मकवानपुर । नेकपा एमाले केन्द्रिय सदस्य तथा मकवानपुर इन्चार्ज रामेश्वर रानाले लोकतान्त्रिक गतिविधि बलियो बनाउंदै अघिबढ्नु पर्ने बताएका छन् । एमाले हेटौंडा उपमहानगर कमिटीको आयोजनामा शनिबार भएको नयाँ बर्ष २०८२ को शुभकामना आदानप्रदान तथा भित्तेपात्रो बिमोचन कार्यक्रमलाई सम्बोधन गर्दै उनले यस्तो बताएका हुन् ।
पार्टीको दिशानिर्देश भैरहेको अवस्थामा गलत बाटो समाउँदै, गलत प्रचार गर्दै संविधान विरुद्ध कदम उठाउने काममा नलाग्न उनले निर्देशित गरेका छन् । एकतामा बल हुने उल्लेख गर्दै उनले पार्टी एकतालाई बलियो बनाउनुपर्नेमा जोड दिए । उनले भने, “एकता भयो भने कसैले कमजोर बनाउन सक्दैन, सामुहिकतामा सोच्नुपर्छ, आफू केन्द्रित भएर हैन, आफैलाई मुल्यांकन गर्दै लोकतान्त्रिक गतिविधि बलियो बनाउंदै अघिबढ्नु पर्छ।”
उनले पार्टी कर्मचारीतन्त्रको आधारमा नचल्ने भन्दै सामुहिकतामा जोड दिए। साथै, पार्टीको जरा अभियानको समिक्षा पनि संगसंगै गर्दै अघि बढाउनु पर्ने उनले बताए। कार्यक्रममा पार्टीका नेताहरू डोरमणी पौडेल, केदार न्यौपाने, एकालाल श्रेष्ठ, जुनेली श्रेष्ठलगायतको उपस्थिति रहेको थियो। नगर अध्यक्ष बोल बहादुर कार्कीको अध्यक्षतामा भएको कार्यक्रममा जनवादी गितहरूको सांगीतिक प्रस्तुति समेत रहेको थियो।
मकवानपुर । नेपाली कांग्रेस बागमती प्रदेश सभापति एवं मकवानपुर २ ख का प्रदेशसभा सदस्य ईन्द्रबहादुर बानियाँले सामन्ती राजा प्रजातान्त्रिक हुन नसक्के बताएका छन् । मकवानपुरकाे मनहरी गाउँपालिकामा शनिबार भएकाे अन्तरसंवाद कार्यक्रममा उनले यस्तो बताएका हुन् ।
कांग्रेस मकवानपुर प्रतिनिधिसभा २ को ख का पार्टी प्रतिनिधि र जनप्रतिनिधिबीच अन्तरसंवाद कार्यक्रम नेता बानियाँले राप्रपाले बोकेर हिडेको सामन्ती सोचको राजा प्रजातान्त्रिक हुन नसक्ने र नेपाली जनताले नपत्याउने बताए । गणतन्त्रमा नागरिक भैसकेको राजालाई केही अराजक झुण्डले बोकेर मालिक बनाउन लागिपरेकाे उनले आरोप समेत लगाए ।
स्थानीय सरकारले अबको बजेटमा शिक्षा, स्वास्थ्य र विकास निर्माणमा विशेष ध्यान दिनुपर्ने उनले बताए । नेता बानियाँले जनताको आवश्यकता पूरा गर्न सके मात्रै पार्टी संगठन बलियो हुने भएकाले अब बन्न लागेको बजेटमा शिक्षा, स्वास्थ्य र विकास निर्माणमा जनप्रतिनिधिले विशेष ध्यान दिनुपर्ने बताए । गाउँगाउँमा रहेका आम कार्यकर्ता तथा जनतालाई कांग्रेसको धारणा बारे जानकारी दिदैं संगठन सुदृढिकरण र विस्तारमा लाग्न अगुवा कार्यकर्तालाई उनले निर्देशन दिए ।
