मकवानपुर । मकवानपुरको कैलाश गाउँपालिकामा वर्थिङ सेन्टर तथा भिडियो एक्सरे सहितको स्वाथ्य सेवा संचालनमा आएको छ । पालिकाकाे वडा नम्बर ७ स्थित स्वास्थ्य चौकीमा वर्थिङ सेन्टर तथा भिडियो एक्सरे सहितको स्वाथ्य सेवा संचालनमा आएकाे हाे ।
भौगोलिक विकटताको कारण सहज र सुलव स्वास्थ्य सेवाको पहुँचबाट बञ्चित कैलाशका स्थानीयलाई वर्थिङ सेन्टर तथा भिडियो एक्सरे सहितको स्वाथ्य सेवा सैचालनमा आएसंगै उपचारमा सहज हुने भएकाे छ । बुधबारबाट कैलाशमा भिडियो एक्सरे सहित गर्भावस्था जाँच तथा वर्थिङ सेन्टर कार्यको सुरुवात गरिएकाे छ ।
बुधबार एक कार्यक्रमका बिच गाँउपालिका अध्यक्ष लोक बहादुर मोक्तानले एक्सरे सहित गर्भावस्था जाँच तथा वर्थिङ सेन्टरको उद्घाटन गरेका हुन् । पालिकामा रहेको ङको स्वास्थ्य चौकीमा गर्भवतीसँग पालिका प्रमुख कार्यक्रम अन्तरगत पहिलो कार्यक्रमको सुरुवात गरिएको अध्यक्ष माेक्तानले बताए । कैलाश गाउँपालिका चेपाङ र तामाङ समूदायको बाहुल्यता रहेकोले पनि नियमित गर्भवती परीक्षण नगर्ने भएकाले स्वास्थ्य चौकीमै विशेषज्ञका साथ भिडियो एक्सरे सेवा सुरु गरिएको वडा ७ का वडा अध्यक्ष उदास भ्लोनले बताए ।
वर्थिङ सेन्टरबाट बुधबार ४० जना गर्भवती महिलाले परीक्षण सुविधा लिएकाे वडाध्यक्ष भ्लोनले जानकारी दिए । विदुर भण्डारीसहितकाे स्वास्थ्य टोलीले गर्भवती महिलाकाे स्वास्थ्य परीक्षण गरेका थिए । गाउँपालिकाले वार्षिक कार्यक्रमै समेटिएर कार्यक्रम पालिका अध्यक्ष मोक्तानले जानकारी दिए । पालिकाका प्रत्येक गर्भवती महिलाले सुरक्षित गर्भावस्था जाँच सेवा प्रदान गर्ने र हेटौंडा अस्पतालका डाक्टर विदुर भण्डारीसँगको सहकार्यमा महिनाको दुई पटक गाउँपालिकामा उक्त सेवा दिने अध्यक्ष मोक्तानले बताए ।
त्यसैगरी गाउँपालिकाका स्वास्थ्य संयोजक कृष्णकुमार यादवले स्त्री रोग विशेषज्ञले स्वास्थ्य चौकीबाटनै सेवा प्रदान गर्ने बताए । यादवले पालिकामा वडा नम्बर २,३,५,८,९ मा यस अघिनै वर्थिङ सेन्टर सञ्चालन भइसकेको बताए । कार्यक्रममा पालिका उपाध्यक्ष बालकुमार मल्ल ठकुरी, डाक्टर विदुर भण्डारी, स्वास्थ्य संयोजक कृष्ण कुमार यादव लगायतको उपस्थिति रहेको थियो ।
मकवानपुर । मकवानपुरको कैलाश गाउँपालिकामा आँखा शिविर भएकाे छ । निःशुल्क भएकाे शिविरमा १ सय ११ जनाको आँखा जाच गरिएको छ । कैलाश गाउँपालिका–५, गोगने स्वास्थ्य चौकीमा भएको शिविरमा महिला ५१ र पुरुष ६० जनाको आँखा जाज गरिएको हाे ।
