस् वा शैक्षिक अभियानहरूमा गैससहरूको सहकार्य सकारात्मक भएको सहभागीहरूले बताए ।
स्थानीय जनप्रतिनिधिहरूसंग शुभकामना आदनप्रदानसंगै परिचयात्मक कार्यक्रमले गैससकर्मीहरूलाई आगामी दिनमा कार्यक्षेत्रमा सहजता होस् भनेर कार्यक्रम गरिएको गैसस मकवानपुर उपाध्यक्ष कुमारी वाईबाले बताइन् ।

मकवानपुर रिकभरीङ समूहको व्यवस्थापनमा कार्यक्रम गरिएको हो । कार्यक्रममा जिल्ला बार एशोसियन अध्यक्ष अप्सरा बस्नेत, राप्रपाका नेता सिताराम बर्तौला, भूमी आयोगका जिल्ला अध्यक्ष बिष्णु दाहाल, हेटौंडा उपमहानगरपालिका १ का वडा अध्यक्ष तथा नगरपालिकाका प्रवक्ता सबिन न्यौपाने, वडा २ का अध्यक्ष बिष्णुगोपाल श्रेष्ठ, जिल्लाका गैरसरकारी संस्थाहरूका प्रमुख तथा प्रतिनिधिहरूको उपस्थिति रहेको थियो ।
कार्यक्रम गैसस मकवानपुर अध्यक्ष रमिला सापकोटाको अध्यक्षतामा भएको थियो । स्थानीय क्षेत्रमा विकास तथा समृद्धिको लागि गैससहरूको समन्वय र सहजीकरण सधैं रहने अध्यक्ष सापकोटाले बताइन् ।
मकवानपुर । हेटौंडामा भएको मोहन श्रेष्ठ स्मृति ८ ए साइड भेट्रान्स कप फुटबलको विजेता खेलाडीलाई हेटौंडा-७ नम्बर वडा कार्यालयले सम्मान गरेको छ।
२०७९ साल फागुन २७ गतेबाट चैत १ गतेसम्म हेटौंडा-९ स्थित औद्योगिक क्षेत्रको खेलमैदानमा सञ्चालित वडा स्तरीय भेट्रान्स कप फुटबलको विजेता खेलाडीलाई हेटौंडा-७ नम्बर वडा कार्यालयले सम्मान गरेको हो।
हेटौंडा-७ वडा कार्यालयमा आयोजित कार्यक्रममा कप विजेता खेलाडीलाई ७ नम्बर वडाअध्यक्ष दामोदर गौतमले सम्मान पत्र सहित सम्मान गरेका थिए ।
सम्मान कार्यक्रममा ७ नम्बर वडा सदस्य सन्तुमाया पाख्रिन, राधिका विक,श्यामसुन्दर परियार,दिनेश थापामगर, भेट्रान्स प्रशिक्षक सोम बहादुर तितुङ,जिल्ला फुटबल संघ मकवानपुर सदस्य कृष्ण केसी, वडा सचिव प्रशान्त श्रेष्ठ लगायतको उपस्थिती रहेको थियो।
प्रधानमन्त्री पुष्पकमल दाहाल ‘प्रचण्ड’लाई मन्त्रिपरिषद् पूर्णता दिन सकस परेको छ । सत्तारूढ नेपाली कांग्रेसको आन्तरिक विवादका कारणले मन्त्रिपरिषद्लाई पूर्णता दिन ढिलाइ भइरहेको छ । प्रधानमन्त्री प्रचण्डले आइतबार आठौंपटक मन्त्रिपरिषद् विस्तार गर्दासमेत सरकारले पूर्णता पाउन सकेन् ।
आठौंपटकमा पनि अपूर्ण
१० पुसमा प्रधानमन्त्री बनेका प्रचण्डले १७ चैतमा सातौंपटक मन्त्रिपरिषद् विस्तार गरेका थिए । त्यतिबेला पाँचवटा मन्त्रालय प्रधानमन्त्री प्रचण्ड आफैंले सम्हालेका थिए । जनमत पार्टीबाट मन्त्री रहेका अब्दुल खानले मन्त्रालय बाँडफाँटमा असन्तुष्टि जनाउँदै खानेपानी मन्त्रीबाट राजीनामा दिएपछि सो मन्त्रालयसमेत प्रधानमन्त्री प्रचण्डले लिएका थिए । खानेपानी मन्त्रालय कांग्रेसलाई दिने आन्तरिक सहमति शीर्ष नेताबीच छ ।
