मकवानपुर । वर्षौदेखि जग्गाको पुर्जा माग गर्दै आएका मकवानपुर मनहरी ४ का वनकरिया समुदायले सरकारसँग आफूहरु थाकेको गुनसो गरेका छन् । वनकरिया समुदायकी अगुवा सन्तोषी वनकरियाले वनकरिया जाति भूमी पुजक भएर पनि जग्गा नपाएपछि सरकारसँग संघर्ष गर्दागर्दै थाकेको बताइन् ।
२०६२ सालमा २० बर्षको लागि दिइएको कागजको समय २०८२ बैशाखमा सकिदै छ । त्यसपछि आफूहरुको वासस्थान कहाँ भन्ने टुङ्गो नभएपछि उनीहरुमा निराशा सँगै आक्रोशित छन् । “वनले हामीलाई पक्कै हटाउँछ, अनि हामी कहाँ जाने ?” सन्तोषिले भनिन् ।
“मैले साबुन उत्पादन गर्ने सीप सिकेको थिएँ । जानेको सीपको प्रयोग गरेर व्यवसायी बनौं न त भन्दा लालपुर्जा नभएर प्यान दर्ता गर्न पाइनँ” उनले भनिन् । व्यवसाय दर्ता गर्न नपाएपछि काम नै तीन महिना रोकिएको उनले बताइन् । स्थानीय वडाध्यक्ष प्रकाश थापाले आफ्नो जग्गा राखेर उद्योग दर्ता गर्ने वातावरण मिलाइदिएपछि उनले उद्योग दर्ता गरेर काम गर्दै आएकी छिन्। “सधैं हामी यसरी नै कतिञ्जेल चल्ने ?” उनले प्रश्न गरिन् ।
स्थानीय संगिता वनकरियाले आफ्नो समुदायको लागि भत्ता होइन,जग्गा र रोजगारी चाहिएको बताइन्। जग्गाको पुर्जा र रोजगारी भए सरकारले आफूहरुलाई भत्ता नदिएपनि त्यो भन्दा बढी हुने उनले बताइन् । “सरकारले बालबालिकालाई १० कक्षासम्म निःशुल्क पढाइदिएको छ भन्छन्, तर हाम्रो बालबालिकाको महिनैपिच्छे शुल्क बुझाइरहेका छौं” उनले भनिन् “यसको लागि हामीले कस्लाई भन्नुपर्ने हो ?” महिनाको ४ हजार रुपैंया भत्ता ३÷३ महिनाको अन्तरमा प्राप्त हुदाँ त्यसले उपचार गर्न, खान र बालबच्चा पढाउन निकै समस्या भएको उनले बताइन् ।
यसैगरी स्थानीय राम वनकरियाले आफूहरु बसोबास गर्ने स्थानमा बाटोको पनि असुविधा रहेको बताए । बाटो पनि छैन । बर्षामा खोलाको बाटो हिड्नै सकिदैनँ, बालबालिकाहरुलाई विद्यालय पुग्न मुस्किल छ, भएको कच्चीबाटोमा बर्षभरी गाडि चल्ने व्यवस्था मिलाइदिन पर्यो” उनले भने “स्थानीय सरकार र प्रदेश सरकारले हाम्रो समस्यामा पनि ध्यान दिनुपर्यो।”
यस्तै अर्का स्थानीय बिष्णुबहादु प्रजाले विद्यालय टाढा रहेको कारण वनकरिया बालबालिकाहरुको पढाइ छुट्ने गरेको बताए । “निकुञ्जका कारण बस्न पनि निकै समस्या भइरहेको उनले बताए । आर्मीहरु घर घेर्न आउँछन्, यो समस्याबाट हामीले कहिले मुक्ति पाउने ?” उनले भने ।
मकवानपुर जिल्लाको मनहरी गाउँपालिका वडा नम्बर ४ मुसेधापमा रहेको वनकरिया वस्तिमा संवादको लागि पुगेका प्रदेश सभा सदस्यसँग उनीहरुले आफूहरुको पीडा सरकारले वर्षौदेखि सम्बोधन नगरेको गुनासो गरे ।
बागमती प्रदेशका उद्योग, पर्यटन तथा वातावरण समितिका सभापती आनन्द कुमार श्रेष्ठ, पूर्व मन्त्री तथा बागमती प्रदेशसभाका सदस्य कुमारी मुक्तान, प्रदेशसभाका सदस्यहरु समिता खड्गी, सुना परियार, गिरबहादुर तामाङले उनीहरुको समस्या सुनेका थिए । समस्या सुनेर मात्रै फर्कने नभइ समाधानको पहल आफूहरुले गर्ने आश्वासन दिएका छन् ।