‘सरकारमा पुगेर मात्र पार्टी बलियो बन्दैन् । जनताका आवश्यकता स्वास्थ्य, शिक्षा र रोजगारीमा जोड दिए पार्टीलाई नयाँ गतिमा लान सकिन्छ’ उनले भने ‘जनताको पीरमर्का बुझ्दै विकास निर्माणमा लाग्नु पर्छ ।’ कार्यक्रममा पार्टी र जनप्रतिनिधिबीचको सम्बन्ध, स्थानीय समस्या, विकास निर्माण र कांग्रेसको भावी रणनीति बारे पश्चिमी क्षेत्रमा रहेका पार्टीका वडा सभापति, पदाधिकारीहरु, अगुवा कार्यकर्ता र जनप्रतिनिधिबीच संवाद भएको थियोे ।
कार्यक्रममा जिल्ला सभापति बुद्ध लामा, बागमती प्रदेश सदस्य सन्त चेपाङ, संघीय सभापति एवं कैलाश गाउँपालिका अध्यक्ष लोक मोक्तान, महासमिति सदस्यहरु प्रभातकुमार दाहाल, राजेश भेटवाल, टेकनाथ शिवाकोटी, राक्सीराङ गाउँपालिका अध्यक्ष राजकुमार मल्ल, मनहरी राक्सिराङ र कैलाशका गाउँपालिका सभापतिहरु प्रकाश वर्तौला, बीरेन्द्र जिम्वा, र राजेन्द्र घिसिङ, मनहरी ७ का वडाअध्यक्ष ठाकुरराम तितुङ लगायतले कार्यकर्ताले गरेका प्रश्नको जवाफ दिएका थिए ।
कांग्रेस मकवानपुर प्रदेश २ ख का सभापति रञ्जन कालाखेतीको सभाध्यक्षता एवं कांग्रेस बागमती प्रदेश सभापति बानियाँको प्रमुख आतिथ्यतामा भएको कार्यक्रममा क्षेत्र–२(ख) अन्तरगत कांग्रेसका महासमिति सदस्य, महाधिवेशन प्रतिनिधि, पालिका अध्यक्ष, उपाध्यक्ष, जिल्ला सदस्य, संघीय पदाधिकारीहरु, पालिका सभापति, क्षेत्रीय कार्यसमिति सदस्यहरु, पालिका पदाधिकारी, नेपाली कांग्रेसबाट निर्वाचित तथा प्रत्यासी वडा अध्यक्ष, सदस्य र भ्रातृ संघसंस्थाका प्रतिनिधिहरुको उपस्थिति रहेको थियो ।
मकवानपुर । बागमती प्रदेशको ललितपुर जिल्लाको विकट गाउँपालिका कोन्ज्योसोममा १३ करोड ८१ लाख रुपैयाँमा अस्पताल निर्माण गरिएको छ ।
अस्पतालको बागमती प्रदेश स्वास्थ्य मन्त्री किरण थापाले उद्घाटन गरेका छन् । गाउँपालिकामा निर्माण भएको शंखु अस्पतालको भवन उद्घाटन गर्दै स्वास्थ्य मन्त्री थापाले जनताको स्वास्थ अधिकारलाई सम्बोधन गर्न सरकार सधै तत्पर रहेको बताए ।
प्रदेशका अधिकांश पालिकाहरूमा आधारभूत अस्पताल स्थापना भइसकेको जानकारी दिंदै, अब त्यहाँ आवश्यक मेडिकल सामग्री तथा जनशक्ति व्यवस्थापनमा ध्यान दिनुपर्ने मन्त्री श्रेष्ठले बताए । भवन मात्र भएर नहुँने बताउँदै मन्त्री श्रेष्ठले चिकित्सकलगायतका अन्य कर्मचारी, उपकरण र सेवा प्रदान गर्ने प्रणाली पनि सँगै हुनुपर्ने बताए ।
कोभिड १९ महामारीको समयमा तत्कालीन प्रधानमन्त्री केपी शर्मा ओलीको नेतृत्वमा सुरु भएको यो अस्पताल स्थापनाको अभियानलाई निरन्तरता दिँदै मन्त्री थापाले सबै तह संघ, प्रदेश र स्थानीय एकै साथ लाग्नुपर्ने आवश्यकता औंल्याए । “पालिकाहरूबाट चिकित्सक, स्टाफ नर्सलगायत आवश्यक स्वास्थ्यकर्मी र उपकरणको माग भइरहेकै छ। यसलाई सम्बोधन गर्न प्रदेश सरकारले ११९ तहका अस्पताललाई सहयोग गर्ने गरी योजना बनाएको छ ” मन्त्री थापाले भने ।
