मकवानपुर । मकवानपुरको बकैया गाउँपालिका–११ आँपचौरमा ट्रक र स्कुटर ठोक्किएर दुर्घटना हुँदा स्कुटर चालकको मृत्यु भएको छ ।
हेटौंडालाई ललितपुर जोड्ने कान्ति लोकपथस्थित आँपचौरमा बिहीबार जितपुर भञ्ज्याङतर्फबाट ठिंगनतर्फ जाँदै गरेको बा.प्र. ०३–००१ क ०९५२ नम्बरको ट्रक र म.प्र. ०३–०३९ प ५६४४ नम्बरको स्कुटर ठोकिएर दुर्घटना भएको थियो । उक्त दुर्घटनामा स्कुटर चालक पर्सा जिल्लाको वीरगञ्ज महानगरपालिका–१० पानीट्यांकीका ५० वर्षीय अनुराग श्रेष्ठको मृत्यु भएको जिल्ला प्रहरी कार्यालय मकवानपुरले जनाएको छ ।
दुर्घटनामा घाईते श्रेष्ठलाई हेटौंडा अस्पताल ल्याइएकोमा उपचारको क्रममा चिकित्सकले मृत घोषणा गरेको प्रहरीले जानकारी दिएको छ । ट्रक तथा चालकलाई प्रहरी नियन्त्रणमा लिएको छ ।
मकवानपुर । मकवानपुरकाे हेटौंडा उपमहानगरपालिका १७ हटिया सानाेगङगटेमा करेन्ट लागेर १ जनाकाे मृत्यु भएकाे छ ।
बिहीबार दिउँसो हेटौडा १७ सानोगङगटे स्थित बिद्युतको ट्रान्समिटरमा काम गर्ने क्रममा करेन्ट लाग्दा मनहरी ५ बसन्तपुर बस्ने २७ वर्षीय निरज भन्ने आदर्श भट्टराईकाे मृत्यु भएकाे हाे । करेन्ट लागि घाईते भएका उनलाई हेटौंडा अस्पताल ल्याएकोमा उपचारको क्रममा मृत्यु भएको प्रहरीले जनाएकाे छ ।
प्रहरीका अनुसार मृतक बिद्युत प्राधिकरणको कर्मचारी नभएकाे तर ठेकेदार मार्फत काम गर्न खटिएको कामदार हुन् ।
मकवानपुर । मकवानपुरको इन्द्रसरोवर गाउँपालिका–२, सिमखोला पुल नजिक बोलेरो पिकअप दुर्घटना हुँदा १ जनाको मृत्यु भएको छ भने २ जना घाइते भएका छन् ।
उक्त दुर्घटनामा बाेलेराेका सहचालक सर्लाही वरहथवा नगरपालिका–१ का १७ वर्षीय रोहन मण्डलकाे मृत्यु भएकाे मकवानपुर प्रहरीले जनाएकाे छ । बिहीबार बिहान १ बजे सर्लाहीबाट हेटौंडा -भीमफेदी – कुलेखानीहुदै काठमाडौंतर्फ जाँदै गरेको म.प्र. ०३–००१ च ६७२१ नम्बरको कुखुरा लोड बोलेरो पिकअप ब्रेक फेल भई सडकबाट ७ मिटर तल खोल्सामा खसेकाे जिल्ला प्रहरी कार्यालय मकवानपुरले जानकारी दिएकाे छ ।
दुर्घटनामा सहचालक मण्डलसहित सर्लाही वरहथवा नगरपालिका–१ कै १६ वर्षीय छोटे पासवान र चालक २५ वर्षीय रामवली साह घाइते भएका थिए । प्रहरीका अनुसार घाइते तीनै जनालाई उपचारका लागि काठमाडौं मेडिकल कलेज लगिएकोमा उपचारको क्रममा सहचालक रोहनको बिहीबार बिहानै मृत्यु भएको हाे । घाइते पासवान र साहकाे काठमाडौँ मेडिकल कलेजमा उपचार भइरहेको छ ।