कार्यक्रममा युएनडिपिका नीति तथा कार्यक्रम समर्थन व्युरो उपसहायक प्रशाशक र उपनिर्देशक डाक्टर फ्रान्सिन पिकअपले
वनकरिया समुदायका समस्याहरु सांसदहरु र आफुले बुझेको बताए । अब नीति निर्माण तहमा काम गर्नेमा आफूले विश्वास लिएको बताए ।
लोपोन्मुख जाती वनकारिया समुदायको समस्याका बिषयमा बागमती प्रदेश सभा र प्रदेश सभाको समिति मार्फत समाधान गर्ने प्रतिवद्धता जनाइएको छ । वनकरिया समुदायका विविध सवालहरुमा जनप्रतिनिधि र जनताबीच अन्तरसंवाद कार्यक्रममा सहभागी प्रदेश सांसदहरुले
वनकरिया समुदायको न्यायका लागि पहलकदमी चाल्ने प्रतिवद्धता गरेका छन् ।
निकुञ्ज क्षेत्रको जमिनमा बसोबास गर्दै आएका वनकरिया समुदायलाई जग्गा धनी पुर्जा उपलब्ध गराइदिन गरेका उनीहरुको मागको सम्बोधन गर्दै प्रदेश सभा सांसद तथा प्रदेश समितिका सभापति र सदस्यहरुले उनीहरुको न्यायका लागि सदन र समितिमा आवाज उठाउने प्रतिबद्धता व्यक्त गरे ।
सभापति आनन्द श्रेष्ठले वनकरियाबीचमा आफू पहिलो पटक उपस्थित भएको बताउँदै उनीहरुको न्यानको लागि आफूले आफ्नो तर्फबाट भूमिका निर्वाह गर्ने बताए।वनकरिया समुदायको हक अधिकारको लागि सम्वन्धित क्षेत्रको जनप्रतिनिधि नै सक्रिय हुनुपर्ने बताए ।
“प्रदेश सभाको समितिको तर्फबाट गर्नुपर्ने कामलाई हामीले हेरिहरेका छौ” उनले भनें । यस्तै, शिक्षा, स्वास्थ्य तथा कृषि समितिका सदस्य तथा प्रदेशको पूर्व मन्त्री कुमारी मोक्तानले यस बस्तीमा यो भन्दा धेरै समस्या रहेको स्मरण गरिन् ।
यस समुदायमा यो भन्दा पहिला धेरै समस्या थियो, उनले भनिन् “पछिल्लो समय वनकरियालाई विभिन्न सेवा सुविधाहरु उपलब्ध गराएको छ, जग्गा प्राप्तीको लागि पनि निकै प्रयत्न गरिरहेको छ,प्रदेश सरकारले जमिनको बिषयमा बोल्न सक्छ ।” तर संघको अधिनमा भएकोले अपनत्व लिन नसकिने उनले बताइन् ।
यता, सार्वजनिक लेखा समिति सदस्य गिर बहादुर तामाङले वनरिया बस्तीको संरक्षण र अधिकारको लागि आफ्नो समितिमा आवाज उठाउँने र सदनबाट कानुन बनाउने बताइन् । अर्थ समितिकी सदस्य सुना परियारले वनरिया समुदायको पीडा सुनेको भन्दा आफनै आँखाले देख्दा निकै दुखदायी रहेको बताइन्।
यसअघि वनकरिया जातीको बिषयमा सदन र समितिमा कहिल्यै अवाज नउठाएको स्वीकार गर्दै उनले भनिन् “यसअघि यसरी बुझ्ने मौका पाइएको थिएन,अब वनकरियाको दुख बुझ्ने मौका पायौ, पक्कै पनि सदनमा कुरा उठाउनेछु ।” यस्तै, शिक्षा स्वास्थ्य तथा कृषि समिति सदस्य समिता खड्कीले वनकरिया समुदायका हितका लागि यसअघि केही नगरे पनि आगामी दिनमा यस समुदायको अधिकारको लागि सधैं आवाज उठाउने बताइन् ।
मकवानपुरगढी सञ्चार प्रा.लि. हेटौंडा २ को आयोजना, नर्बेजियन दुतावास काठमाडौं तथा संसद सहयोग परियोजना संयुक्त राष्ट्रसंघीय विकास कार्यक्रम (युएनडीपी)को सहकार्यमा वनकरिया समुदायका विविध सवालहरुमा जनप्रतिनिधि र जनताका बीच अन्तरसम्वाद कार्यक्रम गरिएको हो ।
