मकवानपुर । देशै भर माध्यमिक शिक्षा परीक्षा (एसईई) आज बाट सुरु हुदैछ । मकवानपुरमा एसईई परीक्षा सबै पूरा भएको छ ।
परीक्षालाई सभ्य र सहज वातावरणमा सम्पन्न गराउन सम्पूर्ण तयारी पूरा भइसकेको शिक्षा विकास तथा समन्वय इकाई मकवानपुरका सूचना अधिकारी कृष्णप्रसाद पौडेलले जानकारी दिए। मकवानपुर जिल्लाबाट यस वर्ष १ सय ३६ विद्यालयका ७ हजार १ सय ३८ जना परीक्षार्थी एसईई परीक्षामा सहभागी हुने सूचना अधिकारी पौडेलले बताए ।
जिल्लाका विभिन्न पालिकाका विद्यालयमा अध्यनरत विद्यार्थीलाई सकेसम्म पायक पर्ने गरी परीक्षा केन्द्र तोकिएको उनले जानकारी दिए । मकवानपुरका १० वटा पालिकामध्ये ८ वटा पालिकामा परीक्षा केन्द्र तोकिएको छ । थाहा नगरपालिकाका विद्यार्थीले थाहानगरमै तोकिएको ३ वटा परीक्षा केन्द्रबाट परीक्षा दिनेछन् । यसैगरी बागमती गाउँपालिकाका विद्यार्थीले बागमतीमै तोकिएको परीक्षा केन्द्रबाट परीक्षा दिनेछन् भने बकैया गाउँपालिकाका विद्यार्थीले बकैयामै रहेको परीक्षा केन्द्रबाट परीक्षा दिनेछन् । राक्सिराङ र मनहरी गाउँपालिका विद्यार्थीले मनहरीको परीक्षा केन्द्रबाट परीक्षा दिने भएका छन ।
हेटौंडा उपमहानगरभित्रका विद्यालयमा अध्ययनरत विद्यार्थीले हेटौंडा उपमहानगरमा तोकिएका परीक्षा केन्द्रबाट परीक्षा दिनेछन् । मकवानपुरगढी, भीमफेदी तथा ईन्द्रसरोबर गाउँपालिकाका विद्यार्थीले पनि सम्बन्धित पालिकामै तोकिएको परीक्षा केन्द्रबाट परीक्षा दिनेछन् ।
बागमती गाउँपालिकामा तोकिएको परीक्षा केन्द्र जनता माविमा १ सय ८८ जना परीक्षार्थी परीक्षामा सामेल हुनेछन् । बकैयाको बुद्ध माविमा ३ सय ८० र महेन्द्र माविमा २ सय ३२ जना परीक्षार्थीले परीक्षा दिनेछन् । हेटौंडाको हटियामा रहेको जनप्रिय माविमा २ सय ९९, भीमफेदीमा रहेका महेन्द्र माविमा १ सय ८१, थाहानगरको पालुङमा रहेको जनकल्याण माविमा २ सय ८२, पालुङकै मच्छेनारायण माविमा १ सय ८८ जनाले परीक्षा दिँदैछन् । यसैगरी मार्खुमा रहेको सरस्वती बालबोधिनी माविमा १ सय ४३ जना, मनहरीको राष्ट्रिय रोटरी माविमा ४ सय ४८ जना, मनहरीकै महेन्द्र किरण माविमा ३ सय ९१ जनाले परीक्षा दिनेछन् । हेटौंडाको बसामाडीमा रहेको महेन्द्र किरण माविमा २ सय ९२ जना, बस्तीपुरमा रहेको निर्मल माविमा ३ सय ४५ जना, चौघडामा रहेको वंशगोपाल माविमा ३ सय ८ जनाले परीक्षा दिनेछन् ।
