मकवानपुर । महिलाले महिनावारीकाे समयमा प्रयोग गर्ने सेनेटरी प्याड सर्वसुुलभ मुल्यमा उपलब्ध गराउने राज्यको दायित्व हुनुपर्ने भन्दै बहस चलिरहेको बेला मकवानपुरको बकैया गाउँपालिकाले भने गाउँपालिका भरका विद्यालयहरुमा निशुल्क सेनेटरी प्याडको व्यवस्था गरेको छ ।
महिनावारीको समयमा प्रयोग गरिने स्यानिटरी प्याडको मूल्यमा सरकारले कर लगाएकाेमा महिला सम्बद्ध संस्थाहरुले विराेधमा प्रदर्शन गरेका छन् । पछिल्लो समय देशभर सेनेटरी प्याडमा लगाएकाे कर हटाउने र निशुल्क गर्नपर्ने माग सहित दैनिक महिला र पुरुष सहभागी भएर विराेध प्रदर्शन तथा सरकारलाई ज्ञापनपत्र बुझाउदै आएका छन् । तर वकैया गाउँपालिकाले भने निशुल्क सेनेटरी प्याडकाे व्यवस्थाका लागि सेफ्टी सेनेटरी प्याड भेन्डिङ मेसिन जडान गर्न थालेकाे छ ।
असाेज १० गते आइतबार हात्तीसुँडेस्थित गाउँपालिका कार्यालयमा मेसिन जडान गरी परीक्षण गरिएको हो । विद्यालयमा निःशुल्क सेनेटरी प्याड वितरणलाई सरल, सहज र व्यवहारिक गराउन मेसिन जडान गर्न लागिएको गाउँपालिकाले जनाएकाे छ । मेसिनमा दुई रुपैयाँको सिक्का राखेर प्याड लिन सकिनेछ । प्याड निःशुल्क वितरण गरिने हुँदा मेसिनमै सुरक्षित रहने उक्त सिक्कालाई प्रयोगकर्ताले पुनः प्रयोग गर्नेछन् । साथै, प्रयोग गरिसकेको प्याड नजिकै जडान गरिएको डिस्पोजल मेसिनबाट नष्ट गर्न सक्ने व्यवस्था समेत मिलाइएको छ ।
गाउँपालिकाले गत आर्थिक वर्षको योजना अन्तर्गत विद्यालयमा ‘महिनावारीले सफलता नछेकोस्’ भन्ने हेतुका साथ गाउँपालिका अन्तर्गतका सबै माध्यमिक विद्यालयहरुमा मेसिन राख्न लागिएको बकैया गाउँपालिकाकी उपाध्यक्ष सरला बोलखेले जानकारी दिइन् । ‘गाउँपालिकाले अघिल्लो आर्थिक वर्षमा १७ वटा सेनेटरी प्याड भेन्डिङ मेसिन खरिद गरेको थियो’ बाेलखेले भनिन् ‘कोरोना संक्रमणको कारण जडान नभएकाले मेसिन जडान गर्न लागिएको हो ।’
बालमैत्री गाउँपालिका घोषण भएसंगै छात्राहरु महिनावारी हुँदा प्याडकै अभावले विद्यालय छुटाउन नपरोस भन्ने हेतुले विद्यालयमा निशुल्क सेनेटरी प्याडको व्यवस्था गरिएको उपाध्यक्ष बोलखेले बताइन् । महिनावारी हुँदा छात्राहरुले विद्यालय छाेडनु पर्ने अवस्थाकाे अन्त्य गर्न निशुल्क सेनेटरी प्याड व्यवस्था गरेको बाेलखेले बताइन् ।
गाउँपालिकाका रहेका ११ वटा मावि र बाकि विद्यालयमा ५ वटा मेसिन तत्काल केहि दिनमै जडान गरिने गाउँपालिकाले जनाएको छ । गाउँपालिकाले गत आर्थिक वर्षको १९ लाख ७० हजार बजेटकाे ठेक्का सूचना अनुसार उक्त योजनामा ११ लाखमा ठेक्का परेसंगै गाउँपालिकाले सेफ्टी सेनेटरी प्याड भेन्डिङ मेसिन खरिद गरेको थियो ।
कर खारेजकाे मागः महिनावारीको समयमा प्रयोग गरिने स्यानिटरी प्याडको मूल्यमा सरकारले लगाएको करको विरोधमा हेटौंडामा भएकाे विरोध प्रदर्शन छ। अनेरास्ववियु मकवानपुर महिला विभागले जिल्ला प्रशासन कार्यालय अगाडी विरोध प्रदर्शन गरेको हो । प्रदर्शनकारीहरूले सरकारसँग १० प्रतिशत भन्सार शुल्क र १३ प्रतिशत भ्याट प्याड तथा अन्य उत्पादनमा लगाइएको कर खारेजीको माग गरेका हुन्।


मकवानपुर । नेकपा (एकीकृत समावादी) को केन्द्रीय कमिटीमा मकवानपुरका ४ नेता समेटिएका छन् ।
नेकपा एमाले विभाजन भएर बनेको एकीकृत समाजवादीमा मकवानपुरबाट केदार न्यौपाने, विरोध खतिवडा, ललित बस्नेत र मुनु सिग्देल केन्द्रीय कमिटीमा समेटिएका हुन् । हालै बसेको एकीकृत समाजवादीको केन्द्रीय कमिटी बैठकले मकवानपुरका चारै नेतालाई विभिन्न जिम्मेवारी समेत दिएकाे छ ।
