मकवानपुर / गत भदौ ३१ गरेको निर्णय अनुसार बागमती प्रदेश सरकारले गौतम बुद्ध अन्तर्राष्ट्रिय क्रिकेट रंगशाला निर्माणका लागि रकम हस्तान्तरण गरेको छ । प्रदेश सरकारले बुधबार धुर्मुस सुन्तली फाउन्डेसनलाई तीन करोड रुपियाँ रकम हस्तान्तरण गरेको हो ।
मुख्यमन्त्री तथा मन्त्रिपरिषद्को कार्यालय हेटौंडामा एक कार्यक्रमको आयोजना गर्दै मुख्यमन्त्री डोरमणि पौडेलले फाउन्डेसनका अध्यक्ष सिताराम कट्टेल र उपाध्यक्ष कुन्जना घिमिरेलाई ३ करोड रकमको चेक हस्तान्तरण गरेका हुन् । कार्यक्रममा बोल्दै मुख्यमन्त्री पौडेलले धुर्मुस सुन्तलीले उत्साहका साथ गरेको कामको प्रसंसा गरे । उनले रंगशाला निर्माण तिव्र गतिमा भएको भन्दै खुसि समेत व्यक्त गरेका थिए ।
‘रंगशाला निर्माण परियोजना छिटो सक्नुहोस’ उनले भने ‘सरकारले आगामी दिनमा पनि सहयोग जारी राख्ने छ ।’ रंगशाला निर्माणमा चुनौती धेरै रहेकोले जसरी पनि सफल बनाउनुपर्ने बताउदै यो गौरवको आयोजना भएको पौडेलले बताए । ‘आगामी वर्षलाई पनि सरकार छ भन्ने सम्झनु ।’ उनले भने । यस्तै कार्यक्रममा सामाजिक विकास मन्त्री युबराज दुलाल आगामी दिनमा पनि सरकारका तर्फबाट सहयोग हुने बताए । परिकल्पना अनुसार सफलताको लागि शुभकामना दिदै फाउण्डेसनलाई चुनौती पन्छाएर अगाडि बढ्न दुलालले सुझाव दिए ।
यसैगरी फाउण्डेसनका अध्यक्ष सिताराम कट्टेलले सहयोग रकम बुझ्दै खुसिको दिन भएको प्रतिक्रिया दिए । सरकारले सहयोग गर्छ भन्ने अपेक्षा रहेको भन्दै जग्गा दिएर सुरु गरेको र हाल रकम सहयोग गरेकोमा धन्यवाद दिए । रंगशाला निर्माणमा हाल २ सय ३३ जनशक्तिले काम गरीरहेको उनले जानकारी दिए ।
’सहयोगी मनहरुले सहयोग गरी रहेको भएपनि लकडाउनले परिस्थिति जटील बनाएको छ’ उनले भने–‘अवस्था समस्याजनक छ तर पनि काम गर्दै छौ, ७ करोड तिर्न बाँकी छ । तर, पनि हामीले हिम्मत हारेका छैनौं ।’ कार्यक्रममा प्रदेशका प्रमुख सचिव डा. मानबहादुर बिक, मुख्यमन्त्रीका प्रमुख राजनीतिक सल्लाहकार जे एन थपलिया, जिल्ला समन्वय समिति मकवानपुरका प्रमुख रघुनाथ खुलाल, सामाजिक विकास मन्त्रालयका सचिव दीपक काफ्ले लगायत सहभागी थिए ।
बागमती प्रदेश सरकारले चितवनमा बन्दै गरेको गौतम बुद्ध अन्तर्राष्ट्रिय क्रीकेट मैदान निर्माणका लागि धुर्मुश सुन्तली फाउण्डेसनलाई ३ करोड दिने निर्णय गत भदौ ३१ गते नै गरेको थियो । प्रदेश सरकारको सशर्त अनुदानका रुपमा आर्थिक वर्ष २०७७र०७८ का लागि अनुदान रकम दिन लागको हो ।
कोभिड १९ को संक्रमणका अवस्थामा पनि निरन्तर निर्माणगरीरहेको भन्दै काम सुचारु गर्न सहज होस भनेर सहयोग गर्न लागिएको सरकारका प्रवक्ता आर्थिक मामिला तथा योजनामन्त्री कैलाश ढुङ्गेलले जानकारी दिए ।
मकवानपुर । नेपाली कांग्रेसको केन्द्रीय कार्यालय आजबाट पाँच दिनका लागि बन्द भएको छ । चार केन्द्रीय सदस्यसहित केही कर्मचारीहरुमा कोरोना भाइरसको संक्रमण देखिएपछि आइतबारदेखि असाेज २२ केन्द्रीय कार्यालय पाँच दिनका लागि बन्द भएको हो ।
