मकवानपुर । मकवानपुरको हेटौंडा उपमहानगरपालिकाको कार्यपालिका बैठक प्रत्यक्ष प्रसारण गर्न राष्ट्रिय स्वतन्त्र पार्टी बागमती प्रदेश द्रुत कार्य टोलि(र्याट)ले नगर प्रमुख(मेयर) मिना कुमारी लामाको ध्यानाकर्षण गराएको छ ।
आईतबार र्याट बागमती प्रदेश संयोजक महेन्द्र श्रेष्ठसहितको समुहले नगर प्रमुख लामालाई कार्यपालिका बैठक नियमति रुपमा प्रत्यक्ष प्रसारण गर्न ध्यानाकर्षण गराएको हो ।
‘कार्यपालिका बैठक कहिले प्रत्यक्ष प्रसारण गर्ने,कहिले नगर्ने, कहिले निर्णय सार्वजानिक गर्ने कहिले नगर्ने कहिले आधा सार्वजनिक गर्ने । हामी पारदर्शीता चाहन्छौ तसर्थ बैठकको नियमित प्रत्यक्ष प्रसारण साथै निर्णयहरुको पूर्ण लिखित विवरणसहित सार्वजनिक गर्न माग गर्दछौं’ ध्यानाकर्षण पत्रमा भनिएको छ ।
साथै समुहले उपमहानगरको संरक्षणमा राखिएको ४८ मध्य आधा भन्दा धेरै सिसि क्यामरा हालको अवस्थामा संचालन नरहेको भन्दै जनताको सुरक्षासँग जोडिएको विषयमासमेत नगरको ध्यान नगएको भन्दै आपत्ति जनाएको छ । क्यामरा नभएको र भएका पनि सञ्चालनमा नआएकोले कुनै पनि दुर्घटना,चोरीलगायतको घटना हुँदा असहज पुगेको भन्दै जनता र सरकारी क्षेत्रकोसमेत सुरक्षालाई ध्यानमा राखेर यथाशीघ्र मर्मत तथा नयाँ जडान गर्न सुझाव दिएको र्याट बागमती प्रदेश संयोजक श्रेष्ठले जानकारी दिए ।
त्यसैगरि हेटौंडाको मुख्य बजार क्षेत्रका फुथपाथमा समेत जथाभाबी पार्किङ तथा व्यवसाय हुँदा सर्वसाधरणलाई आवगमणमा असर पुगेको भन्दै नगर प्रमुखको ध्यानाकर्षण गराइएको प्रमुख श्रेष्ठले बताए ।
ध्यानाकर्षण पत्र बुझेपछि नगर प्रमुख लामाले र्याटले बुझाएको ध्यानाकर्षण ठिक भएको प्रतिक्रिया दिदै छिटोभन्दा छिटो एक्सनमा लैजाने बताइन् । सीसीटीभीको सम्बन्धमा बजेट ब्यवस्थापन गरेर थप क्यामेरा जडानको तयारीमा लागेको जानकारी दिइन् । पहिले राखिएका सीसीटीभी कमसल रहेको सन्दर्भमा उनले बिनियोजन भएको मध्येबाट खरिद भएकोले त्यस्तो हुन सक्ने भन्दै अब सीसीटीभी जडान गर्दा एडभान्स राख्नु पर्ने अनुभव भएको बताइन् ।
टोलीमा प्रदेश र्याट सदस्य राजकुमार घिमिरे, पार्टी जिल्ला जिल्ला सचिवालय सचीव भुवन खनाल, हेटौंडा उपमहानगरपालिका संगठन विभाग प्रमुख बिशालराज महत, उपमहानगरपालिका र्याट विभाग प्रमुख दामोदर दाहाल लगायतको उपस्थिति रहेको थियो ।
‘महिला शसक्तिकरणमा भएको लगानीको समीक्षा हुनु पर्छ’ मन्त्री मुक्तान
Tags: No Comments
