मकवानपुर । भनिन्छ भगवानले दिए भने कसैले खोस्न सक्दैन, भगवानले खोसे भने कसैले दिन सक्दैन । यस्तै भएकाे छ हेटौंडाकाे पहाडी परिवारलाई ।
हेटौंडा ५ बस्ने रेवती पहाडी श्रीमती छोरा बुहारी र नातिनिहरुसँगै रमाउँदै आएका थिए । भगवानले दिएकाे खुसी यही थियाे । पेशाले शिक्षक उनकाे परिवारमा भगवानले सबैथाेक एकै पटक खाेसेर लालान र फेरी कसैले दिन सक्दैनन् भन्ने छदै थिएन् । तर शनिबार बिहान उनकाे परिवारकाे खुसी एकै पटक खाेसियो । चितवनमा भएकाे दुर्घटनामा उनकाे परिवारकाे ३ जनाकाे मृत्यु भयाे । जसमा १ जना गर्भवती थिइन्,उनकाे बुहारी रेनुका ।
आफ्नो सन्तानलाई सुरक्षित प्राप्तिकाे लागि उनी श्रीमान् र सासु आमा सहित भरतपुर अस्पताल जादै थिइन् । शनिबार पूर्व–पश्चिम राजमार्गअन्तर्गत चितवन जिल्लाको राप्ती नगरपालिका–४ मा हेटौंडाबाट नारायणगढतर्फ जाँदै गरेको बागमती प्रदेश ०३–००१ ज २९९ नम्बरको माइक्रोबस र धनगढीबाट काँकडभिट्टातर्फ जाँदै गरेको प्रदेश १–०१–००१ ख ३५८३ नब्बरको यात्रुबाहक बस ठोक्किएर दुर्घटना हुन्छ ।
दुर्घटनामा परेकाे उक्त माइक्राेबसमा दोस्रो सन्तान प्राप्तिकाे लागि भरतपुर अस्पताल जाँदै गरेकी हेटौंडा–५ की २७ वर्षीया रेनुका कँडेल पहाडीसँगै उनका श्रीमान ३५ वर्षीय सरोज र सासुआमा ५५ वर्षीया मैयाकुमारीसँगै ज्यान गुमाए । चितवनको राप्ती नगरपालिका-३ स्थित पूर्वपश्चिम राजमार्गमा शनिबार भएको दुर्घटनामा ७ जनाले ज्यान गुमाए। उक्त दुर्घटनामा ७ जनाको मृत्यु भएको प्रहरीले जनाएकाे ।
हेटौंडामै स्वास्थ्य जाँच गराउँदै आएकी रेनुका सुरक्षित सन्तान प्राप्तिकाे लागि चितवन जाँदै गरेकाे बताइएकाे छ । चिकित्सकले रेनुकाको सुत्केरी हुने मिति आइतबार तोकिदिएको थियो । श्रीमान् सरोजले सुत्केरीपछि केही दिन अस्पतालमै बस्नुपर्ने हुन सक्छ भन्दै सार्वजनिक माइक्रोबसमा यात्रा गर्ने निर्णय लिएकाे मामा नवराज बताउँछन् । ९ र ४ वर्षीया छोरीलाई बुबा (रेवती) सँगै घर छाडेर अर्काे सन्तान हेर्ने सपना बाेकेर गर्भवती श्रीमतिसँगै आमालाई साथी लिएर भरतपुर हिँडेका सरोजसँगै हजुरबुबा र नातिनीले नयाँ सदस्यसहितकाे खुसी घरमा भित्र्याउन पाएनन् ।
घरका ३ सदस्यकाे एकै पटक मृत्यु भएपछि मामा अचेत भएपछि मामा नवराज दिदी, भाञ्जा र भाञ्जी बुहारीको शव सनाखत गर्न चितवन पुगे । श्रीमति, छोरा, बुहारी र गर्भमा रहेको नाती पुस्ताको एकै पटक मृत्यु भएपछि रेवती पहाडी अचेत अवस्थामा रहेको ५ नम्बर वडा अध्यक्ष सुशील घिमिरेले जानकारी दिए । ‘रेवती सर अचेत हुनुहुन्छ । हामी पनि शोकमा छौं’ उनले भने ।
दुर्घटनामा परी हेटौंडा–४ का ५५ वर्षीय सोमप्रसाद रुपाखेती, माइक्रोबस चालक हेटौंडा–१० का ३१ वर्षीय राजु थिङ र रौतहट जिल्लाको चन्द्रनिगाहपुर–६ की ३५ वर्षीया सीता चौधरीको मृत्यु भएको छ । दुर्घटनामा परी मृत्यु भएकी एक युवतीको सनाखत हुन सकेको छैन । अन्दाजी १९ वर्षीय युवतीको सनाखत हुन नसकेको प्रहरीले उल्लेख गरेको छ । रुपाखेती हाल हेटौंडा–४ मा बस्दै आएका थिए ।
