मकवानपुर । मकवानपुरकाे मनहरी गाउँपालिकाले १ वर्षकाे प्रगति विवरण सार्वजनिक गरेकाे छ । स्थानीय तह निर्वाचन २०७९ बाट निर्वाचित पदाधिकारीहरुकाे कार्यकाल १ वर्ष पुगेमा प्रगति विवरण सार्वजनिक गरेकाे हाे । गत वर्ष जेठ ५ गते पदभार ग्रहण गरेका जनप्रतिनिधिहरुकाे १ वर्ष कार्यकालकाे प्रगति विवरण सोमबार एक कार्यक्रमका विच सार्वजनिक गरिएकाे हाे ।
२०७९ सालकाे स्थानीय तहकाे निर्वाचन भएका जनप्रतिनिधिहरुले सार्वजनिक जवाफदेहितालाई महत्व दिदै गाउँपालिका कार्यालय र पालिकाका ९ वटै वडा कार्यालयबाट चुस्त रुपमा सेवा प्रवाह भइरहेकाे प्रगति विवरण सार्वजनिक कार्यक्रममा बताइएकाे छ ।
यसैगरी नेपालको संविधान तथा स्थानीय सरकार संचालन ऐन २०७४ स्थानीय सरकारलाई दिएकाे एकल अधिकार र ती अधिकार क्षेत्र भित्र रहेर निर्वाचित जनप्रतिनिधिहरुबाट घरदैलोमा सेवा प्रवाह लगायत विकास क्रियाकलाप संचालन गरिएकाे पालिकाले जनाएकाे छ ।
मनहरी गाउँपालिकाले सार्वजनिक गरेकाे १ वर्षकाे प्रगति विवरणको भिडियो हेर्नुहाेसः
मकवानपुर । चाहाना गरियाे भने संभावनाकाे बाटाहरु प्रसस्तै छन् । सबै प्रकारका श्रमको सम्मान गर्नुपर्ने बहस बेलाबेलामा चल्ने गरेको छ । प्रकृतिअनुसार काम कष्टकर वा सहज हुन सक्छ तर काम सानो ठूलो भन्ने हुँदैन । यस्ता बहसमा कमै स्मरण गरिने र कमै उदाहरणमा जोडिने काम हो आरनको काम । कुनै समय हेंलाको पेसा मानिने आरनमा समयानुकूल प्रविधिको प्रयोगपछि गज्जबले रोजीरोटी चलेको छ ।
फलाम पिटेर त्यसलाई साइज दिनु चानचुने काम हैन । मानवीय जीवनको धेरै जसो काममा फालाम आवश्यक हुन्छ । कृषि कर्ममा त झनै नभई नहुने वस्तु हो फलाम । फलामलाई उच्चतापक्रममा तताएर, पिटेर साइजमा ल्याएर, धार दिनु र कृषि औजार बनाउनु सहज काम पक्कै हैन । जसका लागि श्रमसँगै सिप र कौशलताको अनिवार्यता हुन्छ । परम्परागत आरनको पेसा शारीरिकरूपमा कष्टकर पेसा हो ।
यही पेसामा आफूलाई आधुनिकताको खोजी गरिरहेका छन् मकवानपुर जिल्ला हेटौंडा उपमहानगरपालिका वडा नम्बर–१५ फारलाइनका खिलबहादुर विश्वकर्मा ।
उनी ५० वर्ष अघिदेखि यही आरन व्यावसाय सञ्चालन गरिरहेका छन् । यो आरन व्यावसायमा उनको ३ पुस्ता भिज्यो । ५० वर्ष पहिले परम्परागत पेसाका रूपमा यो आरन चल्थ्यो । सामग्री बनाएपछि तत्काल ज्याला पाइँदैनथ्यो । वर्षमा एकपटक आफ्ना सेवाग्राही (विष्ट)बाट रासन संकलन गरिन्थ्यो । सामान्य छाक टार्ने निर्वाहमुखी व्यावसायका रूपमा आरनबाट सामान बनाउने गरिएको उनी बताउँछन् । तर, अब समय र परिवेश फेरिएको छ । त्यही आरन अब राम्रो आम्दानी गर्ने व्यवसाय बनेको छ । अहिले कृषि औजार कारखानाका रूपमा दर्ता गरेर यो व्यावसाय सञ्चालन थालिएको छ ।
५० वर्ष अगाडि हातले खलाती तानेर आगो फुकेर फलामका सामान बनाउनुपर्ने बाध्यता भोग्दै आएका बृद्ध खिलबहादुर विश्वकर्मा अहिले भने आधुनिक प्रविधिको प्रयोगमा सहज तरिकाले विगतभन्दा बढी आर्थिक उपार्जन गर्छन् । जंगल डुलेर दाउरा बटुलेर, आगो बालेको भुँग्रोमा रापिँदै फलाम तताउनु पर्दैन अहिले उनलाई । बिजुलीका माध्यमले आगोमा फलाम तताउँछन् र बनाउँछन् कृषिऔजार ।