हेटौँडा सामुदायिक आँखा अस्पताल, तिलगंगा सामुदायिक आँखा केन्द्र र कैलाश गाउँपालिकाको आयोजनामा भएको आँखा शिविरमा ११ जनाको आँखामा मोतिविन्दुको समस्या देखिएको छ । निःशुल्क आँखा शिविरमा हेटौँडा सामुदायिक आँखा अस्पतालको प्राविधिक सहयोग रहेको थियाे । मोतिविन्दु देखिएका बिरामीहरुको बिहीबार तिलगंगा सामुदायिक आँखा केन्द्र पालुङमा निःशुल्क शल्यक्रिया गरिने बताइएकाे छ ।
शिविरमा कैलाश गाउँपालिका अध्यक्ष लोकबहादुर मोक्तानको प्रमुख आतिथ्य तथा कैलाश गाउँपालिका ५ का वडा अध्यक्ष छेकु लामाको अध्यक्षता भएकाे थियो ।
मकवानपुर । हेटौंडा अस्पतालमा मानसिक रोगबाट प्रभावितकाे लागि मनाेचिकत्सा वार्ड सञ्चालनमा आएको छ । मदन भण्डारी स्वास्थ्य विज्ञान प्रतिष्ठानद्वारा सञ्चालित हेटौंडा अस्पतालले मानसिक रोगबाट प्रभावित बिरामीहरुलाई लक्षित गरी २५ बेडकाे मनोचिकित्सा वार्ड सञ्चालन गरिएको हो ।
मनाेचिकित्सा वार्डको बागमती प्रदेशका स्वास्थ्य मन्त्री उत्तम जोशीले उद्घाटन गरेका छन् । ‘हेटौडा अस्पातललाई प्रदेशकै उत्कृष्ट अस्पतालका रुपमा विकास गरिनेछ’ उद्घाटन पछि मन्त्री जोशीले भने ‘मानसिक स्वास्थ्यका कारण आत्म हत्या बढेकाले यसको न्यूनीकरणका लागि उपचार सेवा थप गर्नुपरेको हाे ।’ प्रतिष्ठानका उपकुलपति विश्वराज जोशीले अस्पतालमा मानसिक स्वास्थ्यको उपचार थप गरिएकाे छ, अन्य सेवा पनि थप गर्ने योजनामा अस्पताल प्रशासनले काम गरिरहेकाे जानकारी दिए ।
मनाेचिकित्सा वार्ड संचालनमा आएपछि महगो मुल्यमा निजी स्वास्थ्य संस्थामा उपचार गर्नुपर्ने समस्या हट्ने बताइएकाे छ । प्रतिष्ठानका रजिष्टार राजेश प्रसाईले यसअघि ओपीडीबाटै मानसीक समस्या भएका बिरामी उपचार गरिदै आएकोमा वार्ड संचालन पछि उपचार गर्न सहज हुने बताए ।
अस्पतालको पुरानो भवनमा महिला र पुरुषलाई छुट्टाछुट्टै २५ शय्या क्षमताको मनोचिकित्सा वार्ड सञ्चालनमा आएसंगै मकवानपुरसँगै आसपासका बिरामीलाई सहज हुने भएको छ । गत असारबाट हेटौंडा अस्पतालमा एक जना मनोरोग विशेषज्ञ नियुक्त भइ ओपीडी मार्फत् सेवा प्रवाह गर्दै आएको अस्पताल प्रशासनले जनाएकाे छ । हाल सेवा विस्तार गरी आकस्मिक र बिरामी भर्ना सेवासमेत सञ्चालन सुरु भएको हो । वार्ड सञ्चालनका लागि एक जना विशेषज्ञ चिकिकित्सक नियुक्त भइसकेको र थप एक जना विशेषज्ञ चिकित्सकका लागि आवेदन खुला गरिएको छ । अस्पताल व्यवस्थापन समितिबाट ५ लाख रुपैयाँ खर्च गर्ने योजना अनुसार व्यवस्थापकीय काम भइरहेको प्रसाईले बताए ।