सबै सुविधा तुरुन्त उपलब्ध हुन नसक्ने भए पनि टेलिमेडिसिन सेवाको माध्यमबाट दुर्गम क्षेत्रमा समेत स्वास्थ्य सेवा विस्तार गर्ने योजनामा सरकार अग्रसर रहेको उनले जानकारी दिए। स्थानीय तहबाट सुरु भएको यो प्रयासलाई सुदृढ पार्न प्रदेश सरकारको थप सहकार्य आवश्यक रहेको स्थानयहरुले बताएका थिए। मन्त्री थापाले निकट भविष्यमा स्वास्थ्य सेवा गुणस्तरीय र पहुँचयोग्य बनाउन थप कार्यक्रमहरू ल्याइने प्रतिवद्धता व्यक्त गरे ।
अस्पताल बनाउन स्थानीय विष्णुमाया बोम्जनले ३ रोपनी जग्गा दान गरेकी थिइन् । थप १ रोपनी सरकारी जग्गा र २ रोपनी जग्गा विष्णुमायाको नातिहरु मरिचमान र किशोर बोम्जनसँग १६ लाखमा खरिद गरिएकोसहित ६ रोपनीमा अस्पताल निर्माण गरीएको थियो । २०७८ भदौ २३ गते निर्माण कम्पनीसङ्ग १३ करोड ८१ लाख रुपैयाँ निर्माण सम्झौता गरी काम शुरु भएको थियो ।
मकवानपुर । नेपाल आदिवासी जनजाति आयोगले बागमती प्रदेश प्रमुख दीपकप्रसाद देवकोटालाई वार्षिक प्रतिवेदन बुझाएको छ ।
४ वर्षमा सरकारले आदिवासी जनजातिको सवालमा गरेको काम समेटिएको प्रतिवेदन आयोगका सदस्य सूर्यबहादुर गुरुङले प्रदेश प्रमुख देवकोटालाई बुझाउनु भएको हो । गुरुङले प्रदेश प्रमुख समक्ष संविधानको धारा २९४ को उपधारा (३) बमोजिम आदिवासी जनजाति आयोगको आर्थिक वर्ष २०८०।०८१ को पाँचौ वार्षिक प्रतिवेदन पेश गर्नु भएको हो ।
वार्षिक प्रतिवेदन बुझ्नुहुँदै प्रमुख देवकोटाले प्रतिवेदन अध्ययन गरेर बागमती प्रदेश सरकार मुख्यमन्त्री र प्रमुख सचिवलाई हस्तान्तरण गरिने प्रतिबद्धता जनाउनु भयो । आयोगका सदस्य गुरुङले आयोगको औचित्य र महत्वलाई बुझ्न आवश्यक रहेको बताउनु भयो। आयोगको सिफारिस तीनै तहका सरकारले कार्यान्वयन नगरिएको विषय पनि प्रतिवेदनको तालिकामा समेटिएको उहाँले बताउनुभयो । आयोगले आफ्नो वार्षिक प्रतिवेदन मार्फत् सरकारलाई गरेको सिफारिस कार्यान्वयनको अवस्था प्रभावकारी नभएको गुरुङले जानकारी दिनुभयो ।
नेपालमा जनजातिको संख्या ६० रहेकोमा बागमती प्रदेशमा मात्र ४७ आदिवासी जनजाति रहेका छन् । यस्तै ७८ प्रतिशत जनजाति साक्षर रहेका छन् । कार्यक्रममा आदिवासी जनजाति आयोगकी सदस्य रिना रानाको पनि उपस्थिति रहेको थियो ।
मकवानपुर । बागमती प्रदेशसभामा प्रतिनिधित्व गर्ने विपक्षी दलहरुले प्रदेश सरकारले चालु हिउँदे अधिवेशन अन्त्य गर्ने निर्णय सरकारको निरंकुशता भएकाे आरोप लगाएका छन्।
बुधवार पत्रकार भेटघाट गर्दै नेकपा माओवादी केन्द्र, राप्रपा र नेकपा एकीकृत समाजवादीले आफ्नो कमीकमजोरी र असफलता ढाकछोप गर्न सरकारले संसद छल्न अधिवेशन अन्त्य गरेकाे आरोप लगाएका हुन्। नेकपा एकीकृत समाजवादी प्रदेश संसदीय दलका नेता कृष्ण शर्मा खनालले बागमती प्रदेश सरकारले गरेकाे संसद अधिवेशन अन्त्य गर्ने हर्कतले सरकार पूर्णतः असफल सावित भएको बताए ।
