मकवानपुर / छिमेकी देश सहित विश्वर फेरी कोरोना जोखिम बढ्न थालेपछि सजकता अपनाउन जिल्ला प्रशासन कार्यालय मकवानपुरले आमजनसमुदायलाई आग्रह गरेको छ ।
भारतका विभिन्न प्रान्तहरुमा लकडाउन सुरु भईसको छ भने युरोपका धेरै देशमा लकडाउन जारी छ । जिल्ला प्रशासन कार्यालय मकवानपुरले भेला सम्मेलन नगर्न सोमबार सर्वसाधारणलाई अपिल गरेको छ ।
प्रशासनले सूचना जारी गर्दै विश्वभर र छिमेकी देश भारतमा कोरोना संक्रमण बढेको भन्दै सभा, भेला, सम्मेलन, जुलुस, -याली, जमघट लगायत भिडभाड हुने कार्य नगर्न भनेको छ ।
प्रशासनले भौतिक दुरी कायम गर्न र जनस्वास्थ्य मापदण्ड पालना गर्न सर्वसाधारणलाई अनुरोध गरेको छ।
मकवानपुर/पत्रकार महासंघ मकवानपुर शाखाले नेपालमै पहिलो पटक पत्रकारलाई पेन्सन प्रदान गरेको छ । सोमबार हेटौंडामा औपचारिक कार्यक्रम गर्दै पत्रकार महासंघ मकवानपुरले पेन्सन वितरण गरेको हो ।
महसंघले जेष्ठ पत्रकारलाई मासिक ४ हजार रुपैयाँ पेन्सन वितरण सुरु गरेको हो । २० वर्ष पत्रकारिता गरेको र ६० वर्ष उमेर पुगेका जेष्ठ पत्रकारलाई पेन्सन कोष सञ्चालन गरेर त्यसको व्याजबाट पेन्सन वितरणको काम सुरु गरिएको पत्रकार महासंघ मकवानपुरका अध्यक्ष हरि हुमगाईले बताए ।
कार्यक्रममा हेटौंडा उपमहानगरपालिकाका मेयर हरि बहादुर महतले नेपाल पत्रकार महासंघ मकवानपुर साखाका पूर्व अध्यक्ष समेत रहेका जेष्ठ पत्रकार नवराज शर्मालाई पेन्सन वापतको रकम वितरण गरे । हेटौंडा उपमहानगरपालिकाको सहयोगमा पत्रकार महासंघले पेन्सन कोष स्थापना गरेको छ । मेयर महतले कोषमा आगामी वर्षै फेरी बजेट थप गर्ने बताए । महासंघको संस्थागत कामका लागि उपमहानगर तयार रहेको मेयर महतले बताए । नगद रकम दिनका लागि केही कठिनाइ भएपनि फेरी पनि कोष बृद्वीका लागि सहयोग गरिने उनले बताए ।
करिव ४० वर्षसम्म पत्रकारिता गरेर निवृत जिवन बिताइरहनु भएका शर्मालाई चैत महिनाको ४ हजार रुपैया पेन्सन वापत वितरण गरिएको हो । २० वर्षसम्म पत्रकारितालाई मुख्य पेसा बनाइ ६० वर्ष उमेर पुगेका जेष्ठ पत्रकारका लागि मासिक ४ हजार रुपैयाँका दरले पेन्सन दिन सुरु गरिएको हो । पेन्सन कोषमा १० लाख रुपैयाँ यसअघि हेटौंडा उपमहानगरपालिकाले सहयोग गरेको र अबका दिनहरुमा पनि सहयोगलाई जारी राख्ने मेयर महतले बताए ।
पत्रकार महासंघ मकवानपुर साखाले बाणिज्य बैकमा यसअघिनै खोलीएको खातामा दश लाख रुपैयाँ जम्मा गरिएको छ । त्यही व्याजबाट पेन्सन वितरणको काम सुरु गरिएको हो । पत्रकार महासंघका ७७ वटै जिल्लाका शाखा, प्रदेश र केन्द्रमा पहिलोपटक महासंघ मकवानपुर शाखाले जेष्ठ पत्रकारलाई पेन्सन वितरणको काम सुरु गरेको अध्यक्ष हरि हुमागाईले बताए । पेन्सन सम्वन्धी कार्यविधिलाई महासंघको बितेको मंसिर २६ गतेको साधारण सभाले पारित गरेको छ ।