मकवानपुर । बागमती प्रदेशको राजधानी हेटौंडामा प्रदेश स्तरीय महिला उद्यमी सम्मेलन सुरु भएको छ । सोमबारबाट सुरु सम्मेलनको सामाजिक विकास मन्त्री कुमारी मुक्तानले उद्घाटन गरेकी छिन् ।
सम्मेलनको उद्घाटन गर्दै मन्त्री मुक्तानले ‘महिला शसक्तिकरणको क्षेत्रमा भएकाे लगानीको समीक्षा हुनु पर्ने बताइन् । ‘महिला उद्यमशीलता क्षेत्रमा स्थानीय, प्रदेश तथा संघीय सरकारले लगानी गरेका छन्’ मन्त्री मुक्तानले भनिन् ‘महिला शसक्तिकरणकाे कार्यमा लगानी भएकाे छ तर व्यवस्थित भयाे भएन समीक्षा हुन जरुरी छ ।’
समाजले महिलालाई साेच्ने र बुझ्ने तरिका फरक छ त्याे सबै साेचलाई जितेर अघि बढ्नु परेकाे उनले बताइन् । महिलाले घर भन्दा बाहिर निक्लदा नेपाली समाजले अझै नकारात्मक सोच्ने प्रवृत्ति छ संस्कृति अझ पनि समाजमा रहेको उनको धारणा रहेको थियो । ‘पारिवारिक, सामाजिक संस्कार सबैलाई जितेर सीप सिक्दै अगाडि बढनु पर्ने अवस्था रहेकाे छ’ उनले भनिन् ‘महिलालाई उद्यमी बन्न पैतृक सम्पत्ति र अन्य आर्थिक स्राेत नहुदा थप संघर्ष गर्नु पर्छ ।’ सरकारले दिएकाे अनुदानलाई व्यवस्थापन गर्न गारो भएको महिला उधमीकाे गुनासाेलाई सामान्यिकरणका लागि अभिमुखीकरण आवश्यक रहेकाे मन्त्री मुक्तानले बताइन् ।
उद्यमशीलतासंग सम्बन्धित सबै महिला सिपमा दक्ष हुनुपर्ने उनले बताइन् । उनले महिला दक्ष भए स्थानिय स्राेत साधनलाई प्राथमिकता दिने र बजारीकरणमा ध्यान दिइने गरेको बताइन् । ‘महिलाले संचालन कुनै पनि उघममा बेइमानी छैन’ उनले भनिन् ‘महिला संचालक भएको सहकारीले ठगेर हिडेकाे सुनिन्न ।’ हामीलाई हार्न छुट नभएको उनको भनाई थियो ।
सम्मेलनमा बागमती प्रदेशका १३ वटै जिल्लाका २८ उद्योग बाणिज्य संघका उधमी महिलाहरुकाे हातले बनाएका विभिन्न सामाग्री सहित सहभागिता रहेकाे छ ।
नेपाल उद्योग वाणिज्य महासंघ बागमती प्रदेश समितिकाे संयाेजन तथा बागमती प्रदेश महिला उद्यमी विकास समिमि, उद्योग, वाणिज्य भूमि तथा प्रशासन मन्त्रालय,उद्योग वाणिज्य तथा उपभोक्ता हित संघ निर्देशनालय हेटौंडाकाे आयाेजनामा सम्मेलन भएको हो।
सामाजिक विकास मन्त्री कुमारी मुक्तानकाे प्रमुख आतिथ्यता तथा नेपाल उधाेग वाणिज्य महासंघ बागमती प्रदेश सचिव राजेन्द्र कुमार केसीकाे सभाध्यक्षता भएको उद्घाटनमा उद्योग वाणिज्य महासंघ बागमती प्रदेश अध्यक्ष दिलसुन्दर श्रेष्ठ, महिला उद्यमी समिति बागमती कार्यकारी सदस्य गिता अमात्य, कार्यक्रम संयाेजक मेनुका श्रेष्ठ लगायतको उपस्थिति रहेकाे थियो ।
मकवानपुर । मकवानपुर जिल्लामा छुट्टाछुट्टै घटनामा ३ जनाकाे मृत्यु भएकाे छ । मकवानपुरकाे बागमती गाउँपालिका बकैया गाउँपालिका र हेटौडा उपमहानगरपालिकामा शनिबार र आइतबार भएकाे घटनामा ३ जनाकाे मृत्यु भएकाे हाे ।