प्रहरीका अनुसार बोलेरो गाडीमा रहेको ५ सय वटा कुखुरा मध्ये ३ सय वटा मरेका छन् ।
मकवानपुर । आगामी फागुन २१ गते ताेकिएकाे प्रतिनिधिसभा निर्वाचनकाे लागि मकवानपुरमा निर्वाचन अधिकृतको कार्यालय स्थापना गरिएको छ । २ वटा निर्वाचन क्षेत्र रहेको मकवानपुरमा मुख्य निर्वाचन अधिकृत र निर्वाचन अधिकृतको कार्यालय स्थापना गरिएको हो ।
हेटौंडा उपमहानगरपालिसका वडा नं. ११ स्थित प्रादेशिक कृषि तरकारी थोक बजारको भवनमा निर्वाचन मकवानपुर क्षेत्र नम्बर १ र २ का लागि निर्वाचन अधिकृतकाे कार्यालय स्थापना गरिएको हो । जिल्लामा निर्वाचनकाे कार्य गर्ने गरी जिल्ला न्यायाधीश गीता श्रेष्ठलाई मुख्य निर्वाचन अधिकृत र जिल्ला सरकारी वकिलको कार्यालय मकवानपुरका जिल्ला न्यायाधिवक्ता देवेन्द्रराज आचार्यलाई निर्वाचन अधिकृतमा नियुक्त गरिएको छ ।
३ लाख १५ हजार मतदाता
निर्वाचनका लागि जिल्लामा ३ लाख १५ हजार ३३४ मतदाता कायम भएका छन् । प्रदेश निर्वाचन कार्यालयका अनुसार कुल मतदाता संख्या ३ लाख १५ हजार ३३४ कायम रहेको हो ।
प्रतिनिधिसभा निर्वाचन २०७९ पछि मकवानपुरमा १४ हजार ६०१ जना मतदाता थपिएकाे हाे । प्रदेश निर्वाचन कार्यालयका सूचना अधिकारी तारा प्रसाद आचार्यका अनुसार सबैभन्दा धेरै मतदाता हेटौंडा उपमहानगरपालिकामा ७ हजार १६३ थप भएका छन् । मनहरी गाउँपालिकामा एक हजार ४६८, थाहा नगरपालिकामा एक हजार ४१५ मतदाता थपिदाँ बकैया गाउँपालिकामा ८१७, बागमती गाउँपालिकामा ८४०, मकवानपुरगढी गाउँपालिकामा ७५४ र भीमफेदी गाउँपालिकामा ६९३ मतदाता थप भएका छन् ।
त्यस्तै, इन्द्रसरोवर गाउँपालिकामा ३७३, कैलाश गाउँपालिकामा ३६३ र राक्सिराङ गाउँपालिकामा २३५ मतदाता थपिएको निर्वाचन कार्यालयले जनाएको छ । मतदाता संख्या वृद्धि भएसँगै जिल्लामा मतदान केन्द्र पनि थप गरिएको छ । मतदान स्थल भने साविककै १६७ कायम राखिए पनि मतदान केन्द्र १० वटा थप गरिएको सूचना अधिकारी आचार्यले बताए ।
जिल्लाकाे निर्वाचन क्षेत्र नम्बर १ मा १ लाख ५८ हजार ४३५ र निर्वाचन क्षेत्र नम्बर २ मा १ लाख ५६ हजार ८९९ मतदाता रहेका छन् । जिल्लाभर कुल मतदातामध्ये महिला १ लाख ५३ हजार ३७६, पुरुष १ लाख ६१ हजार ९५३ र अन्य ५ जना रहेकाे प्रदेश निर्वाचन कार्यालयले जनाएकाे छ । अद्यावधिक तथा दाबी–विरोधको क्रममा निर्वाचन कार्यालयले मतदाता सूचीबाट ८८४ नाम हटाएको छ । मृत्यु भएका २१ जना मतदाता तथा दोहोरो नाम रहेका ६८३ जनाको नाम सूचीबाट हटाइएको कार्यालयले जनाएको छ ।