महासंघ मकवानपुर शाखामा आवद्ध हुनुभएका सदस्यहरु मध्ये जेष्ठ सदस्यको वृत्ति विकास गर्नका लागि पेन्सन दिन सुरु गरिएको हो । कार्यक्रममा पत्रकार महासंघ बागमती प्रदेशका अध्यक्ष प्रताप विष्ठले नेपालमै पहिलोपटक मकवानपुर महासंघले राम्रो काम गरेको बताए । प्रदेश र केन्द्रले पेन्सन कार्यक्रमको सुरुवात गर्न लागेपनि त्यो कार्यान्वयन गर्नका लागि समस्या रहेको बताए ।
राज्यबाट उपलब्ध हुने अन्य कुनै सामाजिक सुरक्षा भत्ता वा नेपाल सरकार, प्रदेश सरकार, वा स्थानीय तहबाट कुनैपनि संघ संस्था, गैर सरकारी संस्थाबाट सेवा सुविधा प्राप्त हुने पदमा बहाल रहेको भए मासिक पेन्सन उपलब्ध नगराइने अध्यक्ष हुमागाईले बताए ।
जेष्ठ पत्रकार मासिक पेन्सन प्रदान गर्ने प्रयोजनका लागि पेन्सन प्राप्त गर्नेको निबेदन र कागजपत्रका आधारमा सिफारिस गरिने कार्यबिधिमा उल्लेख छ । सिफारिसका लागि पत्रकार महासंघ मकवानपुरको निवर्तमान अध्यक्ष संयोजक, पत्रकार महासंघ मकवानपुर शाखाको पुर्व अध्यक्षहरु मध्येबाट एक जना सदस्य र पत्रकार महासंघ मकवानपुर साखाको बैठकले सिफारिस गरेका एक जना महिला सहित अरु दुइजना सदस्य राखिने छ ।
पेन्सन प्राप्त गर्नका लागि पत्रकार महासंघ मकवानपुर शाखाको सदस्य भएको हुनुपर्ने, साठी वर्ष उमेर पुरा भएको हुनुपर्ने, निरन्तर बीस वर्ष पत्रकारीतालाई मुख्य पेसा बनाएर सञ्चार क्षेत्रमा कार्य गरेको हुनुपर्ने, कुनै पनि सरकारी संस्था, गैरसरकारी र कम्पनिमा काम गरेर नियमित सरकारी पेन्सन रकम नलिएको र उक्त संस्थाबाट उमेर हदका कारण उपदान रकम नलिएको हुनुपर्ने र ६० वर्ष उमेरपछी सक्रिय पत्रकारिता छोडेर बिश्राम लिएको हुनुपर्ने छ । पेन्सन कोषको सञ्चालन महासंघ मकवानपुर शाखाले विभिन्न सरकारी वा अर्घ सरकारी संस्था, विभिन्न राष्ट्रिय तथा अन्तराष्ट्रिय दातृ संस्था, विभिन्न व्यक्ती संघ, सस्था, उद्योग प्रतिष्ठान बाट प्राप्त रकम कोषमा राखिने छ ।
कार्यक्रममा ब्रोकाष्टिङ एसोसीएसन अफ नेपालका उपाध्यक्ष उज्वल चौलागाई, नेपाल पत्रकार महासंघ मकवानपुरका पूर्व अध्यक्ष राममणि दाहाल, प्रेस चौतारी बागमती प्रदेशका सहसंयोजक प्रकास दाहाल, प्रेस सेन्टर बागमती प्रदेशका संयोजक सुनिल खड्का, प्रेस चौतारी मकवानपुरका संयोजक धर्मेन्द्र दाहाललगायतकाको सहभागिता रहेको थियो ।
मकवानपुर । साहित्य संगम मकवानपुरले यसवर्ष साहित्य क्षेत्रमा क्रियाशील १० जना स्रष्टालाई सम्मान तथा पुरस्कार प्रदान गर्ने भएकाे छ । मकवानपुरकै अग्रणी साहित्यिक साहित्य संगमको शनिबार बसेको बैठकले १० वटा विभिन्न विधामा सम्मान तथा पुरस्कार प्रदान गर्ने निर्णय गरेको हो । सम्मान तथा पुरस्कार २०७८ वैशाख ११ गते संगमको नियमित सन्ध्यामा आयोजना गरिने विशेष साहित्यिक कार्यक्रममा प्रदान गरिने अध्यक्ष निमेष निखिलले जानकारी दिए ।
