मकवानपुर । हेटौंडा–सिस्नेरी-काठमाडौ र फाखेल-काठमाडौं सडक दुई तर्फी संचालनमा आएकाे छ । मर्मतकाे लागि २ असोजबाट एक तर्फी संचालन भएकाे सडक आइतबार बेलुकाबाट दुई तर्फी संचालनमा आएकाे हाे ।
मकवानपुरकाे इन्द्रसरोवर गाउँपालिका २ सिमखोला स्थित बाटोको मर्मत तथा ह्युम पाइप राख्न ३ दिन उक्त सडकमा काठमाडौबाट मात्रै हेटौडा तर्फ सवारी संचालन भएकाे थियाे । बाटोको मर्मत कार्य सम्पन्न भएकाेले आइतबारबाट दुबै तर्फी संचालनमा आएकाे जिल्ला प्रहरी कार्यालय मकवानपुरले जनाएकाे छ ।
उक्त सडक बन्द हुँदा हेटौंडा-भैसे-पालुङ हुँदै काठमाडौं र कान्तिलोकपथ राजमार्ग हेटौंडा ठिगन हुँदै काठमाडौकाे रुट भइ सवारी संचालन भएकाे थियाे ।
मकवानपुर । नेकपा (एमाले) ले ३ जना नेताहरूलाई स्पष्टीकरण सोध्ने निर्णय गरेको छ । आइतबार बसेको केन्द्रीय सचिवालय बैठकले उनीहरुलाई स्पष्टीकरण सोध्ने निर्णय गरेको पार्टीले जनाएकाे छ ।
नेता भीम रावलसहितका स्थायी कमिटी सदस्य विन्दा पाण्डे र केन्द्रीय सदस्य उषाकिरण तिम्सिनालाई स्पष्टीकरण सोध्ने निर्णय गरेको हाे ।
उनीहरूलाई एमाले केन्द्रीय कार्यालयको भवन निर्माणका सम्बन्धमा पार्टी निर्णय विपरित अभिव्यक्ति दिएको भन्दै पार्टीले स्पष्टीकरण सोध्ने निर्णय गरेको हो ।
मकवानपुर । मकवानपुर प्रहरीले लागूऔषध डाइजेपामसहित २ जनालाई पक्राउ गरेको छ । शनिबार हेटौंडा–३, लेवटबाट १२१ एम्पुल लागुऔषधसहित उनीहरुलाई पक्राउ गरेको हो ।
१२१ एम्पुल सहित लागूऔषध सहित मकवानपुरगढी गाउँपालिका–२ का २५ वर्षीय बुद्ध बहादुर डिम्डुङ र हेटौंडा उपमहानगरपालिका–८, कमानेका २९ वर्षीय नवीन रुम्बालाई हेटौडा ३ लेवटबाट पक्राउ गरिएकाे जिल्ला प्रहरी कार्यालय मकवानपुरले जानकारी दिएकाे छ ।
प्रहरी चौकी बसामाडीकाे टोलीले पूर्व–पश्चिम राजमार्गअन्तर्गत चितवनकाे नारायणगढबाट हेटौंडातर्फ आउँदै गरेको ना ३३ प ९५७६ नम्बरको मोटरसाइकलमा सवार उनीहरुको जाँच गर्दा लागुऔषध डाईजेपाम ४१ एम्पुल, फेनार्गन ४० एम्पुल र नुर्फिन ४० एम्पुल बरामद गरेको हाे ।
प्रहरीका अनुसार डिम्डुङ र रुम्बालाई जिल्ला अदालत मकवानपुरबाट ४ दिनको म्याद लिइ थप अनुसन्धान भइरहेकाे छ ।
देवकोटा स्मृति साहित्य सम्मान पोख्रेललाई प्रदान गरिने
Tags: No Comments
मकवानपुर । महाकवि लक्ष्मीप्रसाद देवकोटा स्मृति साहित्य सम्मान–२०८१ माधव पोख्रेललाई प्रदान गरिने भएको छ । साहित्य संगम मकवानपुर र युगप्रकाश क्लबले संयुक्त रुपमा प्रदान गर्ने उक्त पुरस्कार मकवानपरे साहित्यकार पोखरेललाई प्रदान गरिने भएकाे हाे ।