हेटौंडाको आधुनिक राष्ट्रिय माविमा ३ सय ९८ जना, हेटौंडाकै बालज्योति माविमा ३ सय ११ जना, ज्ञानदा माविमा १ सय ९८ जना, भूटनदेवी माविमा ३ सय ५६ जना, सिद्धार्थ माविमा ३ सय ६६ जना, जीएस निकेतनमा ३ सय ५१ जना, सोलड्यारिटी बोर्डिङ स्कूलमा ४ सय २५ जना, प्रगति माविमा ३ सय ५३ जनाले परीक्षा दिनेछन् । थाहा नगरको बज्रबाराही माविमा २ सय ५६ जना, हेटौंडाको अमर माविमा २ सय ६५ जना र मकवानपुरगढीको भानु माविमा १ सय ८२ जना विद्यार्थी परीक्षामा सहभागी हुने जनाएको छ ।
सूचना अधिकारी पौडेलका अनुसार परीक्षा केन्द्र तोकिएको विद्यालयका प्रधानाध्यापकहरुलाई नै केन्द्राध्यक्ष तोकिएकाले सम्बन्धित विषयको परीक्षा भएको दिनको केही समयअघि केन्द्राध्यक्षहरुले जिल्ला प्रहरी कार्यालय मकवानपुर र मातहतका प्रहरी कार्यालयबाट प्रश्नपत्र लगेर परीक्षा सञ्चालन गरिने । परीक्षामा अमर्यादित क्रियाकलाप हुन नदिन पर्याप्त सुरक्षा ब्यबस्था गरिएको बताईएको छ ।
पहिलो दिन आज अनिर्वाय अंग्रेजी विषयको परीक्षा हुँदैछ । परीक्षा २० वैशाखसम्म सञ्चालन हुनेछ । राष्ट्रिय परीक्षा बोर्डका अनुसार एसईईमा ५ लाख १४ हजार ९ सय ७७ परीक्षार्थी सहभागी हुँदैछन् । जसमध्ये छात्र २ लाख ५७ हजार ९ सय २७ र छात्रा २ लाख ५७ हजार ५३ छन् । बोर्डले एसईईका लागि देशभर २ हजार ७ परीक्षा केन्द्र तोकेको छ । विद्यार्थीहरुले ती परीक्षा केन्द्रमार्फत परीक्षा दिनेछन् ।
गत दुई वर्षदेखि कोभिड महामारीका कारण विद्यालयको आन्तरिक मूल्यांकनको आधारमा परीक्षा बोर्डले नतिजा सार्वजनिक गरेको एसईई परीक्षा यसवर्ष परीक्षा केन्द्र तोकेर भौतिक उपस्थितिमा सञ्चालन हुन लागेको हो ।
मकवानपुर । हेटाैडा एकेडेमीले जेहेन्दार विद्यार्थीलाई छात्रवृत्ति प्रदान गर्ने भएकाे छ । हेटौंडा उपमहानगरपालिका वडा नम्वर–११ नवलपुरस्थित एकेडेमीले आगामी शैक्षिक सत्रबाट जेहेन्दार विद्यार्थीहरुका लागि विभिन्न ३ विधाको छात्रवृत्ति प्रदान गर्ने घोषणा गरेको हाे । एकेडेमीले साेमबार पत्रकार सम्मेलन गरी कक्षा १ देखि ९ सम्म अध्ययनरतमध्ये ३ सय ३६ विद्यार्थीलाई छात्रवृत्ति दिने घोषणा गरेको हो ।
एकेडेमीका अनुसार ‘माधवराज सुमार्गी स्मृति ’छात्रवृत्ति १ सय ८९ जनालाई, ‘रुपचन्द्र विष्ट थाहा स्मृति छात्रवृत्ति १ सय ८ जनालाई र विश्वकान्ति कलावती सुमार्गी छात्रवृत्ति ३९ जनालाई प्रदान गरिने भएको हो । विद्यार्थीहरुले परिक्षामा पाएको नजिजाको आधारमा छात्रवृत्ति प्रदान गरिने छ । विद्यार्थीले परिक्षामा ल्याएको नतिजाको आधारमा २५ प्रतिशत छुटदेखि सतप्रतिशतसम्म छात्रवृत्तिको व्यवस्था मिलाइएको छ । यी छात्रवृत्तिहरुले विद्यार्थीहरुलाई अध्ययन क्षेत्रमा नयाँ जोश जाँगर पैदा हुने र अध्ययनशील बालबालिका भएका अभिभावकले आर्थिक अभावकै कारण विद्यालय पठाउन नसक्ने बाध्यताको अन्त्य हुने एकेडेमीकाे विश्वास रहेकाे छ ।