प्रतिष्ठानमा हाल पढाइ भइरहेकेा विषयका साथै चालु आर्थिक वर्षबाट एमडी साइक्याट्रिक वा मानसिक रोग विशेषज्ञकाे लागि शैक्षिक कार्यक्रम सञ्चालनको तयारी भइरहेको छ । आगामी आर्थिक वर्षदेखि हेटौंडा अस्पतालमा ३ जना मनोचिकित्सक नियुक्त गरी मकवानपुरका विभिन्न पालिकामा शिविरका रुपमा मनोचिकित्सा सेवा प्रवाह गर्ने योजना रहेको प्रसाइ बताउँछन्।
प्रतिष्ठानको प्राविधिक सहयोगमा हेटौंडामा रहेको मानव सेवा आश्रममा ३० शय्या क्षमताको मानसिक स्वास्थ्य पुनर्स्थापना केन्द्र स्थापनाको तयारी समेत भइरहेको छ । अस्पतालले मानसिक स्वास्थ्य उपचारका लागि २ बजेदेखि ५ बजेसम्म विस्तारित ओपीडी सेवा संचालन गर्ने जनाएको छ ।
मकवानपुर । बागमती प्रदेश प्रमुख यादवचन्द्र शर्मा समक्ष अख्तियार दुरुपयोग अनुसन्धान आयोग, हेटौँडा कार्यालयले आर्थिक वर्ष २०७९/०८० को प्रतिवेदन पेश गरेको छ । अख्तियार हेटाैडा कार्यालयले ३३ औं वार्षिक प्रतिवेदन बुधबार प्रदेश प्रमुख समक्ष पेश गरेकाे हाे ।
आयोगको हेटौँडा कार्यालय प्रमुख नरहरि घिमिरेले नेपालको संविधानको धारा २९४ को उपधारा ३ बमोजिम आयोगले तयार गरेको वार्षिक प्रतिवेदन प्रदेश प्रमुख शर्मालाई पेश गरेको प्रदेश प्रमुख कार्यालयका प्रवक्ता गाेविन्द प्रसाद पौडेलले जानकारी दिए ।
अख्तियारकाे वार्षिक प्रतिवेदन बुझेपछि प्रदेश प्रमुख शर्माले आयोगको सक्रियताले बागमती प्रदेशमा भ्रष्टाचार न्यूनीकरणमा महत्त्वपूर्ण भूमिका खेलको बताए । अख्तियार हेटौडा कार्यालय प्रमुख घिमिरेले आयोगले सम्पादन गरेको प्रदेश भित्रका विषयवस्तु समेटिएको वार्षिक प्रतिवेदनको सार संक्षेप प्रस्तुति गरेका थिए ।
प्रतिवेदन अनुसार बागमती प्रदेशका स्थानीय तहहरूमा गत आर्थिक वर्षमा मात्र १ हजार ४ सय ४२ उजुरीहरू प्राप्त भएको छ । अघिल्लो आर्थिक वर्षबाट जिम्मेवारी सरेका ३ सय ३५ उजुरी सहित कार्यालयलाई स्थानीय तहका कुल १ हजार ७ सय ७७ उजुरी मध्ये आर्थिक वर्ष २०७९।०८० मा १ हजार १ सय ७१ उजुरी फर्छ्यौट गरिएको छ ।