आफ्नो कमीकमजोरी र असफलतालाई ढाकछोप गर्न संसद छल्ने कार्यले चाँडै हुने वर्षे अधिवेशनलाई समेत प्रभावित पार्नेछ’ उनले बताए ।‘बजेट अधिवेशनसमेत अनिश्चित दिशामा धकेलिने सम्भावना बढेको छ। दलहरुबीचको सहमति र सहकार्यबाट भाग्ने सरकारले नीति, कार्यक्रम र बजेटसमेत ल्याउने नैतिकता गुमाएकोले यस प्रकारको गैरजिम्मेवार हर्कत छोडेर वार्ता र सहमतिमार्फत अगाडि बढ्न हामी जोडदार माग गर्दछौं’ उनले भने ।
नेकपा माओवादी केन्द्र संसदीय दलका प्रमुख सचेतक रत्नप्रसाद ढकालले प्रदेशसभामा प्रतिनिधित्व गर्ने सबै दलहरुको साझा एजेन्डालाई गम्भिरतापूर्वक कार्यान्वयन गर्नुको सट्टा आलटाल गर्ने र अलमल्याउने नीति सरकारको देखिएको आरोप थियो।
उनले विगतका सहमति कार्यन्वयन गरी प्रदेशसभा संचालन गर्ने वातावरण बनाउन मंगलवार दिनभर वार्ता र संवादपश्चात बुधवार १ बजे बस्नेगरी सहमति हुँदाहुँदै बुधवार बिहान अधिवेशन अन्त्य गर्ने निर्णयले सरकार संसद छलेर गैरजिम्मेवार ढङ्गबाट प्रस्तुत भएको आरोप लगाए। दलहरूबीच छलफल चलिरहँदा अधिवेशन अन्त्य गर्ने निर्णयले सरकारको अपरिपक्वता मात्र देखिएन ठूला दलहरु मिलेर बनेको सरकारको दम्भ, घमण्ड र निरंकुश शैलीसमेत उदाङ्गिएको छ’ उनले भने ।
मंगलबार प्रदेशसभा संचालनकाे लागि भएकाे सर्वदलीय बैठकमा सरकार निकै गैरजिम्मेवार ढङ्गबाट प्रस्तुत भएकाे राप्रपा संसदीय दलका उपनेता गिरबहादुर तामाङले बताए । उक्त छलफलमा विपक्षी दलहरु लचिलो भइ वार्ता र छलफल भइरहँदा बुधवार विहानकाे मन्त्रिपरिषद् बैठकले चालू अधिवेशन अन्त्य गर्ने हठात् निर्णय गर्नुले कार्यपालिका र व्यवस्थापिकाबीचको दूरी बढाउने दिशामा सरकार उन्मुख देखिएको उनले आरोप लगाए । सरकारले यसैगरी पेलेर गइरहे वर्षे अधिवेशन समेत प्रभावित हुने विपक्षी दलहरुले चेतावनी दिएका छन्।
मंगलवार विहानदेखि बसेको प्रदेशसभाका ७ दलको बैठकसमेत निष्कर्षविहीन बनेको थियो। प्रदेशसभाका सभामुख भुवनकुमार पाठकले आह्वान गरेको बैठकमा सत्तापक्ष र प्रतिपक्षबीचको विगतको बजेटमाथिको सहमति र पछिल्लो समय भएको सहकारीमन्त्री मदुकुमार श्रेष्ठको स्वकीय सचिवको आत्महत्या प्रकरणमा छानबिन समिति गठनका विषयमा सहमति जुट्न नसक्दा बैठकमा सहमति हुन सकेको थिएन।
बुधवार बसेको मन्त्रिपरिषद्को बैठकले मध्यराती १२ बजेबाट प्रदेश सभाकाे हिउँदे अधिवेशन अन्त्य गर्ने निर्णय गर्दै प्रदेश प्रमुख समक्ष सिफारिस गरेकाे थियाे । प्रदेश प्रमुख दिपक प्रसाद देवकाेटाले बुधबारनै प्रदेशसभाको बैठक अन्त्य गरिएकाे लिखित जानकारी सभामुख भुवनकुमार पाठकलाई गराएका छन् ।
प्रदेश सभा सचिवालयले सभामुखकाे आदेशले अर्को सूचना जारी नहुन्जेलसम्मका लागि प्रदेश सभाकाे बैठक स्थगित गरिएको जानकारी गराएकाे छ ।
हिउँदे अधिवेशनमा के के भए ?