एकेडेमीका प्रमुख कार्यकारी अधिकृत रमेश रिमालले विद्यालयको शैक्षिक गुणस्तर बृद्धि गर्दै विद्यार्थी र अभिभावकप्रति थप जिम्मेवार एवम् जवाफदेही भएर आफुहरु अघि बढिरहेको बताए । उनले आगामी आर्थिक बर्षबाट एकेडेमीले प्लस टु सम्मको अध्यापन सुरु गर्ने पनि बताए । हाल एकेडेमीमा १० कक्षासम्म अध्यापन हुँदै आएको छ । एकेडेमीले यसअघि पनि मामाघर नेपाल नामक बालआश्रमका एक विद्यार्थीलाई छात्रवृत्ति प्रदान गर्दै आएको छ ।
मकवानपुर । मनहरी गाउँपालिका वडा नम्वर–४ स्थित पशुपतिनाथ माविको नवनिर्मित विद्यालय भवन हस्तान्तरण गरिएको छ । २०७२ को भूकम्पका कारण क्षतिग्रस्त विद्यालयमा नेपाल सरकारले दातृनिकाय एसियाली विकास बैंकको ऋण सहयोगमा ९ वटा कक्षाकोठा भएको भवन निर्माण गरिएको थियो ।
लोपोन्मुख वनकरिया समुदायका बालबालिका अध्ययन गर्ने विद्यालयकाे नवनिर्मित विद्यालय भवन साेमबार हस्तान्तरण गरिएको छ । पशुपतिनाथ मावि व्यवस्थापन समितिका अध्यक्ष माधब गौतमको सभाध्यक्षतामा भएको कार्यक्रममा विद्यालय भवन सम्पन्न प्रमाणपत्र शिक्षा विकास तथा समन्वय इकाई प्रमुख दिनानाथ गौतमलाई हस्तान्तरण गरेका थिए । इकाई प्रमुख गौतमले विद्यालय भवन मनहरी गाउँपालिका अध्यक्ष एकराज उप्रेतीलाई हस्तान्तरण गरेका हुन् । यस्तै पालिका अध्यक्ष उप्रेतीले पशुपति मावि व्यवस्थापन समितिका अध्यक्ष गौतमलाई साँचो र प्रमाणपत्र हस्तान्तरण गरेका थिए ।
विद्यालयकाे भूकम्प प्रतिरोधी भवन ३ करोड ८ लाख रुपैयाँमा निर्माण सम्पन्न भएको हाे । यसैगरी विद्यालयका थप १३ वटा कक्षाकोठालाई पौने २ करोड रुपैयाँ लागतमा प्रबलिकरण गर्ने कार्य भइरहेकाे बताइएकाे छ ।
विद्यालयका प्रधानाध्यापक भानुभक्त आचार्यले मन्दिरको सत्तलमा कक्षा संचालन गरी स्थानीय बालबालिकालाई शिक्षा प्रदान गरेको स्मरण गर्दै भवन निर्माण पछी विद्यालयकाे शैक्षिक क्षेत्र उज्ज्वल रहने विश्वास व्यक्त गरे । विद्यालयमा करिब ५ सय बालबालिका अध्ययन गरिरहेका छन् । विद्यालयमा लोपोन्मुख वनकरिया, सिमान्तकृत चेपाङ र तामाङ् समूदायका बालबालिका अध्ययनरत छन् ।
कार्यक्रममा शिक्षा विकास तथा समन्वय इकाईका शाखा अधिकृत तथा सूचना अधिकारी कृष्णप्रसाद पौडेल, मनहरी गाउँपालिकाका शिक्षा प्रमुख हरिचन्द्र सापकोटा, स्रोत शिक्षक पूर्णभद्र भुषाल, समाजसेवी भरत पराजुली, विद्यालय ब्यवस्थापन समितिका पूर्व अध्यक्षहरु चन्द्रबहादुर न्यौपाने, बालमुकुन्द ढकाल, रामहरि बिष्ट, पवन खड्का, पुर्षोत्तम बिष्ट, शिक्षक अभिभावक संघका संयोजक ऋषिराम गौतम, भवन निर्माण कार्यमा संलग्न इन्जिनियर मुकेश जैसवाल, सन्दिप बिष्टलगायतको सहभागिता रहेको थियो ।