सत्ता साझेदार कांग्रेस, जनता समाजवादी पार्टी नेपाल (जसपा)भित्रको आन्तरिक समस्याका कारण प्रधानमन्त्री प्रचण्ड ‘किस्ताबन्दी’मा मन्त्रिपरिषद् विस्तार गर्न बाध्य छन् । ‘यो बीचमा कहिले सत्तासाझेदार दल परिवर्तन हुने र नयाँ गठबन्धन बन्ने र सहकार्य गरेका दलहरूले मन्त्री हुनेको नामावली नदिँदा मन्त्रिपरिषद्लाई पूर्णता दिनमा ढिलाइ भयो । अब उपनिर्वाचनपछि मात्रै सरकारले पूर्णता पाउँछ’ प्रधानमन्त्री प्रचण्डनिकटका एक नेताले भने ।
स्वास्थ्य तथा जनसंख्या, कानुन, न्याय तथा संसदीय मामिला, खानेपानी, वन तथा वातावरण र युवा तथा खेलकुद मन्त्रालय मन्त्रीविहीन छन् । ती मन्त्रालयको कार्यभार महिनौंदेखि प्रधानमन्त्री प्र्र्र्र्र्र्र्र्र्र्रचण्डले नै लिएका छन् ।
- नेपाली कांग्रेसभित्रको गुटबन्दीले मन्त्रिपरिषद् पूर्णतामा ढिलाइ
- उपनिर्वाचनपश्चात् मन्त्रिपरिषद्ले पूर्णता पाउने
- उपनिर्वाचनमा विजयी भएपछि उपेन्द्र आफैं मन्त्री बन्न पार्टीबाट अर्को नेताको सिफारिस गरेनन्
- कांग्रेस केन्द्रीय सदस्य एनपी साउद परराष्ट्रमन्त्री
- एकीकृत समाजवादीकी नन्दा चपाईं भौतिक पूर्वाधार तथा यातायात राज्यमन्त्री
पार्टीभित्रको आन्तरिक विवादलाई थाती राख्दै कांग्रेसले केन्द्रीय सदस्य एनपी साउदलाई परराष्ट्रमन्त्रीका लागि सिफारिस ग¥यो । आइतबार नै साउदले पद तथा गोपनीयताको शपथ लिएका छन् । सत्तारूढ गठबन्धनमा भएको सहमतिअनुसार कांग्रेसले अझै तीन र जसपाले एक मन्त्रीका लागि नाम सिफारिस गर्नुपर्नेछ । तर, कांग्रेसभित्र भागबन्डामा किचलो भएपछि मन्त्रिपरिषद्मा ढिलाइ भएको हो ।
जसपाले वरिष्ठ नेता अशोक राईलाई मन्त्रीका लागि सिफारिस ग¥यो । तर, उसको भागमा परेको एक मन्त्रीको नाम अझै सिफारिस गरेको छैन । बारा २ मा उपनिर्वाचन भइरहेको छ ।
राष्ट्रपति निर्वाचनसँगै बनेको नयाँ सत्ता गठबन्धनमा मन्त्रालय बाँडफाँट भएको तीन साता बित्न लाग्दा पनि दलहरूले मन्त्रीको नाम नदिएपछि प्रधानमन्त्री प्रचण्डले मन्त्रिपरिषद्लाई पूर्णता दिन नसकेका हुन् । ‘कांग्रेसमा आन्तरिक रूपमा सहमति भइसकेको छैन । चुनावको मुखमा मन्त्री छान्दा त्यसले चुनावलाई पनि असर गर्ने हुन सक्छ । त्यसैले अब उपचुनावपछि मात्रै मन्त्रीहरूलाई शपथ गराउने तयारी छ,’ कांग्रेसका एक नेताले भने ।
आगामी आइतबार बारा २, चितवन २, र तनहुँ १ मा उपनिर्वाचन हुँदै छ । कांग्रेसका शीर्ष नेता नै उपनिर्वाचनका लागि ती क्षेत्रमा केन्द्रित भएका छन् । बारा २ मा जसपा र चितवन तथा तनहुँमा कांग्रेसले गठबन्धनबाट निर्वाचनमा होमिएको छ ।
१५ चैतमा सत्ता गठबन्धनमा कांग्रेसले ८, माओवादी केन्द्र ५, जसपा र नेपाल कम्युनिस्ट पार्टी (एकीकृत समाजवादी) २÷२, जनमत, लोकतान्त्रिक समाजवादी पार्टी नेपाल (लोसपा), नागरिक उन्मुक्ति पार्टी र नेपाल समाजवादी पार्टीबाट १÷१ जना मन्त्री बन्ने सहमति भएको थियो ।
