मकवानपुर । गत स्थानीय तह निर्वाचन र उपनिर्वाचनमा समेत आफूले अपेक्षित मत ल्याउन नसके पनि नेकपा एमाले जनताको माझ जनआवश्यकतालाई सम्बोधन गर्न लागि परेको छ ।
हार जित आफ्नो ठाउँ छ, जनताको समस्याको सम्बोधन पार्टीको कर्तव्य सम्झेर लागि परेको एमाले नेता तथा बागमती प्रदेश सभा सदस्य एकालाल श्रेष्ठले बताए । हेटौडा उपमहानगरपालिका -१२ स्थित बीचरोडदेखि विनोद वाइवाको घर हुँदै घिसिङटोल चौतारा जोड्ने सडकमा स्ल्याब ढलान कार्य सुरु गरेपछिको प्रतिक्रियामा श्रेष्ठले यस्तो बताएका हुन् ।
प्रदेश सरकारको आर्थिक वर्ष २०८१/८२ को विनियोजित २० लाख रुपैयाँको बजेटबाट ६ मिटर चौडा रहेको २२० मिटर लामो स्ल्याब ढलान सुरु गरिएको हो। निर्माण कार्यको सुरुवात गर्दै पूर्वमन्त्री एवं सांसद श्रेष्ठले बजेटको पूर्ण सदुपयोग गर्दै गुणस्तरीय निर्माण कार्यको लागि उपभोक्ता समितिलाई निर्देशन दिए । उनले हेटौडा उपमहानगरमापछि गाभिएका वडाहरूको विकासका लागि भौतिक पूर्वाधार, कृषि, सिंचाईलगायतका क्षेत्रलाई प्राथमिकतामा राखेर प्रदेश सरकारबाट बजेट विनियोजन गर्दै आएको बताए ।
१२ नम्बर वडाका निर्वाचित वडा सदस्य महेश भट्टराईले प्रदेश सरकारबाट हेटौडा १२ नम्बर वडाको समग्र विकासको लागि थुप्रै योजनाहरू पार्न विशेष भूमिका खेल्नुभएको भन्दै सांसद श्रेष्ठको प्रशंसा गरे । साथै आगामी वर्षमा पनि अन्य योजनाहरूको लागि समेत श्रेष्ठसँग आग्रह गरे । यस योजनामा हेटौडा उपमहानगरपालिकाले थप बजेट विनियोजन गरेको र जसबाट करिब १०० मिटर स्ल्याब थप हुने उपभोक्ता समिति अध्यक्ष बिरन घिसिङले जानकारी दिए ।
कार्यक्रममा हेटौडा १२ को उपनिर्वाचनमा वडाध्यक्षका प्रत्याशी राजेश नगरकोटी, स्थानीय समाजसेवी अर्जुनप्रसाद अर्याल, विनय मगर लगायतको सहभागिता थियो।
मकवानपुर । राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानबहादुर (ज्ञानेन्द्र) शाहीले जनताबाट प्रत्यक्ष निर्वाचित कार्यकारी प्रमुख रहने व्यवस्थामा सरकार गए समर्थन रहने बताएका छन् ।
बिहीबार मकवानपुरको थाहा नगरपालिका शिखरकोटमा आयोजना भएको दोस्रो थाहा नगर अधिवेशनलाई सम्बोधन गर्दै उनले उक्त कुरा बताएका हुन् । अहिलेकाे व्यवस्थाले देश बर्बादी तर्फ गएकाे बताउँदै नेकपा एमाले, नेपाली कांग्रेस र माओवादीलाई प्रत्यक्ष निर्वाचित कार्यकारी प्रमुख हुने व्यवस्थामा जना चुनौती दिए ।
‘आफैं मन्त्री हुने आफैं प्रधानमन्त्री हुने व्यवस्था ठीक भएन ’ उनले भने ‘तपाईंहरूसँग दुई तिहाई छ। देश बनाउने इच्छा तथा हिम्मत छ भने जनताबाट प्रत्यक्ष निर्वाचित कार्यकारीमा जानुस् तपाईंहरूलाई हामी समर्थन गर्छौं ।’