१६७ मतदान स्थल र ३७४ मतदान केन्द्र, १९ वटा अति संवेदनशील
प्रतिनिधिसभा अन्तर्गत २ वटा निर्वाचन क्षेत्र रहेको मकवानपुरमा हाल १६७ मतदान स्थल र ३७४ मतदान केन्द्र तोकिएका छन् । यसअघि जिल्लामा ३६४ मतदान केन्द्र रहेका थिए ।
निर्वाचन क्षेत्र नम्बर १ मा ६२ मतदान स्थल र १७८ मतदान केन्द्र रहेका छन् भने निर्वाचन क्षेत्र नम्बर २ मा १०५ मतदान स्थल र १९६ मतदान केन्द्र तोकिएका छन् । जिल्लाको १९ मतदान स्थललाई अति संवेदनशील सूचिमा राखिएको छ । सुरक्षा संवेदनशीलताको आधारमा जिल्लाका १० स्थानीय तहमध्ये ६ स्थानीय तहमा रहेका मतदान स्थल अति संवेदनशीलको सूचीमा परेका हुन् ।
जिल्लाभर रहेका कुल १६७ मतदान स्थलमध्ये १९ वटा अति संवेदनशील, ६० वटा संवेदनशील र ८८ वटा सामान्य श्रेणीमा राखिएको जिल्ला प्रहरी कार्यालय मकवानपुरले जनाएको छ । अति संवेदनशील सूचीमा परेका मतदान स्थलमा २६ मतदान केन्द्र रहेका छन् । सबैभन्दा धेरै बकैया गाउँपालिकामा ५ मतदान स्थल र ७ मतदान केन्द्र अति संवेदनशील रहेका छन् । त्यस्तै, राक्सिराङ गाउँपालिकामा ६ मतदान स्थल र ६ मतदान केन्द्र, बागमती गाउँपालिकामा ५ मतदान स्थल र ६ मतदान केन्द्र, भीमफेदी गाउँपालिकामा १ मतदान स्थल र ३ मतदान केन्द्र, मनहरी गाउँपालिकामा १ मतदान स्थल र ३ मतदान केन्द्र तथा कैलाश गाउँपालिकामा १ मतदान स्थल र १ मतदान केन्द्र अति संवेदनशील मानिएको छ ।
यसैगरी, जिल्लामा ६० मतदान स्थल र १ सय २३ मतदान केन्द्र संवेदनशील सूचीमा राखिएका छन् । संवेदनशील मतदान स्थलहरूमा हेटौंडा उपमहानगरपालिकाका ७ मतदान स्थल र ३१ मतदान केन्द्र, थाहा नगरपालिकाका ९ मतदान स्थल र १७ मतदान केन्द्र, राक्सिराङ गाउँपालिकाका १३ मतदान स्थल र १७ मतदान केन्द्र, बकैया गाउँपालिकाका ८ मतदान स्थल र १५ मतदान केन्द्र तथा बागमती गाउँपालिकाका ७ मतदान स्थल र १७ मतदान केन्द्र रहेका छन् ।
मकवानपुरगढी गाउँपालिकाका ४ मतदान स्थल र ७ मतदान केन्द्र, इन्द्रसरोवर गाउँपालिकाका २ मतदान स्थल र २ मतदान केन्द्र, भीमफेदी गाउँपालिकाका ४ मतदान स्थल र ४ मतदान केन्द्र, कैलाश गाउँपालिकाका ३ मतदान स्थल र ५ मतदान केन्द्र तथा मनहरी गाउँपालिकाका ३ मतदान स्थल र ८ मतदान केन्द्र पनि संवेदनशील सूचीमा परेका छन् ।
