मकवानपुर । प्रत्येक प्रदेशमा विधिविज्ञान प्रयोगशाला सञ्चालन ल्याउने तयारीसँगै बागमती प्रदेशकाे राजधानी हेटौंडामा प्रयोगशाला स्थापना गरिएको छ । प्रदेश प्रहरी कार्यालय हेटौडामा नेपाल प्रहरीको विधिविज्ञान प्रयोगशाला सञ्चालनमा ल्याइएको हो ।
हेटौंडा उपमहानगरपालिका–११ थानाभर्याङस्थित प्रदेश प्रहरी कार्यालय परिसरमा स्थापना गरिएको प्रयोगशाला भदौ २२ देखि सञ्चालनमा ल्याइएको हो । करिव १२ करोड रुपैयाँ लागतमा स्थापना गरिएको प्रयोगशालाले मुलुकमा बरामद हुने लागुऔषधमध्ये ४० प्रतिशत नमुनाको परीक्षण गर्ने प्रदेश प्रहरी कार्यालय हेटौंडाका प्रमुख एवं प्रहरी नायब महानिरीक्षक दीपक रेग्मीले बताए । ‘हेटौंडामा विधिविज्ञान प्रयोगशाला स्थापना भएपछि न्यायप्राप्तिको प्रक्रिया छिटो हुनेछ,’ उनले भने ।
लागुऔषध, जबर्जस्तीकरणी र डीएनएको प्रतिवेदन ढिलो हुने कारण न्यायप्राप्ति पनि ढिलो हुने गरेको थियो । विधिविज्ञान प्रयोगशालाबाट प्रतिवेदन नआएका कारण अदालतका फैसलामा ढिलाइ हुने गरेको जिल्ला अदालत मकवानपुरका एक अधिकृतले बताए । हेटौंडास्थित प्रयोगशालामा बागमती प्रदेशका चितवन, मकवानपुर र सिन्धुली तथा मधेश प्रदेशका बारा, रौतहट र सर्लाहीका नमुना परीक्षण गरिनेछ ।
नमुना परीक्षणका लागि बरामद भएका वस्तु वा पक्राउ परेकाहरूको जिल्लाबाट तीन दिनभित्र नमुना पठाइसक्नुपर्ने र प्रयोगशालाले १० दिनभित्र सम्बन्धित जिल्लामा प्रतिवेदन पठाउने कार्यतालिका रहेको प्रयोगशालाका प्रमुख मोहनसिंह धामीले बताए । उक्त प्रयोगशालामा रसायन तथा लागुऔषध, जबर्जस्तीकरणीअन्तर्गत बायोलोजी, सिरोलोजी र डीएनएका नमुना परीक्षण गरिने प्रदेश प्रहरी कार्यालय हेटौंडाका प्रवक्ता एवं वरिष्ठ प्रहरी उपरीक्षक राजेन्द्रप्रसाद धमलाले बताए ।
यो विधिविज्ञान प्रयोगशाला मुलुकको चौथो हो । यसअघि काठमाडौं, धरान र नेपालगन्जमा यस्ता प्रयोगशाला स्थापना भइसकेका छन् ।
मकवानपुर । बागमती प्रदेश प्रहरी कार्यालयबाट नजिकिँदै गरेको दसैं, तिहार र छठ पर्वलाई लक्षित गरी प्रदेशका १० जिल्लामा ४ हजार ४९९ जना प्रहरी परिचालन हुँदैछन् ।
यात्रुको चाप बढ्ने भएकाले ४६ स्थानमा यात्रु सहायता कक्ष स्थापना गरी ती कक्षमा दैनिक १२६ जना प्रहरी खटाइने प्रदेश प्रहरी कार्यालय हेटौंडाले जनाएको छ। काठमाडौं, ललितपुर र भक्तपुरबाहेक बागमती प्रदेशका १० जिल्लामा ‘चाडपर्व सुरक्षा योजना–२०८३’ तयार गरी सुरक्षा व्यवस्था मिलाइएको बागमती प्रदेश प्रहरी कार्यालय हेटौंडाका प्रमुख एवं प्रहरी नायब महानिरीक्षक दीपक रेग्मीले बताए। चाडपर्व लक्षित यात्रु सहायता कक्ष बसपार्कलगायत नाकामा राख्न थालिएको छ।
