मकवानपुर । मकवानपुरमा बैंकिङ कसुर सम्बन्धी मुद्दा बढेकाे छ । पछिल्लाे समय देखिएकाे आर्थिक मन्दीले बैंकिङ जन्य कारोबारमा बढि मुद्दा पर्ने गरेकाे प्रहरीकाे तथ्याङ्कले समेत देखाएकाे छ ।
जिल्ला प्रहरी कार्यालय मकवानपुरमा गत आर्थिक वर्षमा बैंकिङ कसुरका एक सय ८४ मुद्दा दर्ता भएकाे छ । आर्थिक वर्ष २०७९/०८० मा ७९ मात्रै बैकिङ कसुर सम्बन्धी मुद्दा दर्ता भएकाेमा गत आवमा बढेर एक सय ८४ पुगेकाे हाे । यसैगरी चालु आर्थिक वर्षकाे भदौ मसान्तसम्म पनि बैकिङ कसुरका मुद्दा बढी दर्ता भएकाे प्रहरीकाे तथ्याङ्कले देखाउँछ । चालु आवकाे भदौ मसान्तसम्म ३३ मुद्दा बैंकिङ कसुर सम्बन्धी रहेकाे छ ।
बैंकिङ कसुर सम्बन्धी मुद्दा पछि लागु औषध मुद्दा बढी दर्ता भएकाे देखिन्छ । आर्थिक वर्ष २०७९/०८० मा लागु औषध सम्बन्धी मुद्दा सबै भन्दा बढी दर्ता भएकाे थियाे । जिल्लामा उक्त आवमा एक सय ५३ मुद्दा लागु औषधका दर्ता भएकाेमा गत आवमा लागु औषधका एक सय ५८ मुद्दा दर्ता भएकाे जिल्ला प्रहरी कार्यालय मकवानपुरले जनाएकाे छ । यसैगरी चालु आवकाे भदौ मसान्तसम्म १७ मुद्दा लागु औषधका दर्ता भएका छन् ।
यसैगरी आव २०७९/०८० मा लागुऔषध सम्बन्धी मुद्दा १ सय ५३ दर्ता हुँदा २ सय ४८ जना पक्राउ परेका छन् । आव २०८०/०८१ मा लागु औषध मुद्दा एक सय ५८ दर्ता हुँदा दुई सय ४९ जना पक्राउ परेकाे जिल्ला प्रहरी कार्यालय मकवानपुरले जनाएकाे छ । यस्तै चालु आवमा १७ मुद्दा दर्ता हुँदा २९ जना पक्राउ परेका छन् ।

स्राेतः जिल्ला प्रहरी कार्यालय मकवानपुर
यस्तै मकवानपुर प्रहरीले आव २०७९/०८० मा मकवानपुरका विभिन्न पालिकामा १४६ विगाह १७ कठ्ठा १० धुरमा लगाइएकाे गाँजा फडानी गरेकाे छ । यसैगरी साेही आवमा २२४ विगाह ३ कठ्ठामा लगाइएकाे अफिम नष्ट गरेकाे छ । चार ९७ प्रहरी परिचालन गरी उक्त लागुऔषध फडानी गरिएकाे हाे । यसैगरी गत आवमा मकवानपुर प्रहरीले २७८ विगाह ३ कठ्ठामा लगाइएकाे गाँजा र १४६ विगाह ५ कठ्ठा १५ धुरमा लगाइएकाे अफिम नष्ट गरिएकाे हाे । उक्त अभियानमा ५ सय ९६ जना प्रहरी परिचालन गरिएकाे हाे ।
यस्तै जिल्ला प्रहरी कार्यालय मकवानपुरमामा अपराध अनुसन्धान सम्बन्धी मुद्दा दर्ताकाे संख्या बढ्दै गएकाे तथ्याङ्कले देखाउँछ । आर्थिक वर्ष २०७८/०७९ मा विभिन्न अपराधका आठ सय दुई मुद्दा दर्ता भएकाेमा सात सय ३० जना पक्राउ परेका छन् । आर्थिक वर्ष २०७९/०८० मा आठ सय ६६ मुद्दा दर्ता भएकाेमा सात सय ६४ जना पक्राउ गरिएकाे थियाे । गत आवमा अपराध सम्बन्धी एक हजार १९ मुद्दा दर्ता भएकाेमा सात सय ३२ जना पक्राउ गरिएकाे प्रहरीकाे तथ्याङ्कमा उल्लेख छ । चालु आवकाे भदौ मसान्तसम्म अपराधका एक सय ६४ मुद्दा दर्ता भएकाेमा एक सय २२ जना पक्राउ गरिएकाे छ ।