कार्यक्रममा भौतिक पूर्वाधार सभापति माननीय दिपक बहादुर सिंह राप्रपा केन्द्रीय सदस्य राम थक्क र रामहरि न्यौपाने, राष्ट्रिय प्रजातान्त्रिक महिला संगठन केन्द्रीय सचिव सरस्वती थिङ र प्रदेशकी महिला विभाग प्रमुख खुसी कार्की , राप्रपा मकवानपुरका कार्यवाहक अध्यक्ष सागर थापा र नगर अध्यक्ष अरुण लामा लगायत को उपस्थिति थियो ।
कार्यक्रममा सयौं संख्यामा नेकपा माओवादी परित्याग गरी राष्ट्रिय प्रजातन्त्र पार्टीमा प्रवेश गरेकाे बताइएकाे छ ।
मकवानपुर । बागमती प्रदेश सरकारले प्रदेश बालअधिकार समितिकाे सदस्यमा ५ जनालाई मनोनित गरेको छ । मंगलबारकाे मन्त्रिपरिषद् बैठकले मकवानपुरका प्रकाश खतिवडा र झविन्द्र ज्ञवाली, काठमाडौंका अञ्जनी श्रेष्ठ र राजाराम सापकोटा तथा चितवनकी मन्जु बैरागीलाई उक्त समितिकाे सदस्यमा मनोनित गरिएको हाे ।
प्रदेश सरकारका निमित्त प्रवक्ता खानेपानी, ऊर्जा तथा सिंचाईमन्त्री श्यामबहादुर खड्काले सामाजिक विकास मन्त्रालयकाे प्रस्तावमा उक्त ५ जनालाई मनोनित गरिएकाे जानकारी दिए । यसैगरी, मंगलबारकाे मन्त्रिपरिषद् बैठकले चेपाङ समुदायको उत्थानका लागि चिउरी र चमेरो संरक्षण कार्यक्रम सञ्चालन निर्देशिका पहिलो संसोधन स्वीकृत गरेको छ ।
मन्त्रिपरिषद् बैठकले नेपाल सरकारको नाममा भक्तपुरको नखेलस्थित १० रोपनी जग्गामध्ये ५ रोपनी जग्गा र सूर्यविनायक नगरपालिका–७, स्थित ७ रोपनी ७ आना दुई पैसा जग्गा प्रशासनिक कार्य सञ्चालनका लागि भौतिक पूर्वाधार निर्माण गर्न सकिने देखिएकाले जग्गाको स्वीकृति प्रदानका लागि संघीय सरकारलाई सिफारिस गर्ने निर्णय गरेको छ ।
यसैगरी बैठकले खानेपानी क्षेत्रगत सूचना प्रणालीमा आधारित बागमती प्रदेशको स्थानीय तहको खानेपानी सरसफाई तथा स्वच्छता योजना तर्जुमा सम्बन्धी कार्यविधि २०८१ स्वीकृत गरेको खड्काले जानकारी दिए । यस्तै, संघीय सरकारले प्रदेशमा खटाएका सहसचिव बिनु बज्राचार्य र कृष्णबहादुर शाहीलाई जिम्मेवारी दिने निर्णय गरेको छ । बज्राचार्यलाई मन्त्रालय ताेकिएकाे छैन भने शाही हाजिर हुन बाँकी रहेको उनले बताए ।
यस्तै प्रदेश सरकारले कामको अनुगमन र मूल्यांकनका लागि छुट्टै कानून बनाउने भएकाे छ । मंगलबारकाे मन्त्रिपरिषद् बैठकले अनुगमन तथा मूल्यांकनका लागि कानून निर्माण गर्न मस्यौदा तर्जुमाका लागि सहमति दिने निर्णय गरे सँगै छुट्टै कानून बन्ने भएकाे हाे ।
प्रदेश सरकारबाट भएका कामको प्रभावकारिता जाँचका लागि कानून बनाएर अनुगमन तथा मुल्यांकन गर्न कानून निर्माणको तयारी गरिएको निमित्त प्रवक्ता खडकाले जानकारी दिए । मुख्यमन्त्री तथा मन्त्रिपरिषद् कार्यालयको प्रस्तावमा प्रदेश अनुगमन तथा मूल्यांकन सम्बन्धी विधेयकको मस्यौदा तर्जुमाका लागि सैद्धान्तिक सहमति दिने निर्णय गरेको हाे ।