मन्त्रिपरिषदलाई पूर्णता दिने र उपनिर्वाचन’ सम्बन्धमा शनिबार प्रधानमन्त्री प्रचण्डले सत्तारूढका प्रमुख दलका शीर्ष नेतासँग शनिबार प्रधानमन्त्री निवास बालुवाटारमा छलफल गरेका थिए । सो छलफलमा एकीकृत समाजवादीकाले थप एक राज्यमन्त्री पाउने सहमति भएको थियो ।
सोही सहमतिअनुसार एकीकृत समाजवादीकी नन्दा चापाईं भौतिक पूर्वाधार तथा यातायात राज्यमन्त्री बनेकी छन् । उनलाई प्रधानमन्त्री प्रचण्डले आइतबार नै परराष्ट्रमन्त्री एनपी साउदसँगै नियुक्त गरेका हुन् । चपाईं एकीकृत समाजवादीका तर्फबाट राष्ट्रिय सभा सदस्य हुन् ।
एकीकृत समाजवादीले प्रचण्ड नेतृत्वको सरकारमा दुई मन्त्रालय पाएको छ । एकीकृत समाजवादीका उपाध्यक्षसमेत रहेका डा. वेदुराम भुषाल कृषिमन्त्री र उपमहासचिव प्रकाश ज्वाला भौतिकमन्त्री छन् ।
शीर्ष नेताहरूको छलफलका क्रममा प्रधानमन्त्री प्रचण्डले कांग्रेस सभापति शेरबहादुर देउवासँग मन्त्री हुनेको नामावली छिटो दिन आग्रह गरेका थिए । तर, अब उपनिर्वाचनपश्चात् नै नामावली टुंगो लगाउने र मन्त्रिपरिषद्लाई पूर्णता दिने सहमति शीर्ष नेताबीच भएको छ । राजधानी दैनिकबाट
मकवानपुर । आइतबार हेटौंडामा भएको ‘हेटौंडा रन’ प्रतियोगिताको उपाधि हेटौंडा–१४, बनेलधापका उमेश गोङ्बाले जितेका छन् । नयाँ बर्षको अवसर पारेर उपमहानगरपालिकाले आयोजना गरेको ५ किलोमिटरको निर्धारित दुरी गोङ्वाले २० मिनेट ४ सेकेन्डमा पुरा गर्दै उपाधि हात पारेका हुन् ।
प्रतियोगितामा सहभागी सोमप्रसाद न्यौपाने प्रथम भए पनि उनि जिल्ला बाहिरको भन्ने पुष्टि भएपछि दोस्रो स्थानमा रहेका गोङ्बा स्वतः प्रथम घोषित भएका हुन् । न्यौपानेले निर्धारित दुरी १९ मिनेट ५५ सेकेन्डमा पार गरेका थिए । प्रतियोगितामा जिल्ला बाहिका खेलाडीले सहभागीता जनाउँन नपाउँने नियमका कारण प्रथम भएका न्यौपाने प्रतियोगिताबाट बाहिरिएका थिए ।
न्यौपाने बाहिरिएपछि भाग्यमानी सावित भएका गोङ्बाले उपाधिसँगै नगद ५० हजार रुपैयाँ पुरस्कार प्राप्त गरेका छन् । यस्तै प्रतियोगितामा सञ्जिव मिजार द्वितिय र सनिस लामा तृतीय भएका छन् । मिजारले निर्धारित दुरी २० मिनेट १० सेकेन्डमा र लामाले २० मिनेट १८ सेकेन्डमा पार गरेका हुन् । उनीहरुले क्रमशः ३० हजार र २० हजार रुपैयाँ प्राप्त गरेका छन् ।यसैगरी प्रतियोगितामा सान्त्वना भएका सुमन आले मगर र निशान श्रेष्ठले १०/१० हजार नगद पुरस्कार पाएका छन् ।

प्रतियोगिताका विजेता तथा उपविजेतहरुलाई हेटौंडा उपमहानगरपालिकाकी प्रमुख मीना कुमारी लामा र उपप्रमुख राजेश बानियाँले पुरस्कार वितरण गरेका थिए । ५६ जनाको सहभागिता रहेको प्रतियोगिता हेटौंडाको बुद्धचोकबाट सुरु भइ कान्तिराजपथको सानोपोखरा, पिप्ले हुँदै पुनः बुद्धचोकमा आएर समापन भएको थियो ।
