मकवानपुर । मकवानपुर क्षेत्र नं २ का प्रतिनिधि सभा सांसद बिरोध खतिवडाले राक्सिराङ गाउँपालिकालाई पूर्ण विद्युतीकरणको पहलकदमी लिएका छन् । नेपाल विद्युत प्राधिकरणमा सांसद खतिवडाको पहलमा चालू आर्थिक बर्षमै कार्यान्वयन हुनेगरी ६ करोड रुपियाँ बिनियोजन भएको छ ।
सीमान्तकृत चेपाङ जातिको बसोबास रहेको राक्सिराङ गाउँपालिकालाई विद्युतयुक्त गाउँपालिका बनाउने लक्ष्यका साथ पूर्ण विद्युतीकरणका लागि १५ करोड लाग्ने अनुमान गरिएकाे छ । तर अर्काे बर्ष समेत बजेट प्राप्त हुने गरी हाललाई नेपाल विद्युत प्राधिकरणले ६ करोड रुपियाँ कार्यान्वयनका लागि जिल्ला शाखमा अख्तियारी पत्र पठाएको खतिवडाले जानकारी दिए। ‘पूर्ण विद्युतीकरण यसै बर्ष गर्नका लागि मैले प्रयत्न गरेको थिएँ’, सांसद खतिवडाले भने – ‘कोभिड लगायतका कारणले बजेट यथेष्ट आउन सकेन, अब अर्काे बर्ष पूर्ण विद्युतीकरण हुने गरी काम गर्ने योजनामा छौँ ।’
‘केहीदिन अघि नेपाल विद्युत प्राधिकरण केन्द्रीय कार्यालयले राक्सिराङ गाउँपालिकामा विद्युतीकरणका लागि अख्तियारी पत्र पठाएको छ’ नेपाल विद्युत प्राधिकरण हेटौँडा बितरण केन्द्रका प्रमुख योगेन्द्र ठाकुरले भने- ‘अब लागत इस्टिमेट बनाएर ठेक्का प्रक्रियाय सुरु गरिहाल्छौँ ।’ राक्सिराङ गाउँपालिकाको पूर्ण विद्युतीकरणका लागि १५ करोड रुपियाँ लाग्ने लागतसहित यसअघि सांसद खतिवडाले गाउँपालिकाको माग निवेदन, प्राधिकरणको हेटौँडा बितरण केन्द्र र प्रदेश कार्यालयको सिफारिससहित नेपाल विद्युत प्राधिकरण केन्द्रीय कार्यालयमा पहल गरेका थिए । राक्सिराङका बिजुली नपुगेका ४ वटा वडामा पूर्ण विद्युतीकरण र अन्य वडामा काठको पोल बिस्थापन र आंशिक बिजुली बिस्तारको लागत इष्टिमेट बनाइएर माग सहित पेश गरिएकाे थियो ।
ट्रक र ट्याक्टर ठोक्किदा एक जनाकाे मृत्यु, तीन जना घाइते
Tags: No Comments
मकवानपुर । हेटौंडा १५ चुरियामाई नजिक ट्रक र ट्याक्टर ठोक्किदा एकको मृत्यु भएको छ भने तीनजना सामान्य घाइते भएका छन् । पूर्व पश्चिक राजमार्ग अन्तर्गत चुरियामाइमा बाराबाट हेटौंडा तर्फ आउँदै गरेको ना ५ ख ४१६४ नम्बरको ट्रक र हेटौंडाबाट पथलैयातर्फ जाँदै गरेको ना ३ त ६९३१ नम्बरको ट्याक्टर आपसमा ठोक्किएर दुर्घटना भएको हो ।
दुर्घटनामा ट्याक्टर चालक बारा परवानिपुर गाँउपालिका वडा नं १ का २२ वर्षिय लालबाबु यादबकाे मृत्यु भएकाे हाे । दुर्घटनापछि हेटौंडा अस्पतालमा उपचारको क्रममा मृत्यु भएको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक ईन्द्रबहादुर रानाले जानकारी दिए । ट्याक्टरका सहचालक सोहि स्थानका १७ बर्षिय दिपेन्द्र कुमार मण्डल घाइते भएका छन् भने उनकाे अवस्था सामान्य रहेको छ ।
