मकवानपुर / काेराेना संक्रमणकालमा उपभाेग्य वस्तुकाे मूल्य आकाशिएकाे छ । मुल्य बढेपछि हैरान भएका उपभाेक्ताहरूलाई राहत दिने लक्ष्यका साथ सरकारले आज विहीबारबाट सुपथ मूल्य पसल सञ्चालनमा ल्याउने तयारी गरेकाे छ ।
दशैँ, तिहार र छठ पर्वलाई लक्षित गरेर सरकारले विगतमा जस्तै आज विहीबारदेखि सुपथ मूल्य पसल खोल्ने भएको हाे । खाद्य व्यवस्था तथा व्यापार कम्पनी लिमिटेड र साल्ट ट्रेडिङ कर्पोरेशनका देशभर रहेका कार्यालय, डिपो र डिलर तथा घुम्ती सेवामार्फत सुपथ मूल्य पसल सुरु हुने उद्योग वाणिज्य तथा आपूर्ति मन्त्रालयले जनाएको छ ।
काेराेना संक्रमणकालमा उपभाेक्ताले आवश्यक सामग्रीहरू अनलाइन अर्डरमार्फत पनि सुपथ मूल्य पसलका खरिद गर्न सकिनेछ । सुपथ मूल्य पसलका सामग्री काठमाडाै उपत्यकाका कालीमाटी, कोटेश्वर, टेकु, सिंहदरबार, सतुङ्गल, थापाथली, नख्खु, प्रयाग पोखरी, जावलाखेल र भक्तपुरका साथै देशभरका ४९ ठाउँमा खोलिने मन्त्रालयले जनाएको छ । यस्तै दुग्ध विकास संस्थानले पनि आफ्ना सबै कार्यालय र बिक्री केन्द्रबाट सुपथ मूल्यमा दुग्धजन्य वस्तुको बिक्री गर्नेछ ।
यस्तो छ मूल्य र छुट रकम
नुन प्रतिकिलो १८ रुपैयाँका दरले खरिद गर्न सकिनेछ । तर प्रति परिवार चार किलोका दरले मात्रै खरिद गर्न पाइनेछ । यस्तै चिनी प्रतिकिलो ७० रुपैयाँमा खरिद गर्न सकिनेछ । प्रति परिवार चार किलोका दर तोकिएको छ ।
सरकारले चामलमा प्रतिकिलो पाँच रुपैयाँ छुट दिएको छ । यस्तै खसी,बोका, च्याङ्ग्रामा प्रतिकिलो १० रुपैयाँ, दालमा प्रतिकिलो पाँच रुपैयाँ, सिमीमा प्रतिकिलो १० रुपैयाँ, फापरमा प्रतिकिलो पाँच रुपैयाँ र सेतो केराउमा प्रतिकिलो पाँच रुपैयाँ छुट दिइएको मन्त्रालयले जनाएको छ । सुपथ पसल छठ पर्वकाे भाेलिपल्टसम्म सञ्चालन हुने विज्ञप्तिमा भनिएकाे छ ।
हेर्नुहाेस् विज्ञप्ती

सनराइजर्स हैदरावादले दिल्ली क्यापिटल्सलाई १५ रनले हराउँदै आईपीएल क्रिकेटमा जीतको खाता खोलेको छ ।
हैदरावादले दिल्लीको सामु जितका लागि १६३ रनको लक्ष्य दिएको थियो । जवाफमा दिल्लीले निर्धारित २० ओभरमा ७ विकेटको क्षतिमा १४७ रन मात्रै बनाउन सक्यो ।
राशिद खानले १४ रन खर्चेर ३ विकेट र भुवनेश्वर कुमारले २५ रन खर्चेर २ विकेट लिए । अन्तिम ओभरमा दिल्लीलाई जितका लागि २८ रन आवश्यक परेको थियो तर महत्वपूर्ण यो ओभरमा १२ रन मात्रै जोड्न सक्यो ।