उनीभन्दा अघिको पुस्तादेखि यो आरन व्यावसाय सुरु गरिए पनि आफ्नै पहलमा प्रविधिको माध्यमले कृषिऔजारका सामान बनाएर उनले काम गर्दै आए । उनको यो आधुनिक आरनमा हसिया, कचिया, कुटो, कोदालो, कोदाली, कैंची, चुप्पी, चुलेसीलगायतका सामग्री बनाइँदै आएको छ । विगतमा पनि बनाउने सामग्री तिनै थियो, तर दुःख धेरै आम्दानी कम थियो । अब उनी सहज श्रममा राम्रो आय गर्छन् ।
आरन व्यावसायलाई निर्वाहमुखीबाट रोजगारी सिर्सना गर्ने गतिलो माध्यम समेत बनाए उनले । उनको कृषिऔजार कारखानामा अहिले ६ जनाले रोजगारी पाएका छन् । यहाँ कृषिऔजार बनाउने काम गर्न पाउँदा अर्काको मुलुकमा कठिन काम गर्नुपर्ने बाध्यताबाट छुटकारा पाएको कृषिऔजार कारखानामा कार्यरत उमेश विश्वकर्मा बताउँछन् । ‘जहाँ गए पनि बगाउने पसिना हो, आफ्नो ठाउँमा बसेर, रोजगार भएको छु’ उनले भने, ‘विदेश जाने रहर छैन, यहाँ पैसा छ ।’
उमेश मात्र होइन, यस कारखानामा कार्यरत अरू पनि वैदेशिक रोजगारको मोहमा छैनन् । पहिले सबै काम हातले गरिन्थ्यो । तर, अहिले भने ग्रेडर मेसिन, ओल्डिङ गर्ने मेसिन समेतको प्रयोग गरेर काम गरिँदै आएको छ । यही आरनमा हजुरबुबादेखि नातिसम्मले काम गर्दै आएका छन् । हजुरबुबा र अरू पाँच जनाले सामान बनाउने काम गर्दै आए पनि नाति दिनेश विश्वकर्माले भने बनाइएका कृषि औजार देशैभरि बिक्री गर्दै आएका छन् ।
यहाँ तयार गरिएका सामान मकवानपुर, चितवन, काठमाडौं, धादिङ, सिन्धुपाल्चोक, सिन्धुलीलगायतका जिल्लामा बिक्री गर्दै आएको आरनका सञ्चालक दिनेश विश्वकर्मा बताउँछन् ।
करिब ५ लाख रुपैयाँ लगानीमा यो आरन व्यावाय सुरु गरिएको थियो । यसबाट ६ जनाको परिवारको रोजीरोटी चलेको छ । आम्दानी राम्रै भएपछि तीन पुस्ता अघिदेखि सञ्चालन गरिएको व्यावसाय नातिले पनि गर्दै आएका छन् ।
यस व्यावसाय सञ्चालन गर्न बाग्मती प्रदेशको युवा परिषद्ले ५० हजार रुपैयाँ अनुदान पनि दिएको थियो । यो अनुदान रकमबाट ग्रेडर र ओल्डिङ मेसिन खरिद गरेर परम्परागत कामलाई प्रविधिसँग जोडिएको दिनेशले बताए ।
युवालाई उद्यमसँग जोड्नका लागि पम्परागत आरन व्यावसायलाई अहिलेको प्रविधिसँग जोड्न सहयोग गरिएको प्रदेश युवा परिषद्का कार्यकारी उपाध्यक्ष सन्तोष चौलागाईले बताए । कृषि औजारका सामान चाहिने हुनाले पहिलेकै अवस्थामा आरनलाई राख्नु हुन्न र प्रविधिसँग जोडेपछि अहिलेका युवापुस्ताले पनि पहिले पुस्तांैदेखि गर्दै आएको कामलाई निरन्रता दिनका लागि सहज हुने चौलागाईले बताए ।
‘पहिलो यही पेसालाई हेलाको दृष्टिले हेरिन्थ्यो, छुवाछुत कति भोगियो, अब केही छैन, काम सहज छ, पैसा राम्रै छ’ ५० वर्षीय खिलबहादुर विश्वकर्माले भने, ‘मेरो पालामा यस्तै चल्यो, नातिको पालासम्म आइपुग्दा हामी दंग छाैं ।’
