मकवानपुर गढी गाउँपालिकाद्वारा आफन्तको टिका लगाउन नजान आग्रह
Tags: No Comments
मकवानपुर /मकवानपुर जिल्लाको मकवानपुरगढी गाउँपालिकाले यस वर्षको दशैमा आफन्तकोमा टिका लगाउन नजान गाउँपालिकाबासीलाई आग्रह गरेको छ । कोरोना संक्रमणको त्रास फैलिएको भन्दै गाउँपालिकाले आफन्तकोमा टीका लगाउन नजान र आफन्तलाई पनि आफ्नो घरमा नबोलाउन आग्रह गरेको छ ।
गाउँपालिकाको स्थानीय विपद व्यवस्थापन समितिको बैठकले आफन्तकोमा गएर टिका लगाउने र आफन्तलाई टिका लगाउनका लागि आमन्त्रण गर्ने कार्य रोक्ने निर्णय गरेको गाउँपालिकाका अध्यक्ष विदुर हुमागाईले बताए । गाउँपालिकाले आज मंगलबार सूचना जारी गर्दै यस्तो अनुरोध गरेको हो । सूचनामा भनिएको छ : “विश्वब्यापी रुपमा फैलिएको कोरोना भाइरसको संक्रमण जोखिम उच्च हुँदै गएकोले दशैं तथा तिहार घरमै बसी मनाउनु हुन, आफन्तजनलाई आमन्त्रण नगराउनु हुन तथा टीका थाप्ने प्रयोजनका लागि यस बर्षलाई आफन्तजनहरुकोमा जाने काम नगर्नु नगराउनु हुन त उच्च सतर्कताका साथ चाडपर्व मनाउनुहुन समस्त गाउँपलिकाबासीहरुलाई हार्दिक अनुरोध गर्दछ ।”
गाउँपालिकाका प्रमुख प्रशासकिय अधिकृत रामकुमार पुडासैनीद्वारा जारी सूचनामा दशैं तथा तिहार घर परिवारका सदस्य बीच मात्र मनाउनु पर्ने, टिका लगाउन आफन्तकोमा जान नपाइने, शक्तिपिठ, मन्दिरहरुमा नियमित पूजा मात्र हुने, सार्वजनिक स्थलमा भिडभाड गर्ने, पिङ हालेर सामुहिक रुपमा खेल्ने, लङ्गुर बुर्जालगायतका खेलहरु खेल्न, खेलाउन जस्ता कार्य गर्न नपाइने उल्लेख गरिएको छ । यसैगरी जुवा,तास, ध्रमपान, मध्यपानलगायत खेल्ने / पिउने कार्य नगर्ने, दशैंमा टिका लगाउने प्रयोजनका लागि हिँड्डुल गर्न नदिने, तिहारमा द्यैसी तथा भैलो खोल्न नपाइनेलगायतका कुरा उल्लेख छ ।
मकवानपुरमा थप ४४ जनामा काेराेना पुष्टि
Tags: No Comments
मकवानपुर । मकवानपुर जिल्लामा थप ४४ जनामा कोरोना भाइरस संक्रमण पुष्टि भएको छ । हेटौंडा उपमहानगरपालिकाका ३२ जना मनहरी गाउँपालिकाका ९ जान , भीमफेदी गाउँपालिकाका १ जना र जिल्ला बाहिर २ जना गरी ४४ जनामा कोरोना संक्रमण पुष्टि भएको हेटाैडा उपमहानगरपालिकाका स्वास्थ्य अधिकृत भाेलानाथ चाैलागाइले जानकारी दिए ।
असाेज २७ गते संकलित २ सय १५ जनाकाे स्बावकाे परीक्षण हुँदा ४४ जनाकाे नतिजा पाेजेटिभ देखिएकाे हाे । संक्रमण पुष्टि हुनेहरुमा २० जना महिला र २४ जना पुरुष रहेका छन् । पछिल्लाे समय मकवानपुरमा कोरोना पुष्टि हुनेको संख्या बढेको छ । बिशेषगरी हेटौंडा बजार क्षेत्रमा कोरोना संक्रमण पुष्टि हुनेको सख्या बढ्दै गएकाे नतिजाहरुले बताएकाे छ ।

चर्को शुल्क विरुद्ध विद्यार्थी
Tags: No Comments