दुर्घटनामा परी घाइते भएकाहरु भरतपुरस्थित पुरानो मेडिकल कलेज, एलाईभ अस्पताल भरतपुरमा उपचार भइरहेको छ । घाइते मध्ये हेटौंडा–४ का ३१ वर्षीय विष्णु लम्साल, हेटौंडा–१२ का ३२ वर्षीय सिंहवीर घलान र हेटौंडा–१३ का १६ वर्षीय सक्षम थापा मध्यम घाइते रहेको प्रहरीले उल्लेख गरेको छ । हेटौंडा–८ की ३४ वर्षीया गंगा घलान गम्भीर घाइते भएको प्रहरीले जानकारी दिएको छ ।
बस चालक मोरङ जिल्लाको बेलबारी नगरपालिका–७ का २७ वर्षीय सुमन चौधरी सामान्य घाइते भएकोमा उपचारपछि प्रहरीले नियन्त्रण लिएकाे बताइएको छ ।
मकवानपुर। बागमती प्रदेशका प्रमुख दीपक प्रसाद देवकोटाले अन्तराष्ट्रिय योग दिवस २०२४ (जुन २१) को अवसरमा स्वदेश तथा विदेशमा रहेका सम्पूर्ण नेपाली दाजुभाइ तथा दिदी बहिनीहरूलाई सन्देश व्यक्त गर्नुहुदै योग गरि स्वस्थ्यमा ध्य दिन आग्रह गर्नुभएको छ ।
योगको माध्यमबाट स्वस्थ जीवनशैली अपनाउन प्रेरणा मिलोस् भन्ने कामनासहित उहाँले यो सन्देश जारी गर्नुभएको हो।
प्रदेश प्रमुख देवकोटाले योगलाई नेपालको गौरवपूर्ण सभ्यता र सनातन परम्पराले दिएको अनुपम उपहारको रूपमा चित्रण गर्नुभएको छ । उहाँले योग आज विश्वभर स्वीकारिएको जीवनपद्धति बनेको र हरेक वर्ष जुन २१ तारिखमा अन्तराष्ट्रिय योग दिवस मनाइनु यसैको सम्मान भएको सन्देश मार्फत बताउनुभयो।
उहाँको सन्देशमा भनिएको छ, “पूर्वीय सभ्यताले व्यक्तिको शारीरिक, मानसिक, सामाजिक, बौद्धिक र संवेगात्मक स्वास्थ्यमा सकारात्मक प्रभाव पार्न योगाभ्यासलाई आत्मसात गर्यो।
आज त्यसको चमत्कारिक प्रभावलाई पश्चिमी जगत् लगायत समग्र विश्वले अवलम्बन गरेका छन्।”
योगलाई केवल व्यायाम नभई एक समग्र जीवनदर्शनका रूपमा व्याख्या गर्दै, प्रदेश प्रमुख देवकोटाले योगले आत्मानुशासन र सह अस्तित्वको बाटो सिकाउनेमा जोड दिनुभयो।
आजको व्यस्त जीवनशैलीमा मानिस तनाव, चिन्ता र रोगहरूले ग्रस्त भइरहेको अवस्थामा योग नै शान्त, निरोगी र सुदृढ बनाउने अमूल्य साधन भएको उहाँको भनाइ छ।
यस महत्वपूर्ण दिनमा प्रदेश प्रमुख देवकोटाले सम्पूर्णलाई दैनिक केही समय योगाभ्यासमा समर्पित हुन आह्वान गर्दै, अन्तराष्ट्रिय योग दिवस २०२४ को अवसरमा सबैमा हार्दिक मंगलमय शुभकामना समेत व्यक्त गर्नुभएको छ।

माकवानपुर । बागमती प्रदेशकाे राजधानी हेटौंडामा नेकोस कप राष्ट्रिय महिला भलिबल र स्केटिङ प्रतियोगिता हुने भएकाे छ । नेपाल स्पोर्ट सेन्टर (नेकोस) ले शनिबारबाट हेटौंडामा नेकोस कप राष्ट्रिय महिला भलिबल र राष्ट्रिय रोलर स्केटिङ प्रतियोगिता आयोजना गर्ने भएकाे हाे ।
खेलकुद महोत्सव अन्तर्गत नेकोसले हेटौंडामा प्रतियोगिता गर्न लागेकाे शुक्रबार पत्रकार भेटघाट गरी जानकारी दिएकाे छ । दुवै प्रतियोगिताको तयारी पुरा भएको आयोजकले जनाएको छ ।
