मकवानपुर । मकवानपुरको छुट्टाछुट्टै स्थानमा भएको सवारी दुर्घटनामा १ जनाको मृत्यु भएको छ भने ४ जना घाइते भएका छन ।
पूर्व–पश्चिम राजमार्गअन्तर्गत मकवानपुरको मनहरी ६ नयाँबस्तीमा सवारी दुर्घटना हुँदा मोटरसाइकल चालकको मृत्यु भएको छ । शुक्रबार हेटौंडाबाट चितवनतर्फ जाँदै गरेको ना ७ ख ८४७८ नम्बरको डिजल लोड ट्याङ्कर र विपरित दिशाबाट आएको ना १४ प ९९४३ नम्बरको मोटरसाइकल आपसमा ठोक्किएर दुर्घटना हुँदा मोटरसाइकल चालक हेटौंडा–१५ का अन्दाजी ४० वर्षीय शंकरत्न तितुङको मृत्यु भएको हो ।
दुर्घटनामा गम्भीर घाइते भएका तितुङको उपचारको क्रममा चितवन जिल्लाको भरतपुर स्थिय पुरानो मेडिकल कलेजमा मृत्यु भएको जिल्ला प्रहरी कार्यालय मकवानपुरले जानकारी दिएको छ । ट्याङ्कर चालक चितवन जिल्लाको राप्ती नगरपालिका–२ का ३६ वर्षीय ईश्वर बर्तौलालाई प्रहरीले नियन्त्रणमा लिएको छ ।
दुर्घटनापछि स्थानीयले सडक अवरुद्ध गरेका थिए ।
मोटरसाइकल दुर्घटनामा ४ जना घाइते,१ जना गम्भीर
मकवानपुरको बकैया गाउँपालिका–३, हात्तीसुडेमा शुक्रबार साँझ मोटरसाइकल दुर्घटना हुँदा १७ वर्षीय किशोर हिमाल जिम्बा गम्भीर घाइते भएका छन् । सोही दुर्घटनामा अन्य ३ जना घाइते भएका छन । शुक्रबार साँझ ६ बजेको समयमा हेटौंडा–सिन्धुली सडकखण्डको बकैया–३, हात्तीसुडेमा मोटरसाइकल आपसमा ठोक्किएर दुर्घटना भएको थियो । हात्तीसुडेबाट फापरबारीतर्फ जाँदै गरेको ना ४१ प ३००८ नम्बरको मोटरसाइकल र विपरित दिशाबाट आएको बा ८६ प ८७०४ नम्बरको मोटरसाइकल आपसमा ठोक्किएर दुर्घटना हुँदा ना ४१ प ३००८ नम्बरको मोटरसाइकल चालक बकैया–३, हात्तीसुडेका १७ वर्षीय जिम्बा गम्भीर घाइते भएको प्रहरी चौकी हात्तीसुडेले जनाएको छ ।
यस्तै बा ८६ प ८७०४ नम्बरको मोटरसाइकल चालक बकैया–३, हात्तीसुडेका १८ वर्षीय बसन्त डङ्गोल, मोटरसाइकलमा सवार बकैया–३, बाघमाराका २२ वर्षीय तीर्थ लामिछाने र २३ वर्षीय सुजन गुरुङ घाइते भएका छन् ।
डंगोल र लामिछानेको अवस्था मध्यम रहेको र गुरुङको अवस्था सामान्य रहेको प्रहरीले जनाएको छ । उनीहरुलाई उपचारका लागि हेटौंडा ल्याइएको मकवानपुर प्रहरीले जानकारी दिएको छ ।
मकवानपुर । मकवानपुर प्रहरीले लागुऔषध अफिमसहित १ जनालाई नियन्त्रणमा लिएकाे छ । सोमबार दिउँसो ३ बजेकाे समयमा मकवानपुरको मनहरी गाउँपालिका वडा नम्बर ८ बाट पर्सा जिल्लाको पटेर्वा सुगौली गाउँपालिका–८ रंगपुरटारीका ५० वर्षीय शेख भिखारीलाइ अफिम १ केजी सहित नियन्त्रणमा लिइएकाे मकवानपुर प्रहरीले जनाएकाे छ ।