मकवानपुर / कोरोना भाइरसको माहामारीको समयमा वैकल्पिक सिकाइको रुपमा सञ्चालन गरिएको अनलाइन कक्षाको नाममा चर्को शुल्क उठाएको भन्दै मकवानपुरका विद्यार्थी संगठनहरुले आजबाट सुरु हुने गरि आन्दोलन घोषणा गरेका छन् ।
आज विहीबारबाट सुरु हुने गरी मकवानपुरका दुई ठुला विद्यार्थी संगठनहरुल निजी विद्यालय र कलेजको क्रियाकलापको विरोध जनाएका हुन् । अनलाईन कक्षाका नाममा विद्यार्थीहरुसँग चर्को शुल्क असुलेको भन्दै आन्दोलनको घोषणा गरिएको हो । हेटौंडामा सत्तारुढ नेकपा निकट अनेरास्ववियू र नेपाली काँग्रेस निकट नेविसंघले संयुक्त रुपमा केही दिन अगाडि पत्रकार सम्मेलन गर्दै आन्दोलनका कार्यक्रमहरु सार्वजनिक गरेका थिए । विद्यार्थी संगठनहरुले सार्वजनिक गरिएको संघर्षका कार्यक्रम अनुसार आज विहीबार विहान ११ बजेदेखि १२ बजेसम्म हेटौंडा उपमहानगरपालिकाको शिक्षा महाशाखा घेराउ गर्ने कार्यक्रम रहेको छ ।
यसैगरी भोली असोज १६ गते ११ बजेदेखि १२ बजेसम्म हेटौंडा उपमहानगरपालिकाको गेटमा कालोपट्टि बाधेर धर्ना दिने, असोज १८ गते सम्पुर्ण शैक्षिक संस्थाको लेखा शाखामा ताला लगाउने र असोज १९ गते हेटौंडाको बुद्धचोकमा संर्घषका कार्यक्रमकाबारे प्ले कार्डसहित सचेतनामुलक प्रदर्शन गर्ने लगायतका कार्यक्रम रहेको नेविसंघ मकवानपुर सभापति राजु खतिवडाले जानकारी दिए ।
विद्यार्थी संगठनको मागका बारेमा आइतबार वार्ता गर्ने तयारी भएको छ । यसअघि मंगलबार भएको पहिलो चरणको वार्तामा नागरपालिकाले ल्याएको शुल्क सम्बन्धि प्रस्तावमाथि प्याब्सन समहत नभएपछि आइतरबारको लागि दोस्रो चरणको वार्तामा बस्ने गरी बैठक सकिएको थियो । आइतबार बस्ने बैठकमा आन्दोलनरत विद्यार्थी संगठनहरु, नगरपालिका, प्याब्सन, अभिभावक संघका प्रतिनिधिहरु रहने छन् ।
विद्यार्थी संगठनहरुले गत भदौ २९ गते हेटौंडा उपमहानगरपालिका र जिल्ला शिक्षा समन्वय ईकाइ हेटौंडालाई र असोज ७ गते जिल्ला प्रशासन कार्यालय मकवानपुरमा ध्यानाकर्षण पत्र बुझाएका थिए । हालको अवस्थाको मध्यनजर गर्दै पत्र बुझाएता पनि बेवास्ता गरेको भन्दै आन्दोलनको कार्यक्रम सार्वजनिक गरेको बताए । संघर्षका कार्यक्रम सार्वजनिक गर्दै अनेरास्ववियू मकवानपुरका संयोजक किशन घिसिङले कुनै पनि शैक्षिक संस्थाले अनलाईन कक्षाको नाममा चर्को शुल्क उठाउनु अवैधानिक भएको बताए । उनले सरकारी नीति विपरित स्कुल तथा कलेजहरुले विद्यार्थी तथा अभिभावकहरुलाई शुल्क तिर्न बाध्य पारेको बताए ।
मकवानपुर /कोरोना भाइरसको सम्बन्धमा विभिन्न तहका व्यक्तिहरुको फरक फरक बुझाइको कारण समस्या भएको भन्दै सबैको समान बुझाइ हुन आवश्यक भएको बताइएको छ ।