असोज १५ गते केन्द्रीय कार्यालयमा पीसीआर परीक्षण गरिएको थियो । परीक्षणमा केही केन्द्रीय सदस्यसहित कर्मचारीमा कोभिड–१९ पोजेटिभ देखिएका हो । आज आइतबार देखि आउँदाे असोज २२ गतेसम्मका लागि केन्द्रीय कार्यालय बन्द गरिएको मुख्यसचिव कृष्णप्रसाद पौडेलद्वारा हस्ताक्षरित सूचनामा जनाइएकाे छ ।

यद्यपि कांग्रेसले सोमबार बोलाएको केन्द्रीय कार्यसमिति बैठकबारे भने कुनै निर्णय गरिसकेको नसकेकोले अपराह्नसम्म बैठकबारे टुंगो लाग्न सक्ने बताइएकाे छ ।
मकवानपुर । सत्तारूढ नेपाल कम्युनिष्ट पार्टी (नेकपा) को सचिवालय आज बस्दैछ। अपराह्न ४ बजे प्रधानमन्त्री निवास बालुवाटारमा डाकिएको बैठकमा मन्त्री हेरफेर तथा पछिल्लो मन्त्रिपरिषदले गरेको केही नियुक्तिका विषयमा छलफल हुनेछ।
पार्टीभित्र छलफल गरेर मात्रै महत्वपूर्ण राजनीतिक नियुक्ति गर्ने भनिए पनि प्रधानमन्त्री ओली र कार्यकारी अध्यक्ष पुष्कमल दाहाल ‘प्रचण्ड’बीच मन्त्रिपरिषद्को पछिल्लो नियुक्तिअघि पटक-पटक छलफल भए पनि त्यसबारे समझदारी थियो वा थिएन भन्ने बाहिरिएको छैन। प्रचण्डले अहिलेसम्म आफ्नो धारणा सार्वजनिक नगरे पनि उनी निकट नेताहरूले असन्तुष्टि जनाइसकेको विषय बाहिरिएका छन्।
बिहीबारको मन्त्रिपरिषद बैठकले पूर्वअर्थमन्त्री डा.युवराज खतिवडालाई अमेरिकाको राजदूत, मुख्यसचिवमा शंकरदास बैरागी र निवर्तमान मुख्यसचिव लोकदर्शन रेग्मीलाई बेलायतको राजदूत बनाउने निर्णय गरेको थियो।
भदौ २६ गते बसेको स्थायी कमिटीको बैठकले सरकारले महत्वपूर्ण निर्णय गर्नुपूर्व सचिवालयका सदस्यको सुझाव, अध्यक्षद्वयको आपसी परामर्श र सहमतिको आधारमा गर्नुपर्ने निर्णय गरेको थियो। स्थायी कमिटिकाे निर्णय विपरित निर्णय भएपछि नेकपाभित्र गत भदौ अन्तिम साताबाट मत्थर भएको विवाद फेरि बल्झिन सक्ने अनुमान गर्न थालिएकाे छ।
यस्तै आजको सचिवालय बैठकमा मन्त्रिमण्डल हेरफेरबारे नेकपाअध्यक्षद्वयबीच अहिलेसम्म भएको छलफल र समझदारीबारे पनि छलफल हुने बताइएकाे छ।
करिब २८ वर्षअघि भारतको उत्तर प्रदेशमा रहेको बाबरी मस्जिद भत्काउन भूमिका खेलेको आरोपमा ४८ जनामाथि मुद्दा चलाइएकोमा उक्त मुद्दाकाे आज टुंगाे लागेकाे छ । २८ वर्षसम्म टुंगो नलागेको मुद्दाको फैसला आज गरिएको छ। भारतको सर्वोच्च अदालतले आज आडवाणीसहित ३२ जना आरोपीहरुलाई सफाइ दिएको छ।
हिन्दुवादी संगठनले तोडफोड गरी मन्दिर भत्काएको आरोपमा भाजपाका नेताहरुमाथि मुद्दा चलाइयो थियाे। हिन्दुवादी युवाहहरुले मस्जिदको माथिल्लो ढाँचामा टेकेरै मस्जिद भत्काएकाे आराेप लागेकाे थियाे। मस्जिद बनेको स्थानमा राम मन्दिर रहेको दाबी हिन्दुवादी संगठनले गर्दै आएकाे छ ।