साहित्य संगमले गोपालप्रसाद रिमाल स्मृति सम्मान कवि, नाटककार गोपाल पराजुलीलाई दिने निर्णय गरेको छ । काठमाडौं निवासी पराजुलीलाई संगमले २० हजार नगदसहित सम्मानपत्रले सम्मान गर्ने संगमले जनाकारी दिएकाे छ । उनको ‘नयाँ इश्वरको घोषणा’ पुस्तकले मदन पुरस्कार प्राप्त गरिसकेको छ । यो सम्मान नाटकका, साहित्यकार गोपालप्रसाद रिमालको स्मृतिमा रिमालकै परिवारले स्थापना गरेको हो । यसअघि गोपालप्रसाद रिमाल स्मृति सम्मानबाट साहित्यकार नाटककार सरुभक्त, अशेष मल्ल, तुल्सी थापा सम्मानित भइसकेका छन् ।
मकवानपुर साहित्य श्री सम्मान अप्सरा तिम्सिना लम्साललाई प्रदान गरिने भएको छ । संगमले उनलाई मरणोपरान्त मकवानपुर साहित्य श्रीबाट सम्मानित गर्न लागेको हो । साहित्य संगम मकवानपुरले स्थापना गरेको याे सम्मानबाट तिम्सिनालाई सम्मानपत्रसहित १५ हजार ५ सय ५५ रुपैयाँ प्रदान गर्न लागिएको हो । स्वर्गीय तिम्सिना साहित्य संगमको उपाध्यक्ष तथा आँचल साहित्य कला पुञ्ज मकवानपुरको संस्थापक उपाध्यक्ष रहेका उनकाे पुञ्जकाे अध्यक्ष पदमा रहँदा निधन भएको थियाे ।
यस्तै पारिजात स्मृति सम्मान डा. अरुण उप्रेतीलाई प्रदान गर्ने निर्णय गरेको छ । हेटौंडा–१० स्थित आदर्श टोल विकास संस्थाले स्थापना गरेको सम्मानको राशी १५ हजार ५ सय ५५ रुपैयाँ रहेको छ । साहित्यकार पारिजात निकट रही साहित्यमा सेवा पुर्याएवापत डा. उप्रेतीलाई यो सम्मान प्रदान गर्न लागिएको जनाइएको छ ।
श्यामप्रसाद शर्मा स्मृति साहित्य सम्मान मकवानपुरे व्यंग्यकार आरसी रिजाललाई प्रदान गरिने भएको छ । मकवानपुरे साहित्यको संस्थागत विकासमा समेत टेवा पुर्याउँदै आउनुभएका रिजाललाई नगद १५ हजारसहित सम्मानपत्रले सम्मानित गर्ने संगमका सचिव डीबी बर्तौलाले जानकारी दिनुभयो । यो सम्मान हेटौंडा उपमहानगरपालिका वडा नम्बर ४ को कार्यालयले स्थापना गरेको हो ।
भैरव स्मृति सम्मान वीरगञ्जका साहित्यकार व्यंग्यकार गणेश लाठलाई प्रदान गरिने भएको छ । उनलाई सम्मानपत्रसहित २१ हजार १ सय ११ रुपैयाँ राशीले सम्मान गरिने सगमलले जनाएकाे छ ।व्यंग्यकार भैरव अर्यालको स्मृतिमा उहाँको परिवारले यो सम्मान स्थापना गरेको हो । यो सम्मानबाट धुर्मस सुन्तली फाउन्डेसन, राजकुमार लामिछाने, चट्याङ मास्टर, मनोज गजुरेललगायतका स्रष्टा सम्मानित भइसकेका छन् ।
यस्तै शुभद्रादेवि मदन मुडवरी स्मृति सम्मान साहित्यकार राम बर्तौला ‘आँशु’ लाई प्रदान गर्ने निर्णय भएको छ । मकवानपुरको पालुङ निवासी बर्तौलालाई नगद १० हजार राशीसहित सम्मानपत्र प्रदान गरिने जनाइएको छ । हाल अमेरिका निवास मकवानपुरे साहित्यकार दीपक मुडवरीले मातापिताको स्मृतिमा यो सम्मान स्थापना गरेकी हुन् ।