महामारीमा वैकल्पिक शिक्षण सिकाईलाई प्रभावकारी बनाउनतर्फ पनि सवाल उठाइएको छ । राष्ट्रिय बजेटको कम्तीमा २० प्रतिशत बजेट कोभिड रेस्पोन्सकै सन्दर्भमा शिक्षामा लगानी गरि विभिन्न माध्यम रेडियो, टेलिभिजन, भर्चुअल तथा डोर टु डोर विधिलाई प्रभावकारी कार्यन्वन गर्नु पर्ने साथै शिक्षामा एकरुपता ल्याउन शिक्षा र स्वास्थ्यलाई राष्ट्रियकरण गरिनु पर्ने माग गरिएको छ ।
डेक नेपालकाे तथा नागरिक समाज मञ्च मकवानपुरकाे आयाेजनामा पारस्परिक जवाफदेहिताका लागी साझा सभा रेडियो बहस कार्यक्रममा शिक्षा, स्वास्थ्य र विपदबारे बहस गरिएको हो । कार्यक्रममा कोभिड रेस्पोन्सको सन्दर्भमा तीन तहको सरकारलाई स्पष्ट कार्यविभाजन गरिनु पर्ने, क्वारेन्टाईन, आईसोलेशन तथा आईसियु सञ्चालन गर्ने विषयमा सम्बन्धित पक्षको ध्यानाकर्षण हुनु गराउनु पर्ने, कोभिड रेस्पोन्सका सन्दर्भमा निर्वाचित जनप्रतिनिधि मात्र नभई स्थानीय तहमा सरकारी प्रतिनिधि सम्मिलित संकट व्यवस्थापन, अनुगमन तथा सचेतिकरण समिति निर्माण गरि स्वास्थ्य सुरक्षाका प्रोटोकल प्रभावकारी रुपमा व्यवहारमा लागु भए नभएको एकिन गरि थप प्रभावकारी बनाउने लगायतका सवाल उठाइएको थियो ।
कोरोना संक्रमणपछि वैकल्पिक सिकाइ प्रभावकारी बनाउन सबै स्थानमा नेटको सुविधा नभएको समस्या भएको बताइएको छ । नेट उपलब्ध भएकाहरुका लागी पनि सबैसँग एण्ड्रोइड मोबाईल वा ल्यापटपको उपलब्ध नभएकोले सिकाइलाई उपलब्धिमुलक बनाउन नसकिएको सहभागिहरुले बताएका हुन् । केही सामुदायीक विद्यालयले समुदाय स्तरमा पुगेर पठनपाठन गरे गराएको भएता पनि सबै स्थानमा पुग्न असमर्थ भएकोले एउटै विद्यालयका विद्यार्थीहरुमा पनि विभेद गरिएको जस्तो भएको सवाल बहसमा उठाइएको थियो ।
शहरी क्षेत्रमा होम आईसोलेशनको संभावना भएता पनि ग्रामिण भेगमा प्राय घरहरुमा सगोल बसाई हुने भएकोले अलग बस्न समस्या भएकोले ग्रामिण भेगका स्थानीय तहहरुले आईसोलेशनको व्यवस्थापन गर्नु पर्ने माग गरिएको छ । कहिले सरकारी विद्यालयलाई क्वारेन्टाईन बनाउने त कहिले अब शिक्षण कार्य सुरु गर्ने जस्ता पटक पटक फरक निर्देशन प्राप्त हुदाँ कार्य गर्न असहज बनेको बताइएको थियो ।
महामारी लकडाउनको अवस्थमा महिला तथा बालबालिका विभिन्न प्रकारको हिंसाबाट प्रभावित भएको,विद्यालय वन्द भएका कारण ग्रामिण भेगका किशोर किशोरीहरु मागी तथा भागी विवाह गर्ने गरेको, जिम्मेवार निकाय र जिम्मेवार व्यक्तिको अभिव्यक्तिका कारण कोरोना फैलिन मद्दत पुगेको, राहतको नाममा आर्थिक अनियमितता भएको , स्थानीय तहमा सरकारी तथा नागरिक र नागरिक संघसंगठन सम्मिलित संकट व्यवस्थापन तथा अनुगमन र सचेतिकरणका लागि समिति निर्माण गर्नु जस्ता सवालमा बहस गरिएको थियो ।