मकवानपुर । २७ औं राष्ट्रिय भुकम्प सुरक्षा दिवस २०८१ को सन्दर्भमा बागमती प्रदेश प्रमुख दीपक प्रसाद देवकोटाले सन्देश व्यक्त गर्नु भएको छ ।
‘भुकम्पीय सचेतनामा वृद्धिको लागी उहाँले शुभकामना व्यक्त गर्नु भएको छ । वि.स. १९९० साल माघ २ गतेको विनाशकारी भुकम्पको सम्झना गर्दै सचेतना प्रवाह गर्ने अभिप्रायले भुकम्पीय सुरक्षा दिवस मनाउँदै आइएको छ । यसै सन्दर्भमा देवकोटाले सचता अभिवृद्धीका लागि सन्देश वक्तव्य प्रकाशन गर्नु भएको हो ।
भुकम्पीय सुरक्षा तथा सचेतना बढाउन हरेक वर्ष माघ २ लाई भुकम्प सुरक्षा दिवसको रुपमा मनाउने गरिन्छ । यस दिन विभिन्न चेतना र सावधानीमुलक कार्यक्रमसहित मनाइन्छ । यो वर्षको भुकम्प सुरक्षा दिवस “भुकम्पले सिकाएको पाठ: बलिया संरचना र सुदृढ पुर्वतयारीका साथ” नाराका साथ मनाइदै छ ।
भुकम्प प्राकृतिक प्रकोप हो, यसलाई रोक्न सकिन्न तर सुरक्षित संरचना, सावधानि, पुर्वतयारीका उपायहरु अपनाएर यसबाट हुने क्षतिलाई न्यूनीकरण गर्न सकिन्छ ।
‘भुकम्पलाई क्षतिको कारण मान्नुभन्दा हामी बलिया, सुरक्षित संरचना, पुर्वसावधानी र भुकम्प गइहालेमा गर्नुपर्ने प्रतिकार्यमा उचित ध्यान दिएर सुरक्षात्मक स्थितिमा रहनुपर्दछ‘ सन्देशमा भनिएको छ : ‘नेपाल भुकम्पीय जोखिम क्षेत्रमा रहेको कारणले पनि हामी धेरै सचेत हुनु जरुरी छ ।’
वि.स.२०७२ को बिनाशकारी भुकम्पपछि धेरै पराकम्प र अरु थुप्रै भुकम्पहरुले तर्साइरहेको सन्दर्भमा यसबाट आत्तिनुभन्दा सुरक्षात्मक उपायहरू अपनाउन पर्ने उहाँले सन्देशमा बताउनु भएको छ ।
राज्यका सम्पुर्ण निकाय समेत् पुर्वतयारीका साथ रहनुपर्ने उहाँले सझाव दिनु भएको छ । प्रदेश प्रमुख देवकोटाले इतिहासको विभिन्न कालखण्डमा गएका भुकम्पमा परी ज्यान गुमाउने ज्ञात अज्ञात व्यक्तिहरुप्रती श्रद्धाञ्जली समेत अर्पण गर्नु भएको छ ।
बालिकालाई बलात्कार गर्ने युवकलाई जन्मकैद
Tags: No Comments
मकवानपुर । बालिकालाई बलात्कार गर्ने १ जना युवकलाई मकवानपुर जिल्ला अदालतले जन्मकैदकाे फैसला सुनाएको छ । छोरी नाता पर्ने बालिकालाई बलात्कार गरेको ठहर गर्दै अदालतले उक्त युवकलाई ७ लाख रुपैयाँ जरिवाना र ५ लाख रुपैयाँ पीडितलाई क्षतिपूर्ति दिनुपर्ने आदेश समेत गरेको छ ।
जिल्ला न्यायाधीश अवनी मैनाली भट्टराईको सोमबार बसेको इजलाशले मकवानपुरको बकैया गाउँपालिकाका २८ वर्षीय युवकले बालिकालाई पटक/पटक बलात्कार गरेको ठहर गर्दै उक्त फैसला गरेको हो । छोरीलाई बलात्कार गरेको देखेपछि आमाले २०८० कात्तिक १ गते बाबुको विरुद्ध जिल्ला प्रहरी कार्यालय हेटौंडामा उजुरी दिएकी थिइन् ।
उजुरीको आधारमा प्रहरीले युवकलाई पक्राउ गरी हाडानाता जबर्जस्ती करणीमा अदालतमा मुद्दा दर्ता गर्दै जन्मकैदको माग दाबी गरेको थियो । अदालतद्वारा जन्मकैद तोकिएका युवक क्षेत्रीय कारागार भीमफेदीमा थुनामा छन् ।