१० ओभरमा दिल्लीले जम्मा ५४ रन बनाउन सकेको थियो । १२ औं ओभरमा राशिद खानले नै शिखर धवनलाई पनि पेभेलियन फर्काए । उनले ३१ बलमा चार चौकाको मद्दतमा ३४ रन बनाए ।
अप्ठ्यारोमा देखिएको दिल्लीको टिमलाई ऋषभ पन्तले सम्हाले । १३ औं ओभरमा उनले अभिषेक शर्माको बलमा दुई छक्का प्रहार गरे । शर्मालाई शिमरान हेटमायरले साथ दिएका थिए । उनले पनि १५ औं ओभरमा खलिल अहमदको बलमा लगातार दुई छक्का प्रहार गरे । यसका साथ दिल्लीले एक सय रन पूरा गर्यो ।
हेटमायर आउट भएपछि क्रिजमा आएका मार्कस स्टोइनिसले चौकाको साथमा रनको खाता खोले । १७ औं ओभरमा राशिद खानले ऋषभ पन्तलाई आउट गरे । पन्तले २७ बलमा दुई छक्का र दुई चौकाको मद्दतमा ३२ रन बटुले । राशिद खानले यस ओभरमा केबल ५ रन बनाए । ओभरको पहिलो पाँच बलमा केबल सात रन खर्चिएका नटराजनले अन्तिम बलमा स्टोइनिसलाई आउट गरे । स्टोइनिसले केबल ११ रन बनाउन सके ।
अन्तिम दुई ओभरमा दिल्लीलाई अब ३७ रन आवश्यक थियो तर नौ रन मात्र बटुल्न सक्यो ।
यसअघि टस हारेर ब्याटिङ थालेको हैदरावादले निर्धारित २० ओभरमा १६२ रनको योगफल तयार पारेको थियो । हैदरावादका कप्तान डेभिड वार्नर र जोनी बेयरस्टोले सुरुमा सम्हालिएर खेले । पहिलो पाँच ओभरमा केबल २४ रन बन्यो । बेयरस्टोले अमित मिश्राको बलमा छक्का प्रहार गरे ।
छैटौं ओभरमा एनरिज नोर्जेको बलमा एक छक्का र एक चौका प्रहार गरेर वार्नरले रन बटुल्ने संकेत गरे । यस ओभरमा हैदरावादको स्कोर ५० रन नाघ्यो ।
नवौं ओभरमा वार्नरले एक छक्का प्रहार गरे । तर यसै ओभरको तेस्रो बलमा वार्नर आउट भए । आउट हुनुअघि उनले ३३ बलमा ४५ रन जोडेका थिए । अमित मिश्राले फेरि मनिष पाण्डेलाई कागिसो रबाडाबाट क्याचआउट गराए । पाण्डेले ३ रन मात्र बनाउन सके ।
चौथो नम्बरमा ब्याटिङमा आएका विलियम्सनले १६ औं ओभरमा नोर्जेको बलमा लगातार दुई चौका प्रहार गरे । १७ औं ओभरमा उनले मार्कस स्टोइनिसको बलमा पनि लगातार दुई चौका हाने ।
१८ औं ओभरको पहिलो बलमा बेयरस्टोले दुई रन बटुलेर आफ्नो अर्धशतक पूरा गरे । पाँचौं बलमा भने रबाडाले उनलाई पेभेलियनको बाटो देखाइदिए । ४८ बल सामना गरेका बेयरस्टोले दुई चौका र एक छक्काको मद्दतमा ५३ रन बनाए । केन विलियम्सनले २० औं ओभरमा ४१ रन बनाएर रबाडाको शिकार बने । २६ बलमा उनले पाँच चौका हाने । अब्दुल समद ७ बलमा १२ रन बनाएर नटआउट रहे ।
दिल्लीका सबैभन्दा कम रन दिने बलर रबाडा रहे । उनले चार ओभरमा केबल २१ रन खर्चिएर दुई विकेट पनि लिए । अमित मिश्राले पनि चार ओभरमा ३५ रन खर्चिएर दुई विकेट लिए ।