मनहरी ८ दारिमबासस्थित भित्री सडकखण्डमा कान्द्राङबाट मनहरीतर्फ आउँदै गरेको बा ४ ख ५१४८ नम्बरको यात्रुवाहक बस चेकजाँच गर्दा भिखारी र १ केजी अफिम नियन्त्रणमा लिइएकाे जिल्ला प्रहरी कार्यालय मकवानपुरका प्रहरी प्रवक्ता टेक बहादुर कार्कीले बताए ।
कार्कीका अनुसार बा ४ ख ५१४८ नम्बरकाे बसमा लागुऔषध लिई आउदै गरेको भन्ने खबर प्राप्त हुनासाथ इलाका प्रहरी कार्यालय मनहरीबाट प्रहरी निरीक्षक कृष्णराज ढकालको कमाण्डमा प्रहरी टोली खटिइ बसलाई सुरक्षाजाँच गर्दा बसमा सवार भिखारीलाई शंका लागि सुरक्षाजाँच गर्दा लागुऔषध अफिम १ केजी फेला पारेको हाे । उक्त लागुऔषधसहित भिखारीलाई नियन्त्रणमा लिएर थप अनुसन्धान गरिरहेको प्रहरीले जनाएको छ ।
मकवानपुर । मकवानपुरको हेटौंडामा फेरी चक्कु प्रहार भएको छ । किशोरलाई चक्कु प्रहार गरेको आरोपमा दुई जनालाई जिल्ला प्रहरी कार्यालय मकवानपुरले पक्राउ गरेको छ ।
हेटौंडा उपमहानगरपालिका वडा नम्बर–१७ राजदेवीमा मादक पदार्थ सेवनगरी चक्कु प्रहार गर्ने दुई युवालाई प्रहरीले पक्राउ गरेको हो।
हेटौंडामा पछिल्ला महिनामा सामान्य भनाभनका घटनामा पनि शरीरमा गहिरो चोट लाग्नेगरी चक्कु प्रहार गर्ने गरिएको पाइएको छ । शनिबार दिउँसो मादक पदार्थ सेवन गरेका युवाहरूले साइकलमा कवाडीको काम गर्ने भारत मोतिहारी घर भई हाल हेटौंडा–४ कमलडाडा बस्ने अन्दाजी १८ बर्षीय जोधा कुमार सहनीलाई चक्कु प्रहार गरेका थिए ।
लुट्ने प्रयास स्वरुप सहनीलाई मादक पदार्थ सेवन गरेका हटिया बस्ने अन्दाजी ३२ को सन्तोष राई र हेटौडा ९ लामसुरे बस्ने अन्दाजी १९ बर्षीय शुसिल मोक्तानले चक्कु प्रहार गरेको मकवानपुर प्रहरी प्रवक्ता डिएसपी टेक बहादुर कार्कीले बताएका छन्। चक्कु प्रहार गरी फरार रहेका दुवैजनालाई वडा प्रहरी प्रमुख प्रहरी निरीक्षक केशर कुमार न्यौपाने नेतृत्व टोलीले हेटौडा १७ सिसौघारीबाट चक्कु सहित पक्राउ गरेको जनाइएको छ।
चक्कु प्रहारबाट घाइते सहनीको हेटौडा अस्पतालमा उपचार भइरहेको र अवस्था खतरामुक्त रहेको जनाइएको छ। पक्राउ परेका दुवैजनालाई जिल्ला प्रहरी मकवानपुरमा राखिएको र आवश्यक अनुसन्धान कार्य भइरहेको प्रहरीले जनाइएको छ।