प्रतियोगिता अन्तर्गत महिला भलिबलमा प्रथम हुने टिमले ५ लाख रुपैया, द्वितीय हुनेले ३ लाख रुपैंया, तृतीयले १ लाख रुपैंया तथा सान्त्वनाले ५१ हजार रुपैंया प्राप्त गर्ने छन् । त्यस्तै प्रत्येक विधामा नगद ५ हजार प्रदान गरिने आयोजकले जनाएकाे छ । त्यस्तै स्केटबोर्ड प्रतियोगितामा प्रथम हुने टिमले १० हजार, द्वितीय ५ हजार र तृतीय ३ हजार रुपैंया प्राप्त गर्ने छन् ।
भलिबल प्रतियोगितालाई नेपाल स्पोर्ट सेन्टर आफैले र स्केटिङ प्रतियोगितालाई नेपाल स्केटिङ तथा स्केटबोर्डिङ संघले संयोजन गर्ने नेकोसका अध्यक्ष अनिल कुमार रिजालले जानकारी दिए । नेपालको खेल क्षेत्रको विकास गर्ने उद्देश्यले प्रतियोगिता आयोजना गर्न लागिएकाे उनले बताए ।
हेटौंडा-४ हुप्रचौरस्थित भलिबल कोर्टमा हुने महिला भलिबल प्रतियोगिता लिग कप नकआउट अन्तर्गत खेलाइने छ । नेपाल पुलिस क्लब, नेपाल एपीएफ क्लब, न्यू डाइमण्ड क्लब, मधेस प्रदेश, गण्डकी प्रदेश र बागमती प्रदेश गरी ६ वटा टोली महिला भलिबलमा सहभागी हुनेछन् । त्यस्तै पुष्पलाल रोडको स्केटिङ पार्कमा हुने स्केटबोर्ड प्रतियोगितामा देशभरका १२ वर्षमुनिका महिला र पुरुष तथा १२ वर्षमाथिका महिला र पुरुष गरी ४ विधामा १५० जना खेलाडीको सहभागिता रहनेछ ।
महिला भलिबलको असार ७ गते शनिबार र स्केटबोर्डकाे असार ८ गते आइतबार हेटौंडा उपमहानगरपालिकाका प्रमुख मीना कुमारी लामाले उद्घाटन गर्ने कार्यक्रम रहेकाे छ । प्रतियोगिताको समापन ११ असारमा हेटौंडाको हुप्रचौरमा हुने छ । आयोजकका अनुसार दुवै प्रतियोगितामा करिब ८० लाख खर्च हुने अनुमान गरिएको छ ।
मकवानपुर । देशको कोशी, मधेस, बागमती र गण्डकी प्रदेशका केही भूभाग तथा लुम्बिनी प्रदेशका पूर्वी क्षेत्रका थोरै भूभागमा मनसुनी वायुको प्रभाव रहेको छ ।
मौसम पूर्वानुमान महाशाखाका अनुसार देशको पश्चिम भूभागमा पश्चिमी वायु तथा स्थानीय वायुको आंशिक प्रभाव रहेको छ । जसको प्रभावले हाल देशभर आंशिकदेखि साधरणतया बदली रहेको छ। बागमती प्रदेशका थोरै स्थानहरूमा तथा कोशी, लुम्बिनी र कर्णाली प्रदेशको एक–दुई स्थानमा चट्याङसहित हल्कादेखि मध्यम वर्षा भइरहेको महाशाखाले जनाएको छ।
बुधबार दिउँसो देशभर साधरणतया बदलीदेखि पूर्णयता बदली रहनेछ। कोशी, बागमती, गण्डकी र लुम्बिनी प्रदेशका धेरै स्थानहरू र बाँकी प्रदेशका केही स्थानहरूमा चट्याङसहित हल्कादेखि मध्यम वर्षाको सम्भावना रहेको छ । कोशी, बागमती, गण्डकी र लुम्बिनी प्रदेशका एक–दुई स्थानमा भारी देखि धेरै भारी वर्षाको पनि सम्भावना रहेको छ। देशका उच्च पहाडी तथा हिमाली भूभागका थोरै स्थानहरू हल्का वर्षासहित हिमपातको सम्भावना रहेको छ।