मंगलादेवि श्रेष्ठ स्मृति नारी सम्मान महाकाव्यकार मुना अर्याललाई प्रदान गरिने भएको छ । शिक्षा तथा साहित्यसेवी देव श्रेष्ठले आमाको नाममा स्थापना गर्नुभएको उक्त सम्मानको राशी ७ हजार ७ सय ७७ रुपैयाँ रहेको छ । यो यसवर्षबाट प्रदान गर्न लागिएको संगमले जनाएको छ ।
त्यसैगरी भेषनाथ अधिकारी स्मृति सम्मान साहित्यकार भुवनहरि सिग्देललाई प्रदान गरिने भएको छ । संगमका कार्यसमिति सदस्य विशाल अधिकारी ‘आशुतोष’ ले पिताको स्मृतिमा स्थापना गरेकाे यो सम्मान काठमाडौं निवासी सिग्देललाई नगद १५ हजार राशीसहित प्रदान गर्न लागिएको हो । यो सम्मानको राशी अघिल्ला वर्षमा १० हजार रुपैयाँ रहेको थियो यस वर्षबाट यसको राशी १५ हजार पुर्याइएको छ ।
यस्तै शेषजंग स्मृति कथा पुरस्कार चन्द्रोदय माविमा अध्ययनरत् छात्र उज्वल बराललाई प्रदान गर्ने निर्णय भएको छ । हेटौंडा– ८ मा रहेको चन्द्रोदय माविमा कक्षा १० मा अध्ययनरत् बराललाई २ हजार ५ सय राशीसहित यो पुरस्कार प्रदान गर्न लागिएको हो । शिक्षासेवी डेण्डीजंग शाहले छोराको स्मृतिमा यो पुरस्कार स्थापना गरेका हुन् । जिल्लाका माध्यमिक तहमा अध्ययनरत् विद्यार्थीबीच कथा लेखन प्रतियोगिता मार्फत् उत्कृष्ट एकजनालाई यो पुरस्कार प्रदान गर्ने गरिएको छ ।
णकुमारी साहित्य पुरस्कार प्रशन्ना चौलागाईंलाई प्रदान गरिने भएको छ । व्यंग्यकार आरसी रिजालले माताको स्मृतिमा स्थापना गरेको यो पुरस्कारको राशी ५ हजार रहेको छ । यो पुरस्कार जिल्लाका माध्यमिक विद्यालयमा अध्ययनरत् छात्राहरु बीच साहित्यका विभिन्न विधामा प्रतिस्पर्धा गराई उत्कृष्ट एकलाई प्रदान गरिँदै आएको छ ।
सम्मान तथा पुरस्कारहरु सम्बन्धित स्रष्टाको स्मृतिमा प्रदान गरिँदै आएकोमा कोरोना भाइरसको संक्रमणका कारण यसवर्ष एकैपटक प्रदान गर्न लागिएको सगमका उपाध्यक्ष अनिता न्याैपानेले जानकारी दिइन् ।
मकवानपुर / पत्रकारिताले समाजमा सकारात्मक सन्देश दिनुपर्ने बागमती प्रदेशको प्रमुुुख सचिव डा. मानबहादुर बिकले बताएका छन् । आमसन्चारले स्थानीय क्षेत्रको दुरदराजको खोजमुलक समाचारलाई उच्चप्राथमिकता दिनुपर्ने प्रमुख सचिव बिकले बताए ।
सञ्चार रजिष्टार कार्यालय बागमती प्रदेशको समन्वय तथा आन्तरिक मामिला तथा कानुन मन्त्रालय बागमती प्रदेशको आयोजनामा मल्टिमिडिया तथा अनलाइन पत्रकारिता सम्बन्धि मकवानपुरगढी गाउँपालिकामा बिहिवारबाट सुरु भएको तालिमको उद्घाटन गर्दै प्रमुख सचिब बिकले यस्तो बताएका हुन् ।
कहिलेकहि सकारात्मक समाचारले पनि नकारात्मक छाप छाड्न सक्ने भएकोले यस्ता त्रुटी प्रती चनाखो हुनुपर्ने उनले बताए । ब्रेकिङ्ग न्युजको होडबाजीको कारण पत्रकारितामा समस्या भएको बिकले बताए । “फ्याक्ट चेक गर्ने धैर्यता चाहियो” बिकले भने “सोसल मिडियाको लागि सबै व्यक्ति पत्रकार भए,अब यसलाई कसरी व्यवस्थित गर्नेभने तर्फ सोच्नुपर्छ ।”