यसअघि हेटौंडाको मानसचोक र बसपार्क क्षेत्रमा चक्कु प्रहार गरिएको थियो । यस्तै दुई महिना अघि एक युवतीलाई युवकले चुक्कु प्रहार गरि गम्भीर घाइते बनाएका थिए । युवतीलाई चक्कु हान्नेलाई अदालतले सफाइ दिइसकेको छ भने, अन्य दुई घटनाको अनुसन्धान जारी रहेको मकवानपुर प्रहरीको भनाई छ ।
मकवानपुर । बागमती प्रदेशका उपत्यका बाहेकका १० जिल्लामा कार्यरत ४ सय ६६ प्रहरी कर्मचारीलाई पुरस्कृत गरिएको छ । चालु आर्थिक वर्ष २०७९/०८० को पुस महिनासम्म मातहतमा कार्यरत ९६ जना प्रहरी कर्मचारीलाई भने आचरण विपरीत काम गरेको भन्दै विभागीय कारबाही गरिएको बागमती प्रदेश प्रहरी कार्यालय हेटौंडाले जनाइएको छ ।
यस्तै उत्कृष्ट कार्यसम्पादन गर्ने प्रहरी कर्मचारीलाई पुरस्कृत गर्ने गरिएको प्रदेश प्रहरी कार्यालयका प्रवक्ता प्रहरी वरिष्ठ उपरीक्षक दीपक रेग्मी जानकारी दिए । हालसम्म कार्यालयले आफ्नो कार्यक्षेत्रमा उत्कृष्ट कार्य गर्ने ४ सय ६६ जना प्रहरी कर्मचारीलाई पुरस्कृत गरेको एसएसपी रेग्मीले जानकारी दिए । उनका अनुसार कार्यालय मातहत काम गर्ने प्रहरी कर्मचारीलाई प्रत्येक महिना १५ जना पुरस्कृतसमेत गर्दै आइरहेको छ ।
बागमती प्रदेशमा चालु आर्थिक वर्ष २०७९/८० को ६ महिनाभित्र दुई हजार भन्दा बढी मुद्दा दर्ता भएका छन् ।प्रदेशको १० जिल्लाबाट ६ महिनामा २ हजार १ सय ५३ वटा मुद्दा दर्ता भएका हुन् । प्रदेश प्रहरी कार्यालय मातहतका २३ वटा प्रहरी कार्यालयहरुमा उक्त संख्यामा मुद्दा दर्ता भएको हो ।
प्रहरी कार्यालयले विभिन्न अपराधमा संलग्न भएको आरोपमा १ हजार ४ सय ५ जनालाई पक्राउ गरेको जानकारी दिएको छ । कार्यालयका अनुसार फैसला कार्यान्वयनतर्फ प्रहरीले ३ सय ८७ जनालाई पक्राउ गरी ४ करोड ८ लाख ६१ हजार ८ सय ९९ रुपैयाँ जरिवाना संकलन गरेको छ ।
यस्तै चालुआर्थिक वर्षको ६ महिनामा १ लाख २८ हजार ७ सय ५४ वटा सवारी साधन ट्राफिक प्रहरीको कारबाहीमा परेका छन् । बढ्दो सवारी दुर्घटना न्यूनीकरण गर्ने उद्देश्यले नियम विपरित चलेका सवारी साधन नियन्त्रणमा लिएर कारबाही गरिएको बागमती प्रदेश प्रहरी कार्यालयले जनाएको छ ।
कारबाहीमा परेका उक्त सवारी साधन कारबाहीबाट ११ करोड ३२ लाख ६५ हजार ५ सय रुपैयाँ जरिवाना संकलन गरिएको एसएसपी रेग्मीले जानकारी दिए । सवारी दुर्घटना न्यूनीकरण गर्नका लागि सवारी साधनको यान्त्रिक परीक्षण अभियान संचालन गरी ५ हजार ५ सय ९४ वटा सवारी साधनको यान्त्रिक परीक्षण गरिएको प्रवक्ता रेग्मीले बताए ।