मकवानपुर । हेटौंडा उपमहानगरपालिका वडा नम्वर –१४ मा रहेको भृकुटी माध्यमिक विद्यालय व्यवस्थापन समितिको अध्यक्षमा राजकुमार मोक्तान सर्वसम्मत चयन भएका छन् ।
उनी दोस्रो कार्यकालको लागि चयन भएका हुन् । व्यवस्थापन समिति सदस्यहरुमा वडा प्रतिनिधिबाट १४ नम्वर वडा सदस्य विना थिङ , विद्यालय प्रतिनिधिबाट विद्यालयका प्रधानध्यापक अच्युत कृष्ण रिजाल, निशा गुरुङ, जगत बहादुर सिन्तान, राम बहादुर भ्लोन, पार्वती लोप्चन, सुनामाया पाख्रिन सर्वसम्मत चयन भएका छन् ।
त्यसैगरी, विद्यालय व्यवस्थापन समितिको सल्लाहकारहरुमा रामबहादुर रुम्बा र विजयी थिङ् चयन भएका छन् ।
वि.स २०७७ सालमा अध्यक्ष भएका अध्यक्ष मोक्तानले दोश्रो कार्यकालसम्म जिल्लाकै उत्कृष्ट सामुदायिक विद्यालय बनाउन र विद्यालयलाई देशकै उत्कृष्ट विद्यालय बनाउने अभियानमा लागि पर्ने प्रतिवद्धता ब्यक्त गरे । अध्यक्ष मोक्तानले यसअघिको पहिलो कार्यकालमा कोभिडका कारणले गर्न नपाएका कामहरु दोश्रो कार्यकालमा गर्ने समेत बताए । कक्षा १० सम्म पठनपाठन हुने यस विद्यालयमा ३ सय ३० भन्दा बढि विद्यार्थीहरु अध्ययनरत रहेका छन् ।
हेटौंडामा बृहत उद्यमशिलता प्रदर्शनी तथा अन्तर वडा स्तरीय नृत्य प्रतियोगिता
Tags: No Comments
मकवानपुर । हेटौंडामा बृहत उद्यमशिलता प्रदर्शनी तथा अन्तर वडा स्तरीय नृत्य प्रतियोगिता भएको छ । हेटौंडा उपमहानगरपालिका ४ नम्बर वडा कार्यालयको आयोजना तथा टोल विकास संस्था नगर समन्वय समिति हेटौंडाको समन्वय तथा व्यवस्थापनमा बृहत उद्यमशिलता प्रदर्शनी तथा अन्तर वडा स्तरिय नृत्य प्रतियोगिता भएको हो ।
हेटौंडाको रोयल पार्टी प्यालेसमा भएको कार्यक्रममा उद्यमशिलता प्रदर्शनीमा हेटौंडाका महिलाहरुले उत्पादन गरेका १९ वटा स्टलमा सामाग्रीहरु राखिएको थियो । त्यसैगरी हेटौंडाका १७ वडाको सहभागिता रहेको नृत्य प्रतियोगितामा स्थानिय कला र संस्कृतिको सम्बर्दन गर्ने गरि अत्यन्यै रमाईलो ढंगले आफ्ना-आफ्ना प्रतिभा प्रस्तुत गरेका थिए ।
नृत्य प्रतियोगिता कार्यक्रमको उद्घाटन गर्दै बागमती प्रदेशका प्रथम मुख्यमन्त्री डोरमणि पौडेलले स्थानीय सरकारले सडक निर्माण मात्रै बिकास हो भन्ने कुरालाई छोडेर सबै क्षेत्रको काममा जोड दिन आग्रह गरे । ‘विकासका हरेक कामसंगै अतिरिक्त क्षेत्रमा पनि जोड दिनुपर्छ’ पौडेलले भने- ‘उद्यमशिलता प्रवर्द्धन कार्यक्रमले स्थानीय उत्पादनको बजारीकरणलाई सहजता हुनेछ ।’
यसैगरी उद्यमशिलता प्रदर्शनीको उद्घाटन गर्दै बागमती प्रदेशसभाका सदस्य तथा पूर्व श्रम, रोजगार तथा यातायात मन्त्री एकालाल श्रेष्ठले उद्यमशिलता संगै उद्योगी व्यवसायीहरूको प्रवर्द्धनमा लागि पर्नुपर्ने बताए । श्रेष्ठले भने- ‘यस्ता कार्यक्रमले अन्यलाई पनि प्रेरणा मिल्नेछ।’