कार्यक्रममा आन्तरिक मामिला तथा कानुन मन्त्रालयका सचिब मदन भुजेलले पत्रकारितामा धेरै कमजोरी पाटाहरु भएकोले सच्याउन तर्फ लाग्नु पर्ने बताए । पत्रकारलाई टिकाउनको लागि सीप अत्यावश्यक पाटो भएको पत्रकार महासंघ बागमती प्रदेश अध्यक्ष प्रताप बिष्टले बताए । निरन्तरता र कृयाशिलता भएमा पत्रकारितामा भविष्य धेरै राम्रो भएको बिष्टले बताए । सञ्चार माध्यम र सन्चारकर्मीले आमपाठकसामु बिश्वासनियता कायम राख्नुपर्ने उनले बताए । “हाम्रो समाचार समाजमा बिकाउनको लागि विश्वासनीयता चाहिन्छ” बिष्टले भने “हामी साझा जीवनशैली बिताऔं ।”
यसैगरी प्रदेशको सञ्चार रजिष्टार रेवती सापकोटाले पत्रकारको सीप र दक्षता वृद्धिको लागि तालिम उपयोगी भएको बताए । पत्रकारको लागि साना साना लाग्ने तर जीवनपयोगी सीप सिकाइने सापकोटाले बताए । नेपालको ५० प्रतिशतभन्दा बढी पत्रकार बागमती प्रदेशमा कृयाशिल रहेकोले देशलाई नै निर्देशित गर्न जिम्मेवार पत्रकार बन्न सापकोटाले अनुरोध गरे । कार्यालयले प्रदेशमा हालसम्म १ सय २० जना पत्रकारलाई यो तालिम प्रदान गरिसकिएको सापकोटाले बताए ।
तालिममा बागमती प्रदेशको ११ जिल्लाका २० जना पत्रकारहरु सहभागी रहेको आन्तरिक मामिला तथा कानुन मन्त्रालय बागमती प्रदेश शाखा अधिकृत ज्ञानदीप राई जानकारी दिए ।
मकवानपुर/मकवानपुर जिल्लामा भोलीबाट कोरोना विरुद्धको खोप कोभिशिल्ड प्राथमिकता दोस्रो चरणमा लगाईने भएको छ ।
दोस्रो चरणको खोप १७ हजार ५ सयले खोप लगाउने लक्ष्य सहित दोस्रो चरणको खोप २३ गते भोलीबाट सुरु हुने भएको जिल्ला खोप समन्वय समिति मकवानपुरले जनाएको छ ।
शुक्रबार जिल्ला प्रशासन कार्यालय मकवानपुरमा पत्रकारहरु सँग अन्र्तक्रिया गर्दै खोप समन्वय समितिका अध्यक्ष तथा प्रमुख जिल्ला अधिकारी गोविन्द रिजालले सर्वसाधारणलाई खोप लगाउन आग्रह गरेको छ ।
मकवानपुरमा पहिलो चरणमा ३ हजार ३ सय ८४ जनालाई यो खोप दिने लक्ष्य राखिएकोमा २ हजार १ सय ६६ जनाले खोप लगाएको निर्देशनालयले जनाएको छ । माघ १४ गतेदेखि हेटौंडा अस्पताबाट मकवानपुरमा कोरोना विरुद्धको खोप अभियान सुरु भएको थियो । अब जिल्लाको १० वटै स्थानीय तहले आवश्यकताअनुसार खोप केन्द्र निर्माण गरेर कोरोना विरुद्धको खोप लगाउने भएका हुन् ।
मकवानपुर जिल्लामा ४१ वटा खोप केन्द्र निर्माण गरेर दोस्रो चरणको खोप दिईनेछ । जिल्लामा सबै भन्दा धेरै हेटौंडा उपमहानगरपालिकामा ७ हजार ५ सय ५० जना ६५ वर्ष नाघेका मानिस छन् । भोलीबाट ६५ वर्ष माथिका नागरिकलाई १० दिन र ५५ वर्ष माथिका नागरिकहरुलाई १० दिन गरी २० दिन खोप अभियान चल्ने समितिले जनाएको छ ।