दसैं, तिहार र छठमा बसपार्कमा यात्रुको चाप बढी हुने भएकाले मुख्यगरी बसपार्कमा सहायता कक्ष राखिएको रेग्मीले बताए। उनका अनुसार कार्यालय सुरक्षाका लागि १ हजार ४६५ जना प्रहरी परिचालन गरिनेछ।
राजमार्गमा ट्राफिक प्रहरीसहित चेकिङ तथा अनुगमनका लागि ५८ वटा ड्युटीमा २११ जना प्रहरी परिचालन गरिने योजना छ। यसैगरी ३१ स्थानमा आकस्मिक चेकिङ गरिने र त्यसका लागि १३८ जना प्रहरी परिचालन गरिने रेग्मीले बताए। बजार अनुगमनका लागि १९ वटा टोली परिचालन गरिनेछ। चाडपर्वका अवसरमा आयोजना हुने खेलकुद तथा सांस्कृतिक कार्यक्रमको सुरक्षाका लागि पनि आवश्यक संख्यामा प्रहरी परिचालन गरिने जनाइएको छ।
सुरक्षा योजनाको कार्यान्वयन तथा अनुगमनका लागि बागमती प्रदेश प्रहरी कार्यालय हेटौंडा, नेपाल प्रहरी प्रदेश कार्यालय बनेपा, बागमती प्रदेश प्रहरी गण हेटौंडा र नेपाल प्रहरी विशेष सुरक्षा गण रातोमाटेबाट प्रहरी परिचालन तथा अनुगमन गरिनेछ। आवश्यकताअनुसार प्रदेशबाट थप प्रहरी टोलीसमेत परिचालन गरिने रेग्मीले जानकारी दिए।
उपत्यकाका तीन जिल्लाबाहेक बागमती प्रदेशका १० जिल्लामा ७ हजार ३०४ जनाको प्रहरी दरबन्दी छ। त्यसमध्ये ५ हजार ९३४ जना कार्यरत छन्। १८.३४ प्रतिशत अर्थात् १ हजार ३७० दरबन्दी खाली रहेको छ।
मकवानपुर। बागमती प्रदेश सरकारले भाेटेकाेशी बाढी–पहिरोबाट प्रभावित तथा जोखिमयुक्त बस्तीलाई सुरक्षित स्थानमा स्थानान्तरण गरी नयाँ एकीकृत बस्ती विकास गर्ने योजना अघि सारेको छ।
केन्द्रीय विपद् परिषद्को बैठकमा बागमती प्रदेशका मुख्यमन्त्रीले प्रभावित बस्तीको पुनःस्थापना र पुनर्निर्माणसम्बन्धी योजना प्रस्तुत गर्नुभएको हो । भोटेकोशी र त्रिशूली नदी आसपासका क्षेत्रमा आएको बाढी तथा पहिरोका कारण ठूलो क्षति भएपछि जोखिमयुक्त पुराना बस्तीलाई सोही स्थानमा पुनःस्थापना नगर्ने नीति प्रदेश सरकारले लिएको मुख्यमन्त्री किरण थापाले जानकारी दिनुभयो ।