जिल्ला प्रहरी कार्यालय मकवानपुरकाे तथ्याङ्क अनुसार चालु आवकाे भदौसम्म फरार प्रतिवादी १५ जना पक्राउ गरेकाे देखिन्छ । यसैगरी गत आवमा विभिन्न मुद्दाका फरार प्रतिवादी दुई सय ६१ जना पक्राउ गरिएकाे प्रहरीले जनाएकाे छ । यस्तै आव २०७९/०८० मा फरार प्रतिवादी एक सय ६७ र आव २०७८/०७९ मा एक सय १४ जना फरार प्रतिवादी पक्राउ गरिएकाे तथ्याङ्कमा उल्लेख छ ।

स्राेतः जिल्ला प्रहरी कार्यालय मकवानपुर
मकवानपुर । मकवानपुरकाे हेटौंडामा चाडपर्व लक्षित सवारी दुर्घटना न्युनीकरणका लागि सवारी चालकको प्रतिबद्धता कार्यक्रम संचालन गरिएकाे छ ।
प्रदेश प्रहरी कार्यालय हेटौडाले आन्तरिक मामिला तथा कानूनमन्त्री सुरजचन्द्र लामिछानेकाे उपस्थिति बिहीबार कार्यक्रम सुरु गरिएकाे हाे । बागमती प्रदेश प्रहरी कार्यालय हेटौंडा मातहत रहेका १० जिल्लाबाट एकैपटक चाडपर्व लक्षित सवारी दुर्घटना न्यूनीकरणका लागि सवारी चालकहरूसँगको प्रतिवद्धता कार्यक्रम सुरु गरिएको हो ।
मकवानपुरको हेटौँडालगायत बागमती प्रदेशका ९ जिल्लाहरुमा पनि उक्त अभियान संचालन गरिएको प्रदेश प्रहरी कार्यालयका प्रवक्ता प्रहरी नायव उपरीक्षक जितेन्द्र कुमार बस्नेतले जानकारी दिए । उनका अनुसार सवारी चालकहरूलाई सिकाउने, अनुभव गराउने, जानकारी गराउने, प्रतिवद्धता गराउने र आफ्नो सुरक्षाबारे जानकारी गराउने सचेतनामूलक कार्यक्रम हो ।
सार्वजनिक सवारी साधनहरूको हकमा जिल्लास्थित बसपार्कहरुमा रहेका सवारी चालकहरुलाई र मोटरसाइकल चालकहरूको लागि प्रत्येक जिल्लाका राजमार्गको सुरक्षित तथा उपर्युक्त स्थानमा चालकहरूलाई ट्राफिक प्रहरीहरूबाट निरन्तर रूपमा जानकारी गराइने प्रवक्ता बस्नेतले जानकारी दिए । ‘ट्राफिक जरिवाना नगरी विशुद्ध रूपमा सवारी चालकहरूलाई सुरक्षित यात्रा के कसरी गर्न सकिन्छ, सडक/ट्राफिक नियम पालना गर्न स्वयं सचेत गराई सवारी दुर्घटना न्यूनीकरण गराउनु कार्यक्रमको उद्देश्य हाे’ उनले भने ।
मकवानपुर । मकवानपुर प्रहरीले हेटौडा १५ बाट भन्सार छलि ल्याइएका १ करोड ३५ लाख मूल्य बराबरकाे कपडासहित २ जनालाई नियन्त्रणमा लिएकाे छ ।
२ असोजमा जिल्ला प्रहरी कार्यालयका मकवानपुरका प्रहरी उपरीक्षक सीताराम रिजालको कमाण्डमा खटिएको प्रहरी टोलीले उक्त परिमाणकाे कपडासहित भारत, बिहार मोतिहारी,तुकालिया पुर्वी चम्पारण सपही बस्ने ३० वर्षीय जन्दार आलम र बन्जरिया पुर्वी चम्पारण चौलाहा कलोनी बस्ने १९ वर्षीय मुना मियालाई नियन्त्रणमा लिएकाे हाे ।