बाराबाट हेटौंडा चामल लिएर आउँदै गरेकाे ट्रकका चालक घनुषा जिल्ला मिथिला नगरपालिका वडा नं ५ बस्ने बर्ष ३८ का गंगाराम महत्तो र सहचालक जिल्ला सिरहा कल्याणपुर नगरपालिका–८ का अभि साह सामान्य घाइते भएका छन् । घाइतेको हेटौंडा अस्पतालमा उपचार गरिएको छ ।
मकवानपुर । निजामती कर्मचारीहरूको आधिकारिक ट्रेड युनियनको निर्वाचनका लागि नियुक्त सबै विभागीय र जिल्लाका निर्वाचन अधिकृतहरूलाई २०७७ मङ्सिर २७ गते हुने अर्को निर्वाचनसम्म निरन्तरता दिइने भएकाे छ । प्रमुख निर्वाचन अधिकृतको कार्यालयबाट ट्रेड युनियनको निर्वाचनका लागि विभागीय र जिल्लाका निर्वाचन अधिकृतहरूलाई निरन्तरता दिने निर्णय भएकाे हाे ।
प्रमुख निर्वाचन अधिकृतको कार्यालयले आइतबार गरेको निर्णयअनुसार निर्वाचन अधिकृतहरूलाई २०७७ मङ्सिर २७ गते हुने अर्को निर्वाचनसम्म निरन्तरता दिने निर्णय गरेको हो । नियुक्त निर्वाचन अधिकृतहरूले आफ्नो सरुवा, काज सरुवा वा अन्य कारणले जिम्मेवारी हेरफेर भएमा प्रमुख निर्वाचन अधिकृतको कार्यालयमा जानकारी गराउन र प्रमुख निर्वाचन अधिकृतले नियुक्त गरेका अन्य कर्मचारीहरूलाई आजैका मितिदेखि लागू हुने गरी फिर्ता गर्न समेत भनेको छ ।
त्यस्तै निर्वाचन कार्यालयको बोर्ड, स्टाम्प, कोठा, मतदाता नामावलीलगायतका निर्वाचन सम्बन्धी स्रेस्ता एवं सामाग्री आगामी निर्वाचनको लागि पुनः प्रयोगमा ल्याउने गरी सुरक्षित राख्नसमेत भनेको छ ।
निजामती कर्मचारीहरूको आधिकारिक ट्रेड युनियनको निर्वाचन असोज २४ गते हुने गरी तयारी गरिएकाे भए पनि निर्वाचन अनिश्चितकालका लागि स्थगित गर्दै ‘अर्को निर्वाचन नहुन्जेलसम्म आधिकारिक ट्रेड युनियनको समय २०७८ वैशाख मसान्तसम्म थप्ने’ असाेज ६ गतेकाे मन्त्रिपरिषद् बैठकले निर्णय गरेकाे थियाे । तर सरकारले साे निर्णय सच्याउँदै मङ्सिर २७ गते निजामती कर्मचारीहरूको आधिकारिक ट्रेड युनियनको निर्वाचन तोकेकाे छ।
मकवानपुर । जनरल इन्स्योरेन्स कम्पनी (GIC) को आईपीओमा पहिलो दिन नै मागभन्दा बढी आवेदन परेको छ । कम्पनीको आईपीओमा आइतबार ५ बजेसम्म करिब साढे ३२ लाख कित्ता शेयरको लागि आवेदन परेको हो ।
शेयर निष्काशक तथा बिक्री प्रबन्धक एनआईविएल एस क्पापिटलका अनुसार कम्पनीको आईपीओमा ९७ हजार १ सय ७० वटा आवेदनबाट ३२ लाख ४४ हजार ६३० कित्ता शेयरको लागि आवेदन परेको छ । यो कम्पनीले सर्वसाधारणको लागि निष्काशन गरेको २७ लाख ३० हजार कित्ता भन्दा ५ लाख १४ हजार ६३० कित्ता बढी हो ।