भारतीय जनता पार्टी र राष्ट्रिय स्वयमसेवक संघले उक्त स्थानमा मन्दिर रहेको दाबीसहित आन्दोलन गरेको थियो। मन्दिर बनाउन पर्ने मागसहित गरिएको आन्दोलनको नेतृत्व गरेका लालकृष्ण आडवाणी, मुरली मनोहर जोशी लगायतविरुद्ध मुद्दा चलाइयाे । गत नोभेम्बरमा सर्वोच्च अदालतले बाबरी मस्जिद रहेको स्थानमा राम मन्दिर नै रहेको फैसला सुनाएको थियो। त्यसपछि त्यहाँ गुरु योजना बनाएरै मन्दिर बनाउने काम सुरु भइसकेको छ। बाबरी मस्जिद विवादमा फैसला सुनाउने न्यायाधीश एसके यादवले आज नै अवकाश पाउँदै थिए। २ हजार पन्नाको फैसलामा उनले सबै आरोपीलाई निर्दोष घोषणा गरेका हुन्।
उनले आफ्नो फैसलामा मुद्दा चलाइएका कोहीविरुद्ध सीबीआइले प्रमाणहरु फेला नपरेको उल्लेख गरेका छन्। बाबरी मस्जिदमा भएको घटना अचानक भएको घटना भएको भन्दै अदालतले विवादित मस्जिद अज्ञात व्यक्तिहरुले भत्काएको उल्लेख गरिएको छ। अदालतले पत्रपत्रिकामा लेखिएको विषयलाई प्रमाण मान्न अस्वीकारसमेत गरेको छ।
अदालतले प्रमाणको रुपमा प्रस्तुत गरिएको अडियो टेप, भिडियो विश्वास गर्न लायक नभएको उल्लेख गरिएको छ। अदालतमा प्रस्तुत गरिएका अधिकांश तस्विरहरुको नेगेटिभ प्रस्तुत नगरिएकोले त्यसलाई पनि प्रमाण मान्न नसक्ने अदालतले फैसला गरेको छ। एजेन्सी
मकवानपुर । निजामती कर्मचारीहरूको आधिकारिक ट्रेड युनियनको निर्वाचनका लागि नियुक्त सबै विभागीय र जिल्लाका निर्वाचन अधिकृतहरूलाई २०७७ मङ्सिर २७ गते हुने अर्को निर्वाचनसम्म निरन्तरता दिइने भएकाे छ । प्रमुख निर्वाचन अधिकृतको कार्यालयबाट ट्रेड युनियनको निर्वाचनका लागि विभागीय र जिल्लाका निर्वाचन अधिकृतहरूलाई निरन्तरता दिने निर्णय भएकाे हाे ।
प्रमुख निर्वाचन अधिकृतको कार्यालयले आइतबार गरेको निर्णयअनुसार निर्वाचन अधिकृतहरूलाई २०७७ मङ्सिर २७ गते हुने अर्को निर्वाचनसम्म निरन्तरता दिने निर्णय गरेको हो । नियुक्त निर्वाचन अधिकृतहरूले आफ्नो सरुवा, काज सरुवा वा अन्य कारणले जिम्मेवारी हेरफेर भएमा प्रमुख निर्वाचन अधिकृतको कार्यालयमा जानकारी गराउन र प्रमुख निर्वाचन अधिकृतले नियुक्त गरेका अन्य कर्मचारीहरूलाई आजैका मितिदेखि लागू हुने गरी फिर्ता गर्न समेत भनेको छ ।
त्यस्तै निर्वाचन कार्यालयको बोर्ड, स्टाम्प, कोठा, मतदाता नामावलीलगायतका निर्वाचन सम्बन्धी स्रेस्ता एवं सामाग्री आगामी निर्वाचनको लागि पुनः प्रयोगमा ल्याउने गरी सुरक्षित राख्नसमेत भनेको छ ।
निजामती कर्मचारीहरूको आधिकारिक ट्रेड युनियनको निर्वाचन असोज २४ गते हुने गरी तयारी गरिएकाे भए पनि निर्वाचन अनिश्चितकालका लागि स्थगित गर्दै ‘अर्को निर्वाचन नहुन्जेलसम्म आधिकारिक ट्रेड युनियनको समय २०७८ वैशाख मसान्तसम्म थप्ने’ असाेज ६ गतेकाे मन्त्रिपरिषद् बैठकले निर्णय गरेकाे थियाे । तर सरकारले साे निर्णय सच्याउँदै मङ्सिर २७ गते निजामती कर्मचारीहरूको आधिकारिक ट्रेड युनियनको निर्वाचन तोकेकाे छ।