हेटौडा १५ रातोमाटे चेकपोष्ट स्थित पूर्व पश्चिम राजमार्गमा प्रहरी टोलीले सुनसरीबाट हेटौडा हुँदै काठमाडौं जाँदै गरेको बीआर०५जीडी१३४३ नम्बरकाे भारतीय ट्रकलाई जाँच गर्ने क्रममा ट्रकमा ३४५ बोरा आलुको भन्सार बिल काटेर प्रति बोरा ५० किलोको दरले भन्सार बिल भन्दा कम २६४ बोरा आलु राखी ल्याएका थिए । जाँच गर्दा आलुका बाेराकाे भित्री भागमा लुकाई ७४ बोरा कपडा तथा बिभिन्न किसिममा तयारी कुर्ता, रोल सहितको सर्ट एंव पाईन्टको कपडासहित ल्याएको भेटिए पछि ट्रक चालक आलम र सहचालक मियालाई नियन्त्रणमा लिएकाे हाे ।
भन्सार छलि ल्याईएका उक्त कपडा,आलुका बोराहरु गरी १ करोड ३५ लाख बराबरको सामाग्रीहरु बरामद गरी ट्रक र ट्रकका चालक तथा सहचालक समेतलाई नियन्त्रणमा लिइएकाे जिल्ला प्रहरी कार्यालय मकवानपुरले जनाएकाे छ । उनीहरुलाई बरामद सामग्रीसहित थप अनुसन्धान तथा कारवाहीको लागि राजश्व अनुसन्धान कार्यालय पथलैया बारा पठाइने मकवानपुर प्रहरीले जनाएकाे छ ।
मकवानपुर । राष्ट्रिय मानव अधिकार आयोग बागमती प्रदेश कार्यालय हेटौंडाले बागमती प्रदेश प्रमुख दीपक प्रसाद देवकोटालाई प्रतिवेदन बुझाएको छ ।
आयोगले आ.व. २०८०/८१ को गतिविधि तथा मानव अधिकारको अवस्था सहितकाे प्रतिवेदन बुधबार प्रदेश प्रमुखलाई बुझाएकाे हाे । आयोगका बागमती प्रदेशका उपसचिव पवनकुमार भट्टले प्रदेश प्रमुख देवकोटालाई प्रतिवेदन बुझाएका हुन । प्रतिवेद ग्रहण गर्दै प्रदेश प्रमुख देवकोटाले प्रतिवेदनले दिएको सुझाव कार्यान्वयनको लागि आफूले आफ्नो तर्फबाट समन्वय गर्ने प्रतिवद्धता व्यक्त गरे ।
प्रतिवेदनमा बागमती प्रदेशमा नागरिक तथा राजनीतिक अधिकारको अवस्था सुधारोन्मुख भएको उल्लेख गरिएकाे छ । ‘हत्या तथा आत्महत्याका घटना भइरहेकाले नयाँ प्रबिधिसंगै हुने यस्ता अपाराधिक गतिबिधिले प्रहरीको अनुसन्धानमा चुनौती थपिएको देखिन्छ’ प्रतिवदेनमा उल्लेख छ ।प्रतिवेदन अनुसार आयोगको बागमती प्रदेश कार्यालयमा आ.व. २०८०/ ०८१ मा मात्रै मानव अधिकारको हनन भएको भनि नागरिक तथा राजनीतिक अधिकार सम्बन्धी ११ वटा, आर्थिक सामाजिक तथा साँस्कृतिक अधिकारका ३ वटा, यातनाका २ वटा, बाल अधिकारका १ वटा, महिला अधिकारका १ वटा, जातीय विभेदका १ वटा, अपाङगता भएका व्यक्तिको अधिकारका ४ वटा तथा अन्यमा ३ वटा गरी जम्मा २६ वटा उजूरी दर्ता भएका छन् ।
यसैगरी पुराना उजूरीकाे संख्या ५ सय ९६ रहेका छन् । सोही आ.व.मा ७३ वटा उजूरीको अनुसन्धान समपन्न भई कानूनी प्रक्रियामा गएकाे छ । हाल ५४९ उजूरी अनुसन्धानको क्रममा रहेका आयोगले जनाएको छ ।
प्रदेशमा अपाङ्गता भएका व्यक्तिलाई घरपरिवारका मान्छेले विभेद गर्ने गरेको, सरकारी कार्यालय तथा स्थानीय तहका संरचनाहरू अपाङ्गमैत्री नभएको, सार्वजनिक स्थल, सडक मार्ग तथा यातायातका साधन अपाङ्गमैत्री हुन नसकेको विषयका सवाललाई प्रतिवेदनमा उल्लेख गरिएको छ ।