सवारी साधनको तीब्र गति नियन्त्रणका लागि विभिन्न २ सय २० स्थानमा राडर गनसहित चेकजाँच गर्ने व्यवस्था मिलाएर सिन्धुली, काभ्रे, चितवन, मकवानपुर र धादिङ जिल्लाका राजमार्गमा चल्ने सार्वजनिक सवारीसाधनमा टाइम कार्डको व्यवस्था गरिएको प्रवक्ता रेग्मीले बताए ।
बागमती प्रदेशमा चालु आर्थिक वर्षको ६ महिनाको अवधिमा लागूऔषध ओसारपसारमा संलग्न २ सय ५७ जना पक्राउ परेका छन् । सो अवधिमा प्रदेशको कार्यक्षेत्रका १० जिल्लामा लागूऔषध ओसारपसारमा संलग्न २ सय ५७ जना पक्राउ परेको बागमती प्रदेश प्रहरी कार्यालय हेटौंडाले जनाएको छ ।
प्रदेश प्रहरी कार्यालय हेटौंडाद्वारा सार्वजनिक गरिएको विवरण अनुसार, सो अवधिमा लागूऔषध गाँजा २ हजार ८८७ किलो, चरेश ९५ किलो, अफिम २ किलो र खैरो हिरोइन १८७ ग्राम बरामद भएको छ ।
त्यस्तै, विभिन्न प्रतिबन्धीत औषधिजन्य लागूऔषध २२ हजार ९१३ पिस, १ लाख ५ हजार ५०० मिलि लिटर तरलजन्य लागूऔषधसहित २५७ जनालाई पक्राउ गरेको जनाएको हो । साथै सो अवधिमा २६ हजार ८६७ लिटर तयारी घरेलु मदिरा र कच्चा मदिरा २३ हवार ८१ किलो बरामद गरेर नष्ट गरिएको छ ।
यस्तै, कार्यालयले प्रशासनिक सुधारअन्तर्गत मातहतका १४ वटा कार्यालयसँग वार्षिक कार्यसम्पादन सम्झौता गरेको र १२ लक्ष्य र १ सय क्रियाकलाप कार्यान्वयनमा रहेको रेग्मीले बताए । प्रादेशिक प्रहरी अस्पताल तथा प्रदेशस्तरीय विधिविज्ञान प्रयोगशाला निर्माण गर्न ३० वर्षका लागि हेटौँडा उपमहानगरपालिका–१७, स्थित हटियामा नेपाल सरकारको नाममा रहेको ४ बिगाहा जग्गा लिजमा लिने सम्झौता भएको समेत रेग्मीले जानकारी दिए ।
प्रदेश प्रहरी कार्यालयले शान्ति सुरक्षा व्यवस्थापन तथा अपराध अनुसन्धानमा प्रविधिको प्रयोग बढाउँदै लगेको रेग्मी बताउँछन् । उनका अनुसार सिसिटिभी जडानलाई प्राथमिकता दिँदै ६ महिनाको अवधिमा प्रदेशका विभिन्न स्थानमा थप ८१ वटा सिसिटिभी जडान गरिएको छ ।
बागमती प्रदेश प्रवेश गर्ने विभिन्न राजमार्ग तथा नाकाहरुमा रहेका सिसिटिभी प्रदेश प्रहरी कार्यालयको कन्ट्रोल रुमबाट मनिटर गरिँदै आएको छ । थप सिसिटिभी जडानका लागि प्रदेश सरकारबाट १ करोड रुपैयाँ बजेट विनियोजन भइसकेको उनले बताए ।