यस्तै हेटौंडा उपमहानगरपालिकाका नगर प्रमुख मिना कुमारी लामाले स्थानीय रूपमा उत्पादित वस्तुहरूको प्रवर्द्धनमा यस्ता कार्यक्रमहरूले महत्वपूर्ण भूमिका निर्वाह गर्ने बताइन् । लामाले आगामी दिनमा उपमहानगरपालिकाले उत्पादित वस्तुहरूको बिक्रि र बजारीकरण गर्ने सन्दर्भमा थप कार्यक्रमहरू आगामि बजेटमा समावेश गरि अगाडि बढ्ने जानकारी दिइन ।

कार्यक्रममा हेटौंडा–४ का वडा अध्यक्ष नविन सिग्देलले आफ्नो वडामा बिकास निर्माणका काम संगै यस्ता महत्वपूर्ण काम गरेर हरेक क्षेत्रको बिकासमा जोड दिने बताए ।
कार्यक्रममा उद्यमशिलता तर्फ हेटौंडा उपमहानगरपालिका वडा नम्बर -५ प्रथम, वडा नम्बर-४ द्वितीय, वडा नम्बर ६ तृतीय, वडा नम्बर २ र १९ ले सान्त्वना पुरस्कार प्राप्त गरेका छन । पुरस्कृत हुने वडाहरूलाई क्रमशः २५ हजार, १५ हजार, १० हजार र ५/५ हजार नगद पुरस्कार र प्रमाणपत्र प्रदान गरिएको थियो ।
यस्तै नृत्य तर्फ हेटौंड वडा नम्बर १८ प्रथम, वडा नम्बर १० द्वितीय, वडा नम्बर २ तृतीय, वडा नम्बर ११ र ५ ले सान्वना पुरस्कार प्राप्त गरेका थिए । पुरस्कृत हुने वडाका समुहलाई क्रमशः नगद पुरस्कार ५० हजार, ३५ हजार, २० हजार र १०/१० हजार प्रदान गरिएको टोल विकास नगर समन्वय समितिका अध्यक्ष ध्रुवप्रसाद अधिकारीले जानकारी दिए ।
कार्यक्रममा गीत संगीतको माध्यामबाट सामाजिक रूपान्तरणमा महत्वपूर्ण योगदान गर्नुहुने गायक एवम् संगितकार आशाकाजी श्रेष्ठलाई नगद २५ हजार र सम्मान पत्र सहित श्रष्टा सम्मान गरिएको थियो ।

लोक गायक बद्री पंगेनी र नायिका तथा मोडल ऋचा थापा लगायतका कलाकारहरूको विशेष प्रस्तुती रहेको कार्यक्रममा हेटौंडा नगर लका विभिन्न टोल विकास संस्था, विभिन्न संघ संस्थाका गरी ५ हजार भन्दा वढी व्यक्तिहरूले अवलोकन गरेको बताइएको छ ।
टोल विकास संस्था नगर समन्वय समितिका अध्यक्ष अधिकारीको अध्यक्षतामा भएको कार्यक्रममा समापन तथा पुरस्कार वितरण हेटौंडा उपमहानगरपालिकाका मेयर मिना कुमारी लामाले गरेकी थिइन ।
मकवानपुर । मकवानपुरमा रहेर अनलाइन मिडियामा आवद्ध पत्रकारहरुकाे छाता संगठनकाे रुपमा अनलाइन मिडिया एशोसिएसन नेपाल (ओमान)को तदर्थ समिति गठन गरिएकाे छ ।
अनलाईन मिडिया सञ्चालकहरुको छाता संगठनको रुपमा ओमान गठन गरिएको हाे । हेटौंडामा आयोजित अनलाइन सञ्चालकहरुको भेलाले खबरब्रेक अनलाइनका सञ्चालक धर्मेन्द्र दाहालको अध्यक्षतामा समिति गठन गरेको हो । समितिको वरिष्ठ उपाध्यक्षमा रवीन्द्र गौतम (हेटौंडा खबर), उपाध्यक्षद्वयमा सुनिता विष्ट (पालिका डायरी) र रुपक कालिराज (हजुरको खबर), महासचिवमा उज्वल अधिकारी (नेपाल कलम), सचिवद्वयमा मनोज देवकोटा (हेटौंडा टुडे) र राजेश थापा ( रातोसमाचार) र कोषाध्यक्षमा प्रवेश धिताल (साझापत्र) चयन गरेको हो ।
त्यस्तै सदस्यहरुमा दीपेश दाहाल (अखबार हव), गोविन्द तिमल्सिना (शुभसमय), भूपेन्द्र राना (थाहापाना) चयन भएका छन् । आवश्यकताको आधारमा थप केही सञ्चालकहरुलाई कार्यसमितिमा ल्याइने अध्यक्ष दाहालले बताए । स्वरोजगार अनलाइन मिडियालाई स्तरीय र विश्वसनीय बनाई टिकाउने वातावरण बनाउन संस्थाले पहल गर्ने उनले बताए ।