यसैगरी घर परिवार तथा विद्यालयमा बालबालिका माथि हिंसाका घटना भईरहेका, बाल विवाह, बाल श्रम कायमै रहेको तथा बालबालिका यौनजन्य हिंसाका शिकार भईरहनु मानवअधिकारको दृष्टिले संवेदनशिल रशेको प्रतिवेदनमा उल्लेख छ । यसैगरी जातीय छुवाछुत तथा विभेदका घटना भईरहेका, ग्रामिण भेगमा मात्र हैन शहरी क्षेत्रमा पनि जातीय विभेदका घटना भईरहेको प्रतिवेदनमा उल्लेख छ ।
“स्वास्थ्य सेवा सबैका लागि पहुँच योग्य तथा सर्वशुलभ छैन, समाजमा मानसिक रोगबाट पीडित व्यक्तिहरुको हेरचाह र उपचार सुनिश्चित हुन सकेको छैन, निशुल्क पाईने भनेका औषधीको जहिले पनि अभाव हुन्छ, अस्पतालको वातावरण बिमारी तथा कुरुवा मैत्री पाईदैन, उद्योग तथा कलकारखानाबाट निस्केको धुवा, धुलो तथा ध्वनीले वातावरण प्रदुषित भईरहेको छ भने रोकथामका उपायहरु अबलम्वन गरिएको छैन” प्रतिवेदनमा भनिएको छ ।
मकवानपुर । उपभाेक्ताकाे व्यापक गुनासाे आउँदा समेत प्रायः चासाे नदेखाउने प्रशासनले चाडपर्व नजिकिदै गर्दा हेटाैडा बजार अनुगमन गरेकाे छ । करकाे दर बढाएकाे निहुँमा हेटौंडा उपमहानगरपालिकासँग आक्राेशित व्यवसायीहरुलाई ‘तह’ लगाउने भन्दै गरिएकाे बजार अनुगमनपछि केही व्यापारीलाई जरीवान गरिएकाे छ ।
हेटौंडा उपमहानगरपालिकाकाे नेतृत्वमा चाडपर्व लक्षित बजार अनुगमन सुरु गरिएको हाे । हेटौंडा उपमहानगरपालिका कार्यालय, जिल्ला प्रशासन कार्यालय, खाद्य प्रविधि तथा गुण नियन्त्रण कार्यालय, घरेलु उद्योग वाणिज्य कार्यालय र उपभोक्ता हितसंरक्षण मञ्चको संयुक्त बजार अनुगमन गर्दा गैर कानूनि भेटिएपछि केहीलाई कारवाहीकाे दायरामा ल्याउन लागिएकाे उपमहानगरपालिकाले जनाएकाे छ ।
यसपालीकाे बजार अनुगमन विगतमाभन्दा प्रभावकारी बनाइएको पाइएकाे छ । सरोकारवाला निकायले बजार अनुगमनलाई ‘आक्रामक’ बनाउँदै कमजोरी देखिए ठाउँकोठाउँ कारबाही गरेर जरिवाना तिराइने भएको छ ।
विगतमा बजार अनुगमनबाट फर्किएर कार्यालयमा कमजोरीका दृष्टिले कस्तो कारबाही गर्ने भन्ने निर्णय हुने गरेको थियो । यसो हुँदा कमजोर कारबाही र बजार अनुगमनको प्रभावकारितामाथि प्रश्न उठ्ने गरेको थियो । जहाँ चिनजानकाे आधारमा कम कारवाही ताेक्नेदेखि आर्थिक लेनदेन समेत हुने गरेकाे गुनासाहरु आउने गरेका थिए ।
यसअघि विभिन्न निकायसँग समन्वय गरेर गर्ने बजार अनुगमन नाम मात्रैको अनुगमन हुने गरेको पाइएको उपभोक्ताहरुले नै गुनासो गर्ने गरेका थिए । अनुगमनका क्रममा व्यापारी तथा व्यवसायीलाई दिएको निर्देशन कार्यान्वयन नभएपछि नाम मात्रैको बजार अनुगमनमा सीमित हुने गरेको उपभोक्ताहरुको भनाई थियो ।