त्यस्तै बागमती प्रदेशका कार्यालयमा ४ सय ७७ उजुरी गत आर्थिक वर्षमा दर्ता भएकाे थियाे भने अघिल्लो आर्थिक वर्षबाट ७२ वटा उजुरी जिम्मेवारी सरेर आएको थियो । जसमध्ये कार्यालयले ३ सय ५ वटा उजुरी फर्छ्यौट गरेको छ । संघीय सरकारी निकाय विरुद्ध ३ हजार ४ सय ४१ उजुरी प्राप्त भएको प्रतिवेदनमा उल्लेख छ । संघीय निकायहरू विरुद्धको १ हजार ४० सहित गत आर्थिक वर्षमा कुल ४ हजार ४ सय ८१ वटा उजुरीहरू प्राप्त भएको थियो । जसमध्ये २ हजार ८ सय ९० उजुरी फर्छ्यौट गरिएको आयाेगले बुझाएकाे प्रतिवेदनमा उल्लेख गरिएकाे छ ।
कार्यालयमा प्राप्त कुल २ हजार ३ सय २६ उजुरीमध्ये १ हजार ४ सय ४६ उजुरी प्रारम्भिक छानबिनबाट फर्छ्यौट भएका छन् । यस्तै १ सय ११ वटा उजुरी उपर विस्तृत अनुसन्धान गर्ने निर्णय भएकाे प्रतिवेदनमा छ । ६ सय १३ उजुरी तामेली, ३ सय ५८ उजुरी एकीकरण गरिएको छ । प्रतिवेदन अनुसार १ सय ३१ उजुरी आयोगको केन्द्रिय कार्यालयकाे सम्बन्धित महाशाखामा पठाइएको र २ सय ३३ उजुरी उपर कानून बमोजिम आवश्यक कारबाहीका लागि विभिन्न निकायमा पठाइएकाे छ ।
मकवानपुर । प्रदेश युवा परिषद, बागमती प्रदेशको आयोजना एवम् साहित्य सङ्गम मकवानपुरको सहकार्यमा आयाेजना गिरने राष्ट्रिय खुला कविता प्रतियोगिताका लागि उत्कृष्ट २० कविता छनौट गरिएकाे छ । उत्कृष्ट २० कविताका साथै कविहरुकाे समेत नामावली सार्वजनिक गरिएको हाे ।
आश्विन ८ गते प्रकाशित सूचनाबमोजिम प्राप्त कवितामध्ये चितवन, सिरहा, स्याङ्जा, रसुवा, नुवाकोट, दैलेख, भक्तपुर, तनहुँ, काठमाण्डौं, धादिङ, रौतहट, उदयपुर, सुनसरी र सिन्धुपाल्चोकका १/१, गोरखाका २ र मकवानपुरका ४ कविहरूका कविता छनौट चरणमा परेका प्रदेश युवा परिषद्का कार्यालय प्रमुख शारदा कुमारी मैनालीले जारी गरेकाे सूचनामा उल्लेख छ ।
उत्कृष्ट २० मा पर्न सफल कविहरूबीच असोज २७ गते शनिबार प्रतिस्पर्धा गराइनेछ । रोयल पार्टी प्यालेस हेटौंडा ४ मा हुने प्रतियाेगितामा प्रथम हुने कविले ४० हजार, द्वितीय हुनेले ३० हजार, तृतीय हुनेले २० हजार र सान्त्वना हुनेले १० हजार पुरस्कार प्राप्त गर्ने आयोजकले जनाएकाे छ । प्रतियोगितामा कवि स्वयम् उपस्थित भई कविता वाचन गर्नुपर्ने बताइएकाे छ ।
यसैगरी कविता वाचनकाे अवसरमा ‘नयाँ पुस्तामा कविता क्रेज’ विषयक बहस कार्यक्रम गरिने भएकाे छ । यसका साथै कवि विप्लव प्रतीकको एकल कविता वाचन सत्र समेत हुने साहित्य संगम मकवानपुर अध्यक्ष डीबी बर्तौलाले बताए । उनका अनुसार मकवानपुरका स्रस्टालगायतका पुस्तकहरू समेत प्रदर्शनीमा राखिने छ ।