जिल्लाकाे बागमतीमा करेन्ट लागेर देबराम रुम्बाकाे मृत्यु भएकाे मकवानपुर प्रहरीले जनाएकाे छ । आइतबार विहान बागमती ८ कायर बस्ने अन्दाजी ५०/५५ वर्षीय रुम्बा आफ्नै घर अगाडीको बारीमा मकै हेर्न जादाँ भुईमा लत्रिएको बिजुलीको नाङ्गो तारमा छुदा करेन्ट लागि घट्ना स्थलमानै मृत्यु भएकाे जिल्ला प्रहरी कार्यालय मकवानपुरले जनाएकाे छ ।
यसै गरी बकैयामा भिरबाट लडी स्थानीय पुर्णिमा भोम्जनकाे मृत्यु भएको छ । शनिबार विहान बकैया ६ ठुलोसुधा बस्ने सन्दिप भोम्जनको छोरी अन्दाजी ८ वर्षीय पुर्णिमा घरबाट निस्कि हिडेकाेमा आफन्तले खोज्दै शनिबार बेलुका आफ्नै घरदेखि पश्चिममा रहेको बाघ भैरब सामुदायिक बनको सुधाभिरबाट २०० मिटर तल खसी मृत्यु भएकाे प्रहरीले जनाएकाे छ । प्रहरी टोली घटनास्थलमा पुगी बुझ्दा पुर्णिमाकाे मानसिक सन्तुलन ठिक नभएको पाइएकाे छ ।
यस्तै प्रहरीका अनुसरा हेटौडामा सवारीकाे ठक्करबाट ज्ञाने सुनारकाे मृत्यु भएकाे छ । शनिबार बेलुका हेटौडा ११ नवलपुर स्थित चन्द्र शुर्य पेट्रोल पम्प नजिक पुर्व पश्चिम सडक खण्डमा प्रदेश १-०२-०१ ज ४३०० नं.को टाटा सुमोले हेटौडा ११ शान्तीचाेक बस्ने ३५ वर्षीय राईलाई ठक्कर दिदा घाइते भएका थिए । उनलाई उपचारकाे लागि हेटौडा अस्पताल लगिएकाेमा शनिबार राती उपचारकाे क्रममा डाक्टरले मृत घाेषणा गरेका थिए ।
राईलाई ठक्कर दिने सुमाेकाे सीसीटीभीबाट पहिचान भएकाे प्रहरीले जनाएकाे छ । सुमाे चालक मोरङ ग्रामथाङ नगरपालिमा ७ बस्ने ३६ वर्षीय चेतनाथ सापकोटालाई इलाका प्रहरी कार्यालय इटहरी सुनसरीले नियन्त्रणमा सोही कार्यालयमा राखिएको जिल्ला प्रहरी कार्यालय मकवानपुरले जनाएकाे छ ।
मकवानपुर । नेपाली कांग्रेस बागमती प्रदेशले बागमती प्रदेशका मुख्यमन्त्री शालिकराम जमकट्टेलको विपक्षमा मतदान गर्न निर्देशन दिएको छ ।
नेपाली कांग्रेस बागमती प्रदेश सभापति ईन्द्रबहादुर बानियाँको सभाध्यक्षतामा आईतबार काठमाडौंमा बसेको कार्यसम्पादन समितिको बैठकले आफ्नो पार्टीका सम्पूर्ण सांसदहरूलाई तटस्थ नबस्न र विश्वासको मतको विपक्षमा मतदान गर्न निर्देशन दिएको हो । बैठकले नेकपा माओवादी केन्द्र बागमती प्रदेश संसदीय दलका नेता जमकट्टेललाई २०७९ माघ ३ गते विश्वासको मत दिएकोमा २०८० फागुन २३ मा बागमती प्रदेश सरकारबाट राजिनामा दिई बाहिरिएको थियाे ।