यसैगरी बुधबार राति देशभर साधरण बदलीदेखि पूर्णयता बदली रहनेछ। कोशी, मधेस, बागमती, गण्डकी र लुम्बिनी प्रदेशका धेरै स्थानहरू र बाँकी प्रदेशका केही स्थानहरूमा चट्याङसहित हल्कादेखि मध्यम वर्षाको सम्भावना रहेको छ ।कोशी, मधेस, गण्डकी र लुम्बिनी प्रदेशका थोरै स्थानहरू भारी देखि धेरै भारी वर्षाको पनि सम्भावना रहेको छ । उच्चपहाडी तथा हिमाली भूभागका एक–दुई स्थानमा हल्का वर्षासहित हिमपातको सम्भावना रहेको छ।
वर्षाको कारण सडक तथा हवाई यातायातमा प्रभाव पर्न सक्ने हुँदा आवश्यक सतर्कता अपनाउन महाशाखाले अनुरोध गरेको छ ।
मकवानपुर । बागमती प्रदेश युवा परिषद्का कार्यकारी उपाध्यक्ष सन्तोष चौलागाईको ४ वर्षे कार्यकाल सकिएको छ । कार्यकाल सकिएपछि चौलागाईले मंगलबार आफ्नो कार्यकालमा भएका कामको जानकारी गराउन पत्रकार भेटघाट गरे ।
जेठ मसान्तमा कार्यकाल सकिएसँगै मंगलबारकाे पत्रकार भेटघाटमा चौलागाईले आगामी आर्थिक वर्षको बजेट वक्तव्यमा प्रदेश युवा परिषद्लाई खेलकुद विकास परिषदमा गाभ्ने निर्णय सच्याउन आग्रह गरेका छन् । ‘परिषद्ले युवा पुस्तालाई प्रदेश सरकार र सरोकारवालासँग जोड्न सफल भएको छ’ उनले भने ‘युवा परिषद्लाई अझ सशक्त बनाएर अगाडि बढ्नुपर्ने अहिलेकाे आवश्यकता हाे ।’ युवा परिषद्लाई खेलकुदमा गाभ्ने निर्णय कानूनीरुपमा पनि जटिल रहेकाे उनले बताए ।
एक पटक भर्चुअल र ३ पटक भौतिक उपस्थितिमै प्रदेशका १३ वटै जिल्लाका युवाको सहभागितामा युवा सम्मेलनको आयोजना गर्नु आफ्नो कार्यकालको महत्वपूर्ण उपलब्धी भएको उनले जानकारी दिए । ‘आम युवाको सक्षमता, क्षमता विकास र रोजगारी सिर्जनाको क्षेत्रमा काम गर्ने युवा परिषद्लाई सरकारले बजेट विनियोजनमा विभेद गर्ने गरेकाे छ’ उनले भने । ४ वर्षे कार्यकालमा १० हजार भन्दा बढी युवालाई रोजगारमूलक तालिम प्रदान गरिएको, सयौं युवा स्वरोजगार भएको उनले बताए ।
महिला युवाका लागि आत्मरक्षा तालिम सञ्चालन परिषद्को अर्को उपलब्धि रहेको चौलागाईले बताए। तालिमलाई १३ वटै जिल्लामा फैलाएर प्रशिक्षक प्रशिक्षण कार्यक्रम सञ्चालन गरिएको उनले जानकारी दिए । उनका अनुसार युवालाई कुलतबाट जोगाउँदै समाजप्रति उत्तरदायी बनाउन कार्यशाला, अभिमुखीकरण तथा प्रेरणात्मक कार्यक्रमहरू सञ्चालन गरिएका छन् ।
सरकार परिवर्तनको बेला एकपटक प्रदेश सरकारसँग केही असमझदारी भए पनि अदालतले पुनर्स्थापित गरेसँगै आफूलाई काम गर्न कुनै समस्या नभएको चौलागाईले जानकारी दिए । ‘सरकारलाई युवासँग जोड्न र सरकारसम्म युवाको पहूँच स्थापित गर्न परिषद्ले सहजकर्ताको भूमिका निर्वाह गरेको छ’ उनले भने । कार्यकाल सकिए पनि मैले हासिल गरेको ज्ञान, सीपलाई आगामी दिनमा आवश्यकताअनुसार सहयोग गर्दै जाने उनले बताए ।
‘युवालाई देशमै बस्नुपर्छ,यही काम गर्नुपर्छ भन्ने भावना अभिवृद्धि गराउन परिषद्ले निर्वाह गरेको भूमिकालाई निरन्तरता दिनुपर्छ’ उनले भने । मुख्यमन्त्रीसँग युवाको संवाद समेत गराएकाे उनले जानकारी दिए । चौलागाईले आफ्नो कार्यकालमा साथ, सहयोग गर्ने सबैप्रति आभार व्यक्त गरेका छन् ।