बाढीले बगरमा परिणत गरेका क्षेत्रमा पुनर्निर्माण नगरी त्यस्ता स्थानलाई वृक्षारोपण तथा हरियाली क्षेत्रका रूपमा विकास गर्ने योजना बनाइएको उहाँले बताउनुभयो । प्रभावित परिवारलाई पुनःस्थापनाका लागि स्थानीय तहसँगको समन्वयमा सुरक्षित वैकल्पिक जग्गा पहिचान गरिएको प्रदेश सरकारले जनाएको छ। तिनै तहको सरकार मिलेर स्थानीय पालीकाले उपलब्ध गराएको ११५८ रोपनी जग्गा र ४०० रोपनी स्थानीयको जग्गा मिलाएर ल्यान्ड पुलिङ मार्फत स्मार्ट सिटीको लागि चाहिने आबस्यक पुर्वाधारसहित ‘ल्यान्ड पुलिङ’ प्रणालीमार्फत एकीकृत बस्ती विकास गरिने प्रदेश सकारकाे योजना रहेकाे बताइएकाे छ।
नयाँ बस्तीमा व्यवस्थित आवाससँगै आवश्यक आधुनिक पूर्वाधार निर्माण गरिनेछ। विस्तृत परियोजना प्रतिवेदन (डीपीआर) तयार गरी बस्तीभित्र स्वास्थ्य चौकी, सामुदायिक विद्यालयलगायत आधारभूत सेवा तथा सुविधाको व्यवस्था गरिने मुख्यमन्त्री थापा मगरले जानकारी दिनुभएको छ। यस्तै बाढीका कारण पूर्ण रूपमा क्षति भई बगरमा परिणत भएका निजी जग्गाको सट्टा प्रभावित नागरिकलाई सुरक्षित स्थानमा लालपुर्जासहितको जग्गा उपलब्ध गराउने गरी जग्गा सट्टापट्टाको व्यवस्था मिलाइने पनि मुख्यमन्त्री थापाले बताउनुभयो ।
प्रदेश सरकारले बाढी–पहिरो प्रभावित क्षेत्रमा खोज तथा उद्धार, उपचार, अस्थायी आवास र खाद्यान्न व्यवस्थापनलगायत प्राथमिक चरणमा राहतका काम सम्पन्न भएको जनाएको छ। स्थानीय, प्रदेश र सङ्घीय सरकारबीच समन्वय तथा सहकार्य गर्दै दिगो पुनर्निर्माण र पुनःस्थापनाको कामलाई तीव्रता दिने उहाँले जानकारी दिनुभयो।
सरकारले विपदबाट क्षतिग्रस्त क्षेत्रको पुनर्निर्माणसँगै भविष्यमा दोहोरिन सक्ने विपद्को जोखिम न्यूनीकरणलाई समेत प्राथमिकतामा राखेर सुरक्षित र व्यवस्थित नयाँ बस्ती विकास गर्ने संघीय सरकारलाई जानकारी गराइएको छ।
मकवानपुर । आगामी मंसिर १६ देखि २७ गतेसम्म हुने दशौं राष्ट्रिय खेलकुद प्रतियोगिताका लागि प्रस्तावित खेलस्थलको टुंगो लागेकाे छ । राष्ट्रिय खेलकुद परिषद् (राखेप) को आयोजना तथा कर्णाली खेलकुद विकास परिषद्को सहआयोजनामा हुने प्रतियोगितामा ३२ खेल विधा संचालन गरिने भएकाे छ ।
प्रतियोगितामा सात प्रदेश, तीन विभागीय टोली र गैरआवासीय नेपाली सङ्घ (एनआरएनए) सहित ११ टोलीका खेलाडी सहभागी हुनेछन् । प्रतियोगितामा करिब छ हजार पाँच सय खेलाडी सहभागी हुने अनुमान गरिएको छ । खेलाडीसँगै प्रशिक्षक, व्यवस्थापक, निर्णायक, प्राविधिक तथा अन्य पदाधिकारीको समेत सहभागिता रहनेछ । खेल तथा खेलस्थल सम्बन्धी विवरण अनुसार प्रतियोगिताका २० खेल पूर्णरूपमा सुर्खेतमा सञ्चालन हुने