यसपटककाे बजार अनुगमनले कमजोरी देखिएमा साेही ठाउँमै कारबाही गर्दै जरिवाना तिराएको हो । हेटौंडामा वर्षौदेखि सञ्चालनमा आएको हेटौंडा–४, पारिजातपथ स्थित दाजुभाइ फाष्टफुडलाई संयुक्त बजार अनुगमनको क्रममा उपमहानगरपालिकाले २५ हजार जरिवाना गराएको छ । चितवनको शाखाको रुपमा रहेको पारिजातपथकै वैष्णव होटललाई पनि २५ हजार नै जरिवाना गराइएको छ । यी दुई होटललाई सात दिनभित्र उपमहानगरपालिका कार्यालयमा जरिवाना तिर्न पत्र काटिएको छ ।
दाजुभाइ फाष्टफुडमा भान्सा फोहोर भएको, मःम बनाउन ल्याइएको बन्दा कुहिएको अवस्थामा अव्यवस्थितसँग राखिएकोलगायतको कमजोरी फेला परेको थियो । दाजुभाइ फाष्टफुडका सञ्चालक राजकुमार गौतमलाई उमनपाकाे कार्यालयमा अनिवार्य उपस्थित हुन अनुगमन समितिले निर्देशन दिएको छ । दाजुभाइको खोपेगल्लीमा रहेको मिठाईको भान्सामा फोहोरको ढल निकास नगरी नजिकै मिठाई बनाइरहेको अनुगमन टोलीले फेला पारेको थियो । भान्सा सुधार गर्न निर्देशन दिइएको उपमहानगरको उद्योग, पर्यटन, सहकारी शाखाप्रमुख हिमप्रसाद पौडेलले जानकारी दिए ।
यसैगरी, वैष्णव होटलले कालो ढुसी परेको पाउरोटी बिक्रीका लागि राखेको अनुगमन टोलीले फेला पारेको थियो । वैष्णवमा भान्सा सरसफाई नगरिएको, उद्योग वाणिज्य कार्यालयमा दर्ता नगरी व्यवसाय सञ्चालन गरेको, बिक्रीका लागि राखिएका खाद्यवस्तुको लेबलिङ उपयुक्त तरिकाले नराखेको भेटिएको थियो ।
वैष्णव होटलले चितवनबाटै मःमलगायतका तयारी खाद्यवस्तु हेटौंडा ल्याएर बिक्री गर्ने खुलेको छ । पारिजातपथमै अनमोल होटलको भर्खरै सञ्चालनमा आएको भनिएको नयाँ होटललाई सचेत गराइएको छ ।
बजार अनुगमनको नेतृत्व उपमहानगरको आर्थिक विकास महाशाखाअन्तर्गतको उद्योग, पर्यटन, सहकारी शाखा प्रमुख पौडेलले गरेका थिए । अनुगमनमा जिल्ला प्रशासन कार्यालय मकवानपुरका दीपक पौडेल, खाद्यप्रविधि तथा गुण नियन्त्रण कार्यालयका खाद्यनिरीक्षक दीपक घिमिरे, घरेलु उद्योग वाणिज्य कार्यालयप्रमुख रामप्रसाद भुषाल, उद्योग वाणिज्य संघ, उपभोक्ता हितसंरक्षण मञ्चका केन्द्रीय उपाध्यक्ष बासु खतिवडा, मकवानपुर उद्योग वाणिज्य संघका पवन कार्की लगायतको उपस्थिति रहेको थियो ।
‘अब हामीले अनुगमनकै क्रममा जरिवाना तिराउँछौं यसले हुँदा अनुगमनको प्रभावकारिता बढाउँछ’ पाैडेलले भने । यसअघि धेरै पटक सचेत गराउँदा पनि होटल सञ्चालकहरु अटेरी बनिरहेका उनले बताए । उपमहानगरपालिकाले कारबाहीलाई पनि झन बलियो बनाएर जाने याेजना रहेकाे पौडेलले बताए । उपभोक्तालाई ढुक्कसँग खाद्यवस्तु उपभोग गर्न सक्ने वातावरण निर्माणको लागि उपमहानगरपालिका लागिपरेको पौडेलले बताए । उनले बजार अनुगमनलाई तीव्रता दिइने बताए । चाडपर्व नजिकिएसँगै बजारमा बढ्न सक्ने कालाेबजारीलाई नियन्त्रण गर्न उपभाेक्ताहरु प्रशासनकाे सहकायर्य जरुरी रहेकाे उपभोक्ता हितसंरक्षण मञ्चका केन्द्रीय उपाध्यक्ष बासु खतिवडाले बताए ।