१० हजार रुपैया राशिको सम्मान पोख्रेललाई प्रदान गर्ने निर्णय गरेको संगमले आइतबार विज्ञप्ति प्रकाशित गरी जनाएको छ । संगमका अनुसार १५ कात्तिकमा महाकवि लक्ष्मीप्रसाद देवकोटाको जन्मजयन्तीका अवसरमा पोखरेललाई उक्त सम्मान प्रदान गरिने जनाएको छ ।
नेपाली साहित्यको उन्नयन र श्रीवृद्धिमा उल्लेखनीय योगदान पुर्याउने स्रष्टालाई हरेक वर्ष महाकवि लक्ष्मीप्रसाद देवकोटा स्मृति साहित्य सम्मान प्रदान गर्दै आएको संगमले जनाएकाे छ ।
हेटौँडा–४ निवासी पोख्रेल मातृभूमि साहित्य समाजका पूर्वअध्यक्ष हुन् । उनकाे नाटक ‘आकांक्षाको चिता’ (२०६९), कविता संग्रह ‘रित्तिएको गाउँ’ (२०७०) र नाटक ‘ऐनाभित्रको आकाश’ (२०७९) प्रकाशित छन् ।
मकवानपुर । बागमती प्रदेश लोक सेवा आयोगको अध्यक्षमा महेश्वर श्रेष्ठ नियुक्त भएका छन् । प्रदेश प्रमुख दिपक प्रसाद देवकोटाले आइतबार श्रेष्ठलाई आयोगकाे अध्यक्षमा नियुक्त गरेका हुन् ।
मुख्यमन्त्री बहादुर सिं लामा, सभामुख भुवनकुमार पाठक र विपक्षी दलका नेता शालिकराम जम्मकट्टेलकाे ३ सदस्यीय समितिले २१ असोजमा श्रेष्ठलाई लोक सेवा आयोगको अध्यक्ष नियुक्त गर्न सिफारिस गरिएकाे थियो । प्रदेश लोकसेवा आयोग ऐन २०७६ को दफा ३ को उपदफा (१) अनुसार गठित सिफारिस समितिको सिफारिसमा सोही ऐनकाे दफा ४ को उपदफा (२) बमोजिम श्रेष्ठलाई अध्यक्ष नियुक्त गरिएको प्रदेश प्रमुख कार्यालयले जानकारी दिएकाे हो ।
२ मंसिर २०७६ मा गठित आयोगको अध्यक्ष सुरेशमान श्रेष्ठ उमेर हदका कारण अध्यक्ष ३ चैत २०८० बाट पदमुक्त भएका थिए । पटक–पटक सरकार परिवर्तन र सत्तारुढ दलहरुबीच सहमति हुन नसक्दा ७ महिनादेखि आयोगको अध्यक्ष नियुक्त हुन सकेको थिएन ।
श्रेष्ठलाई आयोगको अध्यक्ष नियुक्त गर्न सिफारिस भएपछि आयोगका सदस्य सुदर्शन ढकालले पदबाट राजीनामा दिएका थिए । कनिष्ट व्यक्तिलाई अध्यक्ष नियुक्त गर्न सिफारिस गरिएकाे भन्दै ढकालले २ कार्तिकमा प्रदेश प्रमुख देवकोटा समक्ष राजीनामा दिएका थिए । ६ माघ २०७६ मा सदस्य नियुक्त भएका ढकालले ४ वर्ष ९ महिना काम गरेर राजीनामा दिएका हुन् ।
लाेक सेवा आयोगकाे अध्यक्षमा नियुक्त श्रेष्ठ नवलपरासी पूर्वको विनयी त्रिवेणी गाउँपालिका वडा नम्बर १ निवासी हुन् । लुम्बिनी प्रदेशको बुटवलस्थित स्वास्थ्य तालिम केन्द्रको निर्देशक पदमा कार्यरत श्रेष्ठ बिहीवार मात्रै सरकारी सेवाबाट अवकाश भएका थिए । उनी ११औं तह सहसचिव हुन् ।
यस अघि उनले तत्कालीन स्वास्थ्य तथा जनसंख्या राज्यमन्त्री उमेश श्रेष्ठको प्राविधिक सल्लाहकार पदमा रही काम गरिसकेका छन् । उनको शपथ कार्यक्रम सोमबार हुने बताइएकाे छ ।