मकवानपुर । वित्तीय संघियता सम्बन्धी किताब बिमोचन भएको छ । नेपालमा संघियताको राजनीतिक संरचना सम्बन्धी बिभिन्न किताबहरू लेखिएका छन । तर आर्थिक पाटोलाई फिल्डमै (स्थलगत अध्ययन) गरेर पहिलो चोटी लेखिएको अनुसन्धानमूलक किताब वित्तीय सघियता विमोचन गरिएको हो ।
मुलुकमा भर्खरै संघियताले पाइला टेक्दै गरेको कारणले गर्दा यसको आर्थिक पक्षको बिषयमा कम चर्चा भएको र संघीय सरकारले आफ्नो आर्थिक गतिविधि कसरी सन्चालन गरेको छ भन्ने उत्तर यस किताबले दिने किताबका लेखक बिशभ अधिकारीले बताए।
संघियताको आधारभूत सिद्धान्तको बिषयमा जानकारी हुन यो किताबको महत्वपूर्ण रहेको अर्को लेखक सागर बरालले जानकारी दिए। यस किताबमा शुभकामना पूर्व अर्थमन्त्री तथा अर्थविद डा. प्रकाशचन्द्र लोहनी र राष्ट्रपतिको पुर्व प्रेस सल्लाहकार राजेन्द्र दाहालले दिएको लेखक सम्पुर्ण बस्नेतले बताए।
किताबको प्रकाशक शिखा बुक्स रहेको छ भने किताब बिमोचन बागमती प्रदेशका प्रथम मुख्यमन्त्री माननिय डोरमणि पौडेलले गरेका थिए। किताब बिमोचन कार्यक्रममा पौडेलले यो किताब उत्यन्तै उपयोगी रहेको र वित्तीय संघियता सम्बन्धी बुझ्न खोज्ने पाठकहरु लागि यस पुस्तकबाट लाभान्वित हुने बताए ।
किताबको बारेमा प्राध्यापकद्वय युवराज गिरी र अर्पण पराजुलीले टिप्पणी गरेका थिए । कार्यक्रम सागर बरालको अध्यक्षतामा भएको कार्यक्रममा शुभकामना मन्तव्य मधु अधिकारीले दिएका थिए।
मकवानपुर । थाहा नगरपालिकाकाे १ विद्यालयलाई कम्युटर र प्रिन्टर सहयोग गरिएकाे छ । नेपाली काँग्रेसका मकवानपुरका नेता आनन्दराम पराजुलीले मकवानपुरको थाहा नगरपालिकाकाे पञ्चकन्या आधारभूत विद्यालयलाई कम्युटर र प्रिन्टर सहयोग गरेका हुन् ।
थाहा नगरपालिका वडा नं. ८ ऐँसेलुखर्कस्थित पञ्चकन्या आधारभूत विद्यालयलाई १ थान कम्युटर र १ थान प्रिन्टर विद्यालयका प्रधानाध्यापक सीताराम घलानलाई हस्तान्तरण गरिएकाे हाे । नेता पराजुलीले विद्यालयमा अभिलेख राख्न तथा कम्युटर शिक्षा समेत प्रदान गर्न सहज हाेस भनेर कम्युटर र प्रिन्टर सहयोग गरिएकाे पराजुलीले जानकारी दिए ।
कम्युटर हस्तान्तरण कार्यक्रममा काँग्रेस प्रदेश सभा १ (ख) का क्षेत्रीय सभापति खड्ग गोपाली, काँग्रेस थाहा नगर समितिका सभापति प्रमोद जोशी र थाहा नगरपालिका वडा नं. ८ इकाइ सभापति रामकुमार घलानको उपस्थिति रहेको थियो । पञ्चकन्या आधारभूत विद्यालयमा अहिले ६६ जना विद्यार्थी अध्ययनरत छन् ।