अनुगमन तथा मूल्यांकन विधेयक आएपछि सरकारले कानून कार्यान्वयनको अवस्थादेखि प्रदेशको विकास नीति र मुख्यमन्त्रीसँग मन्त्रीहरूको कार्यसम्पादन सम्झौताअनुसार कामको मूल्यांकन गर्न सहज हुने छ ।
बागमतीमा मुख्यमन्त्रीले मन्त्रीहरुसँग, मन्त्रीहरुले सचिवसँग र सचिवहरुले कार्यालय प्रमुखहरूसँग कार्यसम्पादन सम्झौता गरेका थिए । तर, कार्यसम्पादन सम्झौताअनुसार कामको मुल्यांकन भने सरकारले गर्न सकेको थिएन । कानून निर्माण भएपछि प्रदेश सरकारले स्थानीय तहमा दिने समपुरक र विशेष अनुदानको कार्यान्वयन र प्रभावकारिताको अनुगमन र मूल्यांकनसमेत हुने बताइएकाे छ ।
थाहानगर। राष्ट्रिय युवा संघ, नेपाल थाहा नगर कमिटी अध्यक्षमा सुमन रायमाझी चयन भएका छन् । बुधबार भएकाे थाहा नगर अधिवेशनले रायमाझीको नेतृत्वमा ३१ सदस्यीय कमिटी सर्वसम्मत निर्वाचित भएकाे हाे ।
निर्वाचन मण्डलका अध्यक्ष प्रतिमा श्रेष्ठका अनुसार युवा संघ थाहा नगर कमिटी उपाध्यक्षमा प्रविण घलान, सचिवमा धनबहादुर गोले, उपसचिवद्धयमा सुशान कार्की, यार्साङ बल र कोषाध्यक्षमा रोजन बस्नेत निर्विरोध भएका छन् ।
यसैगरी कमिटीको सदस्यहरुमा रेशिम प्रधान, विष्णु बहादुर गोले, संजिव श्रेष्ठ, विराज थापा, संग्राम कार्की, सुरेन्द्र बर्तौला, सुमन गोले, सुवास पाख्रिन, मिनबहादुर पाख्रिन, नवराज विडारी, पुष्कल थापा मगर, सुमन गर्तौला, विवश थिङ, देवेन्द्र घलान, दिपक थिङ, प्रशान्त बस्नेत, अनिल श्रेष्ठ, मनोज गमाल, अमिर गोपाली, सुमन गोले, शक्तिमान गोले, बुद्ध स्याङ्तान र सुकराम बल चयन भएका हुन् ।
यसैगरी साइवर सर्कल प्रमुखमा सुरज केसी र प्रचार विभाग प्रमुखमा विराजन बस्नेत चयन भए । नवनिर्वाचित कमिटीलाई नेपालका केन्द्रीय सदस्य एवम् मकवानपुर ईञ्चार्ज प्रतिमा श्रेष्ठले पद तथा गोपिनियताको शपथ गराएकी थिइन् । अधिवेशनमा प्रमुख अतिथि प्रतिमा श्रेष्ठ, अतिथिहरु बरिना बल, सुरेश रुम्बा, राजेश नगरकोटी, शशीधर सुवेदी, विमलकुमार ढकाल, सुरेन्द्रमान प्रधान, हेमकुमार थिङ, सुजनकुमार रायमाझी र देवेन्द्र थोकरले युवा संघको आवश्यकता औंल्याएका थिए ।
अधिवेशन आयोजक कमिटी संयोजक देवेन्द्र थोकरको अध्यक्षता र राष्ट्रिय युवा संघ, नेपालका केन्द्रीय सदस्य एवम् मकवानपुर ईञ्चार्ज प्रतिमा श्रेष्ठको प्रमुख आतिथ्यतामा भएकाे अधिवेशनमा युवा संघका केन्द्रीय सदस्य राजन थोकर, प्रदेश सदस्य तथा थाहा ईञ्चार्ज सुरेश रुम्बा, जिल्ला अध्यक्ष राजेश नगरकोटी, युवा संघ केन्द्रीय निर्वाचन आयोग सदस्य रुपेश श्रेष्ठ, केन्द्रीय लेखा आयोग सदस्य सुनिल खत्री, एमाले प्रदेश सदस्य बरिना बल, पूर्व प्रदेश सदस्यहरु श्यामभक्त श्रेष्ठ, बुद्धरत्न मानन्धर, जिल्ला सदस्यहरु शशीधर सुवेदी, विमल कुमार ढकाल, हरि गोपाली, सुनिता दोङ, तुलसा विष्ट, पार्टी नगर अध्यक्ष सुरेन्द्रमान प्रधान, उपाध्यक्ष हेमकुमार थिङ, सचिव सुजनकुमार रायमाझी, पूर्व जिल्ला सदस्य शिवराम थापा, नगर कमिटीका सदस्यहरु, जनवर्गीय संगठनका अध्यक्ष लगायतको आतिथ्यता थियो ।