पोखरामा आइतबार भएको कहालीलाग्दो हवाई दुर्घटनामा ठूलो मानवीय क्षति भएको छ । यती एयरको एटीआर–७२–५०० दुर्घटनामा ज्यान गुमाउनेमध्ये ६८ जनाको शव संकलन गरिएको छ । विमानमा चालक दलका ४ सहित ७२ जना यात्रु सवार थिए । अन्य ४ जनाको शव संकलनमा कठिनाइ भएको छ । नेपालको आन्तरिक हवाई उडानमा यति धेरै यात्रुको मृत्यु भएको यो पहिलो घटना हो । पोखराको यो घटनाले आइतबार सिंगो मुलुक नै शोकमय बन्न पुगेको थियो । सरकारले सो घटनाको शोकमा सोमबार सार्वजनिक बिदा दिएको छ ।
पोखरामा कहालीलाग्दो हवाई दुर्घटना
काठमाडौंदेखि पोखरा उडेको यती एयरलाइन्सको ९एन–एएनसी, एटीआर–७२ ५०० वायुयान पोखरा अन्तर्राष्ट्रिय विमानस्थलमा अवतरण गर्ने क्रममा बिहान १०ः५२ बजे सेती खोंचमा दुर्घटनाग्रस्त भएको थियो । काठमाडांैंबाट १०ः३२ मा उडेको जहाज पोखरा टावरसँग सेती नदीको खोंचमा अन्तिम सम्पर्क भएको नेपाल नागरिक उड्डयन प्राधिकरणले जनाएको छ ।
विमानमा सवार यात्रुमध्ये ५३ नेपाली र १५ विदेशी यात्रु थिए । विदेशीमध्ये ५ भारतीय, ४ रसियन, २ कोरियन, १ अर्जेन्टिनी, १ अस्टे«लियन, १ आइरिस र १ फ्रान्सेली नागरिक थिए । जहाजमा चालक दलका सदस्यमा पाइलट कमल केसीसहित कोपाइलट अञ्जु खतिवडा तथा एयरहोस्टेज सिर्जना होंगचु र ओसिन आलेमगर थिए ।
विमान खसेको स्थान पुरानो विमानस्थलको पूर्वपट्टिको नेपाली सेनाको ब्यारेक पछाडि पर्छ । नयाँ विमानस्थलतर्फ ल्यान्ड गर्न मोडिएको अवस्थामा विमान दुर्घटनामा परेको स्थानीय बताउँछन् । विमानस्थलले अतवरणको अनुमति लिइसकेको अवस्थामा दुर्घटना भएको प्राधिकरणका सूचना अधिकारी ज्ञानेन्द्र भुलले बताए । उनका अनुसार मौसमको समस्या नभए पनि विमानको प्राविधिक कारणले दुर्घटना भएको प्रारम्भिक अनुमान छ ।
विमानमा सवार हुनेमा किसान आचार्य, निशान्त आचार्य, शालिकराम आचार्य, सदाकत अलिमियाँ, पूर्णबहादुर गुरुङ, जीतेन्द्रबहादुर कुँवर, एलिना बन्ड्रो, अनिशा बानियाँ, स्लक भट्ट, निरा छन्त्याल, आशिमा गुरुङ, अनुशा गुरुङ, बेलमान गुरुङ, विजयकुमार गुरुङ, जीवनकला गुरुङ, माया गुरुङ, लक्की गुरुङ, शिवकुमार गुरुङ, सीता गुरुङ, यमुना गुरुङ, यास्मिन गुरुङ, रविन हमाल, सन्जय जैसवाल, सोनु जैसवाल, रचना काप्mले, सीताकुमारी खड्का थिए । यस्तै, अनिलकुमार राजभार, भगवती कुँवर, अविशेक कुशवाह, ओममाया गुरुङ, सुस्मा पाण्डे, हरि परियार, लक्ष्मी परियार, रीता परियार, अरुण पौडेल, लक्ष्मी पौडेल, प्रसिद्धि पौडेल, त्रिभुवन पौडेल, पोजन राना, सविना रायमाझी, राजन सापकोटा, अनिल शाही, संगिता शाही, जमुना शर्मा, विशाल शर्मा, युवराज शर्मा, मोहन श्रेष्ठ, डा. शोना दिवाकर, बन्दना सुनार, राजुसिंह ठकुरी, चूर्ण थापा, गणेश थापा, लवराज तिमिल्सिना थिए ।