न्यौपानेलाई पार्टी उपाध्यक्ष एवम् बागमती प्रदेश इञ्चार्जकाे जिम्मेवारी दिइएकाे छ भने प्रतिनिधि सभा सदस्य समेत रहेका खतिवडा स्थायी कमिटी सदस्य भएका छन् । पार्टी सरकारमा सहभागी भए खतिवडा यसपटक मन्त्री हुने समेत पक्कापक्की भएकाे बताइएकाे छ । एमालेको मजदुर संगठनका प्रभावशाली नेता तथा एमालेका पूर्व केन्द्रीय सदस्य ललित बस्नेत एकीकृत समाजवादीमा पोलिट ब्युरो सदस्य भएका छन् । उनलाई मकवानपुर इञ्चार्जको भूमिका पनि दिइएको छ ।
यस्तै, एमाले मकवानपुर अध्यक्ष रहनु भएका मुनु सिग्देल एकीकृत समाजवादीको केन्द्रीय सदस्य तथा मकवानपुर सहइञ्चार्ज हुन भने बागमती प्रदेश सभामा एकीकृत समाजवादीको प्रमुख सचेतक पनि रहेकी छिन् ।
मकवानपुर ।मकवानपुर प्रहरीले सुन व्यवसायीलाई अपहरण गरेको आरोपमा ४ जनालाई पक्राउ गरेको छ । असोज १० गते आइतबार बिहान ९ बजेकाे समयमा हेटौंडा–१० बासुदेव मार्गमा जे.एस. सुनचाँदी पसल सञ्चालन गर्दै आएका अन्दाजी ४० बर्षीय जितेन्द्र बिश्वकर्मालाई अपहरण गरेको आरोपमा प्रहरीले ४ जनालाई पक्राउ गरेको जनाएको छ ।
हेटौंडा उपमहानगरपालिका वडा नम्बर ११ घर भई सुनचाँदी पसल सञ्चालन गर्दै आएका बिश्वकर्मालाई अपहरण गरेकाे आराेपमा हेटौंडा–१० का ३९ बर्षीय बिनोदलाल श्रेष्ठ, ३० बर्षीय अनिल लामा, हेटौंडा–५ का ३२ बर्षीय बुद्ध लामा र हेटौंडा–२ का २७ बर्षीय आदेश लामा पक्राउ परेका जिल्ला प्रहरी कार्यालय मकवानपुरका प्रवक्ता एवं प्रहरी नायब उपरिक्षक जयश्वर रिमालले जानकारी दिए ।
बा २० च ८९६० नम्बरको सेतो कारमा आएका अपरिचित व्यक्तिहरुले विश्वकर्मालाई अपहरण गरी लगेको भन्ने सूचनाको आधारमा खोजतलास गर्दा हेटौंडा–५ स्थित मकवानपुर रिकभरिङ समूहको कार्यालय अगाडीबाट उनीहरुलाई असाेज १० गते आइतबार विहान ११ः४० बजेकाे समयमा नियन्त्रणमा लिइएको प्रहरी प्रवक्ता रिमालले जानकारी दिए ।
अपहरणमा परेका विश्वकर्मालाई अपहरणुक्त गरी उक्त कार्यमा संलग्न रहेका ४ जना माथी थप अनुसन्धान प्रकृया अगाडी बढाइएको प्रहरी जनाएको छ ।
मकवानपुर । नेकपा (एकीकृत समावादी) पार्टी मकवानपुरले सचिवालय र विभाग गठन गरेको छ । आइतबार बसेको पार्टीको पहिलो जिल्ला कमिटी बैठकले पार्टीकाे कामलाई चुस्तदुरुस्त बनाउन पदाधिकारीसहितको सचिवालय गठन गरेको हो ।
अध्यक्ष श्रीधर पोखरेल, उपाध्यक्ष मीना लामा, सचिव विष्णु दाहाल, उपसचिव जीवन लामा, कार्यालय सचिव तिलक अधिकारीसहित सदस्यहरु रहेको ४९ सदस्यीय सचिवालय गठन गरेको पार्टीले जनाएकाे छ ।
यस्तै, पार्टीको प्रचार विभाग प्रमुखमा रामकुमार एलन र आर्थिक विभाग प्रमुखमा टीपी रुपाखेतीलाई जिम्मेवारी दिने निर्णय गरेको छ ।
यसैबीच नेकपा (एकीकृत समावादी) मकवानपुरले असोज २५ गते बडादशैँ, दीपावली, नेपाल सम्वत् अवसर पारेर हेटौँडा शुभकामना आदानप्रदान तथा चियापान गर्ने भएको छ ।
असाेज ९ गते आइतबार हेटौँडामा बसेको पार्टीको पहिलो बैठकले नेपालीहरुकाे चाड बडादशैँ लगायतका मुख्य पर्वकाे अवसर पारेर शुभकामना आदानप्रदान तथा चियापान गर्ने निर्णय गरेको हो ।
नेकपा (एकीकृत समाजवादी)का अध्यक्ष श्रीधर पोखरेलको अध्यक्षता एवम् पार्टी स्थायी कमिटी सदस्य विरोध खतिवडाको प्रमुख आतिथ्यतामा बैठक भएको हो ।