यसैगरी कोरोना पोजिटिभ देखिएका तथा पोजिटिभ देखिएर पनि नेगेटिभ देखिएकाहरुका लागी घर परिवार तथा छरछिमेकबाट अछुतोको व्यवहार गर्ने गरिएको,कोरोना पोजिटिभ भएका घरपरिवारमा सिल गर्ने लगायतका कार्यले आतंकित र भयभित बनाउने अवस्था भएकोले त्यसलाई सहजीकरण तर्फ लग्नु पर्ने बताइएको छ ।

राष्ट्रिय सभा प्रत्यायोजित आश्वासन समितिका सभापति रामनारायण विडारीको प्रमुख आतिथ्यमा कार्यक्रम गरिएको हो । कार्यक्रममा बागमती प्रदेश सभा सदस्यहरु प्रेम बहादुर पुलामी,जुनेली श्रेष्ठ,जिल्ला समन्वय समिति मकवानपुरका उपप्रमुख भगवती पुडासैनी, थाहा नगरपालिकाका मेयर लवशेर विष्ट, राक्सीराङ् गाँउपालिकाका अध्यक्ष राज कुमार मल्ल, भिमफेदी गाँउपालिकाका उपाध्यक्ष पार्वती राना,स्वास्थ्य कार्यलय मकवानपुरका प्रमुख प्रणय उपाध्याय, शिक्षा समन्वय एकाई मकवानपुरका प्रमुख लिलानाथ गौतम,बागमती प्रदेश वालअधिकार समिति सदस्य झविन्द्र ज्ञवाली,रेडक्रस मकवानपुरका उपसभापती लाल बहादुर थापा,गैसस महासंघ बागमती प्रदेश उपाध्यक्ष आरती पाठक, शिक्षाका लागी राष्ट्रिय अभियान बागमती प्रदेशका संयोजक प्रकाश खतिवडा,नागरिक तथा नागरिक संघसंगठनका प्रतिनिधि लगायतको उपस्थिती रहेको थियो ।
हेटौंडाको रेडियो थाहा संचारले बहस कार्यक्रमको प्रत्यक्ष प्रशारण गरेको नागरिक समाज मञ्च मकवानपुरका संयोजक तथा गैसस महासंघ मकवानपुरका कावा अध्यक्ष रमिला सापकोटाले बताइन् ।
मुख्यमन्त्री र बानियाँले परेवा भीरमा कसरी ढाक्लान् लाज ?
Tags: No Comments
राष्ट्रिय बहसको बिषय बनेको राक्सिराङ गाउँपालिका ४ स्थित परेवाभीर खण्डमा सडक बनाउने बिषयमा त्यस क्षेत्रका प्रतिनिधि सभा सांसद विरोध खतिवडाले प्रतिबद्धता पूरा गरेका छन् ।
उनले परेवाभीर खण्डमा सडक निर्माण गर्ने प्रतिबद्धता जाहेर गरिरहँदा नेपाल कम्युनिष्ट पार्टीभित्रको जीवनमा नै हलचल आउने गरी सांसद खतिवडासहितका अभियन्ताहरुलाई ‘गुटबन्दी’ गरेको आरोप मात्रै लागेन, काँग्रेसपरस्त समेत भनियो ।
कारण थियो–राक्सिराङ गाउँपालिकाले परेवाभीर खण्डमा सडक निर्माणको बहसलाई उच्च विन्दुमा पुर्याएर बजेट समेत बिनियोजन गरिसकेको थियो । राक्सिराङ गाउँपालिकामा काँग्रेस नेतृत्वको सरकार छ । सांसद खतिवडाको परेवाभीर सडक खण्डका लागि संघीय सरकारबाट कुनै पनि शीर्षकमा बजेट बिनियोजन गरिछाड्ने प्रतिबद्धता जनाएपछि भने प्रमुख बिपक्षी दलका नेता तथा त्यस क्षेत्रका प्रदेश सांसद इन्द्रबहादुर बानियाँले पनि व्यक्तिगत खर्चमै बाटो बनाउने घोषणा गरे ।
राष्ट्रिय बहसकै बिषय बनेर मिडियाहरु परेवाभीर पुग्ने र युट्युबरहरुले समेत यही बिषयलाई उठान गर्न थालेपछि दबाबमा परेको बागमती प्रदेश सरकार पनि ‘बजेट नहाल्ने भनिएको होइन, अनलाइनले गलत समाचार दियो’ भन्ने लाइनमा उभिन बाध्य भयो । यही बीचमा राक्सिराङ गाउँपालिकाले २ करोड रुपियाँ यसै बर्ष खर्चिने गरी परेवाभीर सडक खण्ड निर्माणका लागि प्रक्रिया पनि सुरु गरिसकेको छ । जनताले परेवाभीरको सुधारिएको बलियो बाटो हेर्न तम्तयार भएर बसेका छन् ।