भएकाे छ । ४ खेल विधा भने सुर्खेतसँगै नेपालगन्ज तथा कर्णालीका अन्य जिल्लामा सञ्चालन हुने बताइएकाे छ । बाँकी ८ खेल भने सुर्खेतबाहिर सञ्चालन गर्ने तयारी गरिएको छ । प्रतियोगिताका लागि कर्णाली प्रदेशका सुर्खेत, दैलेख, जाजरकोट, कालिकोट, सल्याण, पश्चिम रुकुम र जुम्लाका साथै बाँके जिल्लाको नेपालगन्जलाई समेत खेलस्थलका रूपमा प्रस्ताव गरिएको छ। ।
प्रस्तावित विवरण अनुसार सुर्खेतमा एथलेटिक्स, कुस्ती, ब्याडमिन्टन, कबड्डी, बक्सिङ, कराते, बास्केटबल, फुल कन्ट्याक्ट कराते, क्रिकेट, फुटबल, ह्यान्डबल, हक्की, ई -स्पोट्र्स, स्क्वास, रग्बी, साइकलिङ, तेक्वान्दो, भलिबल, उसु र सेपाकताक्रो सञ्चालन हुनेछन् । यस्तै, शारीरिक सुगठन सुर्खेत र कालिकोटमा तथा जुडो सुर्खेत र जाजरकोटमा सञ्चालन गर्ने प्रस्ताव गरिएकाे छ भने जिम्न्यास्टिक सुर्खेत र दैलेखमा तथा भारोत्तोलन नेपालगन्ज र सुर्खेतमा सञ्चालन हुनेछ ।
सुर्खेतबाहिर सञ्चालन हुने खेलमा आईटीएफ तेक्वान्दो दैलेख, टेबल टेनिस सल्याण, बुद्धिचाल दैलेख, खो-खो पश्चिम रुकुमको चौरजहारी, सुटिङ नेपालगन्ज, पौडी नेपालगन्ज, टेनिस नेपालगन्ज र आर्चरी जुम्ला रहेका छन् । यसैगरी कर्णाली प्रदेशका विभिन्न जिल्लामा खेल सञ्चालन हुने भएकाले खेलाडी तथा पदाधिकारीको आवास, यातायात, खेल सामग्री, सुरक्षा, स्वास्थ्य र प्रतियोगिता सञ्चालनका लागि आवश्यक पूर्वाधार व्यवस्थापनलाई पनि प्राथमिकतामा राखिएको छ।
शिक्षा तथा खेलकुदमन्त्री एवं दशौं राष्ट्रिय खेलकुदको मूल आयोजक समितिका अध्यक्ष सस्मित पोखरेलको अध्यक्षतामा बसेको बैठकले प्रतियोगितामा सात प्रदेश, तीन विभागीय टोली र गैरआवासीय नेपाली संघ (एनआरएनए) गरी ११ टोलीको सहभागिता गराउने निर्णय गरेको थियो । बैठकमा कर्णाली प्रदेशका मुख्यमन्त्री मंगलबहादुर शाहीसहित सम्बन्धित निकायका पदाधिकारी तथा प्रतिनिधिको सहभागिता थियो ।
दशौँ राष्ट्रिय खेलकुद प्रतियोगिता यसअघि विभिन्न कारणले पटकपटक सर्दै आएको छ । प्रतियोगिता आयोजना हुन नसक्दा खेलाडीको तयारी, छनोट प्रक्रिया र खेलकुद गतिविधिमा समेत असर परेको थियो । यसपटक भने आयोजकले मंसिर १६ देखि २७ गतेसम्म प्रतियोगिता सञ्चालन गर्ने प्रतिबद्धता व्यक्त गरेका छन् । खेलस्थलको टुंगो लागेसँगै अब प्रतियोगिताका लागि आवश्यक पूर्वाधार, व्यवस्थापन र खेल सञ्चालनको तयारीलाई तीव्रता दिने बाटो खुलेको छ ।