कृषकका लागि आत्मनिर्भर कार्यक्रम सञ्चालन
Tags: No Comments
मकवानपुर । ग्रामिण स्तरका कृषकहरुलाई आत्मनिर्भर मात्र नभई स्वराेजगारमुलक बनाउन महिला सशक्तिकरण तथा गरिवी निवारण समूह नेपालले वकैया गाउँपालिकामा विभिन्न कार्यक्रमहरु संचालन गरेकाे छ ।
सिंचाइकाे उचित प्रबन्ध भएकाे तथा कृषि पेशाबाट आफ्नाे जीवनस्तर उकास्न खाेज्ने बकैया ९ च्याउच्याउ र ४ नं वडाका कृषकहरुलाई संस्थाले साेमबार उन्नत जातकाे तरकारीका विरुवाहरु प्रदान गरेकाे छ । उन्नत जातका काउलि, वन्दा, गाेलभेडा, खुर्सानि लगायतका ४० हजार थान तरकारिका बिरुवा तथा अन्य आवश्यक कृषि सामाग्रि वितरण गरेकाे छ ।

COVID-19 Response and Socio-economic Recovery project अन्तर्गत संचालित कार्यक्रममा कृषकहरुलाइ साेमबार नै हजारि, स्प्रे, कम्पाेष्ट मल १०० वाेरा लगायतका कृषि सामाग्रि वितरण गरेकाे हाे । युएनडिपि तथा बकैया गाँउपालिकाकाे संयुक्त लगानी तथा संस्थाकाे आयाेजनामा भएकाे कार्यक्रममा संस्थाकी अध्यक्ष इन्दिरा न्याैपानेले उर्जाशिल कृषकहरुका लागि काम गर्न पाउँदा खुसि भएकाे बताइन। उनले कृषकहरुलाई आत्मवल बढाउँदै परिणाममुखी काम गरेर नमुना गाउँकाे रुपमा विकास गर्न हाैसला प्रदान गरिन ।
यस अघि संस्थाले वकैया गाउँपालिकाका साेहि स्थानमा कृषक समुहका लागि आँप, कटहर, लिचि, स्वेजन लगायतका विरुवाहरु वितरण गरेकाे थियाे । साथै साविक धियाल गाविसका कृर्षकहरुका लागि समेत उन्नत जातका वाख्रा प्रदान गरेकाे थियाे । कार्यक्रममा समूह नेपालकी अध्यक्ष ईन्दिरा न्याैपान, वकैया ९ का वडाध्यक्ष टंक ध्वज लाेप्चन , वकैया कार्यपालिका सदस्य लक्ष्मि माझी, कृषि प्राविधिक भिम तिमल्सिना, संस्थाका सदस्य कृष्ण प्रसाद घिमिरे स्थानिय कृषकहरुकाे सहभागिता रहेकाे थियाे ।
मकवानपुर । नेपाल सुनचाँदी व्यवसायी महासंघको बागमती प्रदेश सभापतिमा हेटौंडाका व्यवसायी ज्योतिरत्न बज्राचार्य निर्वाचित भएका छन् । बज्राचार्यको नेतृत्वमा १३ सदस्यीय प्रदेश समिति सर्वसम्मत चयन गरिएको छ । साेमबार हेटौंडामा भएको अधिवेशनबाट बागमती प्रदेशको प्रथम सभापतिको रुपमा बज्राचार्य तथा प्ररदेश समिति सर्वसम्मत निर्वाचित भएका हुन ।