यसैबीच, निर्वाचनको सुरक्षाका लागि भर्ना गर्न लागिएको निर्वाचन प्रहरीमा युवाहरूको आकर्षण देखिएको छ। मकवानपुरमा आवश्यक संख्याभन्दा बढीले आवेदन दिएका छन्। जिल्ला प्रहरी कार्यालयका प्रहरी नायब उपरीक्षक पुष्कर बोगटीका अनुसार हालसम्म १ हजार ६०२ पुरुष र ६६४ महिला गरी कुल २ हजार २६६ जनाले आवेदन दिएका छन्। जिल्लामा १ हजार ९२३ जना निर्वाचन प्रहरी भर्ना गरिने छ ।
मकवानपुर । बागमती प्रदेश सरकारले प्रदेश प्रहरी कार्यालय हेटौंडालाई ३० थान मोटरसाइकल हस्तान्तरण गरेको छ।
बिहीबार बागमती प्रदेशका मुख्यमन्त्री इन्द्रबहादुर बानियाँले प्रदेश प्रहरी कार्यालय हेटौंडाका प्रमुख प्रहरी नायब महानिरीक्षक अरुण पौडेललाई मोटरसाइकलको साँचो हस्तान्तरण गरेका हुन् । प्रदेश प्रहरीको कार्यक्षमता अभिवृद्धि गर्ने उद्देश्यले हस्तान्तरण गरिएको ३० थान मोटरसाइकल प्रदेश अन्तर्गतका १० जिल्लाका प्रहरी कार्यालय तथा ट्राफिक कार्यालयहरूलाई प्रदान गरिने बताइएको छ ।
आन्तरिक मामिला तथा कानून मन्त्रालयको ९७ लाख २० हजार रुपैयाँ बजेटबाट खरिद गरिएका १६० सीसीका ३० वटा मोटरसाइकल गत भदौ २३ र २४ गते भएको जेनजी आन्दोलनका क्रममा क्षतिग्रस्त सवारी साधनको विकल्पका रूपमा उपलब्ध गराइएको हो ।
मोटरसाइकल हस्तान्तरण कार्यक्रममा मुख्यमन्त्री बानियाँले प्रहरीको मनोबल उच्च बनाउनका लागि प्रदेश सरकार प्रतिबद्ध रहेको बताए । ‘समन्वय, सहकार्य र सहअस्तित्वको भावनाका साथ शान्ति सुरक्षा कायम गर्न सरकार र प्रहरीबीच सहकार्य आवश्यक रहेको छ’ उनले भने । आर्थिक मामिला तथा योजना मन्त्री प्रभात तामाङले जनताको सुरक्षामा खटिने सुरक्षाकर्मीलाई प्रदेश सरकारले निरन्तर सहयोग गर्दै आएको बताए ।उनले भने ‘जेनजी आन्दोलनका क्रममा क्षति पुगेका प्रहरी कार्यालयहरूको मर्मतसम्भारका लागि समेत सरकारले बजेट विनियोजन गरेको छ ।’
प्रदेश प्रहरी प्रमुख डिआइजी अरुण पौडेलले प्रदेश सरकारको सहयोगमा १ अर्ब रुपैयाँभन्दा बढी लागतमा ७२ वटा प्रहरी कार्यालय भवन निर्माण भइसकेको र केही अझै निर्माणाधीन अवस्थामा रहेको बताए ।
‘आन्दोलनका क्रममा सवारी साधन क्षति हुँदा कार्यसम्पादनमा असर परेको छ’ उनले भने ‘प्रहरीलाई चारपाङ्ग्रे सवारी साधनको आवश्यकता छ ।’ ‘उक्त सवारी साधनले दैनिक शान्ति सुरक्षा, निर्वाचन लक्षित सुरक्षा योजना तथा अपराध रोकथाममा प्रभावकारी भूमिका रहन्छ’ उनले भने ।