युवा संघले गर्यो विरामीलाई सहयोग
नेकपा एमाले निकट राष्ट्रिय युवा संघ, नेपाल थाहा नगर कमिटीले अधिवेशनकै दिन विरामीलाई आर्थिक सहयोग गरेको छ ।नगर अधिवेशनको अवसरमा थाहा ७ का मृगौला रोग पीडित जुनु तमाङलाई १७ हजार ७ सय ७० रुपियाँ आर्थिक सहयोग गरेको नवनिर्वाचित अध्यक्ष सुमन रायमाझीले जानकारी दिए ।
अध्यक्ष रायमाझीले अधिवेशनमा संकलन भएकाे उक्त रकम पीडित तमाङका भिनाजू शरण मोक्तानलाई बुझाएका हुन् ।पीडित जुनु तमाङलाई थप सहयोग गर्न युवा संघले अपिल पनि गरेको छ ।
मकवानपुर । बागमती प्रदेशका युवा तथा खेलकुद मन्त्री मीनकृष्ण महर्जनले प्रदेशका सबै जिल्लामा रहेका खेलकुद पूर्वाधारहरुकाे सम्पत्ती खोजी गरिरहेकाे बताएका छन् । मकवानपुरको हेटौडा उपमहानगरपालिका वडा नम्बर १४ मा युनिक बक्सिङ क्लब भवनको शिलन्यास कार्यक्रममा मन्त्री महर्जनले यस्तो बताएका हुन् ।
मन्त्री महर्जनले बागमती प्रदेशका १३ जिल्लामा रहेका पूर्वाधारहरु र सम्पत्तीकाे आफूले अध्ययन गरिरहेको बताए । ‘हामीले सबै जिल्लाका पूर्वाधार सहितका सम्पत्तीको खोजी गरिरहेका छौं’ उनले भने ‘ति कस्तो अवस्थामा छन् जानकारी समेत लिने काम शुरु भएकाे छ ।’ उनले खेलाडीहरुका लागि छात्राबास र मार्सल आर्टकोे सुविधासम्पन्न भवन निर्माणको योजना बनाएको बताए ।
हेटौंडा ६ स्थित गौरीटार रंगशाला भित्र निर्माण भएका पुर्वाधारहरुको उचित उपयोग हुन नसकेको प्रति लक्षित गर्दै मन्त्री महर्जनले भने ‘यहाँका खेल पूर्वाधारहरु मनोमानी ढङले बनेका तथा चलेका भन्ने सुनेकाे छु । खेलाडी उत्पादन गर्ने मात्रै ठाउँ हो अरु गर्ने छुट छैन् । ‘विगतमा सामाजिक विकास मन्त्रालयभित्र खेलकुद राखिएकाे भए पनि युवा तथा खेलकुद मन्त्रालय छुट्टै भएकाे छ, अब खेल क्षेत्रकाे व्यवस्थित विकासका लागि काम गर्नु पर्छ’ उनले भने ।
उनले खेलकुद सँगै यूवा स्वरोजगार कार्यक्रमलाई समेत व्यवस्थित रुपमा अघि बढाउने बताए । जिल्लामा रहेका खेलकुदका भौतिक सम्पत्तीलाई खेलाडी र युवाको उपयोगमा ल्याउने गरी योजना अघि सारिएको उनले जनकारी दिए । उक्त भवनकाे आगामी तीन महिनाभित्रै निर्माण सकिने बागमती प्रदेश खेलकुद परिषद्का सदस्य सचिव दिपक लामाले बताए । ‘खेलकुद परिषद्को युनिक बक्सिङ क्लब भवनको शिलान्यास हुनु हाम्रा लागि खुःशी हो” उनले भने ।
हेटौंडा उपमहानगरपालिकाको २५ लाख रुपैंया लागतमा युनिक बक्सिङ क्लबको भवन निर्माण गर्न लागिएकाे हाे ।