प्रदेश सरकारलाई दिएको समर्थनसमेत फिर्ता लिएकोले विश्वासको मतको विपक्षमा मतदान गर्न कांग्रेस संसदीय दललाई निर्देशन दिएको कांग्रेस बागमती प्रदेशका मुख्यसचिव राजु नेपालले जानकारी दिए । बागमती प्रदेशसभामा मुख्यमन्त्री जमकट्टेलले भोली चैत १९ गते विश्वासको मत लिन लिने गरी प्रदेश सभामा दलका सचेतक रत्न ढकालले प्रस्ताव दर्ता गराएका छन् ।
सरकारमा सहभागी दलले समर्थन फिर्ता लिएमा नेपालको संविधानको धारा १८८ को उपधारा (२) अनुसार मुख्यमन्त्रीले प्रदेश सरकारमा सहभागी दलले आफ्नो समर्थन फिर्ता लिएमा ३० दिनभित्र विश्वासको मत लिनुपर्ने व्यवस्था छ । १ सय १० सदस्यीय बागमती प्रदेशसभामा जमकट्टेलले ५६ मत जुटाएमा उनी मुख्यमन्त्रीमा कायम रहनेछन् । बागमतीमा कांग्रेसको ३७, एमालेको २७, माओवादी केन्द्रको २१, राप्रपा १३, एकीकृत समाजवादीको ७, नेमकिपा ३ र हाम्रो नेपाली पार्टीको २ सांसद रहेका छन् ।
मकवानपुर । नेपाल हृदयराेग निवारण प्रतिष्ठान मकवानपुर सभापतिमा विजयकुमार वैद्य चयन भएका छन् । शनिबार हेटौडामा भएकाे प्रतिष्ठान मकवानपुर शाखाकाे १८ ओैँ बार्षिक साधारण सभा तथा अधिवेशनले वैद्यकाे अध्यक्षतामा १२ सदस्यीय कार्यसमिति चयन गरेकाे हाे ।
अधिवेशनले प्रतिष्ठानकाे उपसभापतिमा ध्रुव भुजेल, सचिवमा प्रल्हाद घिमिरे, काेषाध्यक्षमा अनिता न्याैपाने, सहकाेषाध्यक्षमा निर्मला व्लाेन, सदस्ययहरुका त्रैलाेक्य माेहन ठिके, कृष्णगाेपाल बर्ताैला, पम्फा बानियाँ लगायत रहेका छन् ।
साधारण सभा तथा अधिवेशनलाई सम्बाेधन गर्दै सामाजिक विकास मन्त्री कुमारी मुक्तानले मकवानपुर जिल्ला विगतकाे इतिहासमा टेकेर धेरै अघि वढिसकेकाे बताइन् । ‘मकवानपुर जिल्ला ड्राइभरहरुकाे जिल्ला भनेर चिनिन्थ्याे तर स्वास्थ्य क्षेत्रमा फड्काे मारेकाे छ’ उनले भनिन् ‘हाल जिल्लामै विश्वविधालय स्थापनाकाे लागि प्रक्रियागत रुपमा अघि वढेकाे छ ।’
मुक्तानले जिल्लामा मुटु अस्पताल बनाउने साेच रहेकाे र त्याे पुरा गर्ने बताइन् । उनले सरकारी नेतृत्व तहमा रहेकाे बेला हाेस या नभएकाे बेला आफूले निरन्तर सहयाेग गर्ने प्रतिबद्दता व्यक्त गरिन् ।
हेटौंडा शाखा सभापति हरिवंश भेटुवालकाे सभाध्यक्षता तथा सामाजिक विकास मन्त्री मुक्तानकाे प्रमुख आतिथ्यतामा भएकाे साधारण सभा तथा अधिवेशनमा जिसस प्रमुख ललित बहादुर घलान, संविधान सभा सदस्य प्रहाल्द लामिछाने, नेपाल हृदयराेग निवारण प्रतिष्ठान बागमती प्रदेश संयाेजक भाेजराज पौडेल, प्रतिष्ठानका सल्लाहाकार तथा विश्व हिन्दु महासंघका केन्द्रीय उपाध्यक्ष ह्याग्रिव आचार्य लगायतकाे उपस्थिति रहेकाे थियाे ।