अधिवेशनले उपसभापतिमा टेकबहादुर बिश्वकर्मा र रत्नसुन्दर शाक्य, सचिवमा रोहिणा देवी शाक्य र किरण भाई बज्राचार्य, कोषाध्यक्षमा रमेश बहादुर शाक्य र सहसचिवमा विवुषा शाक्य र सहकोषाध्यक्षमा उमेश रत्न शाक्य निर्वाचित हुनुभएको छ । यस्तै सदस्यमा मणि कुमार बिश्वकर्मा, रविन्द्र कुमार खाती, भीमराज बज्राचार्य, सुसन शाक्य, गोकर्ण न्यौपाने र उजिना शाक्य निर्वाचित भएका छन् ।
नेपाल सुनचाँदी व्यवसायी महासंघको बागमती प्रदेश समितिको तदर्थ समितिका सभापति दियेश रत्न शाक्यको अध्यक्षतामा अधिवेशनको उद्घाटन कार्यक्रम भएको थियो । नेपाल सुनचाँदी व्यवसायी महासंघका निवर्तमान अध्यक्ष मणिरत्न शाक्यको प्रमुख आतिथ्यमा भएको कार्यक्रममा नेपाल सुनचाँदी व्यवसायी महासंघका वरिष्ठ उपाध्यक्ष माणिक रत्न शाक्यको विशेष आतिथ्य रहेको थियो ।
मकवानपुर । मकवानपुरका दुई ठुला विद्यार्थी संगठनहरुल पछिल्लो समय मकवानपुरका निजी विद्यालय र कलेजले अनलाईन कक्षाका नाममा विद्यार्थीहरुसंग चर्को शुल्क असुलेको भन्दै आउँदो असोज १५ गतेदेखि आन्दोलन गर्ने भएका छन् ।
सोमबार हेटौंडामा सत्तारुढ नेकपा निकट अनेरास्ववियू र नेपाली कांग्रेस निकट नेविसंघले संयुक्त पत्रकार सम्मेलन गर्दै आन्दोलनका कार्यक्रमहरु सार्वजनिक गरेका हुन । विद्यार्थी संगठनहरुले गत भदौ २९ गते हेटौंडा उपमहानगरपालिका र जिल्ला शिक्षा समन्वय ईकाइ हेटौंडालाई र असोज ७ गते जिल्ला प्रशासन कार्यालय मकवानपुरमा ध्यानाकर्षण पत्र बुझाएका थिए । हालको अवस्थाको मध्यनजर गर्दै पत्र बुझाएता पनि बेवास्ता गरेको भन्दै आन्दोलनको कार्यक्रम सार्वजनिक गरेको बताए ।
संघर्षका कार्यक्रम सार्वजनिक गर्दै अनेरास्ववियू मकवानपुरका संयोजक किशन घिसिङले कुनै पनि शैक्षिक संस्थाले अनलाईन कक्षाको नाममा चर्को शुल्क उठाउनु अवैधानिक भएको बताए । उनले सरकारी नीति विपरित स्कुल तथा कलेजहरुले विद्यार्थी तथा अभिभावकहरुलाई शुल्क तिर्न बाध्य पारेको बताए ।
विद्यार्थी संगठनहरुले सार्वजनिक गरिएको संघर्षका कार्यक्रम अनुसार असोज १५ गते विहान ११ बजेदेखि १२ बजेसम्म हेटौंडा उपमहानगरपालिकाको शिक्षा महाशाखा घेराऊ गर्ने, असोज १६ गते ११ बजेदेखि १२ बजेसम्म हेटौंडा उपमहानगरपालिकाको गेटमा कालोपट्टि बाधेर धर्ना दिने, असोज १८ गते सम्पुर्ण शैक्षिक संस्थाको लेखा शाखामा ताला लगाउने र असोज १९ गते हेटौंडाको बुद्धचोकमा संर्घषका कार्यक्रमकाबारे प्ले कार्डसहित सचेतनामुलक प्रदर्शन गर्ने लगायतका कार्यक्रम रहेको नेविसंघ मकवानपुरका सभापति राजु खतिवडाले जानकारी दिए ।