विदेशी नागरिकमा मेरोल लभ, आयुरी ल्यागिन, भिक्टर ल्यागिन, जेनितसन्डरा पालाभेकिनो, भिक्टोरिया अतुनिना, इलिना बन्डुरो, रुअनकालुम क्रिघ्टोन, एलेक्जेन्डर आइरिडोरे थिए । शिशुहरूमा कृष परियार, प्रसिद्धि पौडेल, आयुर्दी शर्मा, बेबी शर्मा थिए । अन्य २ शिशुको नाम खुलेको छैन ।
१३ जनाको सनाखत
शव भेटिएमध्ये १३ जनाको पहिचान भएको जिल्ला प्रहरी कार्यालय कास्कीले जनाएको छ । पश्चिमाञ्चल क्षेत्रीय अस्पताल (पोखरा स्वास्थ्य विज्ञान प्रतिष्ठान)को शवगृहमा राखिएको शवमध्ये परिवारका सदस्य तथा आफन्तले गरेको पहिचानमा निशान्त आचार्य, संगीता शाही, डा. सुशील श्रेष्ठ, डा.सोना दिवाकर, रियान पौडेल, सदाकत अलिमियाँ, लक्ष्मी पौडेल, प्रसिद्धि पौडेल, त्रिभुवन पौडेल, अरुण पौडेल, पूर्णकुमार गुरुङ, कोरियन नागरिक यु क्युन घुल, युन्जु मेन हुन् । अन्यको सनाखत हुन बाँकी छ ।
पहिचान भएका शव सोमबार मात्र आफन्तलाई जिम्मा लगाइने कास्कीका प्रमुख जिल्ला अधिकारी टेकबहादुर केसीले जानकारी दिए । पहिचान नभएका शवको डीएनए परीक्षण गरिने छ । त्यसका लागि शवको डीएनए सोमबार नै काठमाडौं पठाइनेछ । अस्पताल परिसरमा भने मृतकका परिवारजन, आफन्त र शुभचिन्तकको दिनभर रुवावासी चलेको थियो ।
उद्धारमा कठिनाइ
सेती खोंचमा विमान दुर्घटना भएकाले उद्धारमा कठिनाइ भएको छ । त्यसमाथि मानिसको अत्यधिक भीडले उद्धारकर्तालाई कठिनाइ भएको थियो । सुरक्षाकर्मीसहित एम्बुलेन्स, दमकल र स्थानीय उद्धारमा दिनभर खटिएको नेपाल नागरिक उड्डयन प्राधिकरणको खोज तथा उद्धार समन्वय केन्द्रले जनाएको छ । उद्धारमा सशस्त्र प्रहरीको गोताखोर टोलीसमेत सेती नदीमा परिचालन गरिएको थियो । उद्धार कार्यमा क्रेनको समेत प्रयोग गरिएको थियो ।
पत्रकार पौडेल रहेनन्
जहाज दुर्घटनामा पत्रकार त्रिभुवन पौडेलको पनि मृत्यु भएको छ । नेपाल पत्रकार महासंघका केन्द्रीय सदस्य पत्रकार पौडेल प्रेस सेन्टरका उपाध्यक्षसमेत हुन् ।
प्रेस सेन्टरको सचिवालय बैठकमा सहभागी हुनका लागि उनी काठमाडौं गएका थिए । उनको पाइन्टमा रहेको बालेट र परिचयपत्रका आधारमा शव सनाखत भएको हो । नेपाल पत्रकार महासंघ गण्डकीका संस्थापक अध्यक्षसमेत रहेका ३७ वर्षीय पौडेल पोखरा हटलाइन दैनिकका सम्पादक हुन् । पर्वत स्थायी घर भई हाल पोखरा ११, फूलबारी बस्ने उनका श्रीमती र एक छोरा छन् ।