यो खण्ड निर्माण गर्नका लागि सबैभन्दा बढी आवाज संसदमा उठाउने यसै क्षेत्रका अर्का सांसद हुन् ओमबहादुर ग्लान । उनले यो खण्डबाट कोही मान्छे मरेमा बुद्धचोकमा ल्याएर दाह संस्कार गरिने धम्की पनि संसदबाट सरकारलाई दिएका थिए । तर, बजेट नछुटिएपछि बिरक्तिएर अब सरकारकै बिकल्प खोज्नुपर्ने हो कि भन्नेसम्मको आक्रोश पोख्न भ्याए उनले ।
यतिखेर गाउँपालिका र संघीय सरकारको तर्फबाट समेत गरी २ करोड रुपियाँ कार्यान्वयन भई परेवाभीर खण्डमा सडक बन्ने कुराले सबैभन्दा बढी खुसी सांसद ग्लानलाई लागेको छ । उनले सामाजिक सञ्जालबाटै धन्यवाद तथा आभार ब्यक्त गरेका मात्रै छैनन्, थाहासन्देशसँग प्रतिक्रिया दिँदै भनेका छन्–‘यो सुखद् खबरले मनमा निकै शान्ति मिलेको छ ।’
त्यसो त अर्थ मन्त्रालयले लेखेको पत्र देखाउँदै राक्सिराङ गाउँपालिका अध्यक्ष राजकुमार मल्लले संघीय सांसद खतिवडालाई धन्यवाद दिँदै खुसीको खबर सामाजिक सञ्जालमा लेखेका छन् । संघीय सरकारको लगानी थपिएको कुराले यतिखेर पश्चिम मकवानपुरको कैलाश, राक्सिराङ तथा धादिङका समेत गाउँहरु लाभान्वित भइरहँदा यतिखेर जनताले यो अभियानमा छुटेका नेताहरुबारे चिन्ता ब्यक्त गर्न थालेका छन् ।
जस्तो कि यसै क्षेत्रका सांसद बानियाँले अब के गर्लान् ? ‘उहाँले व्यक्तिगत खर्चमा बाटो बनाउँछु भनेर सुपरहीट हुन बोलेको कुरा हो’, एक स्थानीयले भने–‘सस्तो बोली उहाँकै लागि गलपासो हुने निश्चित थियो ।’ ब्यापारिक पृष्ठभूमिका बानियाँले चतुरतापूर्वक आफैले बाटो बनाउँछु भनिरहँदा अर्का सांसद ग्लान चाहिँ मौन देखिएका थिए । कतिपय मानिसहरु ग्लानले बुद्धचोकमा सद्गद् गर्नेसम्मको धम्की दिँदा बानियाँले पनि साथ दिएको भए प्रदेश सरकारले परेवाभीरमा बजेट हाल्न सक्थ्यो ।
आफ्नै क्षेत्रका जनताले दुःख पाएको कुरा सदनमा अरुले नै उठाउँदा समेत बानियाँले समर्थन जनाएनन् । कारण थियो,–यस भेगका जनताका पीडा मर्कासँग उनी अभ्यस्त थिएनन् ।
अब यतिखेर बानियाँ र बागमती प्रदेश सरकारका मुख्यमन्त्री डोरमणि पौडेलको अग्निपरिक्षा परेवाभीरमा हुँदैछ ।
स्थानीय तहका प्रमुख मल्ल र संघीय सांसद खतिवडाले बोलेको कुरा पूरा गरिसके । आम जनताले यतिखेर दुई तिहाई बढी सांसद भएको बागमती प्रदेश सरकारले परेवाभीरमा थप लगानी गरेर लाज जोगाउँछ कि जोगाउदैन भन्ने बिषय हेरिरहेको छ भने सस्तो लोकप्रियताका लागि बोल्ने बानियाँले ब्यक्तिगत लगानीमा परेवाभीरमा के योगदान गर्न सक्लान् ? यो सर्बत्र चासोको बिषय छ ।
(थाहासन्देश दैनिकबाट)