मकवानपुर । मकवानपुरको मनहरीमा बसको ठक्करबाट दुई वर्षीया बालिकाको मृत्यु भएको छ । आईतबार अपरान्ह मनहरी गाँउपालिका वडा नम्बर-६ नँयाबस्ती स्थित भित्री सडकखण्डमा मनहरी बजारबाट नँयाबस्ती तर्फ जादै गरेको ना १ क ९२५० नम्बरको बसले स्थानीय २ वर्षीय पुजा थिङलाई ठक्कर दिएकाे थियाे ।
बसकाे ठक्करबाट घाइते थिङलाई उपचारकाे लागि हेटौडा अस्पताल ल्याइएकाेमा उपचारकाे क्रममा मृत्यु भएको जिल्ला प्रहरी कार्यालय मकवानपुरका प्रहरी नायव उपरीक्षक श्यामु अर्यालले बताए । प्रहरीका अनुसार मृतक बालिका मनहरी गाउँपालिका ६ नँयाबस्ती बस्ने खडक बहादुर थिङको छोरी हुन् । उक्त बस मनहरीस्थित बिलिभर्स इङलिस बोर्डिङ स्कुलको रहेकाे बताइएकाे छ ।
बस चालक मकवानपुर मनहरी गाँउपालिका वडा नम्बर ७ बिजौना बस्ने चन्द्र बहादुर तामाङ तथा ठक्कर दिने बस ईलाका प्रहरी कार्यालय मनहरीले नियन्त्रणमा लिएको छ ।
मकवानपुर । मकवानपुरको मनहरीमा भएकाे सवारी दुर्घटनामा मृतक संख्या २ पुगेकाे छ । दुर्घटनामा घाइते भएका मध्ये थप १ जनाको मुत्यु भएसँगै मृतककाे संख्या २ पुगेकाे मकवानपुर प्रहरीले जनाएकाे छ ।
शनिबार मनहरी गाउँपालिका–६ डिपार्टस्थित पूर्व पश्चिम सडक खण्डमा वीरगन्जबाट चितवनतर्फ जाँदै गरेको बागमती प्रदेश ०१–०२६ च ५२५० नम्बरको स्कारपियो र चितवनबाट हेटौँडातर्फ आउँदै गरेको बा १६ च ८३२४ नम्बरको कार एक आपसमा ठोक्किएर भएकाे दुर्घटना १४ जना घाइते भएका थिए ।
घाइते मध्ये चितवन राप्ती नगरपापालिका वडा नम्बर २ गड्यौली बस्ने ५० वर्षीय सुनिता श्रेष्ठको उपचारको क्रममा नयाँ मेडिकल कलेज भरतपुर चितवनमा शनिबार साझँ मृत्यु भएकाे मकवानपुर प्रहरीले जनाएकाे छ । उनी कारमा सवार रहेका थिए । यस अघी कार चलाक मकवानपुर हेटौडा–४ स्कुलरोड बस्ने वर्ष ६० को सुरेन्द्र लाल श्रेष्ठको उपचारकाे क्रममा चितवनमै मृत्यु भएको थियाे ।
उक्त दुर्घटनामा कारमा सवार चितवन राप्ती नगरपालिका–२ गड्यौली बस्ने ५५ वर्षीय ओम कुमार श्रेष्ठ, २१ वर्षीय सुमिना श्रेष्ठ घाइते भएका छन् ।यसैगरी स्कारपियोमा सवार पर्सा वीरगंज महानगरपालिका–२ छपकैया २६ वर्षीया पुजा देवी साह, निजको छोरी ८ वर्षीय प्रियान्सी साह, सोही स्थान बस्ने २३ वर्षीय सुरदी देवी, २१ वर्षीय निशा कुमारी साह, १५ वर्षीय ओम शंकर साह, १९ वर्षीय राजिव कुमार साह, १९ वर्षीय आरती कुमारी साह, ४ वर्षीय दिव्या कुमारी साह, १६ वर्षीय सरोज शर्मा र १९ वर्षीय रोशनी शर्मा घाइते भएको मकवानपुर प्रहरीले जनाएकाे छ ।
घाइतेहरुकाे चितवन स्थित एलाईभ अस्पताल भरतपुर उपचार भइरहेको प्रहरीले जनाएकाे छ । प्रहरीका अनुसार स्कारपियाे चालक रौतहट घर भई पर्सा बीरगज बस्ने अन्दाजी १९/२० वर्षीय किशन जैसवाल फरार रहेकोले खोजी भइरहेको छ ।