आइतबार वीरेन्द्रनगरमा बसेको मूल आयोजक समितिको बैठकमा शिक्षा तथा खेलकुदमन्त्री पोखरेलले प्रतियोगिता निर्धारित मितिमै हुनेमा कुनै शङ्का नरहेको बताए । उनले प्रतियोगितालाई प्रभावकारी र उपलब्धिमूलक बनाउन सङ्घीय, प्रदेश र स्थानीय सरकारबीच समन्वय तथा सहकार्य आवश्यक रहेको उल्लेख गर्दै देशभरका खेलाडीलाई कर्णालीमा स्वागत गर्न सबै सरोकारवालालाई आह्वान गरे ।
कर्णाली प्रदेशका मुख्यमन्त्री मङ्गलबहादुर शाहीले प्रतियोगिताका लागि प्रदेश सरकारले बजेट विनियोजन गरेको जानकारी दिए । उनका अनुसार प्रदेश रङ्गशालाका लागि नौ करोड, खेल पूर्वाधारका लागि पाँच करोड र दशौँ राष्ट्रिय खेलकुद प्रतियोगिता सञ्चालनका लागि तीन करोड रुपैयाँ विनियोजन गरिएको छ । प्रतियोगिता निर्धारित समयमै सम्पन्न गर्न आवश्यक तयारी र व्यवस्थापनमा प्रदेश सरकारले प्राथमिकता दिएको उनको भनाइ छ ।
प्रतियोगितामा सहभागी हुने पाहुनालाई कर्णालीका पर्यटकीय क्षेत्र, सांस्कृतिक सम्पदा र स्थानीय जीवनशैलीसँग परिचित गराउन सके भविष्यमा आन्तरिक पर्यटन प्रवर्द्धनमा समेत सहयोग पुग्न सक्छ ।
१ लाख ११ राशीको भैरव पुरस्कारबाट रिजाल सम्मानित
Tags: No Comments
मकवानपुर । मकवानपुरका अग्रज साहित्यकार तथा हास्यव्यङ्गयकार आरसी रिजाल १ लाख ११ हजार राशीको भैरव पुरस्कार–२०८३ बाट सम्मानित हुनुभएको छ ।
आइतबार काठमाडौंमा भैरव पुरस्कार गुठीले एक लाख ११ हजार १११ रुपैयाँ नगदसहित रिजाललाई सम्मानित गरेको हो । भैरव अर्यालको ५० औं स्मृति दिवसको सन्दर्भमा मकवानपुरका रिजालसँगै अन्य दुई जना पनि सम्मानित हुनु भएको छ ।
भैरव वाङ्मय पुरस्कारबाट टेकवीर मुखिया सम्मानित हुनु भएको छ । यस्तै भैरव प्रतिभा पुरस्कारबाट देवीप्रसाद चापागाई सम्मानित हुनुभएको छ । मुखिया १ लाख १ हजार रुपैयाँ नगद तथा चापागाई ५१ हजार १११ रुपैयाँ नगदको उक्त पुरस्कारबाट सम्मानित हुनुभएको हो ।
रिजाल सिस्नुपानी नेपाल मकवानपुरका संस्थापक, साहित्य संगम मकवानपुरका पूर्वअध्यक्ष बुढ्यौली साहित्य समाज मकवानपुरका अध्यक्ष हुनुहुन्छ । हाँस्यव्यंग्यकार रिजालको हाँस्यव्यंग्य कृति समेत प्रकाशित छन् ।
भैरव पुरस्कार गुठीका अध्यक्ष रोचक घिमिरेको अध्यक्षता तथा भैरव अर्यालका छोरा दीपक अर्याल र छोरी रश्मि अर्यालको उपस्थितीमा काठमाडौंको गोकर्णेश्वर जोरपाटीस्थित भैरव स्मृति भवनको सभाकक्षमा सम्मान कार्यक्रम भएको हो ।