कम्पनीले आइतबार एक सय रुपैयाँ अंकित दरका ३० करोड रुपैयाँ बराबरको ३० लाख कित्ता आईपीओ निष्काशन तथा बिक्री खुला गरेको थियाे । कम्पनीले निष्काशन गरेको कुल शेयरमध्य ४ प्रतिशत अर्थात १ लाख २० हजार कित्ता संस्थाका कर्मचारी र ५ प्रतिशत अर्थात १ लाख ५० हजार कित्ता म्युचुअल फण्डहरुका लागि छुटयाइएको छ । सर्वसाधारणले बाँकी २७ लाख ३० हजार कित्ता शेयरका लागि आवेदन दिन सक्ने बताइएकाे छ ।
कम्पनीको शेयरमा आवेदन गर्नेको चाप बढेपछि मेरो शेयरमा कार्यालय समयमा समस्या समेत देखिएको थियो । मेरो शेयरमा समस्या आएपनि कम्पनीको आईपीओ आबेदन गर्नेको संख्या उच्च देखिएको हो । कम्पनीको आईपीओमा पहिलो दिननै माग भन्दा बढी आवेदन परेकोले असोज १४ गतेसम्म मात्रै आवेदन दिन सकिनेछ ।
कम्पनीको आईपीओमा प्रतिशेयर १०० रुपैयाँका दरले न्युनतम १० कित्तादेखि १० हजार कित्तासम्मको लागि आवेदन दिन सकिनेछ। नेपाल धितोपत्र बोर्डबाट अनुमति प्राप्त आश्वा सदस्य बैंक तथा वित्तीय संस्थाहरू र मेरो शेयरबाट पनि आईपीओमा आवेदन दिन सकिने व्यवस्था छ।
मकवानपुर् । देशकै ऐतिहासिक र सबैभन्दा ठूलो गढी मकवानपुरगढीको नाममा साप्ताहिक पत्रिका प्रकाशनमा आएको छ । मकवानपुरगढी गाउँपालिका क्षेत्रका घटना र विचारलाई समेट्दै हरेक हप्ता आइतबार पत्रिका प्रकाशन हुने बताइएको छ ।
आइतबार गाउँपालिका अध्यक्ष बिदुर हुमागाईं, उपाध्यक्ष हर्कमाया रुम्बा, प्रमुख प्रशासकीय अधिृकत रामकुमार पुडासैनीले पत्रिका लोकार्पण गरेका हुन । पत्रिका प्रकाशनलाई निरन्तरताको शुभकामना दिँदै जनताका वास्तविक पिर, मर्का थाहा पाउने र गाउँपालिकाले गरेका काम, कारबाहीका बारेमा स्थानीयलाई सूसुचित गराउन पत्रिकाले भूमिका खेल्ने अध्यक्ष हुमागाईंले विश्वास व्यक्त गरे । ‘मकवानपुरगढीको विकास उदाहरणीय भएको छ’ पत्रिका लोकार्पण गर्दै अध्यक्ष हुमागाईंले भने ‘जति विकासको काम गर्न सकिएको छ,सबै उदाहरणीय छन् ।’
भौगोलिक विकटतालगायतका कारण अधिकांश गाउँपालिकाबासी सूचनाबाट बञ्चित हुनुपरेको अवस्थाले मकवानपुरगढी पत्रिका जन्मिएको छ । गाउँपालिकका ८ वटै वडामा पत्रिका वितरण हुनेछ । रेवतीप्रसाद तिमल्सिनाद्वारा प्रकाशित पत्रिकाको लागि सम्पादक कबिराज हुमागाईं, सहसम्पादक श्रीराम अर्जुन रहेका छन् । कार्यक्रमममा बोल्दै प्रकाशक तिमल्सिनाले भैगोलिक रुपले विकट क्षेत्रमा साप्ताहिक पत्रिका प्रभावकारी हुने बताए ।
प्रकाशक तिमल्सिनाको अध्यक्षता र गाउँपालिक अध्यक्ष हुमागाईंको प्रमुख आतिथ्यतामा भएको पत्रिका लोकापर्ण कार्यक्रममा प्रेस संगठनका बागमती प्रदेश सहसंयोजक सुनिल खड्का, शिक्षा पत्रकार समूह प्रदेशका अध्यक्ष ध्रुव अधिकारी, नेपाल पत्रकार महासंघ मकवानपुरका कोषाध्यक्ष सुदीप शिवाकोटी तथा गाउँपालिकाका शाखा प्रमुखहरुको आतिथयता रहेको थियो ।
यस अघि गाँउपालिकाबाट रेडियाे मकवानपुरगढी प्रशारण हुँदै अाएकाे छ ।