दुर्घटनामा बागलुङकी लोक तथा दोहारीगायिका निरा छन्त्यालको मृत्यु भएको छ । उनी पोखरा छन्त्याल समाजको कार्यक्रममा सहभागी हुन विमानमा सवार भएकी थिइन् ।
यस्तै, दुर्र्घटनामा २ चिकित्सक दम्पतीसहित उनका छोराको मृत्यु भएको छ । राष्ट्रिय ट्रमा सेन्टरमा कार्यरत ३८ वर्षीय डा. सुशील श्रेष्ठ र उनका पति डा. सोना दिवारकको पनि निधन भएको हो । विमान दुर्घटनामा १० वर्षको छोराको पनि मृत्यु भएको हो । उनीहरू छुट्टी मनाउन पोखरा आउँदै थिए ।
सोमबार शोक बिदा
सरकारले यती एयरको विमान दुर्घटनामा मृतकप्रति शोक व्यक्त गर्दै २ माघमा सार्वजनिक बिदा दिने निर्णय गरेको छ ।
आइतबार बसेको मन्त्रिपरिषद्को आकस्मिक बैठकले सोमबार शोकपूर्ण घटनाको सन्दर्भका शोक बिदा दिने निर्णय भएको उपप्रधानमन्त्री तथा अर्थमन्त्री विष्णु पौडेलले जानकारी दिए ।
विमान एक्कासि कोल्टियो र खस्यो : प्रत्यक्षदर्शी विवेक क्षत्री
पर्वतको फलेबास, कुर्घा घर भई हाल म पोखरामा बस्दै आएकोे छु । म सवारीचालक हुँ । आइतबार बिहान साढे १० बजे म कामविशेषले रामबजारदेखि कारमा फर्किंदै थिएँ । पोखराको चाइनापुल (पृथ्वीचोक) आइपुग्दा आकासमा जहाज देखें ।
आज किन यता जहाज आयो भनी मनमा खुल्दुली पस्यो । जहाजको अवस्था हेर्दा त्यति राम्रो लागेन । टाढैबाट भए पनि जहाजको एकातिरको पंखा नचलेको देखे । जहाज एक्कासि मोड लिँदै हुत्तिँदै गयो ।
जहाज कता गयो भनी मैले कार चाइनापुलदेखि स्यालदुलेतिर मोडें । चोरसाँघु नजिक सीतारामको पुल नआउँदै जहाज फरक्कै फर्किएर दुर्घटनाग्रस्त भएको देखें । आगोको मुस्लोले पुरै ठम्याउन सकिएन । त्यहाँ पुग्ने स्थानीयबाहेक म नै पहिलो थिएँ ।
जहाजको पखेडा वारिपट्टि थियो भने ठोक्किएर पारिको भित्ता (सेतीपारि) दुर्घटनाग्रस्त भएको थियो । त्यहाँ जम्मा भएका केही मानिसहरू आगो निभाउनपट्टि लागे । तत्काल पानी थिएन । स्याउला टिपेर निभाइयो । वारिपट्टिको आगो भने नियन्त्रणमा लिन सकियो । तर, जहाज नै खसेको स्थानमा तत्काल जान सकिएन ।
दुर्घटना भएको करिब १० मिनेटपछि दमकल, एम्बुलेन्स, पानीको गाडी साइरन बजाउँदै आउन थाले । क्रमशः त्यहाँ मानिसको भीड बाक्लिँदै गयो । उद्धारकर्तालाई समेत उद्धारमा कठिनाइ भएको थियो । गाडी सिधैं छिराउन सक्ने अवस्था थिएन । पहिलोपटक यस्तो ठूलो जहाज दुर्घटनाको साक्षी भइयो । राजधानी दैनिकबाट