बागमती प्रदेशसभाको हिउँदे अधिवेशन १८ माघबाट सुरु भएकाे थियाे । प्रदेशसभाको हिउँदे अधिवेशन अन्तर्गत २३ माघमा २ वटा, २३ माघमा १ वटा र २६ माघमा २ वटा बैठकहरु संचालन भएकाे छ । सो पश्चात अनिश्चितकालका लागि स्थगित भएको बैठक २ महिनापछि मंगलबारकाे लागि बोलाइएकाेमा सभा चल्दै नचली स्थगित गरियो ।
२६ माघकाे प्रदेशसभा बैठकले प्रदेश खेलकुद विकास ऐन २०७५ लाई संशोधन गर्न बनेको विधेयक पारित गरेको थियो । यसैगरी अन्य ४ विधेयकलाई संसदीय समितिमा छलफलका लागि पठाएको थियो । प्रदेश सभा सचिवालयका अनुसार बैठकले विषयगत समितिमा रहेको मदन भण्डारी स्वास्थ्य विज्ञान प्रतिष्ठान २०७६ लाई संशोधन गर्न बनेको विधेयक, कृषि विकास सम्बन्धमा व्यवस्था गर्न बनेको विधेयक, प्रदेश औद्योगिक व्यवसाय ऐन, २०७६ लाई संशोधन गर्न बनेको विधेयक, प्रादेशिक व्यापार तथा व्यवसायी सम्बन्धी ऐन २०७६ लाई संशोधन गर्न बनेको विधेयकको प्रतिवेदन सभामा पेश गरिएकाे थियाे ।
यस्तै प्रदेश प्रमुखबाट फिर्ता आएको प्रदेश कृषि विकास विधेयक सम्बन्धमा व्यवस्था गर्न बनेको विधेयक पनि २६ माघकाे बैठकमा संशोधन सहित पेश गरिएकाे थियाे ।
मंगलबारकाे बैठकमा गत माघ मै संसदमा पेश भएका संसोधन विधेयकहरु पेश गरिने कार्यसुची रहेकाे थियाे । प्रदेशसभाका सभामुख पाठक दलहरु बीच विगतको बजेट माथिको सहमतिका विषयहरु समेट्ने सहमति बनेको र सोही अनुसार बैठक आह्वान गरिएको बताउँछन् ।
उक्त विधेयकका प्रतिवेदनहरुलाई छलफल गरेर पारित गर्नुपर्ने भएकाले केही दिन प्रदेशसभा चलाउने गरी विषेश समयको कार्यसूचि राखेर बैठक संचालन गरिने गरी बैठक आव्हान गरिएकाे पाठक बताउँछन् । सरकारपक्ष र प्रतिपक्षिय दल सहमतीमा नपुगेकाेले महत्वपूर्ण निर्णय गर्नु पर्ने प्रदेश सभा अनिश्चित भएकाे छ ।
११० सदस्यीय बागमती प्रदेशसभाका ७ दलको प्रतिनधित्व रहेको छ । जसमा कांग्रेस ३७, एमाले २७ (उपसभामुखसहित), राप्रपा १३ (सभामुखसहित), एकीकृत समाजवादी ७, नेमकिपा ३ र हाम्रो नेपाली पार्टी २ जना सदस्य छन् ।